ငယ်စဉ်ကာလ လူ့ဘ၀တွင် အသိပညာအတတ်ပညာများကို သင်ယူရာတွင်လည်းကောင်း နောက်လိုက် ငယ်သားများ ဘ၀တွင်လည်းကောင်း ဆရာကောင်းနှင့် ခေါင်းဆောင်ကောင်းများနှင့်တွေ့ဆုံရန် အလွန်အရေး ပါလှပါသည်။ ဆရာကောင်းဟုဆိုရာဝယ် မိမိ၏တပည့်သားများနှင့် နောက်လိုက်ငယ်သား များတို့ကို ကျောသား ရင်သား မခွဲခြားပဲ တော်သော၊ လိမ္မာသော၊ အလိုက်သိတတ်သော နောက်လိုက်တပည့်များကို ချီးမြှောက် ပေးပြီး၊ ဆိုးသော၊ ပေပေတေတေလုပ်တတ်သော နောက်လိုက်တပည့်များကို လူလိမ္မာ ဖြစ်လာအောင် အပြစ်ပြ ဆိုဆုံးမတတ်သော ဆရာများကို ဆရာကောင်း ခေါင်းဆောင်ကောင်းဟုဆိုနိုင်သည်။ လူတိုင်းသည် ဆရာ ကောင်း ဖြစ်ခွင့်ရှိသည်။ သို့ရာတွင် ဆရာကောင်းတစ်ယောက် ဖြစ်လာရန်အတွက် တပည့်ကောင်းတစ်ယောက် နောက်လိုက်ကောင်း တစ်ယောက်ဖြစ်အောင် ရှေးဦးစွာ ကြိုးစားရမည်ဖြစ်သည်။ ဆရာကောင်းတစ်ယောက် ထံတွင် နည်းလမ်းကောင်းများကို သင်ယူမှတ်သား တပည့်ခံသောသူများသည် လူတစ်ရာကို အုပ်ချုပ်နိုင် ရမည်ဟု မှတ်သားဖူးသည်။ ဆရာဟူသည် ခေါင်းဆောင်ပင်ဖြစ်သည်။ ဆရာကောင်း၊ ခေါင်းဆောင်ကောင်းတို့ မည်သည် မြန်မာတွင်ဖြစ်စေ ကမ္ဘာတွင်ဖြစ်စေ မိမိ၏နောက်လိုက် လက်အောက်ငယ်သားများကို အနာဂါတ် ခေါင်းဆောင်ကောင်းငယ်လေးများ ဖြစ်လာနိုင်အောင် စိတ်ပိုင်းဆိုင်ရာ အသိပညာရပ်များနှင့် ရုပ်ပိုင်းဆိုင်ရာ အသိပညာရပ်များကို ဆရာစားချန်မထားပဲ ကုန်စင်အောင်သင်ကြား လမ်းညွန်ပေးရမည်ဖြစ်သည်။ “ငယ်ကြီး ဆက်ခါ ရင့်ကျက်ရာတွင် အလှည့်အပြောင်း စင်စစ်ဟောင်း မဟောင်းသည်မှာ မြတ်ပညာရှင့်” ဆိုသည့်အတိုင်း ဆရာကောင်း ခေါင်းဆောင်ကောင်း များတို့သည် မိမိ၏တပည့်သား နောက်လိုက်ငယ်များကို မကောင်းသော အမှုအကျင့်များ မဖြစ်ရလေအောင် ကြိုတင်သွန်သင်ဆုံးမပေးခြင်း၊ အမှားများကို ကျူးလွန်မိသည့်အခါ အမြင်မှန်များ၊ အကျင့်ကောင်းများကို ပြန်လည်ရရှိအောင် အပြစ်ညွန်ပြ သွန်သင်ဆုံးမခြင်းဖြင့် ပြုပြင်ပေး ရမည်ဖြစ်သည်။ ဆရာကောင်း ခေါင်းဆောင်ကောင်းများတို့သည် နောက်လိုက်ငယ်သား များအားဝိဇာပညာနှင့် သိပ္ပံပညာများ၊ သက်မွေးဝမ်းကြောင်းပညာ၊ အုပ်ချုပ်ရေးပညာရပ်များကို ခေတ်စနစ်နှင့် လျော်ညီအောင် တစ်လုံးတစ်ပါမျှ ချန်မထားပဲ သင်ကြားပြသ ပေးရမည်ဖြစ်သည်။ ဆရာကောင်း ခေါင်းဆောင်ကောင်း များတို့သည် နောက်လိုက်ငယ်သား တပည့်များ အပေါ်တွင် ကျရောက်လာမည့် ဘေးရန်အန္တရာယ် အသွယ်သွယ်တို့ကို ဒိုင်ခံဖြေရှင်း ပေးရမည်ဖြစ်သည်။ ဆရာကောင်း ခေါင်းဆောင်ကောင်းများတို့သည် မိမိတို့၏ နောက်လိုက်ငယ်သားများအား သင့်လျော်လျောက် ပတ်သည့်နေရာ ရာထူးဌာနနေရာများကို ချီးမြှောက်ပေးစားရမည်။ သူနှင့်ထိုက်တန်သော တာဝန်ဝတ္တရာများကို အပ်နှင်းပေးရမည်ဖြစ်သည်။ ခေါင်းဆောင်ကောင်းများသည် ဒီနေ့ငါဘာလုပ်ပေးရမလဲ ဆိုတာကို အမြဲတမ်း တွေးပြီး အလုပ်လုပ်သည်။ ခေါင်းရှောင်များသည် ဒီနေ့ငါဘာရမလဲဆိုတာကို တွေးပြီးအလုပ် လုပ်သည်။
အရည်အချင်းမပြည့်မီသော စူးစမ်းဆင်ခြင်ဥာဏ်မရှိသော နောက်လိုက်တပည့်များကို နေရာ၊ရာထူးပေးမိပါက ဆရာရောတပည့်ပါ ပျက်စီးစေနိုင်ရုံသာမက ပတ်ဝန်းကျင်အားလုံး ဆင်းရဲတွင်းသို့ ကျရောက်စေနိုင်ပါသည်။ မည်သည့်အဖွဲ့အစည်းမဆို အောင်မြင်အောင် ရေရှည်တည်တံ့အောင် လုပ်ဆောင်ရာတွင် လူမှန်နေရာမှန် ဖြစ်ရန်အတွက်အထက်ပါ ဆရာကောင်းခေါင်းဆောင်ကောင်းများ၏ ဂုဏ်အင်္ဂါရပ်များနှင့်အညီ ဆီလျော်အောင် ကျင့်သုံးမည်ဆိုပါက မိမိတို့အဖွဲ့အစည်း၊ မိမိတို့ဒေသ၊ မိမိတို့တိုင်းပြည် ဆထက်သပိုး တိုးတက်အောင်မြင်ရမည်ဟု တင်ပြရင်း နိဂုံးချုပ်လိုက်ရပါသည်။
ခွန်အောင်ထွိုက်ဗွေ
Like On Facebook
Follow On Twitter
Subscribe On RSS