၂၀၁၆၊ နိုဝင်ဘာ (၃)ရက်၊ ကြာသပတေးနေ့၊ မနက်( ၁၀)နာရီအချိန်တွင် ရှမ်းပြည်နယ်၊ မဲဆန္ဒနယ်အမှတ်(၉)၊ အမျိုးသားလွှတ်တော်ကိုယ်စားလှယ် ဖြားခွန်သိန်းဖေ၊ မောက်မယ်မြို့နယ်၊ ပြည်သူ့လွှတ်တော်ကိုယ်စားလှယ် ဦးစိုင်းငေါင်းဆိုင်ဟိန်း၊ မောက်မယ်မြို့နယ်၊ မဲဆန္ဒနယ်အမှတ်(၂) ပြည်နယ်လွှတ်တော်ကိုယ်စားလှယ် ခွန်ဟန်သိန်းဦး၊ (PNO) အသွင်ပြောင်းဌာနေပြည်သူ့စစ် ကွပ်ကဲရေးမှူး ဗိုလ်မှူးကြီး ဖြားခွန်မြင့်အောင်နှင့် ပအိုဝ်းအမျိုးသားအဖွဲ့ချုပ်(PNO)၊ ဗဟိုဌာနချုပ်ရုံး တာဝန်ရှိပုဂ္ဂိုလ်များမှ အထူးဒေသ(၆)၊ မောက်မယ်မြို့နယ်၊ ဟိုနမ်းဒေသရှိ ဥယာစန်းဘုန်းတော်ကြီးကျောင်းတွင် ဒေသခံပြည်သူများနှင့် တွေ့ဆုံခဲ့ပြီး နိုဝင်ဘာ(၄)ရက်၊ သောကြာနေ့၊ ကဒူးကြီးဒေသရှိ ဗန်းမက်ဘုန်းတော်ကြီးကျောင်းတွင် ကဒူးကြီးဒေသရှိ ဒေသခံပြည်သူများ နှင့်လည်း တွေ့ဆုံခဲ့ပါသည်။
ထိုသို့တွေ့ဆုံရာတွင် ရှမ်းပြည်နယ်၊ မဲဆန္ဒနယ်အမှတ်(၉)၊ အမျိုးသားလွှတ်တော်ကိုယ်စားလှယ်ဖြစ်သည့် ဖြားခွန်သိန်းဖေမှ လက်ရှိ နိုင်ငံရေးအခင်းအကျင်းများနှင့် လက်ရှိ ပအိုဝ်းတိုင်းရင်းသားတို့၏ အခြေအနေများ၊ ဒီမိုကရေစီစနစ်ဖြင့် သွားနေသည့်လက်ရှိအခင်းအကျင်းတွင် မိမိဒေသဖွံ့ဖြိုးတိုးတက်အောင် မည်သို့လုပ်ဆောင် ရမည်စသည့် အကြောင်းအရာများကို ပြောကြားခဲ့ပြီး (PNO) အသွင်ပြောင်း ဌာနေပြည်သူ့စစ် ကွပ်ကဲရေးမှူး ဗိုလ်မှူးကြီး ဖြားခွန်မြင့်အောင်မှလည်း မူးယစ်ဆေးဝါးပပျောက်ရေးနှင့်ဒေသလုံခြုံရေး အကြောင်းအရာများကို ဟောပြောခဲ့ပါသည်။
မောက်မယ်မြို့နယ် ပြည်သူ့လွှတ်တော်ကိုယ်စားလှယ် ဦးစိုင်းငေါင်းဆိုင်ဟိန်းနှင့် ပြည်နယ်လွှတ်တော် ကိုယ်စားလှယ် ခွန်ဟန်သိန်းဦးတို့မှလည်း မိမိတို့တတ်နိုင်သမျှ ဒေသဖွံ့ဖြိုးတိုးတက်ရေးအတွက် လုပ်ဆောင်နေ ပါကြောင်း၊ ထိုသို့လုပ်ဆောင်ရာတွင်လည်း ပြည်သူများအနေဖြင့် မိမိတတ်နိုင်သည့်ဖက်က ကူညီလက်တွဲ လုပ်ဆောင်ဖို့လည်း လိုပါကြောင်း စသည့် အကြောင်းအရာများကို ဟောပြောခဲ့ပါသည်။
လွန်ခဲ့သည့် (၅)နှစ်အတွင်း ပအိုဝ်းအမျိုးသားအဖွဲ့ချုပ်အနေဖြင့် ပအိုဝ်းကိုယ်ပိုင်အုပ်ချုပ်ခွင့်ရဒေသ အတွင်းမှာသာ ဖွံ့ဖြိုးရေးလုပ်ငန်းများကို အားသွန်ခွန်စိုက် လုပ်ဆောင်ခဲ့ပြီး ၂၀၁၅-ခုနှစ် လွှတ်တော်သက်တမ်း (၅)နှစ်အတွင်း ပအိုဝ်းအမျိုးသားအဖွဲ့ချုပ်အနေဖြင့် မောက်မယ်မြို့နယ် ဒေသဖွံ့ဖြိုးရေးလုပ်ငန်းများကို ကူညီလုပ်ဆောင်ပေးသွားဖို့ စိတ်အားထက်သန်နေပါကြောင်း၊ လျင်လျင်မြန်မြန် ဖွံ့ဖြိုးတိုးတက်ဖို့အတွက် ဒေသခံပြည်သူလူထုများမှာ အဓိကကျပါကြောင်း၊ ထို့ကြောင့် ဒေသခံပြည်သူလူထုများနှင့် ပူးပေါင်း၍ ပအိုဝ်းအမျိုးသားအဖွဲ့ချုပ်အနေဖြင့် တတ်နိုင်သည့်ဖက်က ကြိုးစားလုပ်ဆောင်သွားမှာဖြစ်ကြောင်းကိုလည်း အမျိုးသားလွှတ်တော်ကိုယ်စားလှယ် ဖြားခွန်သိန်းဖေမှ ပြောကြားခဲ့ပါသည်။
ခွန်ဓဇ(ဟိုနမ်း)
Like On Facebook
Follow On Twitter
Subscribe On RSS