Thursday, November 3, 2016

တိုးတက်သောကျေးရွာများတည်ဆောက်ကြပါစို့

တောင်ကြီး၊ ၂၀၁၆ ခုနှစ်၊ နိုဝင်ဘာလ (၃) ရက်





ဤဆောင်းပါးကို ရေးသားသောမိမိသည် မိမိ၏ဒေသရှိတိုးတက်သော ကျေးရွာများရှိ သလို၊ မတိုးတက်သောကျေးရွာများလည်းရှိသည်ကို တွေ့ရှိရပါသည်။ တိုးတက်ရန်လိုအပ်သော လမ်းပန်းဆက်သွယ်မှု အင်အားကောင်း(ရှိ)ပါလျှက် အဘယ်ကြောင့် မတိုးတက်သည်ကို မိမိ၏ဉာဏ်မှီ သလောက်တင်ပြသွားမည်ဖြစ်ပါသည်။ ဤဆောင်းပါးကိုရေးသားသောမိမိသည် ကျေးရွာတိုင်းတိုးတက်စေ လိုသော စိတ်ဆန္ဒတစ်ခုကြောင့် ရေးသားရခြင်းဖြစ်ပါသည်။ ဤဆောင်းပါးကို ဖတ်ရှုရသောကြောင့် မိမိ၏ ရပ်ရွာများအတွက် တစ်ထောင့်တစ်နေရာမှအသုံးဝင်လိမ့်မည်ဟု ယုံကြည်ပါသည်။
တိုးတက်သင့်ပါလျှက် အဘယ်ကြောင့်မတိုးတက်သည်ကို အောက်ပါအချက်များကြောင်းဟု ထင်ပါသည်။ ၄င်းအချက်များမှာ   (၁) ကျေးရွာပိုင်သစ်တောကြိုးဝိုင်းထိန်းသိမ်းမှုမရှိခြင်း (၂) မူးယစ် ဆေးဝါးသုံးစွဲသူများပြားခြင်း (၃) ပတ်ဝန်းကျင်သန့်ရှင်းမှုမရှိခြင်း (၄) စည်းလုံးညီညွတ်မှုမရှိခြင်း (၅) ပညာ ရေးကို အားပေးမှုနည်းပါးခြင်း (၆) လူကြီးသူမများ၏ဆိုဆုံးမမှုကို အလေးထားမှုမရှိခြင်း (၇) မိမိတို့ ကျေးရွာတွင် ကိုးကွယ်ထားသော ဘာသာရေးအဆောက်အဦးများနှင့် ရဟန်းသာမဏေများအား လေးစား ကြည်ညိုမှု၊ အားပေးမှုအားနည်းခြင်း တို့ဖြစ်ပါသည်။
အထက်ပါအချက်တို့ကို တစ်ချက်ချင်းစီ တင်ပြရမည်ဆိုလျှင်
(၁) ကျေးရွာပိုင်သစ်တော ကြိုးဝိုင်းထိန်းသိမ်းရန်- ကျေးရွာတော်တော်များများတွင် မိမိတို့၏ ကျေးရွာပိုင်သစ်တောကြိုးဝိုင်းထ်ိန်းသိမ်းရန် ခေတ်စနစ်အရ အလွန်လိုအပ်လှပါသည်။ အချို့ကျေးရွာတွင် သစ်တောကြိုးဝိုင်းထိန်းသိမ်းမှုမရှိသည့် အတွက် အခြားကျေးရွာများမှ ထင်းအဖြစ်သော်လည်းကောင်း၊ မီးသွေးဖုတ်ရန်အတွက်သော် လည်းကောင်း ခိုးထုတ်နေကြသည်ကို တွေ့ရှိရပါသည်။  ရွာခံများအတွက်မူ သစ်တောများပြုန်းတီးခြင်း၊ ထင်းလောင်စာများရှားပါးခြင်း၊ ရေခန့်ခြောက်ခြင်း စသည့်ဒုက္ခများသာ ခံစားရပါသည်။ ဤကဲ့သို့ဖြစ်ရခြင်းသည် ကျေးရွာပိုင်သစ်တောကြိုးဝိုင်းထိန်းသိမ်းရေး ကော်မတီဖွဲ့စည်း ထားမှုမရှိခြင်းဖြစ်သည်။ သစ်တောကြိုးဝိုင်းများကို စနစ်တကျကာကွယ်ရန်မှာ သစ်တောထိန်းသိမ်းရေး ကော်မတီကိုဖွဲ့စည်းရမည်ဖြစ်သည်။ ထိုအထဲတွင် သံဃာတော်များ၊ ရွာသူကြီး၊ လူငယ်ခေါင်းဆောင်နှင့် အဖွဲ့ဝင်များတို့ဖြင့် စနစ်တကျဖွဲ့စည်းပြီး စည်းကမ်းချက်များကိုလည်း စနစ်တကျကိုင်တွယ်ရန်ဖြစ်သည်။
(၂)မူးယစ်ဆေးဝါးသုံးစွဲသူများပြားခြင်း- ဤမူးယစ်ဆေးဝါးသည် ယနေ့အချိန်အခါတွင် နေရာအနှံ့ဖြစ် ပေါ်နေသော ပြဿနာဖြစ်သည်ကို လူတိုင်းသိရှိသကဲ့သို့၊ မိမိတို့ကိုယ်တိုင်လည်းနေ့စဉ်နှင့်အမျှ မြင်တွေ့ ကြားသိနေရပါသည်။ သို့သော် အချို့ကျေးရွာတွင် တင်းကြပ်သောစည်းကမ်းချက်များကို ချမှတ်ထားသော ကြောင့် ရပ်ရေးရွာရေးကိစ္စရပ်များ ဆောင်ရွက်ရာတွင် အဆင်ပြေသော်လည်း၊ အချို့ကျေးရွာများတွင် စည်းကမ်းချက်များ ချမှတ်ထားပါသော်လည်း ထိရောက်သည့်ကိုင်သွယ်မှုမျိုး မရှိခြင်းကြောင့် ရပ်ရွာကိစ္စ ရပ်များ ဆောင်ရွက်ရာတွင် အဆင်ပြေမှုမရှိသကဲ့သို့ ခိုးမှု၊ ဆိုးမှုများပြားသောကြောင့် နေ့စဉ်နေ့တိုင်း စိတ်မချမ်းမြေ့စရာများ၊ မိသားစုပြဿနာများ၊ လူမှုရေးပြဿနာများ  ဖြစ်ပေါ်သည့်အပြင် လူသားများ၏ စိတ်ပိုင်းဆိုင်ရာ၊ ရုပ်ပိုင်းဆိုင်ရာတို့ကို ဖျက်ဆီးသောကြောင့်၊ ထိုမူးယစ်ဆေးဝါး၏ နောက်ကွယ် ရည်ရွယ်ချက်၊ ဦးတည်ချက်တို့ကို သေချာလေ့လာပြီး မိမိ၏ရပ်ရွာတွင် တင်းကြပ်သောစည်းကမ်းဖြင့် အရေးယူခြင်း၊ မကြာခဏ အားကစားပြိုင်ပွဲများပြုလုပ်ပေးခြင်း၊ မူးယစ်ဆေးဝါး ပညာပေးဟောပြောပေးခြင်းတို့ကို လုပ်ဆောင်သင့်သည်။
(၃) ပတ်ဝန်းကျင်သန့်ရှင်းမှုမရှိခြင်း-ခေတ်စနစ်ပြုပြင်ပြောင်းလဲမှုအရသော်လည်းကောင်း၊ ကျန်း မာရေးအရသော်လည်းကောင်း သန့်ရှင်းမှုရှိခြင်းသည် လွန်စွာအရေးကြီးပါသည်။ သန့်ရှင်းမှုဆိုရာ၌ တစ်ကိုယ်ရေသန့်ရှင်းမှု၊ မိမိနေထိုင်သောအိမ်၏သန့်ရှင်းမှု၊ ရပ်ရွာ၏လမ်းများ ရွာပတ်ဝန်းကျင်သန့်ရှင်းမှု တို့ကို ဆိုလိုပါသည်။ အချို့ကျေးရွာများသည် စားမှု၊ နေမှု၊ ပတ်ဝန်းကျင်တို့သည် သန့်ရှင်းသပ်ရပ်မှု မရှိသည့်အတွက် ရောဂါများဖြစ်ပွားနေသည်ကို တွေ့ရှိရပါသည်။ အဘယ်ကြောင့်ဆိုသော် တိုးတက်သော အင်္ဂါရပ်လက္ခဏာတို့တွင် ဤအချက်သည် မဖြစ်မနေပါရခြင်းဖြစ်သည်။ လုပ်ဆောင်ရန်မှာ ရွာလုံးကျွတ် စုပေါင်း၍ သန့်ရှင်းရေးလုပ်ဆာင်ခြင်း၊ တာဝန်ရှိပုဂ္ဂိုလ်များနှင့်ရွာသူကြီးများ မကြာခဏဆော်သြပေးခြင်း တို့ကို ပြုလုပ်ရမည်ဖြစ်သည်။
(၄) စည်းလုံးညီညွတ်မှု- ကျေးရွာ၊ မည်သည့်အဖွဲ့အစည်းမဆို စည်းလုံးညီညွတ်မှုရှိရန် လွန်စွာအရေးကြီးပါသည်။ သို့မှသာလျှင် လိုရာပန်းတိုင်ကို အရောက်လှမ်းနိုင်မည်ဖြစ်သည်။ စည်းလုံးညီ ညွတ်မှုရှိသောကျေးရွာ၏   လူမှုရေး၊ ပညာရေး၊ လူမှုဘ၀နေထိုင်ရေး စသည်တို့သည်  အခြားစည်းလုံးမှု မရှိသောကျေးရွာထက် များစွာသာလွန်သည်ကို တွေ့ရှိရမည်ဖြစ်ပါသည်။ ရပ်ရေးရွာရေးကိစ္စရပ်များတွင် မိမိကိုယ်တိုင်ဦးဆောင်နိုင်အောင် ကြိုးစားပါ၊ မဦးဆောင်နိုင်လျင် တတ်သိသည့်ပုဂ္ဂိုလ်များ ဦးဆောင်သည်ကို လိုက်နာပါ။ သူတစ်မျိုး ငါတစ်ဖုံနည်းနှင့်စည်းလုံးမှုမရှိလျင် အစစအရာရာနောက်ကျကျန်ခဲ့မည်ကို သတိချပ်စေလိုပါသည်။
 (၅) ပညာရေးကိုအားပေးရန်- ယနေ့ခေတ်သည် IT  နည်းပညာခေတ်ဖြစ်သည်နှင့် အညီ ပညာရေးကိုအားပေးသော ကျေးရွာ(လူမျိုး)သည် အစစအရာရာတိုးတက်မည်မှာ မလွဲပေ။ ထို့ကြောင့် မိမိတို့၏သားသမီးနှင့် ပတ်ဝန်းကျင်တို့တွင် ပညာရေးကိုအားပေးရန်လွန်စွာ အရေးကြီးပါသည်။ ပညာရေးကိုအားပေးသည်ဟုဆိုရာ၌ လောကီဆိုင်ရာပညာရေး၌သော်လည်းကောင်း၊ လောကုတ္တရာ ပညာရေး၌သော်လည်းကောင်း အားသန်သည့်ဘက်တွင် အားပေးရန်ဖြစ်ပါသည်။
(၆) လူကြီးသူမများ၏ဆိုဆုံးမမှုကို လေးစားလိုက်နာရန်- လူကြီးသူမများသည် ဘွဲ့ရပညာတတ် မဟုတ်သော်လည်း အတွေ့အကြုံပိုင်းတွင် မိမိတို့လူငယ်ထက် များစွာသာလွန်သည်ကို တွေ့ရှိရပါသည်။ လုပ်ငန်းတစ်ခုလုပ်ဆောင်ရာ၌အတွေ့အကြုံရှိမှုသည် အားသာချက်တစ်ခုပင်ဖြစ်သည်ကို သတိပြုစေလို ပါသည်။ ဤကဲ့သို့လူကြီးသူမများအား ရိုသေလေးစားခြင်းသည် မြတ်စွာဘုရား၏တရားတော်အရ မင်္ဂလာတစ်ပါးဖြစ်သကဲ့သို့၊ မိမိတို့၏ ရိုးရာယဉ်ကျေးမှုပြယုဂ်တစ်ခုလည်းဖြစ်ပါသည်။
(၇) ဘာသာရေး အဆောက်အဦးများနှင့် သံဃာတော်များအပေါ် လေးစားကြည်ညိုမှု၊ အလေးထားမှုရှိရန်- မြို့ပြ၌ နေထိုင်သောသူများအတွက် အရေးမကြီးသော်လည်း ကျေးရွာများအတွက်မူ များစွာအရေးပါသည်ကို သိရှိပြီးဖြစ်ပါသည်။ အကြောင်းမှာ ကျေးရွာတိုင်းနီးပါး သံဃာတော်များ၏ သွန်သင် ဆုံးမမှု၊ ဦးဆောင်မှုအောက်တွင် ရပ်ရေးရွာရေးကိစ္စရပ်တို့ကို ဆောင်ရွက်ကြရခြင်းဖြစ်ပါသည်။ ရွာကောင်း၊မကောင်း ကျောင်းကြည့်ဆိုသည့် စကားပုံအတိ်ုင်း သံဃာတော်များအား လေးစားကြည်ညိုမှု၊ အားလေးထားမှု ရှိသောရွာသည် ဂုဏ်သတင်းများကောင်းခြင်း၊ အခြားရွာများ၏ အလေးထားမှု ရရှိမည်ကို မိမိကိုယ်တိုင် တွေ့ရှိရပါသည်။ ထို့ကြောင့် မ်ိမိတို့၏ ကျေးရွာရှိ ဘာသာရေးအဆောက်အဦးများနှင့် သံဃာတော်များအား လေးစားကြည်ညိုမှု၊ အလေးထားမှုတို့အားများစွာထားပြီး တိုးတက်သော ကျေးရွာများ တည်ဆောက်နိုင်ကြပါစေဟု ဆန္ဒပြုရင်း နိဂုံးချုပ်အပ်ပါသည်။

ခွန်ကျော်ထွန်း ပင်အွဉ်း လွယ်မော်

Powered by Blogger.