Thursday, May 11, 2017

ငါတို့ဘာကြောင့် မဲပေးခဲ့ကြတာလဲ

တောင်ကြီး၊ ၂၀၁၇ ခုနှစ်၊ မေလ (၁၁) ရက်


နှစ်ဟောင်းကုန်ဆုံးလို့ နှစ်သစ်ကို ရောက်ရှိလာပြီဖြစ်သော ရက်အခါသမယမှာ မိမိတို့ လူများသည်လည်း မိမိသက်ဆိုင်သော လုပ်ငန်းခွင်အသီးသီးကို စိတ်သစ်လူသစ်နှင့် ကျရာအခန်းကဏ္ဍကို ပြန်လည်တာဝန်ထမ်းဆောင်ကြရမည်ဖြစ်သည်။ နှစ်သစ်ကို ရောက်ရှိလာပြီ ဖြစ်သောကြောင့် မိမိတို့သည်လည်း စိတ်သစ်လူသစ်ဖြင့် မိမိလုပ်ငန်းခွင်ကို ဝင်ရောက်လုပ်ကိုင်ကြရမည်ဖြစ်ပါသည်။

ထိုသို့ဝင်ရောက်လုပ်ကိုင်ကြရမည်ဖြစ်သောကြောင့် မိမိသည် စိတ်သစ်လူသစ်နှင့်ပင်ဖြစ်လင့်ကစား မိမိ၏အာရုံအတွေး၌ ဖြစ်ပေါ်နေသောအကြောင်းအရာသည် ပစ္စုပ္ပန်ဖြစ်ပျက်နေသော အကြောင်းများ မဟုတ်ဘဲ လွန်ခဲ့သော မိဘပြည်သူများ ရင်ခုန်လှုပ်ရှားဖွယ်ဖြစ်သော မိမိမြန်မာနိုင်ငံတော်ကြီးကို အပြောင်းအလဲကြီး တစ်ရပ်ဖြစ်ပေါ်စေသော ၂၀၁၅ ရွေးကောက်ပွဲကာလနှင့် မကြာသေးသောကာလ တစ်ခုကကြားဖြတ်ရွေးကောက်ပွဲ အကြောင်းများကို ပြန်လည်တွေးတောနေမိသောကြောင့်ပင်ဖြစ်သည်။

အဆိုပါတွေးတောနေမှုများကို ပြန်လည်သုံးသပ်ရမည်ဆိုလျှင် ၂၀၁၅ ခုနှစ်အထွေထွေရွေးကောက်ပွဲကြီး မတိုင်ခင် ရက်ပေါင်း (၆၀) အလိုမှာ မိမိတို့ပြည်သူလူထုအတွက် ရင်ခုန်လှုပ်ရှားဖွယ် ကောင်းသော မျှော်လင့်ချက် စကားများကို ပျော်ရွှင်စွာကြားခဲ့ကြရမည်မှာ လူတိုင်းပင်ဖြစ်နေမည်ဖြစ်သည်။ ထိုကြောင့်တာဝန်သိပြည်သူများလည်း ရင်ခုန်ခဲ့ကြသလို ပြည်သူများ၏တာဝန်ကို ထမ်းဆောင်နိုင်အောင် ကြိုးပမ်းနေကြရသော လွှတ်တော်ကိုယ်စားလှယ်လောင်းများသည်လည်း တက်ကြွစွာစည်းရုံးရေးများ ပြုလုပ်ခဲ့ကြရသော ကာလပင်မဟုတ်ပါလော့။

ထိုကာလကို ပြန်လည်တွေးတောကြည့်ပါစို့။ မဲဆွယ်စည်းရုံးရေးကာလအတွင်း ရွေးကောက်ပွဲတွင် ဝင်ရောက်ယှဉ်ပြိုင်မည့် လွတ်တော်ကိုယ်စားလှယ်လောင်းများ၏ မဲဆွယ်စည်းရုံးရေးဆောင်ပုဒ်များ၊ စည်းရုံးရေး ဆောင်ရန်ရှောင်ရန်များ စသော ကျင့်ဝတ်များအတိုင်း ပြည်သူလူထုများကလည်း တာဝန်သိစိတ်ဓါတ်ဖြင့် ရွေးကောက်ပွဲကျင်းပသည့်နေ့၌ တာဝန်ကိုယ်စီဖြင့် ရွေးကောက်ပွဲတွင် မိမိကြိုက်နှစ်သက်သော ပါတီကို မိမိ၏သဘောဆန္ဒဖြင့် မဲပေးခဲ့ကြခြင်းဖြစ်သည်။

ထိုသို့မဲပေးကြခြင်းမှာ မိမိသည်လည်းတစ်ဦးအပါဝင်ဖြစ်ပါသည်။ မိမိတို့သည် မဲဆွယ်ကာလအတွင်း လွတ်တော်ကိုယ်စားလှယ်လောင်းများ ဟောကြားသွားသော စကားများအရ မဲပေးခြင်းမျိုးလည်း ရှိနေသလို ဆောင်ပုဒ်ကို ကြည့်ခြင်းအားဖြင့်လည်းမဲပေးခဲ့ကြခြင်းဖြစ်သည်။ ထိုသို့မည်သို့မည်ပုံ မဲပေးခဲ့ကြခြင်းမျိုးပင် ဖြစ်နေပါစေ မဲဆန္ဒရှင်တိုင်းသည် မျော်လင့်ချက်ကိုယ်စီဖြင့် မဲပေးခဲ့ကြခြင်းဖြစ်သည်ကို မဲဆန္ဒရှင်ဖြစ်သူတိုင်း အသိပင်ဖြစ်ကြောင့် ကျွန်ုပ်ယုံကြည်ပါသည်။

မိမိတို့ တိုင်းရင်းသားလူမျိုးများနေထိုင်ရာဒေများအတွင်းရှိ မဲဆန္ဒရှင်များသည် မိမိဒေသကို ကိုယ်စားပြုသော လွှတ်တော်ကိုယ်စားလှယ်များရွေးချယ်သင့်သည်ကို ယခုရောက်ရှိလာပြီဖြစ်သော ခုနှစ်သစ်တွင် မဲဆန္ဒရှင် ဖြစ်သော မိမိကိုယ်တိုင်ခံစားမိသည့်အတွက် ကျွန်ုပ်နည်းသူ ကျန်သော မဲဆန္ဒရှင်များလည်း ခံစားမိသူများ ရှိနေလိမ့်မည်ဖြစ်သည်။ အဘယ်ကြောင့်ဆိုသော် ဆောင်ပုဒ်ကို ကြည့်၍မဲပေးခြင်းမျိုး ရှိနေသလို လူကိုကြည့်ပြီး မဲပေးခြင်းမျိုးလည်း ရှိခဲ့ပါသည်။ မည်သို့ပင်ဆိုစေကာမူ မိမိဒေသကို ကိုယ်စားပြုသော လွှတ်တော်ကိုယ်စားလှယ်ကသာ လိုလားမိပါသည်။ မိမိတို့ပြည်သူလူထုများမဲပေး၍ ရွေးကောက်ပွဲအနိုင်ရသော ကိုယ်စားလှယ်များသည် မိမိနှင့်သက်ဆိုင်သော ဒေသဆိုင်ရာ လိုအပ်ချက်များကို ကွင်းဆင်းလေ့လာမှုပြုလုပ်ပြီး ပြုပြင်ပေးစေလိုပါသည်။

လွှတ်တော်ကိုယ်စားလှယ်သည် မိမိအနိုင်ရသောဒေသ၏လိုအပ်ချက်ဖြစ်သော ရေ၊ မီး၊ လမ်းတံတား စသော အစစအရာရာကို တတ်နိုင်တတ်အားသောဘက်မှ တဖြည်းဖြည်းချင်း ဖြည့်ဆည်းပေးစေလိုပါသည်။ အဘယ်ကြောင့် ဤသို့တောင်းတနေရသည်မှာ ပြည်သူလူထု၏တာဝန်ကို ကိုယ်စားထမ်းဆောင်ရန်အတွက် လွှတ်တော်ကိုယ်စားလှယ်ကို ရွေးချယ်တင်မြောက်ရသည်ဟု ဆိုလိုထားခြင်းဖြစ်သည်။ ဤသိုဆိုလိုခြင်းကြောင့် ပြည်သူလူထုများ၏ လိုအပ်ချက်များကို ပြည်သူလူထုကိုယ်စား လွတ်တော်အမတ်က စိတ်ပါဝင်စားမှုမရှိလျှင် မဲဆန္ဒရှင်လူထုသည် အားကိုးရာမဲ့ဘဝနှင့် မိမိဒေသအမှောင်ဖုံးလွှမ်းခြင်း ဆက်လက်ခံနေရမည်ပင် ဖြစ်ပေသည်။

လွှတ်တော်အမတ်၏စိတ်နေသဘောထားသည် မိမိမဲဆွယ်စည်းရုံးစဉ်ကာလအတွင်း ဟောပြောစည်းရုံးခဲ့သော ဟောပြောချက်အတိုင်း မပြောင်းလဲသောစိတ်ထား၊ ပြည့်ဝသောသဘောထားများဖြင့် ထိုသဘောထားဖြင့် မဲဆန္ဒရှင်များအပေါ် သဘောထားပြည့်ဝမှုဖြင့် ပြန်လည်လှည့်ကြည့်စေလိုပါသည်။ ဤသို့ပြောဆိုရခြင်းမှာ ပြည်သူလူထုများသည် ရှေ့ဆောင်လမ်းပြရှိမှသာ နားလည်သဘောပေါက်သော လူများဖြစ်သောကြောင့်ဖြစ်သည်။ ကျေးရွာလိုအပ်ချက်များ ရှိနေသော်လည်း မည်သို့မည်ပုံတောင်းဆိုရမည်ကိုပင်မသိသောသူများပင် ဖြစ်နေပါသည်။

ကျေးရွာ ပြည်သူလူထု (မဲဆန္ဒရှင်များ) ထိုသို့တောင်းဆိုနိုင်အောင် လွှတ်တော်အမတ်များသည် မဲဆွယ်စည်းရုံးစဉ်ကာလအတိုင်း စိတ်ရှည်သည်းခံမှုဖြင့် ကွင်းဆင်းရှင်းလင်းပေးစေလိုပါသည်။ (ဥပမာ- လမ်း တံတား လိုအပ်၍ တောင်းဆို ရမည့်နည်းလမ်း၊ ရေ၊ မီးလိုအပ်၍တောင်းဆိုရမည့်နည်းလမ်း စသဖြင့်)စသည်များကိုနှင့် ကွင်းဆင်းလေ့လာပြီး နည်းလမ်းတကျရှင်းပြစေချင်ပါသည်။ ဤသည်မှာ မဲဆန္ဒရှင်ပြည်သူများ၏ ဆန္ဒအမှန်ပင်ဖြစ်ပေမည်။

မဲဆန္ဒရှင်များအားလုံးသည် ရိုးသားကြိုးစားသောတာဝန်သိပြည်သူများဖြစ်ကြသည်။ အဘယ်ကြောင့်ဆိုသော် မဲပေးရမည့်ရက်တွင် တာဝန်သိစိတ်ဖြင့် သက်ဆိုင်ရာအလုပ်အကိုင်များကို ပစ်ပယ်ထားခဲ့ပြီး မဲပေးခဲ့ကြပါသည်။ မျော်လင့်ချက် ကိုယ်စီဖြင့် မဲပေးခဲ့ကြသည်ဟုလည်းဆိုနိုင်ပါသည်။ ဒေသကို ကိုယ်စားပြုစေချင်၍ ရွေးချယ်ခဲ့ကြသည့် အတွေးမျိုးဖြင့် မဲပေးမှု ရှိနေသလို ပါတီကြီးကို လေးစား၍ မဲပေးခဲ့သည်မျိုးလည်းရှိနေသည်။ ထိုသို့မကသေးဘဲ တိုင်းရင်းသားပါတီများ ရှိနေ၍ မိမိတိုင်းရင်းသားလူမျိုးကို အားကိုးတစ်ကြီးဖြင့် မိမိလူမျိုးပါတီကို ပြန်လည်မဲပေးခဲ့ကြသည်များလည်းရှိ နေပါသေးသည်။ ဤသို့မိမိလူမျိုးပါတီကို မဲပေးရခြင်း၏ရည်ရွယ်ချက်လည်း များစွာရှိနေပါသည်။ မိမိလူမျိုး၊ မိမိဒေသ၏ အခက်အခဲ လိုအပ်ချက်များကို မိမိလူမျိုးကသာ နားလည်နိုင်ခြင်းကြောင့်လည်းဖြစ်သည်။ ယုံကြည်မျှော်လင့်ချက်အမျိုးမျိုးဖြင့် မဲပေးခဲ့ကြပါသည်။

မည်သို့ပင်ဆိုစေကာမူ မဲဆန္ဒရှင်များကလည်း မျော်လင့်ချက်နှင့်တာဝန်သိစိတ်ဓါတ်ဖြင့်မဲပေးခဲ့ကြ၍ အနိုင်ရရှိပြီဖြစ်သောကြောင့် မရှုံးသင့်ဘဲ ရှုံးနိမ့်ခဲ့ကြရသော လွှတ်တော်ကိုယ်စားလှယ်များလည်း ဒုနှင့်ဒေးပင် ဖြစ်သည်ကို လူတိုင်းတွေ့မြင်နေကြပါသည်။ အောင်မြင်မှုသရဖူဆောင်း လွှတ်တော်ကိုယ်စားလှယ်များကလည်း မိမိအနိုင်ရသော ဒေသ၏အကျိုးကို မဲဆွယ်စည်းရုံးချိန်ကလိုပင် စွမ်းစွမ်းတမံကြိုးစားပေးမည်ဆိုလျှင် နောင်လမည့် ၂၀၂၀ ရွေးကောက်ပွဲတွင်ဝင်ရောက်အရွေးခံမည့် လွှတ်တော်ကိုယ်စားလှယ်များအတွက်ရော မိမိကိုယ်စားပြုမည့် ပါတီအတွက်ပါ ကြိုတင်ပြင်ဆင်မှု ဖြစ်စေပါလိမ့်မည်။ ထိုသို့မဟုတ်ဘဲ မိမိအနိုင်ရသော ဒေသကို ပြန်လည်လှည့်ကြည့်ရန် ဝန်လေးနေမည်ဆိုလျှင် လာမည့်ရွေးကောက်ပွဲများအတွက် အနိုင်ရရှိရန်လွန်စွာခက်ခဲပေလိမ့်မည်။ ၂၀၁၅ ရွေးကောက်ပွဲကိုကြည့်ပြီး သင်ခန်းစာယူကြသော မဲဆန္ဒရှင်ပြည်သူများရှိမည်မှာ အမှန်ပင်ဖြစ်သည်။ ထို့ကြောင့် လွှတ်တော်ကိုယ်စားလှယ်များမှလည်း သတိဝိရိယနှင့် လုပ်ဆောင်ပေးရန် အချိန်တန်ပြီဖြစ်ကြောင်း ဤဆောင်းပါးဖြင့် အကြံပြုရေးသားလိုက်ရပါသည်။

နန်းဆောင်းလေပြေ (တောင်ကြီးတစ်ဝိုက်)
Powered by Blogger.