မြန်မာနိုင်ငံသည် မြစ်ချောင်းအင်းအိုင်၊ တောင်ကျရေ၊ သဘာဝရေထွက်၊ သဘာဝစိမ့်စမ်းရေ မရှိသောဒေသများသည် သောက်ရေ သုံးရေအတွက် မိုးရေကိုသာ အဓိကအားကိုးအားထားပြုနေရပါသည်။ သောက်သုံးရေဖူလုံရေးအတွက် ရေလှောင်ကန်(ရေတွင်း)များ တူးဖော်ဆောက်လုပ်ပြီး မိုးရေကို သိုလှောင်ထားရပါသည်။ မိုးရေကို သိုလှောင်ရာတွင် မြေအောက်ပိုင်းကို (၉)ပေ၊ မြေအပေါ်ပိုင်း (၃)ပေ၊ (၁၂)ပေ အကျယ်အဝန်းရှိ ရေလှောင်ကန်တည်ဆောက်ကြသည်ကို တွေ့ရှိရပါသည်။ ရေလှောင်ကန်(ရေတွင်း) တည်ဆောက်ရာတွင် မိမိတို့လိုချင်သည့် ပုံစံအမျိုးမျိုးဖြင့်လည်း တွေ့နေရပါသည်။ ငွေကြေးတတ်နိုင်သူများသည် တစ်နှစ်စာ သောက်သုံးရေဖူလုံရေးအတွက်အပြင် စိုက်ပျိုးရေးအတွက်ပါ သိုလှောင်ထားသည်ကိုလည်း တွေ့နေရပါသည်။
အချို့ကျေးရွာဒေသများသည် ရေဂါလံ(၁၀၀၀၀)ဆံ့ ရေလှောင်ကန်(ရေတွင်း)ကြီး တည်ဆောက်ပြီး မိုးရေမလုံလောက်သည့် အိမ်ထောင်စုများကို ရေမီတာစနစ်ဖြင့် ပြန်လည်ရောင်းချခြင်းပြုလုပ်သည့်အပြင် ဒေသအတွင်း လူမှုရေးပွဲများဖြစ်သည့် သာရေး၊ နာရေးပွဲများတွင် ပြန်လည်အသုံးပြုကြပြီး ကျေးရွာရံပုံငွေလည်း ရရှိစေပါသည်။ မိုးရေကို လုံလောက်စွာသိုလှောင်နိုင်ခြင်းအားဖြင့် ရေအရင်းအမြစ်သည် ကိုယ်ပိုင် လက်ဝယ်တွင် ရှိနိုင်ခြင်းကြောင့် ရေမီတာခလည်း သက်သာခြင်းဖြစ်သည်။ သဘာဝအလျောက်ရရှိသော မိုးရေသည် ထုံးဓာတ်များပါဝင်မှု မရှိသည်ကို တွေ့ရှိရပါသည်။ ဥပမာ-ရေနွေးအိုးတည်ရာတွင် ပွက်ပွက် ဆူနေသောရေသည် ထုံးဓာတ်အနယ်များ ပါဝင်မှုမရှိခြင်းနှင့် အိုးများကပ်ခြင်းမရှိသည်ကို တွေ့ရပါသည်။ ကျေးလက်ဒေသများအတွက် မိုးရေသည် အကောင်းဆုံးသော ရေသန့်ဖြစ်ပါသည်။
ရနိုင်သမျှသော ရေအရင်းမြစ်တို့ကို စုစည်းအသုံးချနိုင်ရေးသည် မျက်မှောက်ခေတ်မြန်မာနိုင်ငံ၏ အရေးကြီးသော လုပ်ငန်းတစ်ရပ်ဖြစ်လာနိုင်ပါသည်။ လက်တွေ့အသုံးပြုနိုင်သော ရေအရင်းအမြစ် ရရှိရေး နည်းလမ်းတို့အနက် သဘာဝအလျောက်ရွာသွန်းသော မိုးရေတို့ကို သိုလှောင်အသုံးချခြင်းသည်လည်း နည်းလမ်းကောင်းတစ်ခုအဖြစ်ရှိနေပါသည်။ မိုးရေသိုလှောင်ခြင်းကို မြန်မာ့လူ့ဘောင်အဖွဲ့အစည်း အစဉ်အဆက်ကတည်းက မြင်တွေ့ခဲ့ရသော်လည်း ယခုထက်ပို၍ ထိထိရောက်ရောက် သိုလှောင်နိုင်မည့် အခြား နည်းလမ်းများကို ချဲ့ထွင်ကြံဆ လုပ်ဆောင်သင့်ပါသည်။
ထိုင်းနိုင်ငံရှိ ကျေးလက်နေပြည်သူတို့၏ (၄၀)ရာခိုင်နူန်းသည် သိုလှောင်ရရှိထားသော မိုးရေအပေါ် အမီပြုရှင်သန်ရပ်တည်ကြရပါသည်။ တရုတ်နိုင်ငံ၏ ကုန်းတွင်းပိုင်းပြည်နယ်ဖြစ်သော ဂန်ဆူး(Gansu)နှင့် မိုးခေါင်ခြောက်သွေ့သော ဘရာဇီးနိုင်ငံအရှေ့မြောက်ပိုင်း၌ အိမ်ခေါင်မိုးမှတစ်ဆင့် မိုးရေသိုလှောင်ခြင်းကို ကျယ်ကျယ်ပြန့်ပြန့် ဆောက်ရွက်ကြပါသည်။ အိန္ဒိယနိုင်ငံ၌ တမီလ်းနာဒူး (Tamil Nadu)ပြည်နယ်သည် နေအိမ်အဆောက်အအုံတိုင်း မိုးရေသိုလှောင်ခြင်းကို မလုပ်မနေရ သတ်မှတ်ပြဌာန်းခဲ့သော ပထမဦးဆုံး ပြည်နယ်ဖြစ်ပါသည်။ မိုးရေသိုလှောင်ခြင်းအား အကောင်အထည်ဖော် ဆောင်ရွက်ခဲ့သည့် ၅နှစ်တာ ကာလအတွင်း တမီလ်းနာဒူးပြည်နယ်၏မြို့တော် ချန်နိုင်းရှိ မြစ်ချောင်းအင်းအိုင်တို့၏ ရေထိန်းသိမ်းနိုင်မှုသည် (၅၀)ရာခိုင်နူန်းခန့် မြင့်မားလာပြီး ရေ၏အရည်အသွေးသည်လည်း တိုးတက်ကောင်းမွန်လာသည်ကို တွေ့ရှိရပါသည်။
စာရေးသူ၏ မွေးဖွားရာဇာတိ ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ် တောင်ဖက်ခြမ်းတွင်လည်း ရွာတိုင်းနီးပါး အိမ်တိုင်းအိမ်တိုင်း ရေအရင်းအမြစ်ကို အိမ်ခေါင်မိုးပေါ်၏ မိုးရေမှတစ်ဆင့် ရေတလျောက်ဖြင့်ခံယူကာ အုတ်ရေကန်ထဲသို့ သိုလှောင်ရယူကြရပါသည်။ ဤမိုးရေသိုလှောင်ခြင်းသည် နွေရာသီတွင် ကြုံတွေ့နေရသည့် ရေရှားပါးမှု၏ပြဿနာကို တစ်ဖက်တစ်လှမ်းမှ ကူညီဖြေရှင်းပေးနိုင်ပါသည်။ မြေအောက်(အဝီစိ)ရေရရှိရေး တူးဖော်သော်လည်း တောင်တန်းများထူထပ်ခြင်း၊ ကျောက်ဆောင်များထူထပ်ခြင်း၊ ချိုင့်များနေရာတွင် ဂလိုင်(တွင်း)များ ပေါများခြင်းကြောင့် ရေအရင်းအမြစ် ရရှိရန်အတွက် မိုးရေမှ မှီခိုအားပြုအားထားနေရပါသည်။
မကြာခင်လာမည့် ဇွန်လတွင် မြန်မာနိုင်ငံ၏ ရာသီဥတုသုံးပါးမှ မိုးရာသီအချိန်ကို ရောက်ရှိလာတော့မည်ဖြစ်ပါသည်။ မိုးရာသီသည် ကျေးလက်နေပြည်သူများအများစု၏ လယ်ယာများ၊ တောင်ယာများကို မိမိတို့စားဝတ်နေရေးအတွက်ဖြစ်သည့် ကျန်းမာရေး၊ သားသမီးပညာရေး၊ လူမှုရေး၊ နေထိုင်နိုင်ရေးတို့ အဆင်ပြေစေရန်အတွက် မျိုးစေ့သီးနှံများ စိုက်ပျိုးသောရာသီဖြစ်ပါသည်။ စိုက်ပျိုးနိုင်ရန်အတွက် လယ်ယာမြေများ၊ တောင်ယာမြေများကိုထည်ထိုးခြင်း၊ ပြုပြင်ခြင်းများ ပြုလုပ်နေကြပြီဖြစ်ပါသည်။ ထိုသို့ပြုလုပ်နိုင်ရန် မိုးရေကို မှီခိုအားထားနေရပါသည်။ ရာသီဥတုဖောက်ပြန်ပြီး မိုးရွာသွန်းမှု နည်းပါးသောနှစ်များတွင် ကျေးလက်နေပြည်သူများ ရေရှားပါးမှုပြဿနာများကို ကြုံတွေ့နေရပြီး မြန်မာနိုင်ငံအနှံ့အပြားတွင်လည်း နွေရာသီတွင် ရေရှားပါးမှုပြဿနာကို နှစ်စဉ်ကြုံတွေ့နေရပါသည်။
ထိုကြောင့် အိမ်ခေါင်မိုးပေါ်မှ ရရှိသည့် မိုးရေစက်ကို ရေလှောင်ကန်(တွင်း) ပြုလုပ်ခြင်းသော်လည်းကောင်း၊ မိုးကာကန်ပြုလုပ်ခြင်းသော်လည်းကောင်း၊ မိမိတို့ကြိုက်နှစ်သက်သည့်ပုံစံဖြင့်သော်လည်းကောင်း၊ နွေရာသီအတွက် ရေရှားပါးမှုပြဿနာကို တစ်စိတ်တစ်ပိုင်း ဖြေရှင်းနိုင်ရန် မိမိတို့ဒေသနှင့် အဆင်ပြေရာနည်းလမ်းဖြင့် မိုးရေကို သိုလှောင်ထားစေချင်ပါသည်။ မိုးရေသည် ရိုးရှင်း၍ သဘာဝကျသော နည်းလမ်းဖြင့် လူ့အဖွဲ့အစည်း၏ လူမှုဘဝကို မြင့်မားတိုးတက်ပါစေကြောင်း စာရေးသူကိုယ်၌ လက်ရှိပစ္စုပ္ပန်တွင် ကြုံတွေ့နေခြင်း၊ လက်တွေ့အသုံးပြုခံစားနေရခြင်းကြောင့် နွေရာသီတွင် ရေရှားပါးမှု ပြဿနာများ မကြုံတွေ့ရလေအောင် ရေရှားပါးသည့်ဒေသတိုင်း မိုးရေကို သိုလှောင်ထားနိုင်ရန် ကြိုတင် ပြင်ဆင်ထားကြပါစေလိုကြောင်းဖြင့် ရေးသားတင်ပြလိုက်ရပါသည်။
လွန်းလွို၊
(ခမ်းလွယ်လုံ/ပင်လောင်း)
Like On Facebook
Follow On Twitter
Subscribe On RSS