လူတိုင်းသည်မတူညီသည့်ပုံစံမျိုးစုံနှင့်အတူ လူ့လောကကြီးကို မွေးဖွားခြင်းဖြင့်ရောက်ရှိလာကြပါသည်။ မည်သို့ပင်ဆိုစေကာမူ လူဖြစ်ခြင်းတူသော်ငြားလည်း မိမိဘဝရှင်သန်ရပ်တည်နိုင်ရေးအတွက် မိမိနှင့်သက်ဆိုင်သည့်တာဝန်များသည် မိမိတို့၏ကျောပေါ်၌ ကျောက်တုံးကြီးသဖွယ်တည်ရှိနေပါသည်။ ထိုတာဝန်များကို ကိုယ်ပေါ်မှ ခွာချလျက် ပေါ့ပေါ့နေ ပေါ့ပေါ့စားပြီး ပေါ့ပေါ့တွေးကြခြင်းဖြင့်ဘဝပျောက် ကွယ်သွားသောအဖြစ်မျိုးကို စာရေးသူအနေဖြင့်တွေ့မြင်နေရပါသည်။ မည်သူကိုမျှဤအဖြစ်မျိုးနှင့် ပျောက်ကွယ်မသွားစေလိုပါ။
မိမိတို့ယခုအထိ အသက်ရှင်နေနိုင်သည်မှာ မိခင်မြေကြီးနှင့်မကင်းပါ။ ဆိုလိုသည်မှာ အသက်ရှင်ရန်အတွက် လိုအပ်သော ကောက်ပဲသီးနှံ၊ အပူအအေးလုံခြုံကာကွယ်မှုအတွက် အဝတ်အထည်နှင့် အသက်ရှင်သန်ရန် လိုအပ်သော လေ၊ ရေ စသည်တို့ကို မိခင်မြေကြီးကပေးစွမ်းလေသည်။ မိမိတို့ အသက်ရှင်နေစဉ်တွင် မိခင်မြေကြီးကထောက်ပံ့နေသော်လည်း မိမိတို့ပျောက်ကွယ်သွားမည့်တစ်နေ့တွင် မိခင်မြေကြီးအတွက် မည်သည့်အရာများဖြင့်ကျေးဇူးပြုမည်နည်း။ လူဖြစ်နေသော်လည်း လောကကြီးသည် မိမိနှင့်ဘာမျှမသက်ဆိုင်ဟု ယူဆထားပါသလား။
အိမ်တိုင်းတွင်မတူညီသည့်မိသားစုကိုယ်စီရှိသည်အလျောက် မတူညီသည့်တာဝန်ကိုယ်စီရှိကြပါသည်။ မိမိတို့မွေးဖွားခြင်းဖြင့် လူ့လောကထဲသို့စတင်ရောက်ရှိချိန်တွင် ဝတ်စရာအဝတ်အထည်မပါ၊ စားစရာ ထမင်းတစ်ဆုပ်လည်း ကိုင်ဆောင်လာခြင်းမရှိခဲ့ပါ။ သို့သော် မိမိတို့ယခုလက်ရှိအချိန်တွင် မိမိသည် မည်သည့်ဖက်ရှင်အဝတ်အစားဝတ်ဆင်နေခြင်းနှင့် မည်သည့်အစားအသောက်မျိုးဖြင့် စားသောက်မှုပုံစံ ရောက်ရှိနေသည်ကို မိမိကိုယ်တိုင်ပြန်လည်သုံးသပ်သင့်ပါသည်။
ကြောက်တတ်လျှင်ဖျင်း၊ ဝန်ကင်းလျှင်တစ်ကောင်ကြွက်ဆိုသကဲ့သို့ လူဟုဆိုရာတွင် မည်သည့် အရေးကိစ္စနှင့် ကင်းမည်မဟုတ်ပါ။ တာဝန်သိတတ်လျှင်တာဝန်ရှိမည်သာဖြစ်သည်။ သူတို့အဘယ်ကြောင့် ကမ္ဘာကျော်သလဲ ဆိုသည့်စကားလုံးကို ဦးစွာမိမိကိုယ်မိမိစဉ်းစားစေလိုပါသည်။ ကြိုးစားအားထုတ်ခြင်း မပြုပါပဲဖြစ်လာမည်မဟုတ်သည်ကို လူတိုင်းလက်ခံတတ်စေလိုပါသည်။ ချိတ်ဆက်တင်ပြရလျှင် ကမ္ဘာကျော်သူတစ်ဦးဖြစ်သည့် Nick Vujicic ဆိုသည့်ပုဂ္ဂိုလ်သည် မွေးစကတည်းက ခြေလက်တွေလုံးဝမပါခဲ့ပဲ တုံးတိပြတ်နေခဲ့သူဖြစ်ပြီး လက်ရှိတွင်အမေရိကန်နိုင်ငံ ကာလီဖိုးနီးယားပြည်နယ်တွင်နေထိုင်သူဖြစ်သည်။ Nick Vujicic ၏ဘဝသည် သာမန်လူတွေမတွေးရဲသည့် ဒုက္ခအခက်အခဲများစွာရောပြွမ်းနေပုံမှာ (၁) လူ့လောကထဲကိုကိုယ်လက်အင်္ဂါမပြည်စုံမှုဖြင့်မွေးဖွားလာခြင်း၊ (၂) ကျောင်းနေအရွယ်ကလေးဘဝတွင် မသန်စွမ်းများတက်ရောက်သည့်ကျောင်တွင်မထားပဲ ရိုးရိုးကျောင်းတွင်တက်ရောက်သည့်ဖြတ်သန်းမှု၊ (၃) အထက်တန်းကျောင်းအောင်မြင်ပြီး တက္ကသိုလ်အဆင့်ဆက်လက်သင်ယူခြင်း၊ (၄) အခြားသူများအား စိတ်ဓာတ်ခွန်အားမြှင့်တင်ပေးခြင်းနှင့် (၅) မိသားစုဘဝကိုခက်ခဲစွာဖြတ်သန်းခြင်း စသည့်အချက်များအပေါ် မိမိဖြတ်သန်းခဲ့သည့် အခက်အခဲမှန်သမျှလက်မြောက်အရှုံးမပေးတတ်သောသူဟု လူတိုင်း Nick Vujicic အကြောင်းရေးထားသည့်စာအုပ်များ၊ ဟောပြောပွဲ(သို့)ဗီဒီယိုဖိုင်ကို နားထောင်ဖူး၊ လေ့လာဖတ်ရှုဖူးသူတိုင်း အသိပင်ဖြစ်သည်။ ဆိုလိုသည်မှာ လူတိုင်းတွင်သမိုင်းကိုယ်စီရှိကြသော်လည်း သမိုင်းကျန်ရစ်သည့်ပုံစံခြင်း မတူညီမှုနှင့် အကျိုးပြုပုံများကွာခြားခြင်းကို သိစေလိုပါသည်။ စာဖတ်ပရိသတ်အနေဖြင့် မည်သည့်သမိုင်းများရေးပြီး ကမ္ဘာကြီးအတွက် ကျေးဇူးပြုမည်နည်း။
မိမိတို့သည် ကမ္ဘာလောကမှလူ့ဘဝပျောက်ကွယ်သွားပြီးသည့်နောက် အမည်တစ်လုံးကျန်ရစ်ခဲ့ ခြင်းသည် အဘယ်မျှအရေးကြီးသည်ကို အလေးထားစေလိုပါသည်။ အမည်တစ်လုံးကျန်ရစ်ခဲ့ခြင်းသည် မိမိအပေါ်မိမိအတ္တ၊ လောဘစိတ်ထားနေရုံမျှ မပြီးသေးပါ။ သူတစ်ပါးအပေါ်တွင်လည်းစိတ်ကောင်းထားရန် လိုပါသည်။ ဆိုလိုသည်မှာ မိမိအကျိုးကိုသာမကြည့်သင့်ပဲ သူတစ်ပါးအကျိုးကိုလည်းကြည့်တတ်ရန် လိုအပ် ပါသည်။
ပေါ့ပေါ့နေ၊ ပေါ့ပေါ့စား၊ ပေါ့ပေါ့တွေးခြင်းဖြင့် လူ့ဘဝတွင် ပျောက်ကွယ်မသွားလိုသောစာဖတ် ပရိသတ်များအတွက် နောင်အခါ အမည်ကောင်းတစ်လုံးကျန်ရစ်ခဲ့ရန်အတွက် မည်သည့်အရေးကိစ္စများကို ဆောင်ရွက်ပြီးပြီလဲ။ မိမိကိုယ်သာမိမိအတော်ဆုံးဟုကြွေးကြော်နေသူတစ်ဦးသည် သူမရှိသည့်တစ်နေ့၊ သူ၏အမည်ပါလိုက်ပါပျောက်ကွယ်သွားမည်မှာ မုချမလွဲပါ။ ထို့ကြောင့်စာဖတ်သူများအနေဖြင့် နိုင်ငံ၊ လူမျိုး၊ အမျိုးသားတို့နှင့် ကမ္ဘာမြေကြီးအတွက် တာဝန်ကိုယူနိုင်ရန် အဆင်သင့်ဖြစ်နေပြီလား(သို့) အကောင်အထည်ဖော်နိုင်ခဲ့ပါပြီလား ဆိုသည့်မေးခွန်းဖြင့်သာ စာဖတ်သူများကို မိမိသိရှိစေလိုသည့် အသိပညာများကို ရေးသားတင်ပြနိုင်ရန် စာရေးသူကိုယ်တိုင်စာအုပ်စာပေများကို လေ့လာဖတ်ရှုပြီး လူတိုင်းအတွက် တာဝန်ကိုယ်စီရှိစေလိုသော အပြုသဘောဆန္ဒဖြင့် ရေးသားတင်ပြရခြင်းဖြစ်သည်။
ပအိုဝ်;မူပေ,
စန္တာ;ခမ်း
Like On Facebook
Follow On Twitter
Subscribe On RSS