Thursday, March 14, 2019

ပိုမိုပီပြင်သောပအိုဝ်းအလှယဉ်ကျေးမယ် ပြိုင်ပွဲဆီသို့

တောင်ကြီး၊ ၂၀၁၉ ခုနှစ်၊ မတ်လ (၁၅)ရက်

Photo - Credit

မြန်မာနိုင်ငံတွင် တိုင်းရင်းသားလူမျိုးပေါင်း(၁၃၅)မျိုးရှိသည့်အနက် ပအိုဝ်းလူမျိုးလည်းအပါအဝင် ဖြစ်သည်။ တိုင်းရင်းသားမျိုးနွယ်စုအများစုက ၄င်းတို့၏ စာပေနှင့်ယဉ်ကျေးမှု၊ ရိုးရာဓလေ့ထုံးတမ်းတို့ကိုကိုယ်ပိုင်ပြဌာန်းထားကြသည်။ ထိုသို့သောရိုးရာယဉ်ကျေးမှုကိုထိန်းသိမ်းစောင့်ရှောက်နိုင်ရန်အတွက် တိုင်းရင်းသားမျိုးနွယ်စု၏ နေ့ထူးနေ့မြတ်ဖြစ်သောအမျိုးသားနေ့၊ ပြည်နယ်နေ့ စသည်ဖြင့် ထားရှိခဲ့ကြသည်။ ထိုနေ့မျိုးတွင် မိမိတို့ရိုးရာအစားအစာ၊ ရိုးရာအဝတ်အစားတို့ကိုခင်းကျင်းပြသထားလေ့ရှိသည်။

ပအိုဝ်းအမျိုးသားနေ့ပွဲတော်သည် ရိုးရာအက၊ ခေတ်ပေါ်အက၊ ရိုးရာအတီးအမှုတ်တူရိယာစသည် ဖြင့်  ရိုးရာပေါင်းစုံဖေါ်ပြပေးသောပွဲတော်ဟုလည်းသတ်မှတ်နိုင်ပါသည်။ ပအိုဝ်းအဖွဲ့အစည်းအသီးသီးမှလည်း၎င်းတို့၏ တစ်နှစ်တာဆောင်ရွက်ချက်များကို ပြခန်းများတွင် ခင်းကျင်းပြသထားလေ့ရှိသည်။ ပအိုဝ်းရိုးရာအသုံးအဆောင်ပစ္စည်းဖြစ်သောရိုးရာပလိုင်း၊ လွယ်အိတ်၊ ခေါင်းပေါင်း၊ အလံရင်ထိုး၊ နဂါးရင်ထိုးစသည့် အသုံးအဆောင်အမျိုးမျိုးခင်းကျင်းပြသထားသည်ကိုလည်းတွေ့နိုင်ပါသည်။ ပအိုဝ်းအမျိုးသားနေ့ပွဲတော်ကိုတစ်နှစ်ထက်တစ်နှစ် တွင်တွင်ကျယ်ကျယ် ကျင်းပနိုင်ရန်အတွက် နိုင်ငံရပ်ခြားသို့ရောက်ရှိနေသောပအိုဝ်းလူမျိုးများသည်လည်းမျိုးချစ်စိတ်ဓါတ်ကိုအရင်းခံကာမိမိရောက်ရှိရာနိုင်ငံကိုပအိုဝ်းအမျိုးသားနေ့ ဖြစ်မြောက်အောင် ကြိုးစားဆောင်ရွက်နေကြသည်ကိုလည်းတွေ့ရပါသည်။

ပအိုဝ်းအမျိုးသားနေ့ပွဲတော်ကိုစင်္ကာပူနိုင်ငံ၊ ထိုင်းနိုင်ငံ၊ ဂျပန်၊ ကိုးရီးယား၊ အမေရိကန် စသောနိုင်ငံများတွင် ထိုနိုင်ငံရောက် ပအိုဝ်းလူမျိုးများ၏ ကြိုးပမ်းဆောင်ရွက်မှုကြောင့် ကျင်းပနိုင်ခဲ့ပြီးဖြစ်သည်။ မြန်မာနိုင်ငံတွင် ပအိုဝ်းလူမျိုးအများစုနေထိုင်ရာ မြို့နယ်တိုင်းအမျိုးသားနေ့ပွဲတော်ကိုကျင်းပနိုင်ကြသည်။ ပအိုဝ်းအမျိုးသားနေ့ပွဲတော်တွင် ကြီးကျယ်ခမ်းနားစွာကျင်းပနိုင်သော မြို့နယ်အချို့မှာပအိုဝ်းအလှယဉ်ကျေးမယ် ပြိုင်ပွဲအစီအစဉ်ကိုထည့်သွင်းထားကြသည်။ ထိုအလှမယ်ပြိုင်ပွဲအစီအစဉ်ကိုတပေါင်းလပြည့်မတိုင်ခင် တစ်ရက်အလိုအဖိတ်ညတွင် ပြိုင်ပွဲထားလေ့ရှိသည်။ သို့သော်တစ်မြို့နယ်နှင့်တစ်မြို့နယ် ရက်သတ်မှတ်ချက် မတူညီကြပေ။ ပအိုဝ်းအလှယဉ်ကျေးမယ်အစီအစဉ်တွင် စိတ်ပါဝင်စားသည့် မိန်းမပျိုတိုင်းဝင်ရောက်ယှဉ်ပြိုင်နိုင်ကြသည်။

ပအိုဝ်းအမျိုးသားနေ့(ဒဲဉ်သီးဗွေ)ပွဲတော်တွင်ကျင်းပပြုလုပ်ပေးသောဒေသအလှမယ်ပြိုင်ပွဲသည် နိုင်ငံအဆင့်အထိအလှမယ်ဝင်ပြိုင်မည့်သူများအတွက် အထောက်အကူ ဖြစ်စေသည်။အလှမယ်ဝင်ပြိုင်ဖူးသောညီမငယ်တစ်ဦး၏ ပြောပြချက်အရအလှမယ်တစ်ဦးဆိုသည်မှာရုပ်ရည်တစ်ခုတည်းနှင့် မပြည့်စုံနိုင်ပေ။ အလှမယ်တစ်ဦး၏ မဖြစ်မနေလိုအပ်သောအရည်အချင်းမှာ မြင့်မြတ်သောစိတ်၊ နူးညံ့သိမ်မွေ့သော နှလုံးသား၊ ယဉ်ကျေးလိမ္မာသောကိုယ်ကျင့်တရား၊ ဗဟုသုတကြွယ်ဝသူ၊ ပေါင်းသင်းဆက်ဆံရေးကောင်းမွန်သူ၊ ရုပ်ရည်အတင့်အသင့်ရှိသူစသည့် အရည်အချင်းများနှင့် ပြည့်စုံမှသာလျှင် နိုင်ငံတကာအဆင့်နှင့် ယှဉ်ပြိုင်နိုင်မည်ဖြစ်သည်။

အလှမယ်တစ်ဦး၏ ရှိသင့်ရှိထိုက်သောအရည်အချင်းနှင့် ရုပ်ရည်သာမက စိတ်ဓာတ်ပိုင်းဆိုင်ရာတွင်ပါလှပြီးစစ်မှန်သောအလှမယ်တစ်ဦးကိုရွေးချယ်နိုင်ရန်အတွက် ပအိုဝ်းအမျိုးသားနေ့ပွဲတော်တွင် အကဲဖြတ်ဒိုင်အဖြစ် ဆောင်ရွက်မည့်သူများ(သို့မဟုတ်) အလှမယ်စာရင်းလက်ခံမည့်သူများအနေဖြင့် အလှမယ်ဝင်ပြိုင်မည့်သူများအားနာမည်စာရင်းလက်ခံချိန်တွင်မိမိအနေဖြင့် အောက်ပါအချက်အလက် များကိုထည့်သွင်းစဉ်းစားပြီး ပြုလုပ်စေချင်ပါသည်။ ထည့်သွင်းကန့်သတ်ရမည့် အချက်များမှာ
(၁) CVဖောင်ဖြင့် အမည်စာရင်းပေးသွင်းခြင်း
(၂) လူတွေ့ခေါ်ယူခြင်း(ပြိုင်ပွဲဝင်အားလုံးတစ်ရက်တည်း)
(၃) အရပ်အနိမ့်အမြင့်ကန့်သတ်ထားခြင်း
(၄) ပုဂ္ဂိုလ်ရေးဆိုင်ရာအင်တာဗျူးခြင်း
(၅) ဆန်ခါတင်ရွေးချယ်ခြင်း နှင့်
(၆) ကာလအနည်းဆုံးတစ်ပတ်ခန့် စခန်းသွင်းလေ့ကျင့်ပေးခြင်းစသည်ဖြင့် ပြုလုပ်စေလိုပါသည်။

နိုင်ငံတကာအဆင့်မှာ ပြိုင်မည်ဆိုလျှင် ဤထက်များသောကန့်သတ်ချက်များနှင့် ယှဉ်ပြိုင်ကြရပါသည်။ ဤသို့ အထက်ပါ အချက်အလက်(၆)ချက်နှင့်သာရွေးချယ်မည်ဆိုလျှင် လူမျိုးဂုဏ်သာမက နိုင်ငံ့ဂုဏ်ပါဆောင်နိုင်သောအလှမယ်တစ်ဦးရွေးထုတ်နိုင်လိမ့်မည်ဟုယုံကြည်ပါသည်။  ပြိုင်ပွဲဝင်များကို ကြိုတင်ပြင်ဆင်နိုင်ရန် အကြံပြုချက်များအနေဖြင့် (၁) မိမိစိတ်ဓာတ်ကိုပြင်ဆင်ထားရမည်၊ (၂) နိုင်ငံရေး၊ အုပ်ချုပ်ရေး၊ တိုင်းရေးပြည်ရေး၊ပညာရေး၊ ကျန်းမာရေး၊ လူမှုရေး၊ စီးပွားရေး၊ အနုပညာဆိုင်ရာဗဟုသုတများကိုလေ့လာဖတ်ရှုထားရမည်၊ (၃)အင်္ဂလိပ်ဘာသာစကားပိုင်းတွင်လည်းလေ့လာထားရမည်၊ (၄) ကျန်းမာရေး၊ စည်းကမ်းလိုက်နာရေး၊ အလှအပပိုင်းဆိုင်ရာတစ်ကိုယ်ရည် သန့်ရှင်းရေးတို့ကိုဂရုစိုက်ရမည်၊ (၅) အချင်းချင်းဖော်ရွေစွာပေါင်းသင်းဆက်ဆံနိုင်ရမည်ဖြစ်သည်။

အကဲဖြတ်ဒိုင်လူကြီးအဖြစ် ပါဝင်ဆောင်ရွက်မည့်သူများသည် အလှမယ်ရွေးချယ်ချိန်တွင် ရုပ်ရည်တစ်ခုတည်းသာ မရွေးချယ်ဘဲဥပမာအားဖြင့် (၁) မေးခွန်းကိုမဲလိပ်ဖြင့်ပြုလုပ်၍ မဲလိပ်နှိုက်ခိုင်းစေပြီးသူတို့ကျရာမဲလိပ်ထဲမှ မေးခွန်း၏အဖြေကိုဖြေဆိုစေရန်။ (၂) ဒိုင်လူကြီးတစ်ဦးဦးမှ ကြိုက်နှစ်သက်ရာအထွေထွေဗဟုသုတမေးခွန်းမေးရန် စသည်ဖြင့် ပြုလုပ်ဆောင်ရွက်သင့်ပါသည်။ Culture Show လျှောက်ချိန်တွင် စကားလုံးများစွာ မမိတ်ဆက်စေဘဲနာမည်၊ နေရပ် ၊ ပညာအရည်အချင်းတို့ကိုသာမိတ်ဆက်စေ၍ အချိန်ဖြစ်သတ်မှတ်ပြီးဆောင်ရွက်စေလိုပါသည်။

အချုပ်အားဖြင့်ဆိုသော်  အထက်ပါအကြောင်းအရာများကို လက်တွေ့ အသုံးပြု မည်ဆိုပါက ပအိုဝ်းအလှမယ် ဝင်ပြိုင်မည့်သူများ၊ ဒိုင်အဖြစ်တာဝန်ပေးအပ်ခြင်းခံရသူများအဖို့ များစွာအသုံးဝင်ပါသည်။ ပအိုဝ်းအနာဂတ်ဂုဏ်ဆောင်မည့် အလှမယ်လေများပေါ်ထွက်လာစေရန် ရည်ရွယ်ကာဒိုင်အဖြစ်ပါဝင်ဆောင်မည့်သူများသည် အလှမယ်ဝင်ပြိုင်မည့်သူများကိုအထက်ပါ လိုအပ်ချက်ချက်များအတိုင်းဖြည့်ဆည်းဆောင်ရွက်သွားမည်ဆိုပါက အရည်အချင်းပြည့်မီသောအလှမယ်များပေါ်ထွက်လာနိုင်မည်ဟုယုံကြည်ပါသည်။ ပအိုဝ်းအလှမယ်များမှသည် နိုင်ငံတကာအလှမယ်အဆင့်သို့ စံချိန်တင်နိုင်ရန် ရည်ရွယ်ချက်ရှိသူတိုင်း အထက်ပါအချက်အလက်များကိုသေချာလေ့လာပြီး  ပြင်ဆင်နိုင်ရန်အတွက် ရည်ရွယ်၍ရေးသားတင်ပြလိုက်ရပါသည်။

နန်းခမ်းညာ - ကောင်တန်ပင်တဝီးဒေသ
မှတ်ချက် - သွေးချင်းတို့ပွဲတော်အလှမယ်ပြိုင်ပွဲတွင် ဝင်ပြိုင်ခဲ့ဖူးသော
ညီမငယ်တစ်ဦး၏ အကြံဥာဏ်ရယူပြီးရေးသားတင်ပြခြင်း ဖြစ်ပါသည်။ 
Powered by Blogger.