ပြည်ထောင်စုသမ္မတမြန်မာနိုင်ငံတော်ကြီးသည် တိုင်းရင်းသားလူမျိုးများ(၁၃၅)မျိုး ရှိသည်ကို ပြည်ထောင်စုအစိုးရသော်လည်းကောင်း၊ ပြည်ထောင်စုအတွင်းရှိ တိုင်းရင်းသားလူမျိုးများအားလုံးက သော်လည်းကောင်း အသိအမှတ်ပြုလက်ခံပြီးဖြစ်ပါသည်။ လူမျိုးပေါင်း(၁၃၅)မျိုးထဲတွင် ပအိုဝ်းလူမျိုးသည် လူဦးရေစာရင်းအရ ရှမ်းပြည်နယ်ထဲတွင် ဒုတိယအကြီးဆုံးတိုင်းရင်းသားအုပ်စုအဖြစ် ယေဘုယျအားဖြင့် မှတ်ယူနိုင်ပါသည်။ ပအိုဝ်းလူမျိုးတို့သည် ဘာသာတရားအလွန်ကိုင်းရှိုင်းပြီး ရဟန်းသံဃာ၊ ဆရာသမား တို့၏ ဆိုဆုံးမမှုကိုနာခံတတ်ပြီးသော စည်းလုံးညီညွတ်မှုအားကောင်းသော လူမျိုးတစ်မျိုးလည်းဖြစ်သည်။ ထို့အပြင် ပအိုဝ်းလူမျိုးတို့သည် နိုင်ငံတော်အတွက် သစ္စာရှိပြီး နိုင်ငံတော်ကို အလုပ်အကျွေးပြုသည့် လူမျိုးဖြစ်သကဲ့သို့ နိုင်ငံတော်မှပြဌာန်းထားသည့် ဒို့တာဝန်အရေးသုံးပါးများကိုလည်း မည်သည့်အစိုးရလက်ထက်၌ပင်ဖြစ်စေ အစဉ်အမြဲ လိုက်နာကျင့်သုံးလာခဲ့ပါသည်။ အခြားသော ညီနှောင်တိုင်းရင်းသားလူမျိုးများနှင့်လည်း သဟဇာတဖြစ်အောင် ပေါင်းသင်းနေထိုင်ကြပြီး စိတ်ထားမွန်မြတ်လွန်းသည့် လူမျိုးဖြစ်ပါသည်။
ပအိုဝ်းလူမျိုးတို့၏ သမိုင်းကြောင်းအကျဉ်းကို ပြန်ကြည့်ရမည်ဆိုလျှင် ခရစ်သက္ကရာဇ် ၁၀၅၇-ခုနှစ် သုဝဏ္ဏဘူမိသထုံကို အနော်ရထာမင်း တိုက်ခိုက်သိမ်းပိုက်ပြီးနောက် အချို့သောပအိုဝ်းလူမျိုးတို့သည် အချို့သည် သထုံမှအဖွဲ့(၃)ဖွဲ့ဖြင့် အုပ်စု(၉)စုခွဲကာ မြန်မာနိုင်ငံ အနှံ့အပြားတွင် ရေကြည်ရာ၊ မြက်နုရာသို့ ပြောင်းရွှေ့နေထိုင်ခဲ့ကြသည်။ ထိုကဲ့သို့ ပြန့်နှံ့စွာနေထိုင်၍ အရှေ့ကုန်းပြင်မြင့်တွင်ရောက်ရှိလာသည့် ပအိုဝ်းလူမျိုးအချို့တို့သည် တောင်ကုန်းတောင်တန်းများကို အမှီတဟဲပြု၍ တောင်ယာလုပ်ငန်း၊ သနပ်ဖက်လုပ်ငန်းများကိုလုပ်ကိုင်စားသောက်ကြပါသည်။ အဆိုပါ အရှေ့ကုန်းပြင်မြင့်တွင်နေထိုင်သည့် ပအိုဝ်းလူမျိုးတို့သည် ပဒေသရာဇ်စနစ်၏ ဖိနှိပ်မှုဒဏ်ပေါင်းစုံကိုခံခဲ့ကြရပြီး နောက်ဆုံးမခံနိုင်တော့သည့်အချိန်တွင် “မတရားသည့်အခွန်တော်လှန်ရေး”မှစပြီး ပအိုဝ်းလူမျိုးတို့သည် မိမိတို့ရသင့်ရထိုက်သည့်အခွင့်အရေးများ မဆုံးရှုံးရလေအောင် တရားသောနည်းလမ်းများဖြင့် တော်လှန်ရေး လုပ်ငန်းများကိုလုပ်ဆောင်ရင်း ၁၉၉၁-ခုနှစ်တွင် နိုင်ငံတော်နှင့် အပစ်ခတ်ရပ်စဲ၍ ဒေသဖွံ့ဖြိုးရေးလုပ်ငန်းများကို တစိုက်မတ်မတ် ကြိုးစားလုပ်ဆောင်အကောင်အထည်ဖော်လာခဲ့သည်မှာ ယနေ့တိုင်ပင်ဖြစ်သည်။ ပအိုဝ်းအမျိုးသားခေါင်းဆောင်ကြီးများနှင့် လုပ်ဖော်ကိုင်ဖက်အားလုံးတို့သည် ပအိုဝ်းပြည်သူအပေါင်းတို့နှင့် ပူးပေါင်းကာ မြန်မာနိုင်ငံ၏ ခေတ်စနစ်အမျိုးမျိုးတွင် စည်းလုံးညီညွှတ်စွာ တွန်းလှန်ခဲ့ကြသောကြောင့် ၁၉၄၈-ခုနှစ်တွင် ပအိုဝ်းဒေသ၏ဒေသန္တရအုပ်ချုပ်ရေးစနစ် အဖြစ်သော်လည်းကောင်း၊ ၁၉၉၁-ခုနှစ်တွင် ပအိုဝ်းအမျိုးသား ထိန်းချုပ်နယ်မြေအဖြင့် အထူးဒေသ(၆)ကို သော်လည်းကောင်း၊ ၂၀၀၈-ဖွဲ့စည်းပုံအခြေခံ ဥပဒေအရ ယခုလက်ရှိပအိုဝ်းကိုယ်ပိုင်အုပ်ချုပ်ခွင့်ရဒေသကို သော်လည်းကောင်း ရရှိပိုင်ဆိုင်လာခဲ့ပါသည်။ ဤကဲ့သို့ ရရှိလာခြင်းသည် ရော့ယူဆိုပြီး ရယူခြင်းမျိုးမဟုတ်ပဲ သွေးနှင့်ချွေးများရင်းပြီး ပူးပေါင်းလုပ်ဆောင်မှု အားကိုအသုံးပြု၍ ရယူခြင်းသာဖြစ်သည်။
ပအိုဝ်းလူမျိုးတို့ စည်းလုံးညီညွတ်မှုအားကောင်းသည့် လူမျိုးဖြစ်သည်ကို သမိုင်းကြောင်းအားဖြင့် ထင်ရှားစွာ တွေ့နိုင်ပါသည်။ သို့သော်ငြားလည်း အဖြူထည်များကို ဆေးရောင်ဆိုးလိုက်သည့် ပြောင်းလဲနေသည့်နိုင်ငံရေးအခြေအနေကို ခုတုံးလုပ်ပြီး နိုင်ငံရေးအမြတ်ထုတ်ချင်သော နိုင်ငံရေးအစာမကြေသည့် သူတွေကြောင့် ပအိုဝ်းလူမျိုးတို့ရသင့်ရထိုက်သည့်အခွင့်အရေးများဆုံးရှုံခဲ့ရသည်မှာ၂၀၁၅ ရွေးကောက်ပွဲ အပြီးတွင် အကျိုးခံစားခဲ့ရပြီးဖြစ်ပါသည်။ ၂၀၁၅ ရွေးကောက်ပွဲတွင် ပအိုဝ်းလူမျိုးများအတွက် ထိချက်နာခဲ့ရသည်မှာ ပါတီကွဲခြင်းပြဿ နာနှင့် မဲမရခြင်းပင်ဖြစ်ပြီး ပါတီကွဲခြင်းကြောင့် ကြားကားခရီးသည်များခဲ့သည်။ ကြားကားဆွဲသည့်ပြဿ နာများကြောင့် လွှတ်တော်တွင် ကိုယ်စားပြုမှုများ မပါဝင်နိုင်တော့သည့် အခြေအနေသို့ပင် ဖြစ်သွားခဲ့ပါသည်။ လွှတ်တော်တွင် မိမိတို့လူမျိုးကို ကိုယ်စားပြုမည့်အမတ်ဦးရေ နည်းပါးခြင်းသည် မိမိတို့ရသင့်ရထိုက်သည့်အခွင့်အရေးများကို ထိုက်သင့်သလောက်မရရှိတော့ပေ။ မည်သို့ပင် ဆိုစေကာမူ ၂၀၁၀၊ ၂၀၁၅ ရွေးကောက်ပွဲကြီးသည် အတိတ်မှာပင် ပုံပြင်သဖွယ် ကျန်ရစ်ခဲ့ပြီး ဖြစ်သည်။
ထို့ကြောင့် ပြည်သူများမှ နေ့စဉ်ခံစားနေရသော အခြေခံစားဝတ်နေရေးပြဿ နာများ၊ ပြည်သူများအတွက် ပုံမှန်ဈေးကွက်ရှိသော စိုက်ပျိုးရေးထွတ်ကုန်များ စသည့် ပြည်သူများ၏ အခြေခံလိုအပ်ချက်များကို အားသွန်ခွန်စိုက် ဖော်ဆောင်ပေးနိုင်ရန်အတွက် ကွဲပြားခြားနားမှုများ၊ ပါတီစွဲများ၊ ပုဂ္ဂိုလ်စွဲများကို မေ့ထား၍ “အမြင်မတူ ငါ့ရန်သူ” ဆိုသည့်သဘောထားမျိုးမထားပဲ နိုင်ငံရေးအဖွဲ့အစည်းများ၊ လူငယ်အဖွဲ့အစည်းများအားလုံးတို့ပူပေါင်းကာ မိမိတို့ရရှိပြီးအခွင့်အရေးများကို ဆက်လက်ထိန်းသိမ်းနိုင်ရန်နှင့် ပအိုဝ်းတစ်မျိုးသားလုံးတို့အတွက် ရသင့်ရထိုက်သည့်အခွင့်အရေးများကို ရရှိနိုင်ရန်အတွက် မကြာမီ ပြည်ထောင်စုသမ္မတမြန်မာနိုင်ငံတွင် ကျင်းပပြုလုပ်တော့မည့် ၂၀၂၀-ခုနှစ် ပါတီစုံဒီမိုကရေစီ ရွေးကောက်ပွဲတွင် မျိုးချစ်စိတ်ကိုအရင်းခံကာ မိမိပအိုဝ်းလူမျိုးတို့၏ ဘုံရည်မှန်းချက်များဆီသို့ အရောက်သွားနိုင်ရန်အတွက် တွဲလက်မဖြုတ် ပူးပေါင်းလုပ်ဆောင်ရန် အချိန်ကျရောက်ပြီဖြစ်သည်။
ခွန်စွစ်ခမ်း၊ တောင်ကြီး။
Like On Facebook
Follow On Twitter
Subscribe On RSS