မောက်မယ်ဒေသ ပအိုဝ်းတစ်မျိုးသားလုံးဆိုင်ရာ အမျိုးသားအဆင့်နိုင်ငံရေးဆွေးနွေးပွဲ (အကြို) ကျင်းပ

တောင်ကြီး၊ ၂၀၁၇ ခုနှစ်၊ ဖေဖော်ဝါရီလ (၇) ရက်

ပအိုဝ်းတစ်မျိုးသားလုံးဆိုင်ရာအမျိုးသားအဆင့်နိုင်ငံရေးဆွေးနွေးပွဲ (အကြို) ကို မောက်မယ်မြို့နယ်၊ ၀မ်းမတ်ကျေးရွာ၊ ၀မ်းမတ်ဘုန်းတော်ကြီးကျောင်း၌ ၂၀၁၇ ခုနှစ်၊ ဖေဖော်ဝါရီလ (၆) ရက် တနလာင်္နေ့၊ နံနက် (၉း၃၀) အချိန်တွင် စတင်ကျင်းပကြောင်းသိရှိရပါသည်။

အဆိုပါဆွေးနွေးပွဲသို့ ပအိုဝ်းအမျိုးသားလွှတ်မြောက်ရေးအဖွဲ့ချုပ်(PNLO)၊ ဒု- ဥက္ကဌ ဗိုလ်မှူးတန်ခွန်သူရိန် မှ အဖွင့်အမှာစကားပြောကြားခဲ့ပြီး NCA ပေါ်ပေါက်လာပုံနှင့် NCA ကိုအခြေခံသော ငြိမ်းချမ်းရေးလုပ်ငန်းစဉ်များ၊ UPDJC နှင့် အမျိုးသားအဆင့်နိုင်ငံရေးဆွေးနွေးပွဲဖြစ်ပေါ်လာပုံ၊ ပအိုဝ်းတစ်မျိုးသားလုံးဆိုင်ရာ အမျိုးသားအဆင့်နိုင်ငံရေးဆွေးနွေးပွဲအသီးသီးဖြစ်ပေါ်လာပုံအဆင့်ဆင့်ကို ခွန်ထွန်းတင်၊ စောခွန်ကျော်ဝင်း၊ ခွန်ဆောင်းရွှေတို့က အကျယ်တ၀င့်ရှင်းလင်းတင်ပြခဲ့ကြောင်း၊ Panel Discussion များကို ခွန်သောမတ်၊ ခွန်ကျော်ဆွေ၊ ခွန်ဆောင်းရွှေ၊ နန်းခမ်းဗွာ၊ (Moderator) ခွန်လှစိုးတို့က ဆွေးနွေးပေးခဲ့ကြောင်း၊ Group Discussion များကိုလည်း ဆွေးနွေးပေးခဲ့ကြောင်း၊ ပအိုဝ်းတစ်မျိုးသားလုံးဆိုင်ရာ အမျိုးသားအဆင့် နိုင်ငံရေးဆွေးနွေးပွဲသို့ တက်ရောက်မည့် မောက်မယ်ဒေသ လူထုကိုယ်စားလှယ် (၅) ဦးကိုလည်း ရွေးချယ်ပေးခဲ့ကြောင်း၊ ဒေသခံလူထုကိုယ်စားလှယ် ဝေးခွန်ဆာ က နိဂုံးချုပ်အမှာစကား ပြောကြားပေးခဲ့ကြောင်း သိရပါသည်။

“ ဒီလိုနိုင်ငံရေးဆွေးနွေးပွဲ (အကြို) လုပ်ဆောင်ပေးတာဟာ ပြည်သူလူထုများ နိုင်ငံရေးအမြင်ဗဟုသုတတွေ သိရှိလာမယ်။ ပအိုဝ်းလူမျိုးများရသင့်ရထိုက်တဲ့အခွင့်အရေးကို ရနိုင်မယ်လို့လည်း မျှော်လင့်ပါတယ် “ ဟု ဒေသခံလူထုကိုယ်စားလှယ် ခွန်နေအောင် က ပြောကြားကြောင်းသိရှိရပါသည်။ ထိုအခမ်းအနားများကို ဒေသခံလူထုကိုယ်စားလှယ် (၄၀၀) ကျော်တက်ရောက်ကြောင်း သတင်းရရှိပါသည်။

နန်းနေင်းခံ