တောင်ကြီး၊ ၂၀၁၅ ခုနှစ်၊ မေလ (၈) ရက်
ဟိုပုံးမြို့နယ် ပြည်သူ့လွှတ်တော် ကိုယ်စားလှယ် ဦးခွန်သိန်းဖေသည် ၂၀၁၅ ခုနှစ်၊ မေလ (၆) ရက်နေ့၌ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဟိုပုံးမြို့နယ်ရှိ နောင်တောင်းပရဟိတကျောင်းတွင် ဘုန်းတော်ကြီးများ ဖွင့်လှစ်ပေးသာ ဗုဒ္ဓဘာသာ ယဉ်ကျေးမှု စွမ်းရည်မြှင့်သင်တန်းသို့ တက်ရောက်လျှက်ရှိသော သင်တန်းသား၊ သင်တန်းသူများအား ရင်းရင်းနှီးနှီး သွားရောက်တွေ့ဆုံ အားပေးစကား ပြောကြားခဲ့ကြောင်း သိရှိရပါသည်။
ထိုသို့ သွားရောက် တွေ့ဆုံရာတွင် လွှတ်တော်ကိုယ်စားလှယ် ဦးခွန်သိန်းဖေက ယခုလို ရပ်ရွာပေါင်းစုံ၊ ဒေသပေါင်းစုံမှ သင်တန်းသား/သူများကို တွေ့ဆုံရသည်မှာ မိမိအနေနှင့် ၀မ်းသာအားရမိပါကြောင်း၊ မိမိဘ၀တွင် ထိုစဉ် ပအိုဝ်းအမျိုးသားအဖွဲ့ချုပ် (PNO) ၏ တာဝန်ပေးအပ်ချက်အရ လက်နက်ကိုင်ဘ၀တွင် ရှင်သန်ခဲ့ရကြောင်း၊ မိမိငယ်စဉ်ဘ၀တွင် အင်းလေး နန်းပန် ပရဟိတကျောင်းတွင် ပညာသင်ယူခဲ့ရကြောင်း၊ မိဘများက ငွေကြေးအဆင်မပြေ၍ တက္ကသိုလ် ကျောင်းသားဘ၀တွင် အများထောက်ပံ့မှုဖြင့် ပညာသင်ယူခဲ့ရကြောင်း၊ ပြည်ထောင်စုမြန်မာနိုင်ငံတွင် အစိုးရထုတ်ပြန်ချက်အရ တိုင်းရင်းသား (၁၃၅) မျိုး နေထိုင်လျက်ရှိကြောင်း၊ ၄င်းတိုင်းရင်းသားလူမျိုးများထဲတွင် မိမိတို့ပအိုဝ်းလူမျိုးသည် သတ္တမမြောက် လူဦးရေအများဆုံးဖြစ်ကြောင်း၊ မြန်မာနိုင်ငံတွင် ဗုဒ္ဓဘာသာ သာသနာ ထွန်းလင်းလာသည်မှာ မိမိတို့ ပအိုဝ်းလူမျိုးများနှင့် ဆက်စပ်နေသည်ဟု သမိုင်းကြောင်းရှိခဲ့ကြောင်း၊ ပအိုဝ်းလူမျိုးများသည် မြန်မာနိုင်ငံနေရာ အနှံ့အပြားတွင် နေထိုင်လျက်ရှိကြောင်း၊ မြန်မာနိုင်ငံတွင် နေထိုင်သော တိုင်းရင်းသားများသည် ခေတ်အဆက်ဆက် ကပေးသော ကံဆိုးမှုများနှင့် ကြုံတွေ့ခဲ့ရကြောင်း၊ အင်္ဂလိပ်၊ ဂျပန်တို့၏ ကိုလိုနီကျွန်ပြု အုပ်ချုပ်မှုကို ခံခဲ့ရသည့်အပြင် ရောင်စုံသောင်းကျန်းမှု ဟုခေါ်သော ပြည်တွင်းစစ်ဒဏ်ကိုလည်း ခံခဲ့ရကြောင်း၊ ထိုစနစ်ဆိုးကြီးထဲတွင် မိမိတို့ အမျိုးသားခေါင်းဆောင်ကြီးများ၏ အတွေးအခေါ် မှန်ကန်စွာ ဦးဆောင်လမ်းပြမှုကြောင့် မိမိတို့လူမျိုးများသည် အခြားတိုင်းရင်းသားများ အလယ်တွင် ထင်ထင်ရှားရှား တည်ရှိနေကြောင်း၊ မိမိဘ၀အကြောင်းနှင့် ခေတ်အဆက်ဆက်က မြန်မာ့နိုင်ငံရေး အခြေအနေများကို အကျယ်တ၀င့် ပြောကြားသွားပါသည်။
ဆက်လက်၍ မြန်မာနိုင်ငံအရေးနှင့် ပတ်သက်၍ မြန်မာနိုင်ငံတွင် သဘာဝသယံဇာတ ပေါကြွယ်ဝလှကြောင်း၊ ယခုလက်ရှိမြန်မာနိုင်ငံသည် နိုင်ငံတကာနှင့်ယှဉ်ကာ အဘက်ဘက်မှ ပြုပြင်ပြောင်းလဲ နေပြီဖြစ်ကြောင်း၊ ဒီမိုကရေစီစနစ် ကျင့်သုံးလာသည်နှင့် အညီ မိမိတို့ ပအိုဝ်းလူမျိုးများသည်လည်း ခေတ်စနစ် ပြောင်းလဲလာမှုအပေါ် ပြောင်းလဲနေထိုင်တတ်ရန် လိုအပ်ကြောင်း၊ ထိုကြောင့် မိမိတို့လူမျိုးသည် အတွေးအခေါ်နှင့် အတတ်ပညာရှိရန် လိုအပ်ပြီဖြစ်ကြောင်း၊ ယခုလက်ရှိ မိမိသည် ဟိုပုံးမြို့နယ် ပြည်သူ့လွှတ်တော် ကိုယ်စားလှယ် အဖြစ် တာဝန်ထမ်းဆောင်သည်မှာ လွှတ်တော်သက်တမ်း (၄) နှစ်ရှိပြီဖြစ်ကြောင်း၊ မိမိတို့လွှတ်တော်၏ အဓိကတာဝန်မှာ ဥပဒေပြုခြင်းဖြစ်ကြောင်း၊ ယခုလက်ရှိ မြန်မာနိုင်ငံတွင် အာဏာကြီး (၃) ရပ်ဖြစ်သော ဥပဒေပြုရေး၊ အုပ်ချုပ်ရေး၊ တရားစီရင်ရေး စသည့် မဏ္ဍိုင်ကြီး (၃) ရပ်ဖြင့် အုပ်ချုပ်နေသည်ဖြစ်ကြောင်း၊ မိမိတို့လွှတ်တော်သည် အစိုးမှတင်သွင်းလာသော စီမံကိန်းများ၊ ရသုံးမှန်းခြေငွေစာရင်းများကို စီစစ်ပေးရကြောင်း၊ မိမိတာဝန်ယူသော လွှတ်တော်ကိုယ်စားလှယ် သက်တမ်းကာလတွင် ပြည်သူများ၏ လိုအပ်ချက်များကို အတတ်နိုင်ဆုံး ဆောင်ရွက်ပေးခဲ့ပါကြောင်း၊ ထိုသို့ဆောင်ရာတွင် အဓိကဖြစ်သော လမ်းပန်းဆက်သွယ်ရေးကို ဦးစားပေး ဆောင်ရွက်ခဲ့ပါကြောင်း ပြောကြား သွားပါသည်။
ထို့နောက် သင်တန်းသား/သူများမှ နိုင်ငံရေး၊ ဖွံ့ဖြိုးရေးနှင့် ပတ်သက်သော မေးမြန်းချက် များကို ပြန်လည်ဖြေကြားပြီး ရဟန်းသံဃာများအား ပအိုဝ်းအမျိုးသားအဖွဲ့ချုပ် (PNO) ဗဟိုဌာနချုပ်ရုံးမှ ထုတ်ဝေသော စွမ်းရည်မြှင့် သင်တန်းလက်စွဲ စာအုပ်များကို ကပ်လှူခဲ့ပါကြောင်း သိရှိရပါသည်။
ခွန်ထင်းလေအောင်း
Like On Facebook
Follow On Twitter
Subscribe On RSS