တိုင်းရင်းသားလူမျိုးတိုင်းသည် ရိုးရာဓလေ့ထုံးတမ်း အစဉ်အလာများ ကိုယ်စီရှိကြသည်။ ၎င်းလူမျိုးတို့ အုပ်စုထဲမှ ပအိုဝ်းတိုင်းရင်းသားလူမျိုး၏ ရိုးရာဓလေ့အစဉ်အလာကို အနည်းငယ်မျှဝေပေးလိုပါသည်။ ပထမဆုံးအနေနှင့် ပအိုဝ်းရပ်ရွာဒေသ၏ အုပ်ချုပ်မှုပုံစံ စည်းကမ်းချက်တွေကို မျှဝေပေးလိုက်ပါသည်။ ရပ်ရွာထဲမှာ ရွာသမာဓိကြီးများ၊ ရွာသူကြီး၊ လူငယ်ခေါင်းဆောင် အမျိုးသားတစ်ဦး အမျိုးသမီးတစ်ဦး အဆင့်များ သတ်မှတ်ပြီး ကျေးရွာနေလူထုများက အထက်ပါ ပုဂ္ဂိုလ်များကို ရွေးချယ်ကာ တာဝန်ပေးအပ် ကြသည်။ ရွာသူကြီးမှအစ ကျေရွာဥက္ကဌများ၊ ကျေးရွာအုပ်စု ၊ မြို့နယ်၊ တိုင်း ဗဟိုအဆင့်ရှိလူကြီးများကို ဒီမိုကရေစီ နည်းလမ်းများဖြင့် ရွေးချယ်တင်မြောက်ကြသည်။ ပအိုဝ်းတိုင်းရင်းသားများသည် နိုင်ငံရေး အုပ်ချုပ်ရေးထက် မိမိ၏ ၀မ်းစာရေးကို စိတ်အားသန်ကြသည်။ ဥပဒေဘောင်အတွင်းတွင်သာ အေးချမ်းစွာ အလုပ်လုပ်ကိုင်လိုကြသည်။ မကောင်းမှု ဒုစရိုက်များကို အလွန်ရွံမုန်းတီးကြသည်။
ကျေးရွာများထဲတွင် ရွာသူကြီး၏ သြ၀ါဒများကို နာခံကြသည်။ ပြဿနာတစ်စုံတစ်ခု ဖြစ်ပေါ်လာပါက ရွာသူကြီးနှင့် လူငယ်ခေါင်းဆောင်တစ်ဦးက သဘာပတိအဖြစ် ဆောင်ရွက်ပြီး ငွေများတရားနိုင်ဖြေရှင်နည်းကို အသုံးမပြုဘဲ အဂတိ ရှောင်ရှားပြီး နှစ်ဦးနှစ်ဖက်ပြေလည်မှုကို အဓိက ဖြေရှင်းပေးသည်။ သာမန်ပြစ်မှုများကို ရွာအကြီးအကဲ၏ အဆုံးအဖြတ်ဖြင့်သာ ဆုံးဖြတ်သည်။ ပအိုဝ်းဒေသတွင် ဖြစ်ပွားလေ့ရှိသော လူမှုထုံးတမ်း စော်ကားမှု၊ ဖောက်ဖျက်မှုများတွင် ရွားသူကြီးများသည် အပြစ်ပေးရန်ထက် ပြုပြင်ရန်သာ အားသန်ကြသည်။ ပြစ်မှုကျူးလွန်သူကိုဆိုဆုံးမခြင်း၊ လျော်ကြေးပေးခြင်းနှင့် အပြင်းထန်ဆုံး ပြစ်ဒဏ်မှာ ကျေးရွာမှနှင်ထုတ်ခြင်း များသာ ကျင့်သုံးကြသည်။ စည်းကမ်းမလိုက်နာသူများနှင့် ပြဿနာတစ်စုံတစ်ခုကို ရွာသူရွာသားနှင့် အတူ ဖြေရှင်း၍ မရပါက ကျေးရွာမှ ဖယ်ရှားခြင်းတိုကို ပြုလုပ်ကြသည်။
ပအိုဝ်းတိုင်းရင်းသားများ၏ ယဉ်ကျေးမှုသည် အခြားယဉ်ကျေးမှုများနှင့် ရောသင့်သလောက် ရော၍နေပါသည်။ သုဝဏ္ဏဘူမိသထုံပြည်မှ ဗုဒ္ဓအယူဝါဒကို လက်ခံခဲ့ကြပြီး ဗုဒ္ဓဘာသာယဉ်ကျေးမှုအပေါ်တွင် အခြေပြုထားပါသည်။ ပအိုဝ်းဒေသ ကျေးရွာများရှိ ဘုန်းတော်ကြီးကျောင်းများ လပြည့်၊ လကွယ် နေ့ကြီးရက်ကြီးများ၊ အလှူ ဒါနပွဲများသည် ပအိုဝ်းအမျိုးသား၏ထူးခြာသော ယဉ်ကျေးမှု လက္ခဏာများပင်ဖြစ်သည်။ ပအိုဝ်းတိုင်းရင်းသားများ၏ ဘာသာရေး ကိုးကွယ်ယုံကြည်မှုများသည် အများအားဖြင့် ဗုဒ္ဓဘာသာကို ယုံကြည်ကိုးကွယ်ကြသည်။ အနည်းငယ်မျှသာ ခရစ်ယာန်ဘာသာကို ကိုးကွယ်ကြသည်။ ကြီးကျယ်ခမ်းနားသော ဘုန်းတော်ကြီးကျောင်း များကို ပအိုဝ်းဒေသတွင် တွေ့မြင်ရသည်။ ဘုရားစေတီ၊ ကျောင်းကန်၊ ဇရပ်စသော သာသနာရေးဆိုင်ရာ အဆောက်အအုံများကို ဆောက်လုပ်လှူဒါန်းကြသည်။ စေတီဘုရားများကိုလည်း တင့်တယ်စွာ ဖူးတွေ့ရမည် ဖြစ်သည်။ အခါကြီးရက်ကြီး လပြည့်၊ လကွယ်၊ ၀ါတွင်းသုံးလ နေ့ထူး၊ နေ့မြတ် အခါသမယများတွင် ဘုန်းတော် ကြီးကျောင်းနှင့် ဇရပ်၌ သီလဆောက်တည်သူများ ပြည့်ကျပ်နေတတ်ပါသည်။ ရဟန်း၊ သံဃာ၊ ဘုန်တော်ကြီးများကို ဗုဒ္ဓ ဝေယျာဝစ္စ ၊ ဓမ္မ ဝေယျာဝစ္စ သံဃာ ဝေယျာဝစ္စများကို ကျေပွန်တတ်ကြသည်အပြင် ၀ါတွင်းဝါပ၊ လပြည့် ၊ လကွယ် ၊ ဥပုသ်နေ့များတွင် ဘုန်းကြီးကျောင်းသို့ တက်ရောက်ပြီး ရွာကိစ္စနှင့် ပတ်သက်၍ ဆရာတကာများနှင့် ဆွေးနွေးတိုင်ပင်ကြသည်။
ကျေးရွာများတွင် လုပ်ငန်းခွင်ပြီး၍ဘာသာရေးနှင့် ဆိုင်သော ပွဲလမ်းသဘင်များကို ကျင်းပကြသည်။ ဗုဒ္ဓပူဇော်သည့်ပွဲ၊ ဗုဒ္ဓ၏ သားတော်အဖြစ် ခံယူသည့်ရှင်ပြုပွဲ၊ ရဟန်းခံပွဲ၊ ၀ါကျွတ်ပွဲ၊ သင်္ကြန်ပွဲများနှင့် ဗုဒ္ဓကိုရည်စူးသည့်ပွဲ များကျင်းပလေ့ရှိသည်။ ရေထွက်ဧရိယာများရှိ သဘာဝသစ်တော၊ သစ်ပင်၊ ၀ါးပင်များကို မီးရှို့ မီးလောင်ခြင်း များ မရှိရအောင် ရွာအလိုက် ကျေးရွာပိုင်သစ်တောများ သာသန၀တ္တုမြေသစ်တောများ သတ်မှတ်ပြီးမီးဘေး ကို တန်ဆောင်မုန်းလမှစ၍ ကြိုတင်ကာကွယ်ကြသည်။ အများသုံးရေတွင်း ၊ ရေကန်၊ ရေထွက် များကို အမြဲတမ်း သန့်ရှင်းစွာထားရှိကြသည်။ အိမ်တိုင်းတွင်လည်း ကျန်းမာရေးနှင့် ကိုက်ညီသော ယင်လုံအိမ်သာ ဆောက်လုပ်ပြီးသုံးသည်။ ကျေးရွာလုံခြုံရေးနှင့် ရွာ၏အရေးကိစ္စကို ဆက်သွယ်ဆောင်ရွက်နိုင်ရန်အတွက် နေ့တိုင်း(၂၄)နာရီ အလှည့်ကျရွာကင်းစောင့်ထားရှိကြပါသည်။
ပညာရေး၊ မီးရရှိရေး၊ ကျန်းမာရေး၊ တိုင်းရင်းဆေး၊ လမ်းပန်းဆက်သွယ်ရေးကိစ္စများကို ကော်မတီများဖွဲ့ပြီး ဖွံ့ဖြိုးရေးလုပ်ငန်းကို ကိုယ်ထူကိုယ်ထလုပ်ဆောင်ကြပါသည်။ ကျေးရွာအတွင်း အမှုကိစ္စပေါ်လာပါက မိမိ၏ အရေးထက် ရွာအရေးကို ဦးစားပေးကြသည်။ ပွဲလမ်းသဘင် ထိမ်မြှားမင်္ဂလာဆောင်ပွဲ၊ အသုဘပွဲများကို ရွာလုံးကျွတ် စုပေါင်းလုပ်ဆောင်ခြင်း၊ တာဝန်ခွဲယူခြင်း စသည်တို့ ပြုလုပ်ကြသည်။
ပအိုဝ်းမိဘတိုင်းသည် မိမိတို့၏ရင်နှစ်သည်းချာ သားလှရတနာများအား ရှင်ပြုနိုင်ရန်အတွက် အနှစ်နှစ် အလလကြိုးစား အလုပ်လုပ်ကာငွေကြေးစုဆောင်းကြသည်။ နှစ်စဉ်လယ်ယာလုပ်ငန်းခွင် ပြီးဆုံးအားလပ် သော အချိန်များတွင် ကျေးရွာမှ စုပေါင်း၍ ရဟန်းသာမဏေရှင်ပြုပွဲကို စည်ကားသိုက်မြိုက်စွာ ကျင်းပကြ သည်။ ထို့အတူမိမိတို့လှူဒါန်းခဲ့ကြသော ကျောင်း၊ သိမ်၊ ဇရပ်၊ ရေတွင်း၊ ရေကန် အစရှိသော အလှူဒါနများအ တွက် တစ်ပါးတည်း ရေစက်တွန်းချ ကုသိုလ်အမျှပေးဝေကြပါသည်။ ရပ်နီးရပ်ဝေးမှ မိတ်ဆွေ၊ သင်္ဂဟ အပေါင်း အသင်းများအား ဖိတ်ကြားကာဧည့်ခံကျွေးမွေးကြသည်။
လူပျို၊ အပျိုဘ၀သည် လူမျိုးတိုင်းတွင်ရှိသည်။ ပအိုဝ်းတိုင်းရင်းသားများတွင်လည်း လူပျိုလှည့်သည့်ဓလေ့ ရှိသည်။ လူငယ်များ လူပျိုလှည့်ရာတွင် မိမိရွာတွင်း၌ အပေါင်းအသင်းနှင့် လှည့်လေ့ရှိသည်။ ပြင်ပရွာ၌ အပျိုလှည့်လိုလျှင် ရွာခံကာလသားတစ်ဦးဦးက ဦးဆောင်ပေးကြရသည်။ အိမ်ရှင်လှပျိုဖြူအနေနှင့် အိမ်အလည် လာသော လူပျိုများကို သိသည်ဖြစ်စေ၊ မသိသည်ဖြစ်စေ စကားပြောပြီး ရေနွေးကြမ်း ၊ စားဖွယ် တစ်ခုခုဖြင့် ဧည့်ခံပေးရသည်။ လူပျိုလှည့်စကားပြောရာတွင် နေအိမ်အတွင်းရှိ မီးဖိုနှံဘေး၌ ၀ိုင်းထိုင်၍စကားပြောကြသည် ကများသည်။
အမျိုးသမီးနှင့် အမျိုးသားအချင်းချင်း မေတ္တာမျှကြသောအခါ အမျိုးသားမိဘနှင့် လူကြီးများက အမျိုးသမီး၏ မိဘများနှင့် လူကြီးထံသို့ သွားရောက်စေ့စပ်ကြသည်။ အမျိုးသမီးဘက်မှ သဘောတူလျှင် စေ့စပ်အောင်မြင် သည့်အနေဖြင့် လက်ဆောင်ပစ္စည်းတစ်ခုခုတင်ကြရသည်။ မင်္ဂလာလက်ထပ်ပွဲအတွက် နှစ်ဖက်သောမိဘ များက ရက်ကောင်းရက်မြတ်ရွေးပြီး ဆွေမျိုးမိတ်သင်္ဂဟများအား ဖိတ်စာကမ်းကြသည်။ လက်ထပ်ပွဲများကို အမျိုးသမီး၏နေအိမ်တွင် ကျင်းပသည်ကများသည်။ မင်္ဂလာအချိန်အခါကို နံနက် နေထွက်ချိန်မှ မွန်းတည့် ချိန်အထိသတ်မှတ်လေ့ရှိသည်။ မင်္ဂလာပွဲပြီးလျှင်ပြီးချင်း နှစ်ဖက်မိဘများ ကန်တော့ရန်၊ ကျေးရွာကာလသား ခေါင်းဆောင်ကန်တော့ရန် ၊ မင်္ဂလာပွဲပရိတ်သတ်များအား ကန်တော့ရန် ကန်တော့ပွဲများ ပြုလုပ်ကြပါသည်။ ပအိုဝ်းကျေးလက်တောရွာတွင် သတို့သား၊ သတို့သမီးများကိုယ်တိုင် နှစ်ဖက်သော ဆွေမျိုးများထံ တစ်ရွာဝင် တစ်ရွာထွက် လိုက်လံကန်တော့ရသော မင်္ဂလာပွဲအစဉ်အလာ များလည်းရှိပါသည်။
ပအိုဝ်းစာပေ ပြန့်ပွားရေးကို ရဟန်းသံဃာတော်များက ဦးဆောင်၍ ပအိုဝ်းစာပေဆရာဖြစ်သင်တန်း (ဗဟို)ကို တစ်နှစ်တစ်ကြိမ် ဦးဆောင်ကာဖွင့်လှစ်ပေးလျက်ရှိသည်။ ဤဆရာဖြစ်သင်တန်းမှ ဆင်းလာသော ဆရာ/ဆရာမများသည် ကျေးရွာအလိုက် နွေရာသီတွင် ပအိုဝ်းစာပေသင်ကြားပေးရပါသည်။ စာပေသင်ကြား ပြီးနောက် ဆုပေးပွဲအခမ်းအနားများကို စည်ကားစွာကျင်းပကာ စာအောင်ဆု ဆုပေးခြင်းများ သာမက ရွာအလိုက် ယဉ်ကျေးမှုအကများကိုလည်း ထည့်သွင်းယှဉ်ပြိုင်စေကြပါသည်။ ထို့ကြောင့် မိမိတို့ပအိုဝ်း တိုင်းရင်းသားများသည် ချစ်စရာကောင်းသော ဓလေ့ထုံးတမ်းများကို ပိုင်ဆိုင်ထားသောလူမျိုးပင်ဖြစ်ကြောင်း ရေးသားတင်ပြလိုက်ရပါသည်။
နန်းရက်ခွို,
Like On Facebook
Follow On Twitter
Subscribe On RSS