ပြည်ထောင်စုငြိမ်းချမ်းရေးညီလာခံ(သို့)၂၁ရာစုပင်လုံညီလာခံကြီးသည် မြန်မာ့နိုင်ငံရေး လောကအတွက် သက်ရောက်မှုတစ်စုံတစ်ရာဖြစ်လာစေမည်မှာ အသေအချာပင်ဖြစ်သည်။ လာမည့်သြဂုတ်လ(၃၁)ရက်နေ့ တွင် ကျင်းပမည့်(၂၁)ရာစုပင်လုံညီလာခံကြီးသည် ပြည်တွင်းငြိမ်းချမ်းရေးကိုဦးတည်ပြီး စစ်မှန်သည့် ဒီမိုကရေစီဖက်ဒရယ်ပြည်ထောင်စုကြီးကို အဓိကဖော်ဆောင်သွားရမည်ဖြစ်သည်။ စစ်မှန်သည့်ဒီမိုကရေစီ ဖက်ဒရယ်ပြည်ထောင်စုကြီးကို တည်ဆောက်မည်ဆိုပါက မိမိတို့ဒေသ၊ မိမိတို့နိုင်ငံသည် ဒီမိုကရေစီ အမှန်တကယ်ရှိနေပြီလော၊ ရှိနေလျှင်သော်မှပြည်သူနှင့်ဒီမိုကရေစီရင်းနှီးမှုရှိနေပြီလော ဒီမိုကရေစီဆိုတာ ဘာလဲ ပြည်သူတွေဂဃနဏ သိရန်လိုသည်။ အထူးသဖြင့်ပြည်တွင်းငြိမ်းချမ်းရေးမရှိဘဲ ဒီမိုကရေစီ ဖက်ဒရယ်ကိုတည်ဆောက်မည်ဆိုပါက ကောင်းကျိုးထက်ဆိုးကျိုးပိုများသွားမည်ဖြစ်သည်။ လက်ရှိမိမိတို့ ဒေသ၊ မိမိတို့နိုင်ငံအတွင်းတွင် တိုင်းရင်းသားလူမျိုးပေါင်း(၁၃၅)မျိုးစုပေါင်းနေထိုင်လျက်ရှိသည်။ ထို တိုင်းရင်းသား(၁၃၅)မျိုးတွင် လူမျိုးတမျိုးချင်းစီတွင် ကိုးကွယ်သည့်ဘာသာ၊ စာပေ၊ ယဉ်ကျေးမှု၊ ဘာသာစကား၊ ပညာရေး၊ စီးပွားရေး၊ ကျန်းမာရေး အစရှိသော ကဏ္ဍများတွင် တန်းတူအခွင့်အရေး တည်းဟူသော တိုင်းရင်းသားလူနည်းစုများအတွက် ရသင့်ရထိုက်သောအခွင့်အရေးများကိုလည်း အဓိကထည့်သွင်း စဉ်းစားရမည်ဖြစ်သည်။
တိုင်းရင်းသားများအနေဖြင့် မိမိတို့ရသင့်ရထိုက်သောအခွင့်အရေးများကို မိမိတို့ဘာသာမိမိဖန်တီးယူရမည် ဖြစ်သည်။ ထိုသို့ဖန်တီးယူရာတွင် မိမိတို့၏ရပ်တည်ချက်များသည် အစွန်းမရောက်ရန်လည်းလိုအပ်သည်။ သို့မှသာထာဝရငြိမ်းချမ်းရေးကို တည်ဆောက်နိုင်မည်ဖြစ်သည်။ ငြိမ်းချမ်းရေးဖော်ဆောင်မှုကာလတွင် တိုင်းရင်းသားအချင်းချင်ကြား ပဋိပက္ခအသွင်ဆောင်မည့် ဖန်တီးမှုမျိုးကိုလည်း အထူးရှောင်ကြဉ်ရမည် ဖြစ်သည်။ နိုင်ငံတော်အတိုင်ပင်ခံပုဂိုလ်ဒေါ်အောင်ဆန်းစုကြည်ကိုယ်တိုင် ဦးဆောင်သော အစိုးရယန္တရားကြီးသည် လက်ရှိမြန်မာ့နိုင်ငံရေး ခရီးစဉ်တွင် ပြည်တွင်းငြိမ်းချမ်းရေးကို အကောင်အထည်ဖော်နိုင်ရန် ကြိုးပမ်းလျက်ရှိပြီး (၂၁)ရာစုပင်လုံညီလာခံကြီးကိုဗဟိုပြုပြီး ပြည်သူများမျှော်လင့်တောင့်တနေသော စစ်မှန်သောပြည်ထောင်စုကြီး အမှန်တကယ်ပေါ်ပေါက်လာစေရန် ကြိုးပမ်းနေချိန်တွင် သက်ဆိုင်ရာကဏ္ဍ အသီးသီးမှတာဝန်ရှိပုဂိုလ်များ၏ တာဝန်ယူမှုတာဝန်ခံမှုသည်လည်း လွန်စွာမှအရေးကြီးပါသည်။ နိုင်ငံရေး အကူးအပြောင်း ကာလတွင်ကိစ္စရပ်တိုင်းသည် ထိလွယ်ရှလွယ်ဖြစ်နိုင်သော အခြေအနေများကြောင့် လိမ္မာပါးနပ်စွာ ကိုင်တွယ်တတ်ရန်လိုအပ်သည့်အပြင် ပြည်သူများ၏ဆန္ဒသဘောထားများကိုလည်း အထူး အလေးထားရန်အရေးကြီးပါသည်။ အနီးစပ်ဆုံးဥပမာအနေဖြင့် ဆိုရှယ်မီဒီယာတွင် ကန့်ကွက်သံများဆူညံခဲ့သည့်တောင်ကြီးမြို့ မြို့ဝင်ဆိုင်းဘုတ်ကိစ္စပင်ဖြစ်သည်။ မြို့ဝင်ဆိုင်းဘုတ်အသစ်ပြုပြင်ခြင်းသည် သာမာန် အနေဖြင့်ကြည့်မည်ဆိုပါက သိပ်မထူးဆန်းသကဲ့သို့ဖြစ်နေမည်မှာ အမှန်ပင်ဖြစ်သည်။ သို့သော် မူလဆိုင်းဘုတ်တွင် ရှိနှင့်ပြီးသော ပအိုဝ်းစာကိုပယ်ဖျက်ပြီး အစားထိုးခံလိုက်ရခြင်းသည် ပအိုဝ်းတစ်မျိုးသားလုံး၏ အသည်းနှလုံးကိုဖျက်ဆီးလိုက်ခြင်းနှင့် အတူတူပင်ဖြစ်သည်။ အကြောင်းမှာ တောင်ကြီးမြို့သည် ရှမ်းပြည် နယ်၏ မြို့တော်ဖြစ်သော်ငြားလည်း တောင်ကြီးမြို့၏အနီးတဝိုက်တွင် ပအိုဝ်းလူမျိုးများအများစုနေထိုင် သည်ကို မည်သူမျှမငြင်းနိုင်ပါ။ လူမျိုးတစ်မျိုး၏အသက်သွေးကြောသည်စာပေဖြစ်သည်။ ပအိုဝ်းလူမျိုး၏ အသက်သွေးကြောဖြစ်သောပအိုဝ်းစာပေကို ဖျက်ဆီးပစ်ခြင်းသည် ပအိုဝ်းလူမျိုးကိုသတ်လိုက်ခြင်းနှင့် အတူတူပင်ဖြစ်သည်။ မိမိတို့၏စာပေဖျက်ဆီးခံရခြင်းကိုမည်သည့်လူမျိုးကမှလက်သင့်မခံနိုင်ပါ။ ထို့ကြောင့် ပအိုဝ်းတိုင်းရင်းသားတို့၏စာပေဖျက်ဆီးခြင်းကို ပအိုဝ်းတိုင်းရင်းသားများအနေဖြင့် ပြန်လည်ကန့်ကွက် ခြင်းသည်လည်း ဒီမိုကရေစီစနစ်အရလက်ခံရမည့် အမှန်တရားတစ်ခုပင်ဖြစ်သည်။ တာဝန်ရှိပုဂိုလ်များ အနေဖြင့်လည်း မိမိတို့၏လုပ်ဆောင်မှုအပေါ်ဖြစ်လာမည့် ဆိုးကျိုးကောင်းကျိုးများကိုလည်း တာဝန်ယူမှု တာဝန်ခံမှု ရှိရန်လိုအပ်ပါသည်။ ပြည်သူလူထု၏ဆန္ဒနှင့်သဘောထားများကို အလေးထားပြီးတောင်ကြီးမြို့ မြို့ဝင်ဆိုင်းဘုတ်ကိစ္စကို ညတွင်းချင်းအကောင်အထည်ဖော် ဆောင်ရွက်ပေးခဲ့သည့်ရှမ်းပြည်နယ် အစိုးရအဖွဲ့၏ တာဝန်ယူတာဝန်ခံမှုကိုလည်း ချီးကျူးဂုဏ်ပြုရမည်ဖြစ်သည်။ ထိုနည်းတူစွာ လက်ရှိအစိုးရ အကောင်အထည်ဖော်လုပ်ဆောင်နေသော ပြည်တွင်းငြိမ်းချမ်းရေးမှသည် (၂၁)ရာစုပင်လုံညီလာခံကြီးဆီသို့ သွားရာလမ်းကြောင်းတွင် တန်းတူအခွင့်အရေးတည်းဟူသော ဒီမိုကရေစီနည်းလမ်းကျကျဖြင့် အများစု ၏ဆန္ဒကိုအလေးထားသကဲ့သို့ တိုင်းရင်းသားလူနည်းစုများ၏ဆန္ဒသဘောထားကိုလည်း အထူးအလေး ထားရမည်ဖြစ်သည်။
အချုပ်အနေဖြင့် အမှန်တကယ် စစ်မှန်သောပြည်ထောင်စုကြီးကိုတည်ဆောက်မည်ဆိုပါက တိုင်းရင်းသား အားလုံးပါဝင်ပြီး အစွန်းမရောက်သော အကောင်းမြင်ဝါဒများဖြင့်ဆွေးနွေးညှိနှိုင်းပြီး ပြည်သူများလိုလား တောင်းတနေသည့် ပြည်တွင်းငြိမ်းချမ်းရေးကို အမှန်တကယ်ဖော်ဆောင်ပြီး ထာဝရငြိမ်းချမ်းရေးကို တည်ဆောက်ကာ စစ်မှန်သောပြည်ထောင်စုသမ္မတနိုင်ငံတော်ကြီးကို အမြန်ဆုံးတည်ဆောက်နိုင်ပါစေဟု ဆန္ဒပြုလိုက်ရပါသည်။
ခြဲုင်းပေခွန်
(စန္တာခမ်း)
Like On Facebook
Follow On Twitter
Subscribe On RSS