Monday, August 8, 2016

သစ်ပင်စိုက်ပျိုးခြင်းဖြင့် ရာသီဥတုဖောက်ပြန်မှုကို ပြန်လည်ကယ်တင်ကြပါစို့

တောင်ကြီး၊ ၂၀၁၆ ခုနှစ်၊ သြဂုတ်လ (၉) ရက်



အချိန်ဟူသော စက်ဝန်းကြီးသည် အမြဲမပြတ် လည်ပတ်လျက်ရှိပြီး ထိုယန္တရားကြီးနှင့်အတူ ရာသီဥတုများသည် လည်း လိုက်လံပြောင်းလဲလျက် ရှိသည်။ မိုးရာသီရောက်ရှိလာလျှင် လူသားတိုင်း မဖြစ်မနေ လုပ်ရမည့် တာဝန် တစ်ရပ်ရှိပြီး ယင်းတာဝန်မှာ သစ်ပင်စိုက်ပျိုးခြင်းပင်ဖြစ်သည်။ လူသားများသည် တစ်ဦးတစ်ယောက်တည်းနှင့် နေထိုင်သွားလာ ရပ်တည်နိုင်ခြင်းမရှိပါ။ အသိုင်းအ၀ိုင်း၊ အဖွဲ့အစည်း၊ ပတ်ဝန်းကျင်နှင့် နေထိုင်ရသည်။ ထိုသို့ ပတ်ဝန်းကျင်အသိုင်းအ၀ိုင်းများနှင့် နေထိုင်ရသည်ဖြစ်သည့်အားလျော်စွာ မိမိ၏ အကျိုးကိုသာ ရှေးရှုမှုမပြုဘဲ မိမိနှင့်သက်ဆိုင်သည့် ပတ်ဝန်းကျင်တစ်ခုလုံးကို အကျိုးပြုနိုင်ရန် လိုအပ်ပါသည်။ ကျွန်ုပ်တို့ နေထိုင်ရာ လူ့ပတ်ဝန်းကျင်တွင် နေ့စဉ်နှင့်အမျှ မြင်တွေ့နေရသည်မှာ လူသားများ၏ အတောမသတ်နိုင်သော ၀ိသမလောဘကြောင့် သစ်တောများ အဆမတန် ပြုန်းတီးလျက်ရှိပြီး ပြုန်းတီးသွားသော သစ်တောများကို အချိန်မီ ပြန်လည်အစားထိုးမှု မပြုလုပ်နိုင်ပါက မကြာမီအနာဂတ်တွင် မိမိတို့နေထိုင်ရာ ဒေသသည် တောင်ကတုံးနှင့် ကန္တာရကမ္ဘာကြီး ဆိုက်ရောက်လာနိုင်သည့် အခြေအနေပင်ဖြစ်သည်။
ယခုလက်ရှိအချိန်တွင် စက်မှုလုပ်ငန်းများကို သိပ္ပံနည်းပညာများဖြင့် အရှိန်အဟုန်မြှင့် ဆောင်ရွက်လာသည်နှင့် အမျှ ဖွံ့ဖြိုးတိုးတက်မှုများ၊ အကျိုးဖြစ်ထွန်းမှုများ ရှိလာသည်ဟု ဆိုနိုင်သော်လည်း အခြားတစ်ဘက်တွင်လည်း ဆုတ်ယုတ်မှုများဖြစ်သည့် သစ်တောများ ပြုန်းတီးလာခြင်း၊ မြစ်ချောင်းအင်းအိုင်များ တိမ်ကောလာပြီး ခန်းခြောက်လာခြင်း၊ ရာသီဥတုဖောက်ပြန်မှုများ ဖြစ်ပေါ်လာပြီး ရှားပါးတိရိစ္ဆာန်မျိုးစိတ်များ ပျောက်ကွယ်လာ ခြင်း စသည်တို့ကို များစွာ မြင်တွေ့ရလျက် ရှိပါသည်။ ထိုကဲ့သို့ သဘာဝပတ်ဝန်းကျင် ထိခိုက်ဆုံးရှူံးမှု ဆင့်ကဲဖြစ်စဉ်များကြောင့် ရာသီဥတုဖောက်ပြန်လာပြီး မိုးကြီးခြင်း၊ မိုးသီးကြွေခြင်း၊ မိုးခေါင်ခြင်း၊ ရေရှားပါးခြင်း၊ မြေပြိုခြင်း၊ ငလျင်လှုပ်ခြင်း၊ မုန်တိုင်းကျရောက်ခြင်း စသည့် ရာသီဥတုဖောက်ပြန်မှုများ၏ ဆိုးကျိုးများ ဖြစ်ပေါ်လာပြီး ယခုနှစ်အတွင်း ကမ္ဘာ့အနှံ့ရှိ လူသားများ ခံစားရလျက်ရှိသည်ကို တွေ့မြင်ကြရပါသည်။ လူသားများ၏ အတောမသတ်နိုင်သော လောဘများကြောင့် သစ်တောများကို အကန့်အသတ်မဲ့ ခုတ်ထွင်လာ ခြင်း၊ လျှပ်စစ်ဓါတ်အားထုတ်လုပ်ရာတွင် ရေသယံဇာတ အလွန်အကျွံ အသုံးပြုခြင်း၊ စက်ရုံထုတ် အညစ်အကြေးနှင့် ကာဗွန်ဒိုက်အောက်ဆိုက်ဓါတ်ငွေ့များကြောင့် ယခု ကျွန်တော်တို့နေထိုင်ရာ ကမ္ဘာမြေကြီး၏ အသက်သည် ယဲ့ယဲ့လေးသာ ကျန်ရှိတော့သည့် အနေအထားသို့ ရောက်ရှိလာနေပြီဖြစ်သည်။
ရာသီဥတုဖောက်ပြန်မှုများကြောင့် သဘာဝဘေးအန္တရာယ်များဖြစ်သည့် ရေကြီးခြင်း၊ မိုးသီးကြွေခြင်း၊ ငလျင်လှုပ်ခြင်း၊ မုန်တိုင်းကျရောက်ခြင်း စသည်တို့ကို လူသားများ အန်တုနိုင်စွမ်းမရှိသောကြောင့် နှစ်စဉ်နှင့် အမျှ လူသားများစွာ ဆိုးကျိုးများ ကြုံတွေ့ခံစားရလျက်ရှိပါသည်။ ယခုနှစ်၏ ရာသီဥတုဖောက်ပြန်မှုသည် လွန်စွာမှ မကြုံစဖူးသော ဘေးအန္တရာယ်များ သိသာထင်ရှားမှုရှိခဲ့ပြီး ရေအရင်းအမြစ်များ ခန်းခြောက်သွားခဲ့ပါ သည်။ ရေသယံဇာတများ ခန်းခြောက်လာသည်နှင့်အမျှ လူသားများသည်လည်း တပြိုင်တည်း သောက်သုံးရေ ရရှိမှု၊ စိုက်ပျိုးရေရရှိမှုများ အခက်အခဲကြုံတွေ့လာရပြီး ထိုသို့သော ဆိုးကျိုးများသည် အသိဥာဏ်ရှိသော လူသားများ၏ လုပ်ရပ်ကြောင့်ပင်တည်း။
ရှေးယခင်တွင် မြန်မာနိုင်ငံသည် သစ်တောဖုံးလွှမ်းသော နိုင်ငံတစ်ခုဖြစ်ပြီး မိုးလေ၀သနှင့် ရာသီဥတုများ မှန်ကန်ပြီး မိုးရေချိန်များလည်း ပြည့်မှီကာ မြန်မာနိုင်ငံ၏ (၇၀) ရာခိုင်နှုန်းသော လူဦးရေများမှ သစ်သီးဝလံစိုက်ပျိုးမှုများ ဖြစ်ထွန်းခဲ့ပါသည်။ ယခင်တွင် မည်သည့်လ၏ မည်သည့်အပတ်မြောက်တွင် မိုးဝင် မည်၊ မည်သည့်လ၏ မည်သည့်အပတ်မြောက်တွင် မိုးကုန်မည် စသည့်ခန့်မှန်းချက်များ မှန်ကန်ပြီး တွက်ဆခန့်မှန်းသည့်အတိုင်းပင် စိုက်ကြပျိုးကြပါသည်။ တွက်ဆခန့်မှန်းသည့်အတိုင်းပင် မိုးဝင်မှု၊ မိုးကုန်မှု မှန်ကန်ခဲ့သည်။ အဘယ်ကြောင့်ဆိုသော် သစ်တောဖုံးလွှမ်းမှုရှိပြီး မိုးလေ၀သနှင့် ရာသီဥတုမှန်ကန်သော ကြောင့်ပင်ဖြစ်သည်။ ယခုလက်ရှိအချိန်တွင် ယခင်ကဲ့သို့ တွက်ဆခန့်မှန်းမှုများ မဆိုထားနှင့် မိုးရာသီသည် မည်သည့်လတွင် စတင်ပြီး မည်သည့်လတွင် မိုးကုန်သည်ကိုပင် မသိရှိနိုင်တော့ကာ ရံဖန်ရံခါ နွေရာသီတွင်ပင် မိုးရွာသည့်အခြေအနေပင် ဆိုးရွားမှုများ ဖြစ်ပေါ်လာခဲ့ပါသည်။ ဤကဲ့သို့ ဖြစ်ရခြင်း၏ အကြောင်းရင်းကား ကမ္ဘာတ၀န်းရှိ နှစ်စဉ်တိုးပွားလာလျက်ရှိသော လူဦးရေ၏ လိုအပ်ချက်များအရ လောင်စာထင်းအဖြစ် သော်လည်းကောင်း၊ လူသုံးပရိဘောဂပစ္စည်းအဖြစ် သော်လည်းကောင်း၊ ရွေ့ပြောင်းတောင်ယာ စိုက်ပျိုးရေးအတွက် သော်လည်းကောင်း သစ်တောများကို အကန့်အသတ်မဲ့ လွန်ကဲစွာ ခုတ်ထွင်ရောင်းချ လာခြင်းကြောင့်ပင်ဖြစ်သည်။
ထို့ကြောင့် ရာသီဥတု ဖောက်ပြန်မှုများ ထပ်မံမဖြစ်ပွားစေရန်၊ သဘာဝဘေးအန္တရာယ်များဖြစ်သော မိုးကြီးခြင်း၊ မိုးသီးကြွေခြင်း၊ ရေကြီးခြင်း၊ မုန်တိုင်းကျရောက်ခြင်း၊ ငလျင်လှုပ်ခြင်း စသည်တို့ ထပ်မံမကြုံတွေ့ရစေရန်၊ မိုးလေ၀သနှင့် ရာသီဥတုမှန်ကန်ပြီး ကောင်းမွန်သော စိုက်ပျိုးရေး ဆောင်ရွက်သွား နိုင်စေရန်အတွက် သစ်ပင်များကို စနစ်တကျ ပြန်လည်စိုက်ပျိုးပြီး ထိန်းသိမ်းစောင့်ရှောက်သွားရန် အထူးလိုအပ် ပါသည်။ သစ်ပင်ပြန်လည်စိုက်ပျိုးခြင်းနှင့် သစ်တောများ ပြုန်းတီးမှု ပြန်လည်ထိန်းသိမ်းခြင်းတို့သည် ယခုလက်ရှိအချိန်တွင် အရေးတကြီး ဆောင်ရွက်ရမည့် လုပ်ငန်းတစ်ရပ်ဖြစ်သည်။ စိုက်ပျိုးပြီးသော သစ်ပင်များ ကိုလည်း ရှင်သန်မှုရှိစေရန်အတွက် စနစ်တကျ ပြုစုစောင့်ရှောက်ပြီး နွေရာသီတွင် မီးလောင်မှုမဖြစ်စေရန် လည်း အထူးဂရုစိုက်ရန် လိုပါသည်။ လူတစ်ဦးတစ်ယောက်၏ အမှုမဲ့အမှတ်မဲ့ ဆေးလိပ်တိုမီးတစ်စ လွင့်ပစ်ရာမှ တောမီးလောင်မှုများ ဖြစ်ပွားနိုင်ပါသည်။ ထိုကဲ့သို့ မဖြစ်ရစေရန် နွေရာသီ မီးလောင်မှု မဖြစ်ပွားစေရေးဆိုင်ရာ ပညာပေးလုပ်ငန်းများ၊ သင်တန်းများ ပြုလုပ်ပေးရန် လိုအပ်ပါသည်။  သစ်ထုတ်လုပ်မှု ကိုလည်း စနစ်တကျ ခုတ်ထွင်ပြီး ခုတ်ထွင်ထားသည့် နေရာများကို အစားထိုးသစ်ပင်များ ပြန်လည်စိုက်ပျိုးရန် လိုပါသည်။
ခြုံငုံသုံးသပ်ရလျှင် သစ်ပင်သစ်တောများသည် သဘာဝပတ်ဝန်းကျင်၏ အဓိကကျသော အရင်းအမြစ်တစ်ခု ဖြစ်သည်။ သစ်ပင်သည် ရေကြီးခြင်းမှ ကာကွယ်ပေးနိုင်ခြင်း၊ ရေများ သိုလှောင်ပေးနိုင်ခြင်း၊ သန့်ရှင်းသော လေများ ထုတ်လွှတ်ပေးနိုင်ခြင်း စသည်တို့ကြောင့် လူသားများအတွက် ကောင်းကျိုးအဖြာဖြာ ပေးစွမ်းသော သဘာဝသူရဲကောင်းများသာ ဖြစ်သည်။ ထို့ကြောင့် လူသားများ၏ လူနေမှုဘ၀ အဆင်ပြေချောမွေ့စေရန်နှင့် လူသားများအတွက် ကောင်းကျိုးအဖြာဖြာ ပေးစွမ်းနေသော သစ်ပင်များကို ပြန်လည်စိုက်ပျိုးခြင်းဖြင့် ရာသီဥတုဖောက်ပြန်မှုကို ပြန်လည်ကယ်တင်ကြပါစို့ ဟု ရေးသားတင်ပြလိုက်ပါသည်။


Kka Sp

Powered by Blogger.