လွန်လေပြီးသော နှစ်ပေါင်းများစွာက လူသားတို့ဝယ် အခြေချရာ ဤကမ္ဘာလောကကြီးသည် သူတစ်လုံးကိုယ်တစ်လုံးဖြင့် အတူယှဉ်တွဲ နေထိုင်ကြရာတွင် နေ့စဉ်နှင့်အမျှ စားဝတ်နေရေး၊ လူမှုရေး ပြဿနာများ တစချင်းဖြစ်ပေါ်လာပြီး မိမိတို့လူသားအချင်းအချင်း ချစ်ချစ်ခင်ခင် ညီညီညွတ်ညွတ်ဖြင့် နေထိုင်လာနိုင်ရန်အတွက် မိမိတို့ကို အုပ်ချုပ်မင်းလုပ်ပေးမယ့်သူကို ခန့်အပ်ရန် အစည်းအဝေးပြုလုပ်ပြီး တိုင်ပင်ကြလေသည်။
ထိုအခါ မိမိတို့ထက် လူလောကကို ဦးဆုံးရောက်လာသူသည် အသက်အားဖြင့်လည်းကြီး ဂုဏဂုဏ်၊ ဝယဂုဏ်နှင့်လည်းပြည့်စုံ အကျင့်သီလသိက္ခာ သမာဓိလည်းရှိ မေတ္တာကရုဏာတို့ဖြင့်လည်းပြည့်စုံသော လူကောင်းသူကောင်းကို မိမိတို့ခေါင်းဆောင် မိမိတို့ရွာသူကြီး မိမိတို့ရဲ့မင်းကြီးအဖြစ် တပြိုင်နက်တင်မြှောက် ကြလေသည်။ မိမိတို့ကိုအုပ်ချုပ်မင်းလုပ်သောသူကို ရွာသူရွာသားများက အလုပ်အကျွေးပြုကြရပြီး နေ့စားလခလည်း ကျေကျေနပ်နပ်ပေးဆောင်ကြရလေသည်။ တိုင်းပြည်အုပ်ချုပ်မင်းလုပ်သောသူသည်လည်း ရွာသူရွာသားများ၏ ပြဿနာ ကိစ္စအဝဝတွေကို နေ့စဉ်နှင့်မျှ တရားမျှတစွာ နှစ်ဦးနှစ်ဖက်မနစ်နာစေပဲ ဖြေရှင်းပေးရလေသည်။ တိုင်းပြည်အုပ်ချုပ်မင်းလုပ်သူက အဆုံးအဖြတ်ပေးသည့်အတိုင်း ရွာသူရွာသားများလည်း လိုက်နာဆောင်ရွက်ခဲ့ကြကြောင်း မှတ်သားရဖူးလေသည်။
နောင်တွင်တိုင်းပြည်ကို အုပ်ချုပ်မင်းလုပ်မည့် လူငယ်လူရွယ်များကို အုပ်ချုပ်သူလူတန်းစားအဖြစ် ရှိထားရမည့် အရည်အချင်းကို တိုင်းသူပြည်သား လူအများရှေ့မှောက်တွင် သဘောတူဆုံးဖြတ်ခဲ့ကြလေသည်။ ထိုကဲ့သို့ အလေ့အထကောင်းများသည် ယနေ့တိုင်းပြည်ကို ဦးဆောင်နေသည့်ခေါင်းဆောင်များတိုင်အောင် ထိုနည်းနာများကို လိုက်နာကျင့်သုံး အတုယူကြရလေသည်။ “ကလေး ကလေးအထင်မသေးနဲ့ ကလေးဆိုတာလူကြီးပါပဲ ကလေးကောင်းမှ လူကြီးကောင်းမည် လူကြီးကောင်းမှ တိုင်းပြည်တိုးတက်မည်” ဆိုသည့်အတိုင်း အနာဂါတ်တိုင်းပြည်ကိုအုပ်ချုပ် မင်းလုပ်ကြမည့် ကလေးလူငယ်များကို ဘက်စုံဖွံ့ဖြိုးတိုးတက်ရေး အတွက် လူကြီးမိဘများအနေဖြင့် သွန်သင်ဆုံးမပေးရမည်။ စိတ်ဓါတ်၊ စည်းကမ်း၊ ပညာဆိုသည့်အတိုင်း ပရဟိတစိတ်ဓါတ်များ အများအကျိုးကို သယ်ပိုးလိုသောစိတ်များ အမျိုး၊ ဘာသာ၊ သာသနာကို ချစ်မြတ်နိုးသောစိတ် အမိနိုင်ငံတော် အမိတိုင်းပြည်ကို ကာကွယ်ချင်သည့်စိတ်ဓါတ်များ ထွန်းကားလာအောင် နည်းစနစ်ကျနစွာဖြင့် ကလေးသူငယ်များအား ပြုစုပျိုးထောင်ပေးကြရန် မိဘတိုင်း၊ ဆရာသမားတိုင်းမှာ တာဝန်ရှိကြသည်။
လက်ရှိတိုင်းပြည်ကို အုပ်ချုပ်မင်းလုပ်နေသူများသည် တစ်ချိန်က မိဘဆရာသမားများက ပြုစုပျိုးထောင်ပေးခဲ့သည့် လူငယ်မောင်မယ်များသာဖြစ်သည်။ ယခုလက်ရှိလူငယ်မောင်မယ်များသည်လည်း နောင်တွင် တိုင်းပြည်ကိုအုပ်ချုပ် မင်းလုပ်ကြမည့် လူငယ်မောင်မယ်များသာဖြစ်ပြီး အနာဂါတ်တိုင်းပြည်၏ လူစွမ်းကောင်းဖြစ်အောင် ယခုလူငယ် နောင်ဝယ်လူကြီး ဆိုသည့်အတိုင်း ကလေးသူငယ်တိုင်း သူတော်ကောင်းများ ဖြစ်လာစေရန် လူတိုင်းမိမိတို့ သားသမီးများကိုသွန်သင်ဆုံးမကြပါရန် တိုက်တွန်းလိုက်ရပါသည်။
ခွန်အောင်ထွိုက်ဗွေ
Like On Facebook
Follow On Twitter
Subscribe On RSS