Monday, July 24, 2017

စည်းလုံးကြစို့ ရွှေပအိုဝ်းတို့

တောင်ကြီး၊ ၂၀၁၇ ခုနှစ်၊ ဇူလိုင်လ (၂၄) ရက်


လောကတွင် မည်သည့်အဖွဲ့အစည်း မည်သည့်လူမျိုးမဆို မိမိတို့လိုလားတောင့်တသော ပန်းတိုင်သို့ရောက်ရှိနိုင်ရန်အတွက် စည်းလုံးမှုသည်အောင်မြင်မှုတိုင်း၏ သော့ချက်အခရာကျသည်ကို သိရှိပြီးဖြစ်ပါသည်။ သို့သော် စည်းလုံးရန် ဆောင်ရွက်ရာတွင် အပြောလွယ်သလောက် လက်တွေ့မူကား အလွန်ခက်ခဲ၏။

ယခု မိမိတင်ပြလိုသည်မှာ မိမိတို့ပအိုဝ်းလူမျိုးများ လိုအပ်သောပန်းတိုင်သို့ရောက်ရှိရန် လက်ရှိစည်းလုံးသည်ထက် ပို၍စည်းလုံးရန်ဖြစ်ပါသည်။ ပအိုဝ်းလူမျိုးတို့၏ စည်းလုံးမှုအားမည်မျှကောင်းသည်ကို - လွန်ခဲ့သော ၂၀၁၀-၂၀၁၅ - ခုနှစ် ပါတီစုံအထွေထွေရွေးကောက်ပွဲတွင် ပအိုဝ်းကိုယ်ပိုင်အုပ်ချုပ်ခွင့်ရဒေသ သုံးမြို့နယ်တွင် မိမိတို့ပအိုဝ်းလူမျိုး အမတ်များသာလျှင် မဲအပြတ်အသတ်အနိုင်ရရှိခြင်းကို ကြည့်ခြင်းအားဖြင့် မိမိပအိုဝ်းလူမျိုးများ၏ စည်းလုံးမှုအကျိုးရလာဒ်ပင်ဖြစ်ပါသည်။ အခြားသောမြို့နယ်များတွင် စည်းလုံးမှုအားကောင်းသော်လည်း အကြောင်းအရာတစ်ခုခုကြောင့်သာ ကပ်၍ရှုံးနိမ့်ခဲ့ပါသည်။

၎င်းတို့ကိုကြည့်ခြင်းအားဖြင့် မိမိတို့ပအိုဝ်းလူမျိုးများသည် စည်းလုံးမှုအားကောင်းသလောက် ပယောဂတစ်ခုခုကြောင့် စည်းလုံးမှုပျက်ပြားနိုင်သောအနေအထားတစ်ရပ်သို့ အချိန်မရွေး ရောက်ရှိသွားနိုင်ပါသည်။ သာဓကများကို ပြန်လှန်ကြည့်ရမည်ဆိုလျှင် ငြိမ်းချမ်းရေးမယူခင် တော်လှန်ရေးကာလ ခရစ်နှစ် ၁၉၇၃ ခုနှစ်တွင်ပြင်ပ၊ ပယောဂတစ်ခုကြောင့် ပအိုဝ်းဖြူ ၊ ပအိုဝ်းနီ ဟုနှစ်ဖွဲ့ကွဲသွားပါသည်။ ပြည်သူလူထုများလည်း အနည်းနှင့်အများကွဲသည်ကို တွေ့ရှိရသလို အယူဝါဒကြောင့်လည်း တစ်ရွာနှင့်တစ်ရွာစိတ်ဝမ်းကွဲပြီး ဘာသာရေး၊ လူမှုရေး စသည့်ကိစ္စရပ်များတွင် ပူးပေါင်းဆောင်ရွက်၍ မရတော့ဘဲစည်းလုံးမှု ပြိုကွဲသည့်အနေအထားသို့ ရောက်ရှိခဲ့ရသည်ကိုလည်း တွေ့ရှိ/သိရှိခဲ့ပြီးဖြစ်ပါသည်။

ရှင်တော်ဗုဒ္ဓဟောကြားတော်မူသော ဇာတ်တော်တစ်ခုတွင် “ဖျံနှစ်ကောင်သည် ရရှိလာသောငါးကြီးတစ်ကောင်ကို ညီညွတ်စွာဖြင့် အဝေအခွဲမတည့်၍ မြေခွေးအားဝေခွဲခိုင်းရာ အခွင့်အရေးကိုစောင့်ဆိုင်းနေသော မြေခွေးသည်လည်း ဖျံနှစ်ကောင်အား ငါး၏အခေါင်းပိုင်းနှင့် အမြီးပိုင်းတို့ကိုသာပေးပြီး ငါး၏အနှစ်သာရဖြစ်သော အသားအမျှင်တို့ကို အပိုင်သိမ်း သွားလေတော့သည်။” မ်ိမိတို့လူမျိုးသည်လည်း သူတစ်မျိုး၊ ငါတစ်မျိုးဖြင့် စည်းလုံးမှုမရှိလျှင် မိမိတို့ရမည့်အခွင့်အရေးများကို လက်လွတ်ဆုံးရုံးရမည်မှာ အသေအချာပင်ဖြစ်သည်။ ထို့ကြောင့် မိမိတို့ပအိုဝ်းလူမျိုးသည်လည်း ဤဇာတ်တော်၏သင်ခန်းစာတို့ကို အတုယူသင့်ပါသည်။ အိုင်တီနည်းပညာထွန်းကားသော ယနေ့ခေတ်တွင် ရရှိလာသောသတင်းအချက်အလက်များကို ကြောင်းကျိုးဆီလျှော်စွာ စူးစမ်းလေ့လာပြီးမှသာ ယုံသင့်ပါသည်။ ထိုသို့မဟုတ်ဘဲ တွေ့သမျှသတင်းစကားများကို ယုံကြည်လျှင် တစ်ဦးနှင့်တစ်ဦးအထင်အမြင်လွဲမှားပြီး စည်းလုံးမှုပြိုကွဲနိုင်ပါသည်။ “နွားကွဲလျှင် ကျားဆွဲမည်” ဟူသော စကားကိုလည်း အစဉ်သတိပြုရန်လိုအပ်ပါသည်။ ပုထုဇဉ်လူသားမှန်သမျှသည် မည်သူမှအမှားနှင့်မကင်းနိုင်ပါ။ လုပ်ငန်းလုပ်ဆောင်နေသော လူပုဂ္ဂိုလ်တစ်ဦး (သို့မဟုတ်) အဖွဲ့အစည်းကိုဦးဆောင်နေသော ပုဂ္ဂိုလ်တို့၏ မှားကွက်၊ဟာကွက်တို့ကို စာဖြင့်ဝေဖန် အကြံပြုသည်ဖြစ်စေ၊ အင်တာနက် Facebook ပေါ်၌ဖြစ်စေ၊ ဝေဖန်အကြံပြုတော့မည်ဆိုလျှင် ကိုယ်ရေးကိုယ်တာနှင့်ဆိုင်aသာကိစ္စရပ်များ၊ တစ်ဦးနှင့်တစ်ဦး အထင်အမြင်လွဲစေသောစာသားများ၊ စည်းလုံးညီညွတ်မှုကိုပြိုကွဲစေသောစာသားများ စသည့်အချက်တို့ကို ရှောင်ရှားရန်လိုအပ်ပါသည်။

ထိုသို့လုပ်ဆောင်မှသာလျှင် မိမိ၏ဝေဖန်အကြံပြုချက်များသည် နှစ်ဦးနှစ်ဖက် အကျိုးရှိမည်ဖြစ်ပါသည်။ ယနေ့ အင်တာနက် Facebook စာမျက်နှာပေါ်၌ အချို့လူများသည် သေချာလေ့လာမှုမရှိဘဲ တစ်စုံတစ်ဦး(သို့) အဖွဲ့အစည်းတစ်ခုခုအပေါ် မိမိ၏မကျေနပ်ချက်များကို ဝါးလုံးရှည်နှင့်ရမ်း၍ Post တင်နေကြသည်ကိုလည်း စိတ်ပျက်ဖွယ်ရာတွေ့ရှိရပါသည်။ ၄င်းအပြုအမှုများသည် မိမိတို့လူမျိုးအတွက် အပေါင်းလက္ခဏာမဆောင်ဘဲ အနုတ်လက္ခဏာဆောင်နေသည်ကိုလည်း အထူးသတိပြုသင့်ပါသည်။

ထို့ကြောင့် ယနေ့ချိန်မှစ၍ မိမိရွှေပအိုဝ်းတို့ရောက်လိုသောပန်းတိုင်(သို့) ကိုယ်ကြမ္မာကိုဖန်တီးပိုင်ခွင့်များကို ဆွတ်ခူးရရှိနိုင်ရန်အတွက် စည်းလုံးညီညွတ်မှုသည် အခြေခံအုတ်မြစ်ပင်ဖြစ်ပါသည်။ စည်းလုံးညီညွတ်မှုမရှိလျှင် မည်သည့် အောင်မြင်မှုမှ ရရှိမည်မဟုတ်ပါ။ ထို့ကြောင့် အခွင့်အရေးများကို စည်းလုံးညီညွတ်မှုအားဖြင့် ရယူကြပါစို့ဟု တိုက်တွန်းရင်း နိဂုံးချုပ်အပ်ပါသည်။

မေတ္တာဖြင့် ခွန်ဗေခြောင် လေမော်ဟေ့
Powered by Blogger.