“PNOနှင့် အလုပ်တွဲလုပ်ဆောင်ရခြင်းသည် မိမိတို့အတွက် ကံကောင်းခြင်းဖြစ်ပြီး အခြားတိုင်းရင်းသား လက်နက်ကိုင်များသည်လည်း PNO စံနမူနာများကို ယူသင့်ကြောင်း” ဒေါ်ဆိုင်းရော် ဆို

တောင်ကြီး၊ ၂၀၁၇ ခုနှစ်၊ အောက်တိုဘာလ (၁၂) ရက်

ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့နယ်မှ ပအိုဝ်းအမျိုးသားပိုင် နောင်ခမ်းစိုက်ပျိုးရေးကွင်း အတွင်းရှိ (၁၂-၁၀-၂၀၁၇)ခုနှစ်တွင် ပြုလုပ်ကျင်းပ သော နောင်ခမ်းဖွံ့ဖြိုးရေးရိပ်သာ ပေးအပ်လွှဲပြောင်းပွဲ အခမ်းအနားတွင် မေတ္တာဖောင်ဒေးရှင်း နာယက ဒေါ်ဆိုင်းရော်က  ပြောကြားခဲ့သည်။

အဆိုပါ အခမ်းအနားတွင် “အဘဦးအောင်ခမ်းထီရဲ့အရပ်အောက်မှာဘဲ ပအိုဝ်းတွေဟာ ကိုယ်ပိုင်အုပ်ချုပ်ခွင့်ရဒေသဦးစီးအစိုးရအနေနဲ့ ရပ်တည်နေပါတယ်။ ၁၉၉၁ ခုနှစ် ငြိမ်းချမ်းရေးရယူပြီးသည့် နောက်ပိုင်း ငြိမ်းချမ်းစွာ ရပ်တည်နိုင်ခဲ့တယ်။ ကျွန်မတို့ ငြိမ်းချမ်းရေးရယူခဲ့တဲ့ တိုင်းရင်းသားတွေထဲမှာ ကိုယ့်ဒေသ ကိုယ်ပိုင်အုပ်ချုပ်ခွင့်ရမှ အုပ်ချုပ်နိုင်ခဲ့တာဟာ PNO တစ်ဖွဲ့သာ ရှိပါတယ်။ အဲတာကြောင့် ကျမအနေနဲ့ ပအိုဝ်းတွေနဲ့အတူ အလုပ်လုပ်ရတာ သူတို့ထက် ပိုချင်ပိုနေလိမ့်မယ်၊ သူတို့နဲ့ လုပ်ဆောင်ရတာ ဂုဏ်လည်းယူတယ်၊ ၀မ်းလည်းသာတယ်။ ဒါဟာ ကျမတို့ ကံကောင်းခြင်းဘဲဖြစ်တယ်။ တစ်ဖက်မှာလည်း အခြားတိုင်းရင်းသားလက်နက်ကိုင်တွေအနေ PNOရဲ့ စံနမူနာကို ယူသင့်တယ်ဆိုတဲ့အကြောင်း ဒီနေရာကနေ ပြောချင်ပါတယ်” ဟု ၎င်းက ဤသို ပြောကြားခဲ့ခြင်း ဖြစ်သည်။

ပအိုဝ်းဒေသဖွံ့ဖြိုးတိုးတက်ရန် ရည်ရွယ်၍ ပအိုဝ်းအမျိုးသားအဖွဲ့ချုပ်(PNO)နှင့် မေတ္တာဖောင်ဒေးရှင်း သည် ၂၀၀၂တွင် ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဟိုပုံးမြို့နယ်၊ နမ့်ခုတ်ကျေးရွာ၌ တွေ့ဆုံဆွေးနွေးခဲ့ပြီး ၂၀၀၃ခုနှစ်မှစတင်၍ အတူလက်တွဲလုပ်ဆောင်ပြီးနောက် (၁၀၄)ဧကအကျယ်အ၀န်းရှိသော နောင်ခမ်းဖွံ့ဖြိုးရေး ရိပ်သာကို တည်ဆောက်ခဲ့ကြောင်း၊ ယခုအချိန်တွင် အဆိုပါရိပ်သာ၌ ကျေးရွာများကို အကျိုးပြုနိုင်မည့် ဒေသခံလူငယ်ခေါင်းဆောင် သင်တန်းသူ/သား အယောက်(၃၀၀)ကျော်ကို မွေးထုတ်နိုင်ခဲ့ကြောင်း အဆိုပါအခမ်းအနားတွင် သိရသည်။

ထို့ပြင် ယခု နောင်ခမ်းဖွံ့ဖြိုးရေးရိပ်သာကို ပအိုဝ်းလူမျိုးတွေကိုယ်တိုင်စီမံအုပ်ချုပ်ခွင့်လွဲပေးခြင်းသည် ဆီလျော်မှုရှိလှပါကြောင်း၊ ပအိုဝ်းလူမျိုး လူနေမှုဘ၀မြင့်တင်ပေးရန် ပအိုဝ်းအုပ်ချုပ်သူများက ဦးဆောင်ပေးရ မည်ဖြစ်ကြောင်း၊ အုပ်ချုပ်သူမပါလျှင် ရေရှည်တည်တံ့ခိုင်မြဲသော ဖွံ့ဖြိုးမှု ရရှိမည်မဟုတ်ကြောင်း၊ ဆင်းရဲရခြင်း၊ ဖွံ့ဖြိုးမှုနောက်ကျရခြင်းစသော အခြေခံစနစ်များကို အုပ်ချုပ်သူမပါဘဲ ဖြေရှင်း၍ ရမည်မဟုတ်ကြောင်း၊ ဆင်းရဲသားပြည်သူများကို ပိုမိုကောင်းမွန်သောဘက်သို့ ခေါ်ဆောင်သွားရာတွင် အစိုးရမပါဘဲ ရေရှည်တိုး တက်ပြောင်းလဲလာမည် မဟုတ်ကြောင်း၊ သို့ဖြစ်၍ ၁၄နှစ်တိုင်အောင် အတူလုပ်ဆောင်ခဲ့သော PNO အုပ်ချုပ်သူအစိုးရကို ယခုကဲ့သို့ ပြည်လည်လွှဲပြောင်းပေးအပ်ခြင်းသည် အင်မတန်မှ ဂုဏ်ယူရပါကြောင်း၊ မိမိတို့နှင့်အတူ အလုပ်တွဲလုပ်သော ကာလတစ်လျောက် အဆင့်အတန်းမခွဲခြားဘဲ ပေါင်းသင်းဆက်ဆံခဲ့သော ပအိုဝ်းခေါင်းဆောင်ကြီးများကိုလည်း ဂုဏ်ယူပါကြောင်း မေတ္တာဖောင်ဒေးရှင်း နာယက ဒေါ်ဆိုင်းရော်က ထပ်လောင်းပြောကြားခဲ့သည်။

ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးဥက္ကဌ ဖြားခွန်စံလွင်ကလည်း ယခုလို မိမိတို့ဒေသဖွံ့ဖြိုးအောင် ကြိုးစားအားထုတ်ပေးခဲ့သော မေတ္တာဖောင်ဒေးရှင်း၏ လုပ်ဆောင်မှုများကို မှတ်တမ်းတင် ဂုဏ်ယူနေမည်ဖြစ် ကြောင်း၊ နောင်ခမ်းဖွံ့ဖြိုးရေးရိပ်သာနှင့် ပတ်သက်၍ မိမိတို့ ပအိုဝ်းအမျိုးသားအဖွဲ့ချုပ်အနေ၏ ခံယူချက်မှာ မျိုးဆက်သစ်လူငယ်များကို ကောင်းမွန်သောအမွေများ လက်ဆင့်ကမ်းပေးနိုင်ရန်သာ ဖြစ်ကြောင်း၊ ထိုသို့ မျိုးဆက်သစ်လူငယ်များကို ကောင်းမွန်သောအမွေပေးနိုင်ရန်မှာ မိမိတို့အဖွဲ့နှင့် မေတ္တာဖောင်ဒေးရှင်းမှာ တစ်သားတည်းဖြစ်ရန် လိုအပ်ကြောင်း၊ လိုအပ်ချက်များ၊ အားနည်ချက်များရှိနေသေးသော မိမိတို့မျိုးဆက်သစ် လူငယ်များကို ကောင်းမွန်သောပညာများပေးနိုင်ရန်အတွက် မေတ္တာဖောင်ဒေးရှင်းအနေဖြင့် မည်သည့်ကဏ္ဍ တွင်မဆို ပါဝင်ပေးရန်လိုအပ်ကြောင်းနှင့် နောင်ခမ်းဖွံ့ဖြိုးရေးရိပ်သာ ရေရှည်တိုးတက်ရန်အတွက် အကြံပြုပေး စေလိုကြောင်း အမှာစကားတွင် ပြောကြားခဲ့သည်။
 
အဆိုပါ နောင်ခမ်းဖွံ့ဖြိုးရေးရိပ်သာလွှဲပြောင်းပေးအပ်ပွဲ အခမ်းအနားသို့ ရဟန်းသံဃာတော်များ၊ ပအိုဝ်းဒေသ အမျိုးသားလွှတ်တော်၊ ပြည်သူ့လွှတ်တော်၊ ပြည်နယ်လွှတ်တော်ကိုယ်စားလှယ်များ၊ ပအိုဝ်း အမျိုးသားအဖွဲ့ချုပ်(PNO)မှ လူကြီးမင်းများ၊ ပါရမီဖွံ့ဖြိုးရေးကွန်ယက်မှ တာဝန်ရှိသူများ၊ ဒေသခံမိဘပြည်သူများ၊ ဖိတ်ကြားထားသော ဧည်သည့်တော်များ တက်ရောက်ခဲ့ကြောင်း သိရှိရသည်။

နဂါ့ခွန်