“လူဆိုးတွေ လူကောင်းကို မနိုင်အောင် လူကောင်းတွေများများ မွေးထုတ်ဖို့ လိုအပ်ကြောင်း” ဒေသဦးစီးဥက္ကဋ္ဌ ပြောကြား

တောင်ကြီး၊ ၂၀၁၇ ခုနှစ်၊ နိုဝင်ဘာလ (၂၃)ရက်

ဒေသဖွံ့ဖြိုးတိုးတက်ရန်နှင့် ဒေသလိုအပ်ချက်များကို သိရှိနိုင်ရန် ရည်ရွယ်၍ ပင်လောင်းမြို့နယ်သို့ ကွင်းဆင်းရောက်ရှိနေသော ဒေသဦးစီးဥက္ကဋ္ဌ ဖြားခွန်စံလွင်သည် ၂၀၁၇ခုနှစ်၊ နိုဝင်ဘာလ(၂၂)ရက်၊ ဗုဒ္ဓဟူးနေ့တွင် ပင်လောင်းမြို့နယ်၊ ပေါအင်ကျေးရွာအုပ်စု၊ ထီရယ်ကျေးရွာတွင် ပြုလုပ်သော လူထုတွေ့ဆုံပွဲတွင် ဒေသဦးစီးဥက္ကဋ္ဌ ပြောကြားခဲ့ခြင်းဖြစ်သည်။

ထိုတွေ့ဆုံပွဲတွင် ဒေသဦးစီးဥက္ကဋ္ဌ ဖြားခွန်စံလွင်က မူးယစ်ဆေးဝါး အန္တရာယ်နှင့် ပတ်သက်၍ “ ကျွန်တော်တို့ မိဘပြည်သူများအနေနဲ့ မိဘ၀တ္တရားကျင့်ဝတ်များအတိုင်း ကိုယ့်ကလေးတွေကို နိုင်ငံအကျိုးထမ်းဆောင်နိုင်တဲ့သူ၊ ဒေသအကျိုးသယ်ပိုးနိုင်တဲ့သူဖြစ်အောင် သွန်သင်ဆုံးမဖို့ လိုအပ်ပါတယ်၊ ဒါမှသာ ရပ်ရွာအေးချမ်းတိုးတက်နိုင်မှာ ဖြစ်တယ်၊ အခုဆိုရင် မိမိတို့ဒေသမှာရော၊ မြန်မာနိုင်ငံအခြားဒေသမှာပါ မူးယစ်ဆေးဝါးကို လွယ်လွယ်နဲ့ ရနေတော့ လူကောင်းတွေက လူဆိုးတွေကို ကြောက်နေရတဲ့ အနေအထား ဖြစ်နေလိမ့်မယ်။ ဒါကြောင့် လူဆိုးတွေက လူကောင်းတွေကို မလွမ်းမိုးနိုင်အောင် ကျွန်တော်တို့ လူကောင်းမျိုးဆက်သစ်တွေကို များများမွေးထုတ်ဖို့ လိုအပ်ပါတယ်” ဟု ၄င်းက ဤသို့ ပြောကြားခဲ့သည်။

ထို့ပြင် ပင်လောင်းမြို့နယ် ပြည်သူ့လွှတ်တော်ကိုယ်စားလှယ် ဖြားခွန်မောင်သောင်းကလည်း မူးယစ်ဆေးဝါးသည် စီးပွားရေးဖွံ့ဖြိုးတိုးတက်ရန်အတွက် အဟန့်အတားဖြစ်သောအရာ ဖြစ်ကြောင်း၊ နောင်တရားဒေသသည် စီးပွားရေးအခြခံကောင်းသော နေရာတစ်ခုဖြစ်ကြောင်း၊ ထို့ကြောင့် ဖွံ့ဖြိုးမှုကို နှောက်ယှက်နေသော မူးယစ်ဆေးဝါးပပျောက်အောင် ၀ိုင်းဝန်းကာကွယ်ရမည် ဖြစ်ကြောင်း၊ ယခုလက်ရှိ မိမိတို့ လွှတ်တော်တွင် မူးယစ်ဆေးဝါး ဥပဒေကို ပြင်ဆင်လျက်ရှိပြီး အဆိုပါ ဥပဒေသည် ထောင်ဒဏ် သာမက လူမှုရေးပြစ်ဒဏ်ပါ ပါရှိကြောင်း မူးယစ်ဆေးဝါးနှင့် ပတ်သက်၍ ပြောကြားခဲ့သည်။

ယခုလက်ရှိ နောင်တရားဒေသအတွင်းရှိ ဖွံ့ဖြိုးမှုနောက်ကျနေသော ကျေးရွာအုပ်စု (၄)အုပ်စုဖြစ်သည့် ပေါအင်း၊ ပင်ခင်၊ မွေးပင်၊ လွယ်မော ကျေးရွာအုပ်များတွင် (Pilot Project)ဖြင့် (၃)နှစ် စီမံကိန်း လုပ်ဆောင်နေပြီး ထိုစီမံကိန်းတွင် ဘိန်းအစားထိုး စီမံချက်များလည်း ပါရှိကြောင်း သိရသည်။

ပအိုဝ်းကိုယ်ပိုင်အုပ်ချုပ်ခွင့်ရဒေသ အမျိုးသားလွှတ်တော်ကိုယ်စားလှယ် ဖြားခွန်သိန်းဖေကလည်း မိမိတို့ပအိုဝ်းလူမျိုးများအနေဖြင့် ပညာရေးကို ဦးစားပေးပြီး အစိုးရဌာနဆိုင်ရာများတွင် တာဝန်ထမ်း ဆောင်စေလိုကြောင်း၊ မိမိတို့ မြို့နယ်၊ မိမိတို့ကျေးရွာသည် မိမိတို့သာ အသိဆုံးဖြစ်သောကြောင်း အစိုးရဌာနဆိုင်ရာများတွင် တာဝန်ထမ်းဆောင်ခြင်းအားဖြင့် မိမိတို့ဒေသသည်လည်း တိုးတက်မှုမြန်ဆန်မည် ဖြစ်ကြောင်း၊ မိမိတို့ဒေသ တိုးတက်ရန်အတွက် အစဉ်အမြဲ စည်းလုံးညီညွတ်နေရမည် ဖြစ်ကြောင်း အားပေးအမှာစကား ပြောကြားခဲ့သည်။

အဆိုပါ ထီရယ်ကျေးရွာ ပြည်သူလူထု တွေ့ဆုံပွဲတွင် ပအိုဝ်းကိုယ်ပိုင်အုပ်ချုပ်ခွင့်ရ ဒေသဦးစီးဥက္ကဋ္ဌ ဖြားခွန်စံလွင်နှင့်အဖွဲ့များ၊ ပအိုဝ်းကိုယ်ပိုင်အုပ်ချုပ်ခွင့်ရဒေသ အမျိုးသားလွှတ်တော်ကိုယ်စားလှယ် ဖြားခွန်သိန်းဖေ၊ ပင်လောင်းမြို့နယ် ပြည်သူ့လွှတ်တော်ကိုယ်စားလှယ် ဖြားခွန်မောင်သောင်း၊ ပင်လောင်းမြို့နယ် မဲဆန္ဒနယ်(၁)၊(၂) ပြည်နယ်လွှတ်တော်ကိုယ်စားလှယ် ခွန်လှဆန်း၊ ခွန်စောအောင် ဒေသဦးစီးအဖွဲ့ဝင်များ၊ မြို့နယ်အဆင့်ဌာနဆိုင်ရာများ၊ ပအိုဝ်းအမျိုးသားအဖွဲ့ချုပ်(PNO)မှ တာဝန်ရှိသူများ လည်း လိုက်ပါတက်ရောက်ခဲ့ကြောင်း သိရှိရသည်။

ခွန်ထင်းလေအောင်း