Sunday, March 4, 2018

ကြက်သွန်ဖြူလေ့လာဆည်းပူးကွက် ကွင်းသရုပ်ပြရှင်းလင်းပွဲ

တောင်ကြီး၊ ၂၀၁၈ ခုနှစ်၊ မတ်လ (၅)ရက်







ပါရမီဖွံ့ဖြိုးရေးကွန်ယက်မှ အကောင်အထည်ဖော်ဆောင်ရွက်လျှက်ရှိသော အမျိုးသမီးများအတွက် ဈေးကွက်ဆိုင်ရာအခွင့်အလမ်းများ တိုးတက်ရရှိရေးစီမံကိန်းမှ ၂၀၁၈-ခုနှစ်၊ မတ်လ(၄)ရက်နေ့တွင် ပအိုဝ်းကိုယ်ပိုင်အုပ်ချုပ်ခွင့်ရဒေသ၊ နောင်တရားမြို့နယ်ခွဲ၊ ပင်ခင်ကျေးရွာအုပ်စု၊ လွယ်အယ်ကျေးရွာ၌ ကြက်သွန်ဖြူလေ့လာဆည်းပူးကွက် ကွင်းသရုပ်ပြရှင်းလင်းပွဲ ကျင်းပပြုလုပ်ခဲ့ကြောင်းသိရှိရပါသည်။

ထိုအခမ်းအနားတွင် ရှေးဦးစွာ ပင်ခင်ကျေးရွာအုပ်ချုပ်ရေးမှူး ဦးခွန်မောင်ကြီးမှ အဖွင့်အမှာစကား ပြောကြားရာ၌ မိမိတို့ရပ်ရွာဒေသတွင် ယခုလိုမျိုးအသိပညာ နည်းပညာများ လာရောက်ဖြန့်ဝေပေးတဲ့အတွက် ကျေးဇူးတင်ကြိုဆိုပါကြောင်း၊ မည်သည့်အဖွဲ့အစည်းမဆို ဒေသတွင်း ပြည်သူလူထုအကျိုးရှိပြီး ကောင်းမွန်သည့်လုပ်ငန်းမှန်သမျှ လာရောက်ပြုလုပ်မည်ဆိုလျှင် အမြဲတမ်းနွေးထွေးစွာ ကြိုဆိုမည် ဖြစ်ကြောင်းပြောကြားခဲ့ပါသည်။

၎င်းနောက် ပါရမီဖွံ့ဖြိုးရေးကွန်ယက် အတွင်းရေးမှူး ခွန်ချစ်ဦးမှ မိမိတို့အဖွဲ့အစည်းသည် ဒေသဖွံ့ဖြိုးရေးလုပ်ငန်းများ အကောင်အထည်ဖော်ဆောင်ရွက်လျက်ရှိသော ပအိုဝ်းအမျိုးသားအဖွဲ့ချုပ် (PNO)၏  ဌာနတစ်ခုဖြစ်သည့် လူမှုရေးဌာနမှ ဒေသဖွံ့ဖြိုးရေးလုပ်ငန်းများကို နိုင်ငံခြားအလှူရှင်များနှင့် ချိတ်ဆက်ပူးပေါင်းဆောင်ရွက်ရန်အတွက် ဖွဲ့စည်းတည်ထောင်ခဲ့ခြင်းဖြစ်ကြောင်း၊ လက်ရှိတွင် ဒေသဖွံ့ဖြိုးရေးလုပ်ငန်းများဖြစ်သည့် ပညာရေး၊ စီးပွားရေး၊ သစ်တော၊ စိုက်ပျိုးရေး၊ လူမှုရေး၊ ကျန်းမာရေး၊ လူ့စွမ်းအားအရင်းအမြစ်၊ ဟိုတယ်နှင့်ခရီးသွားလုပ်ငန်းနှင့် မွေးမြူရေးလုပ်ငန်းများကို နိုင်ငံခြားအလှူရှင်များ၊ ဒေသခံပြည်သူလူထုများနှင့် ပူးပေါင်းအကောင်အထည်ဖော်ဆောင်ရွက်လျှက်ရှိကြောင်း၊ ယခု စီမံကိန်းသည် ရည်ရွယ်ချက်(၃)ခုဖြစ်သော ငွေကြေးလက်လှမ်းမီမှုရှိစေရန်၊ စိုက်ပျိုးရေးနည်းပညာနှင့် ဈေးကွက်ချိန်ဆက်မှုအားကောင်းစေရန်နှင့် ကျားမတန်းတူညီမျှမှုနှင့် ဆုံးဖြတ်ချက်ချမှတ်ရာတွင် အမျိုးသမီးများပါဝင်မှု မြှင့်မားလာစေရန် စသည်တို့ကို အကောင်အထည်ဖော်ဆောင်ရွက်နေကြောင်း၊ ရာသီဥတု၊ ခေတ်စနစ်ပြောင်းလဲလာသည်နှင့်အမျှ မည်သည့်လုပ်ငန်းများလုပ်ဆောင်သည်ဖြစ်စေ နည်းစနစ်မှန်ကန်စွာသုံးစွဲမှသာလျှင် အထွက်တိုးပြီး ရေရှည်တည်တံ့ခိုင်မြဲနေမည်ဖြစ်ကြောင်း၊ ရှေ့ဆက်ပြီး မိမိတို့တတ်စွမ်းသမျှ ဒေသခံပြည်သူလူထု အကျိုးရှိသည့်လုပ်ငန်းများကို ဒေသခံများနှင့်အတူ ပူးပေါင်းအကောင်အထည်ဖော်ဆောင်ရွက်သွားမည် ဖြစ်ကြောင်း စသည်တို့ကို အကျယ်တဝင့်ရှင်းလင်းခဲ့ပါသည်။

လွယ်အယ်ကျေးရွာတွင် အကောင်အထည်ဖော်ဆောင်ရွက်လျှက်ရှိသော စီမံကိန်းလုပ်ငန်းများ သွင်းအားစုနည်းနည်းဖြင့် ထိရောက်အကျိုးရှိစွာ ရရှိစေရန် အနီးကပ်ဒေသခံများနှင့်အတူကြီးကြပ်ပေးသည့် ပါရမီဖွံ့ဖြိုးရေးကွန်ယက် ရပ်ကျေးပံ့ပိုးသူ ခွန်ထီးမှ ကွင်းသရုပ်ပြပွဲပြုလုပ်ရခြင်း၏ ရည်ရွယ်ချက်များကို ရှင်းလင်းတင်ပြပေးခဲ့ပါသည်။

လွယ်အယ်ကျေးရွာမှ အမျိုးသမီးတောင်သူခေါင်းဆောင် နန်းအိခမ်းမှလည်း ကျေးရွာတွင် စီမံကိန်းလုပ်ငန်းများလုပ်ဆောင်နေသည်များနှင့် ၎င်းတို့၏လှုပ်ရှားမှုများကို ရှင်းလင်းတင်ပြပြီး၊ နန်းခမ်းနွယ်မှလည်း ၎င်းတို့၏ ကြက်သွန်ဖြူစမ်းသပ်စိုက်ပျိုးကွက် စိုက်ပျိုးမှုနှင့် သွင်းအားစုထည့်သွင်းမှုများကို ရှင်းလင်းတင်ပြခဲ့ပါသည်။ လွယ်အယ်ကျေးရွာသူကြီး၊ ပင်ခင်ကျေးရွာသူကြီးနှင့် ပင်ခင်ကျေးရွာအုပ်စုမှ ပအိုဝ်းအမျိုးသားအဖွဲ့ချုပ်(PNO) ဥက္ကဋ္ဌ တို့မှလည်း အားပေးစကားအသီးသီးပြောကြားခဲ့ပါသည်။

ထို့နောက် ယခုကဲ့သို့ ကြက်သွန်ဖြူလေ့လာဆည်းပူးကွက် ကွင်းသရုပ်ပြပွဲသို့ကြွရောက်ချီးမြှင့်ပေးသည့် အတွက် နန်းအေးမိုးစန္ဒာမှ ကျေးဇူးတင်စကားပြောကြားပြီး ကြွရောက်လာကြသည့် ဧည့်သည်တော်များ ကြက်သွန်ဖြူစမ်းသပ်ကွက်သို့ လေ့လာကြည့်ရှုရင်း သိလိုသည်များကို အပြန်အလှန်မေးမြန်း ဆွေးနွေးခဲ့ကြကြောင်းသိရှိရပါသည်။

ထို ကြက်သွန်ဖြူလေ့လာဆည်းပူးကွက် ကွင်းသရုပ်ပြပွဲသို့ ပင်ခင်ကျေးရွာအုပ်စုမှ ကျေးရွာ(၁၀)ရွာမှ တောင်သူများ စုစုပေါင်း (၁၅၀)ဦးကျော်တက်ရောက်ခဲ့ကြောင်းသိရှိရပါသည်။

ခွန်ကျော်
Powered by Blogger.