အောင်မြင်သူတို့ကို လူတိုင်းအားကျတတ်ပါသည်။ အောင်မြင်သူ၏ ပိုင်ဆိုင်မှုကို ကြည့်ပြီး "သူတို့သည် ကံကောင်းပြီး တော်လိုက်ကြသည်" ဟု တွေးတတ်ပြောဆိုတတ်ကြပါသည်။ ထိုအယူအဆ/အတွေးအခေါ် များသည် မှားယွင်းသောအယူအဆဟု မြင်မိပါသည်။ အောင်မြင်နေသည့်လူသည် နေ့ချင်း၊ ညချင်း ကံကောင်း နေသည်ဟုယူဆပြီး သူတို့အောင်မြင်နေသည့်နည်းလမ်းများကို လူတိုင်းက စိတ်ပါဝင်စားမှု၊ မေးမြန်းလေ့လာမှု အားနည်းနေသည်ကို တွေ့မြင်နေရပါသည်။ အောင်မြင်နေသည့်သူတို့ကို မေးကြည့်လျှင် ယခုလိုအောင်မြင် နေသည့်သူသည် နေ့ချင်း၊ ညချင်း အောင်မြင်နေသည်မဟုတ်သကဲ့သို့၊ ကံကောင်းခြင်းတစ်ခုတည်းကို လက်ကိုင်ထားပြီး မျက်စိစုံမှိတ် အောင်မြင်လာကြသည်မဟုတ်ပါ။
လူတိုင်းလူတိုင်းသည် နေ့စဉ်ဘ၀တိုက်ပွဲများရှိနေကြပါသည်။ တိုက်ပွဲ၏ နှစ်ဖက်စစ်တပ်သည် တိုးတက်လိုသည့် စိတ်နှင့် ပျင်းရိနေသည့်စိတ်များဖြစ်ကြပါသည်။ မနက်အိပ်ယာထထချင်း သူတို့တွေ စတိုက်နေကြပါသည်။ "ငါစောစောထလျှင်ကောင်းမလား၊ ငါလေ့ကျင့်ခန်းများလုပ်လျှင် ကောင်းမလား၊ ငါဖုန်းပွတ်လျှင်ကောင်းမလား၊ ငါထမင်း/ဟင်းချက်လျှင်ကောင်းမလား၊ ငါစာဖတ်လျှင် ကောင်းမလား၊ ငါဘဲပြန်အိပ်လျှင်ကောင်းမလား" စသည့် လူတွေရဲ့ အတွေး၊လူတွေရဲ့အမူအကျင့်တွေကို နေ့စဉ်၊ နေ့တိုင်း တိုက်ပွဲများကိုတစ်ပွဲပြီးတစ်ပွဲ ဆင်နွှဲနေကြရပါသည်။
အောင်မြင်သူများသည် ထိုစစ်ပွဲကို ပွဲတိုင်းတွင်တိုးတက်လိုသည့်စိတ်ဖြင့် အနိုင်ယူပါသည်။ နေ့စဉ်နေ့တိုင်း တိုက်ပွဲများအနိုင်ယူရင်းယူရင်းဖြင့် သူတို့၏ဘ၀များကို ပိုပိုပြီးတိုးတက်လာသည်ကို တွေ့မြင်နေရပါသည်။ နှစ်ပေါင်းများစွာ ကြာလာသည်နှင့်အမျှ အောင်ပွဲအလီလီဆွတ်ခူးခဲ့ရသည့်အတွက် လူတို့၏မြင်တွေ့ပြောဆို နေကြသည့် နေ့ချင်း၊ညချင်း ကံအရမ်းကောင်းလွန်းသူ၊အောင်မြင်သူကြီး ဖြစ်လာပါတော့သည်။ နေ့ချင်း၊ ညချင်း အောင်မြင်မှုများဖြစ်ချင်နေကြသည့်သူများသည် နေ့စဉ်တိုက်ပွဲကို အာရုံစူးစိုက်တိုက်ပွဲဝင်ရန် လိုအပ်နေ သည်ဟု စာရေးသူမြင်မိပါသည်။
လူသားတို့၏ ဘ၀သည် လဲကျမှုများ ရှိစမြဲပါ။ " လူသာလဲကျရင် ကျပါစေ၊ စိတ်ဓာတ်တော့လဲမကျပါနဲ့ စိတ်ဓာတ်လဲကျသည့်နေဟာ အောင်မြင်မှုကို သေမိန့်ပေးလိုက်တဲ့နေ့" ဟုဆိုသည့်စကားအတိုင်း အောင်မြင် သည့်လူတစ်ယောက်ဖြစ်ချင်သည်ဆိုလျှင် ထိုစကားအတိုင်း လူသာလဲကျလျှင် ပြန်ထပြီး ၊ စိတ်ဓာတ်ခိုင်မာ အောင် ကြိုးစားဆောင်ရွက်ကြပါဟု တိုက်တွန်းလိုပါသည်။ အောင်မြင်သည့်လူတစ်ယောက်ဖြစ်ချင်သည် ဆိုလျှင် တစ်နေ့တစ်နေ့လုပ်ရမည့်ကိစ္စများကို မလုပ်ခင်ကတည်းက ကြိုတင်ပြင်ဆင်သင့်ပါသည်။ ကြိုတင်ပြင်ဆင်ခြင်းသည် အောင်မြင်မှု၏ပန်းတိုင်ဟု ဆိုရိုးစကားရှိခဲ့ပါသည်။ လုပ်ရမည့်လုပ်ငန်းများကို အသေးစိတ်တစ်ခုချင်းစီချရေးပြီး ဦးစားပေးလုပ်ရမည့်အလုပ်၊ အရေးကြီးလုပ်ရမည့်အလုပ် စသည်များကို အစီအစဉ်တကျ လုပ်ဆောင်ရန်လိုအပ်ပါသည်။ လုပ်ရမည့်လုပ်ငန်းများကို အကြောင်းပြချက်အမျိုးမျိုးကြောင့် အကြွေးများကို မချန်ထားပါနှင့် နေ့စဉ်လုပ်ငန်းဆွဲထားသည့်အချိန်ဇယားများကို ပြီးစီးအောင်လုပ်ဆောင်ရန် လိုအပ်ပါသည်။ ပျင်းရိခြင်းကြောင့်သော်လည်းကောင်း၊ ခက်ခဲသည့်လုပ်ငန်းများကိုသော်လည်းကောင်း ချန်မထားပါနှင့် ချန်ထားခဲ့သည်ဆိုလျှင် နောက်တစ်ကြိမ်ပြန်လုပ်မည်ဆိုသည်ကို မသေချာတော့ပါ။ ကိုယ်လုပ်မည့်အလုပ်တစ်ခုသည် "ငါမလုပ်နိုင်ဘူး မဖြစ်နိုင်လောက်ဘူး" ဆိုသည့် အတွေးမျိုးဝင်သွားသည်နှင့် ဖြစ်နိုင်ခြင်းကိုဝေးကွာတတ်လေ့ရှိပါသည်။ လုပ်ငန်းတစ်ခုလုပ်ဆောင်ရာတွင် အခက်အခဲများသည်ရှိစမြဲပါ။ ထိုအခက်အခဲများကြုံလာလျှင် ဘယ်လိုဖြေရှင်းရမလဲ ဆိုသည့်နည်းလမ်းများကို ရှေးဦးစွာတွေးထားရန် လိုအပ်ပါသည်။ ရေးဆွဲထားသည့်အစီအစဉ်အတိုင်း တစ်ခုမကျန်ပြီးစီးအောင်လုပ်ဆောင်မှသာလျှင် လုပ်ငန်းအချိန်ဇယားသည် လူတို့၏ အောင်မြင်မှုဘ၀သစ်ဆီသို့ ခေါ်ဆောင်ပေးခြင်းဖြစ်သည်။
အောင်မြင်သည့်လူတစ်ယောက်သည် လုပ်ငန်းများလုပ်ဆောင်ရာတွင်သော်လည်းကောင်း၊ အခက်အခဲများ ကြုံတွေ့လာလျှင်သော်လည်းကောင်း အချောင်ခိုခြင်း၊ ပျင်းရိခြင်း စသည့်စိတ်ဓာတ်များမရှိပါ။ အောင်မြင်မှု ပန်းတိုင်ဆိုသည့်စကားကို လက်မှာဆွဲကိုင်ထားပြီး ဘာမဆိုလုပ်လေ့ရှိတတ်ကြပါသည်။ ဘယ်အရာမဆို အောင်မြင်ချင်လျှင် ဆန္ဒပြင်းပြရမည်၊ စိတ်ဓာတ်ခိုင်မာရမည်၊ ၀ီရိယရှိရမည်၊ စူးစမ်းဆင်ခြင်တတ်သည့် ပညာရှိရမည် စသည့်အချက်များဖြင့် လိုက်နာကျင့်သုံးမှသာလျှင် အောင်မြင်မှုပန်းတိုင်ကိုရောက်ရှိလာမည် ဖြစ်သည်။ ထို့ကြောင့် အောင်မြင်ချင်သောသူများသည်လည်း အောင်မြင်သူတို့၏ နည်းလမ်းများအတိုင်း လိုက်နာကျင့်ကြံကြိုးစားအားထုတ်မှသာလျှင် အောင်မြင်မှုပန်းတိုင်ကို ရောက်ရှိလာနိုင် မည်ဟုယုံကြည်မိပါသည်။
နန်းအိနြေ္ဒခမ်း
Like On Facebook
Follow On Twitter
Subscribe On RSS