ပအိုဝ်းနိုင်ငံရေးသည် တည်ဆောက်ရေးဖြစ်သည့်အတွက် ပအိုဝ်းဒေသအတွင်း ဖွံ့ဖြိုးရေးလုပ်ငန်းများ လုပ်ဆောင်ရာတွင် လူထုကို ဗဟိုပြု၍ လုပ်ဆောင်ခြင်းဖြစ်ပြီး ဖွံ့ဖြိုးရေးလုပ်ငန်းများ လုပ်ဆောင်ရာတွင် ပအိုဝ်း၊ ရှမ်း၊ ကယန်း စသည့် လူမျိုး ခွဲခြားမှုမရှိပဲ လုပ်ဆောင်ပေးနေကြောင်း ပအိုဝ်းကိုယ်ပိုင်အုပ်ချုပ်ခွင့်ရဒေသ၊ အမျိုးသားလွှတ်တော်ကိုယ်စားလှယ် ဖြားခွန်သိန်းဖေက ယနေ့ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်မွန်းကျေးရွာအုပ်စု၊ ဥာဏ်ပင်ကြီး(လျံမွူးတန်)ဘုန်းတော်ကြီးကျောင်းတွင် ပြုလုပ်သည့် လူထုတွေ့ဆုံပွဲမှာ ပြောကြားခဲ့ပါတယ်။
ယနေ့ လူထုတွေ့ဆုံပွဲတွင် အမျိုးသားလွှတ်တော်ကိုယ်စားလှယ် ဖြားခွန်သိန်းဖေမှ ပအိုဝ်းအမျိုးသားအဖွဲ့ချုပ်(PNO)၏ ငြိမ်းချမ်းရေးရယူခြင်းနှင့်ဖွံ့ဖြိုးရေးလုပ်ဆောင်နေမှုများ၊ လွှတ်တော်တွင်း ဆောင်ရွက်နေသည့် လုပ်ငန်းများနှင့် ဒေသခံပြည်သူများအနေဖြင့် မိမိဒေသ လိုအပ်ချက်များကို ရရှိရန် မည်သို့ မည်ပုံလုပ်ဆောင်ရမည်ကို ရှင်းလင်းပြောကြားခဲ့ကြောင်း သိရှိပါတယ်။ “ စင်္ကာပူနိုင်ငံကို ကြည့်ပါ၊ သဘာဝသယံဇာတ ဘာမှမရှိဘူး၊ ခုဆို အရှေ့တောင်အာရှမှာ အတိုးတက်ဆုံး နိုင်ငံဖြစ်နေတယ်၊ သူတို့က ပညာရေးကို ဦးစားပေးပြီး ပညာတတ် ပညာရှင်တွေနဲ့ တိုင်းပြည်ကို တည်ဆောက်ခဲ့တယ်၊ လူသားအရင်းအမြစ်စွမ်းအားကို ဖွံ့ဖြိုးတိုးတက်အောင် လုပ်ဆောင်တယ်၊ ခုဆို သူတို့နိုင်ငံမှာ ကမ္ဘာ့ဒုတိယအကြီးဆုံး ဆိပ်ကမ်းရှိတယ်၊ ပြီးတော့ ကမ္ဘာငွေရေးကြေးရေးဘဏ်နှင့်ပတ်သက်လို့ ကမ္ဘာ့အဆင့်(၄)လောက်ရှိတယ်၊ ဥာဏ်ရည်စွမ်းအားနဲ့ လူတွေက အသက်မွေးမြူကြတယ်၊ စင်္ကာပူကို နမူနာယူပြီး ပအိုဝ်းပြည်သူတွေအနေနဲ့လည်း ပညာတတ် ပညာရှင်တွေ ပေါများလာဖို့ လိုတယ် “၎င်းက ပြောကြားပါတယ်။
နိုင်ငံတော်အကြီးအကဲတစ်ဦးမှ အကြံဥာဏ်များ ပေးခဲ့ရာတွင်- ပအိုဝ်းပြည်သူများအနေဖြင့် ပညာရေးပိုင်း တိုးတက်လာအောင်၊ ပညာတတ် ပညာရှင်များ ပေါများလာအောင် လုပ်ဆောင်ဖို့လိုသလို ပအိုဝ်းဒေသအတွင်း စစ်ဗိုလ်မှူး၊ ရဲမှူး၊ အင်ဂျင်နီယာ၊ ဆရာဝန်၊ တရားသူကြီး စသည့် ပုဂ္ဂိုလ်များမှာ ပအိုဝ်းဖြစ်နေလျှင် ဘယ်လောက်ကောင်းမည်လဲ၊ သို့ဖြစ်သည့်အတွက် ပအိုဝ်းပညာတတ်ဘွဲ့ရလူငယ်များ အနေဖြင့် အစိုးရဌာနဆိုင်ရာများတွင် ၀င်ရောက်တာဝန်ထမ်းဆောင်ဖို့ လိုအပ်သည့်အကြောင်း၊ ပအိုဝ်းပြည်သူအနေဖြင့် စီးပွားရေး၊ လူမှုရေးစသည့် ကိစ္စရပ်များ ဆောင်ရွက်နိုင်ရန်မှာ ကျန်းမာကြံ့ခိုင်ဖို့ လိုအပ်ကြောင်း၊ အစား အသောက် သတိပြုဖို့ လိုအပ်သလို မူးယစ်ဆေးသုံးစွဲနေမှုများ ကင်းရှင်းစေလိုကြောင်း၊ ပအိုဝ်းပြည်သူများ၏ စီးပွားရေးကောင်းလာအောင် လုပ်ဆောင်ဖို့ လိုသလို သဘာဝပတ်ဝန်းကျင် ရေမြေတောတောင်များကို ထိန်းသိမ်းဖို့လိုအပ်ကြောင်း၊ တောင်ယာခြံအလိုက် သစ်တောအလိုက် သူ့အကန့်နဲ့သူ ထားဖို့ လိုအပ်သည့်အကြောင်းစသည့် အကြံဥာဏ်များ ပေးခဲ့သည့်အကြောင်းကိုလည်း ဖြားခွန်သိန်းဖေက ရှင်းလင်းပြောကြားခဲ့ပါတယ်။
“ကျေးရွာမှာရှိတဲ့ ပြည်သူတွေအနေနဲ့ ကိုယ်ဘာဖြစ်ချင်လဲ၊ ကိုယ်ဘာလုပ်နိုင်လဲ ဆိုတာကို သိနေဖို့ လိုတယ်၊ ကိုယ်လုပ်ချင်တဲ့ ကိုယ်ဖြစ်ချင်တဲ့ဟာက ကိုယ့်ရွာသူ ရွာသားနဲ့ပဲလုပ်နိုင်တယ်ဆိုရင် လုပ်၊ မလုပ်နိုင်ဘူးဆိုရင် ဘယ်နည်းနဲ့လုပ်နိုင်တာလဲ၊ ကျေးရွာအုပ်ချုပ်ရေးမှူးကနေ မြို့နယ်တာဝန်ရှိတဲ့သူတွေ၊ လွှတ်တော် ကိုယ်စားလှယ်တွေစတဲ့ အဆင့်ဆင့်သက်ဆိုင်ရာသူတွေထံ တင်မှ ရမယ်ဆို သူတို့ဆီကနေ တင်ပြလို့ရတယ်။ အကြောင်းအရာတစ်ခုခုတင်ပြမယ်ဆိုရင် အချက်အလက်ပြည့်ပြည့်စုံစုံ လိုအပ်ရင် ဓာတ်ပုံကစပေါ့၊ နယ်ဧရိယာအချက်အလက်ပြည့်ပြည့်စုံစုံပါဖို့လိုတယ်၊ ကျေးရွာအုပ်ချုပ်ရေးမှူးလက်မှတ်နဲ့ မြို့နယ်အုပ်ချုပ်ရေးမှူးဆီတင်ရမယ်၊ ဒါမှမဟုတ်ရင် မြို့နယ် ပအိုဝ်းအမျိုးသားအဖွဲ့ချုပ်(PNO)ရုံးနဲ့ ဗဟိုဌာနချုပ်ရုံးက လွှတ်တော်ရေးရာဌာန၊ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ဥက္ကဋ္ဌ၊ လွှတ်တော်ကိုယ်စားလှယ်တွေထံ တင်ပြဖို့လိုတယ်။ ဒါ့ကြောင့် ရပ်ရွာဒေသ ဖွံ့ဖြိုးဖို့က အဓိက ဒေသခံပြည်သူတွေဖြစ်တယ်၊ ဒေသခံတွေ ညီညွတ်တယ်ဆိုရင် ဘာမဆို ဖြစ်နိုင်ပါတယ် “ ဟု ၎င်းက ရှင်းလင်းပြောကြားခဲ့ပါတယ်။
ယနေ့ လူထုတွေ့ဆုံပွဲသို့ ၀ါးပြုံး၊ ဆောင်းခါး၊ မေးတွိုင်း၊ ငိုလန၀်၊ ငိုလ၀၊ ငိုလထင်၊ ငိုလကြာပူး၊ လျံမွူးတန် ရွာများမှ ဒေသခံပြည်သူ (၃၀၀)ခန့် တက်ရောက်ခဲ့ကြကြောင်း သိရပြီး တက်ရောက်သူများမှ မေးမြန်းတင်ပြသည့် မေးမြန်းချက်များကိုလည်း ဖြားခွန်သိန်းဖေမှ ပြန်လည်ဖြေကြားပေးခဲ့ကြောင်း သိရပါတယ်။ လူထုတွေ့ဆုံပွဲအပြီးတွင် လျံမွူးတန်အခြေခံပညာမူလတန်းကျောင်းသို့သွားရောက်ပြီး ကျောင်းဆောင်များ၏ အခြေအနေကိုလည်း လှည့်လည်ကြည့်ရှုခဲ့ကြောင်း သိရသည်။
ခွန်ဓဇ
Like On Facebook
Follow On Twitter
Subscribe On RSS