Thursday, December 13, 2018

လူကောင်းလူတော်တို့ရည်မျှော်

တောင်ကြီး၊ ၂၀၁၈ ခုနှစ်၊ ဒီဇင်ဘာလ (၁၄)ရက်


ကျွန်ုပ်တို့နေထိုင်လျက်ရှိသော သတ္တလောကကြီးတွင် လူဟုဆိုရာ၌ နှစ်မျိုးနှစ်စားရှိကြသည်။ ထိုနှစ်မျိုးမှာ လူကောင်းနှင့်လူတော် တို့ဖြစ်ကြသည်။ လူသည်ကောင်းတိုင်းလည်း မတော်နိုင်သကဲ့သို့ တော်တိုင်းလည်း လူကောင်းမဖြစ်နိုင်ပေ။ ရှေးယခင်က လူတော်လူကောင်းကို ရည်မျှော်ခဲ့ကြသော်လည်း ယခုအခါတွင် လူကောင်းလူတော်ကို ရည်မျှော်ကာ အသုံးအနှုန်းကို ပြောင်းလဲသုံးစွဲနေပေပြီ။ အကြောင်းကား လူကောင်းလူတော်ကမှသာ နိုင်ငံအကျိုး ကမ္ဘာ့အကျိုးကို ဆောင်ရွက်နိုင်သောကြောင့်တည်း။

လူကောင်းတစ်ဦးဖြစ်ဖို့ ပျိုးထောင်ရန်မှာ လူတော်တစ်ဦးကို ပျိုးထောင်ရန်လောက် မလွယ်ကူချေ။ လူကောင်းဖြစ်ဖို့ရန် ခဲယဉ်းလှသည်။ လူကောင်းဖြစ်ဖို့ ကမ္ဘာ့ရှားပါးကုန်တစ်မျိုးသာတင်စားထားပါသည်။ လူတို့သည်အခြားသူတို့ကို မနာလိုဝန်တိုငြိုငြင်စိတ်ထားတတ်ကြသည်။ နှိမ့်ချပြစ်တင် ရှုတ်ချလိုသောဆန္ဒ အနည်းနှင့် အများရှိတတ်ကြသည်။ ဤသို့သော စိတ်ယုတ်ညံ့တို့ကို ပယ်မှသာလျှင် လူကောင်းတစ်ယောက် ဖြစ်လာပေမည်။

လူတော်ဖြစ်ရန်မှာ လူကောင်းဖြစ်ရန်လောက်မခဲယဉ်းပေ။ ကြိုးစားလျှင်ကြိုးစားသလောက်တော်ကာ ထူးချွန်ထက်မြက်နိုင်ပေသည်။ လူတော်တော်များများကား လူ့ဘုံလောက၏ ဖန်တီးရှင်များပင်ဖြစ်သည်။ သူတို့၏ စွမ်းအားများကြောင့် ကမ္ဘာ့စက်မှုရေးရာ၊ စာပေ၊ အနုပညာ၊ ယဉ်ကျေးမှု၊ စားဝတ်နေရေး၊ ပညာရေး အစစအရာရာ ဘက်စုံတိုးတက်လာရသည်။

လူတော်တို့ကြောင့် ကမ္ဘာ့လူနေမှုအဆင့်အတန်းများ တိုးတက်လာခဲ့ရသည်။ ကမ္ဘာဦး ကျောက်ခေတ် မှသည် ယနေ့ဂြိုလ်တု ဒုံးပျံခေတ်သို့ ရောက်ရှိလာရသည်မှာလည်း လူတော်များကြောင့် ပင်ဖြစ်သည်။ ကမ္ဘာ့ထိပ်တန်းစက်မှုနိုင်ငံများ စက်မှုထွန်းကားတိုးတက်နေရခြင်းမှာလည်း လူတော်များရှိနေခြင်းကြောင့်သာဖြစ်သည်။

ရှေးအခါက သစ်ဥသစ်ဖုများကို လိုက်လံရှာဖွေစားသောက်နေကြရာမှ ယခုအခါ လွယ်လင့်တကူ စားသောက်နိုင်ကြပြီဖြစ်သည်။ ကျောက်လက်နက်အသုံးအဆောင်တို့ကို အသုံးပြုကြရရာမှ စက်ရုပ်များကို စေခိုင်းနိုင်ပြီဖြစ်သည်။ ကျောက်ဂူများတွင် နေကြရရာမှ မိုးထိအောင်မြင့်သော တိုက်အဆောက်အဦးများနှင့် နေနိုင်လာကြပြီဖြစ်သည်။ ဤကား လူတော်တို့၏ ကျေးဇူးကြောင့်များပင်ဖြစ်သည်။

လူတော်တို့ မည်မျှပင်တော်ပါစေ သူတို့၏စိတ်သဏ္ဍာန်တွင် မကောင်းသောစိတ်ဓာတ်များ ကိန်းအောင်းနေပါက ကမ္ဘာပျက်သည့်တိုင် ဆိုးကျိုးပြုနိုင်ပေသည်။ လူတော်တို့သည် များသောအားဖြင့် သဘောထားမပြည့်ဝတတ်ချေ။ တော်သည်ထက်တော်သည်ကို ပြိုင်ဆိုင်ကာ ပြိုင်ဖက်ကို မနာလိုအပြစ်ရှာ ရှုတ်ချဝေဖန်လိုကြသည်။ မိမိသာအတော်ဆုံးဟူသည့်ဂုဏ်ကို ပိုင်ဆိုင်လိုကြသည်။ သူတို့၏ခံယူချက်ကြောင့် ကမ္ဘာ့ငြိမ်းချမ်းရေးမှာ အကြိမ်ကြိမ်ထိပါးခံခဲ့ရသည်။

လူတော်များ ကမ္ဘာလောကတစ်ခွင်ကို လွှမ်းမိုးနေပါက ကမ္ဘာကြီး၏ အေးချမ်းသာယာမှုကို ထာဝစဉ်မရနိုင်ပေ။ လူတော်တို့သည် မိမိတို့တတ်သိထားသော ပညာတို့ဖြင့် ကမ္ဘာကြီးကို အကောင်းဆုံး သို့မဟုတ် အဆိုးဆုံးဖြစ်အောင် ဖန်တီးနိုင်သောစွမ်းရည်ကို ရယူထားကြသည်။ သူတို့၏ပညာရပ်များကို နေရာတကျ အသုံးမပြုပါက ကမ္ဘာလောကကြီး၏ ဘေးဆိုးကြီးပင်ဖြစ်သည်။ မဟာဒုက္ခကြီးပင် ရောက်ရချေသည်။

ပညာများကား သုံးတတ်လျှင်ဆေး မသုံးတတ်လျှင်ဘေးပင်ဖြစ်သည်။ မတော်လျှင် သင်ပေးလို့ ရသေးသည် မကောင်းလျှင်သင်ပေးလို့မလွယ်ကူပါ။ လူတော်များလုပ်ရပ်ကြောင့် လူကောင်းများ ဖေးမ၍ ကမ္ဘာကြီးငြိမ်းချမ်းပြီး ပြန်လည်တည်တံ့မှုများလည်း ရှိနေသည်။ ကမ္ဘာ့ငြိမ်းချမ်းရေးမှာလည်း လူကောင်းတို့ ရှိမှသာ တည်တံ့ခိုင်မြဲနေပေလိမ့်မည်။

လူသည် တော်ပင်တော်ငြား စိတ်ဓာတ်မကောင်းပါက ပို၍ပင်ဒုက္ခပေးနိုင်ပေသည်။ လူကောင်းဖြစ်ပါက မတတ်သည်ကို သင်ကြားပါကဖြစ်နိုင်ပေသည်။ မကောင်းသောသူကို ကောင်းရန်ပြုပြင်ရန်မှာ အလွန်ခဲယဉ်းသော ကိစ္စတစ်ရပ်ပင်ဖြစ်သည်။ လူတို့သည် မိမိကိုယ်ကိုတော်သည်ထက် တော်အောင်ကြိုးစားသကဲ့သို့ ကောင်းသည်ထက်ကောင်းအောင် ကြိုးစားသင့်သည်။ လူကောင်းတစ်ယောက်ဖြစ်ရန်မှာ အကျင့်စာရိတ္တလည်း ကောင်းမွန်ရမည်။ ရဲစွမ်းသတ္တိလည်းရှိရမည်။ အများကျိုးလည်းထမ်းပိုးလိုသော စိတ်ဓာတ်နှင့်အတူ စိတ်သဘောထားပြည့်ဝရန်လည်း လိုပေသေးသည်။ သို့မှသာ လူကောင်းစင်စစ် ဧကန်ဖြစ်ပေလိမ့်မည်။

လူတော်တစ်ဦးအဖြစ်ကို ရရှိရန်မှာ မိမိ၏ကြိုးစားမှု၊ အားထုတ်မှုတို့ အပေါ်တွင်သာ တည်ပေသည်။ ကြိုးစားက ဘုရားဖြစ်နိုင်သကဲ့သို့ မည်သူမဆို ကြိုးစားကထူးချွန်ကာ လူတော်တစ်ဦးဖြစ်လာနိုင်ပေသည်။ လူကောင်းတစ်ဦး၏ အရည်အသွေးမှာ မိခင်ဝမ်းတွင်းမှပါလာသော စိတ်ထားနှလုံးသားတို့ အရသာဖြစ်၍ လူကောင်းအဖြစ်ရပ်တည်ရန်မှာ ခဲယဉ်းလှပေသည်။ လူတော်ဖြစ်ရန်ကြိုးစားရပေမည်။ လူကောင်းဖြစ်ရန်ကား ထို့ထက်ဆယ်ဆမကပင် ကြိုးစားရန်လိုပေသည်။

လူသည် တော်ပင်တော်ငြား စိတ်ထားမကောင်းပါက နုံချာသူထက်ပင်ဆိုးပေသည်။ လူကောင်းကို တော်ရန်လေ့ကျင့်ပေးရာမှာ တော်လာသူသည် ဆိုးကျိုးကိုမပေးနိုင်။ ထို့ကြောင့်လည်း လူကောင်းဆီမှ လူတော်ဖြစ်ကာ ဘက်စုံပြည့်စုံအောင် ကြိုးစားရပေမည်။ လူတော်တစ်ဦးကို လူကောင်းတစ်ဦးအဖြစ် ပြုပြင်ပုံသွင်းရန်မှ မလွယ်ကူပေ။ သို့သော် လူကောင်းပါသော်လည်း မတော်ပါက နုံလွန်းညံ့လွန်းသူအဖြစ် အပြောခံရပေလိမ့်မည်။ ထို့ကြောင့် ဘက်စုံထူးချွန်သူ ပြည့်ဝသူ လူကောင်းလူတော် ဖြစ်ရန်လိုအပ်ပေသည်။

လူတစ်ဦးသည် အရည်အချင်းတစ်မျိုးတည်းရှိနေ၍ မဖြစ်နိုင်ပေ။ ကောင်းလည်းကောင်း၊ တော်လည်းတော်မှ အများအကျိုးဆောင်နိုင်မည်။ လူကောင်းသည် မည်သူ့ကိုမှ ထိခိုက်အောင် မလုပ်ဆောင်ပေ။ လူတော်သည်ကား ကောင်းကျိုးဆိုးကျိုး အဆုံးစွန်အောင် စွမ်းဆောင်နိုင်သည်ဖြစ်သည်။ လူကောင်းလူတော်မှသာ ကောင်းကျိုးဆောင်သူ သက်သက်သာသာဖြစ်သည့်အတွက် လူကောင်းလူတော်ကို ရည်မျော်ကြရပေမည်။

လူတော်ကို လူကောင်းဖြစ်ရန် တည်ဆောက်ပေးရေးမှာ မလွယ်ကူသော ကိစ္စတစ်ရပ်ပင်ဖြစ်သည်။ မလွယ်ကူရုံသာမာ ခက်ခဲသည်ဟုပင် ဆိုနိုင်ပေသေးသည်။ လူကောင်းကို လူတော်ဖြစ်အောင် တည်ဆောက်ပေးရေးမှာမူ ဖြစ်လည်းဖြစ်နိုင်သည်။ လွယ်လည်းလွယ်ကူသည်။ အဓိပ္ပါယ်လည်းရှိသည်။

ဤသည်တို့ကို ထောက်ရှုခြင်းအားဖြင့် လူကောင်းလူတော်ကိုသာ ရည်မျော်ကြရပေလိမ့်မည်။ လူသားတိုင်းကို လူကောင်းဖြစ်စေ၍ လူကောင်းတိုင်းကို လူတော်ဖြစ်အောင် တည်ဆောက်ပေးကြပါ။ သို့ဖြစ်ပါ၍ စာဖတ်ပရိတ်သတ်အပေါင်းတို့ မိမိကိုယ်တိုင်လည်း သာမန်လူသားဘဝမှသည် လူကောင်းအဖြစ်သို့ လူကောင်းအဖြစ်မှသည် လူတော်အဖြစ်သို့ တိုင်အောင် တစ်ဆင့်တစ်ဆင့် တက်လှမ်းကြပါစို့လို့ တိုက်တွန်းရေးသားရင်း နိဂုံးချုပ်လိုက်ပါတယ်။

နန်းစန်းစန်းဝင်း
Powered by Blogger.