စီးပွားရေးလောကတွင်ဖြစ်စေ၊ နိုင်ငံရေးလောကတွင်ဖြစ်စေကိုယ်ပိုင်ဆုံးချက်မပါပဲ သူတစ်ပါးပြောတိုင်းအကြံပေးတိုင်းလိုက်နာကျင့်သုံးနေသူများသည် နောင်တတရားများကိုရင်ဝယ်ထွေးပိုက်ရတတ်သည်။ ကိုယ်ပိုင်စဉ်းစားတွေးခေါ်တတ်သော ဉာဏ်ပညာဖြင့်ဘဝအတွက် အရေးကြီးသောဆုံးဖြတ်ချက်ကို အကောင်အထည်ဖော်ဆောင်နိုင်သော သူသည်သာလျှင် ပန်းတိုင်သို့ ချဉ်းကပ်နေသူအဖြစ် သတ်မှတ်နိုင်မည်ဖြစ်သည်။
လူသားတိုင်းသည် မိမိအတွေးအခေါ်ယူဆချက်များတွင် ပညာသားပါပါ နည်းပညာမျိုးစုံတို့ဖြင့် ကိုယ်ပိုင်ဘဝကိုတည်ဆောက်နိုင်မှသာ သူတစ်ပါးတို့၏ပါးစပ်ဖျားကမိမိဘဝကို မကုန်ဆုံးစေနိုင်မည်ဖြစ်သည်။ မိမိကိုယ်ပိုင်ဘဝကိုလူ့အခွင့်အရေးအရဖြစ်စေ၊ ကိုယ်ပိုင်ဆုံးဖြတ်ချက်ဖြင့်ဖြစ်စေ မလွှဲစေဖို့ လွန်စွာအရေးကြီးပါသည်။ ထိုသို့မလွှဲမှားဖို့အတွက် မိတ်ကောင်းဆွေကောင်းများနှင့် ဆရာသမားကောင်းများရှိဖို့ အလွန်လိုအပ်ပါသည်။
ရခဲလှသည့်လူ့ဘဝသည် အကျိုးရှိရှိနေထိုင်တတ်ရန်လိုအပ်ပြီးမှန်မှန်ကန်ကန် ဆုံးဖြတ်တတ်ဖို့ရန်လည်း အရေးကြီးပြန်ပါသည်။ မိမိကောင်းကျိုးများနှင့် လောကကောင်းကျိုးများကို သယ်ပိုးနိုင်ဖို့ဆိုလျှင်အသိပညာ၊ အတတ်ပညာများကိုသင်ယူရမည်၊ ဘာသာရေးတရားလိုက်စားရမည်၊ ဆရာသမားကောင်းများရှိရမည်၊ အားလပ်သည့်အချိန်တွင် စာဖတ်ရမည်ဖြစ်သကဲ့သို့ တစ်ဖက်တွင် ကိုယ်တိုင်လက်တွေ့ကျင့်သုံးရမည်ဖြစ်သည်။
အချို့သောသူများသည် သူတစ်ပါးပြောသောစကားဖြင့် ကိုယ်ပိုင်ဘဝကိုဖန်တီးခြင်းကြောင့် လူလိမ္မာလေးဖြစ်သင့်ပါလျှက် လူဆိုးသူခိုးဖြစ်ရခြင်း၊ မူးယစ်၏သားကောင်ဖြစ်ရခြင်း၊ ဒုစရိုက်သမားဖြစ်ရခြင်းစသည့် မကောင်းသောနေထိုင်ပြောဆိုမှု အမွေဆိုးများကိုလက်ခံရရှိကာ မကောင်းမှုများကိုအဟုတ်ထင် အဖော်လုပ်ပြီးရခဲလှသည့် လူဘဝကိုအချုပ်ခန်းနှင့် ထောင်တွင်းသာအဆုံးသတ်ကြရလေသည်။
ထိုကဲ့သို့အမှားများကိုလူငယ်များနှင့် စာဖတ်သူများသတိထားဆင်ခြင်နိုင်ရန်နှင့်မမှားခင်ကြိုတင်သိရှိနိုင်ရန် တန်ဖိုးရှိသော ဘဝကိုလောကကြီးအတွက် အကျိုးပြုနိုင်ရန်အလို့ငှာရည်ရွယ်၍ ဗုဒ္ဓမြတ်စွာဘုရားဟောကြားခဲ့သော တရားဒေသနာတော်လာသည့်အတိုင်း ယုံမှတ်လို့ပုံမအပ်မိစေဖို့၊ အထူးသဖြင့်ကိုယ်ပိုင်ဆင်ခြင် ဉာဏ်မပါပဲမယုံကြည်၊ မစွဲလမ်းသင့်သောစကား(၁၀)ခွန်းကိုကေသမုတ္တိသုတ်၊ ကုလာမပုဏ္ဏားအားဟောကြားပေးသည့်အတိုင်းအကျည်းချုပ်ရေးသားတင်ပြရလျှင် အောက်ပါအတိုင်းဖြစ်ပါသည် - ၎င်းစကား (၁၀)ခွန်းမှာ-
(၁)ငယ်ရွယ်စဉ်က ကြားဖူခဲ့သည့်စကားမို့ မှန်ကန်သည်ဟုယုံမှတ်ခြင်း၊ (၂)မိဘဘိုးဘွားများ၏ ဓလေ့ထုံးစံဆိုပြီးယုံမှတ်ခြင်း၊ (၃)အများသူငါ ပြောဆိုကျင့်သုံးခြင်းကြောင့် ယုံမှတ်ခြင်း၊ (၄)သူတစ်ပါးပြောဆိုသောစကားနှင့် မိမိသင်ယူဖူးသည့်ကျမ်းဂန်အတိုင်းမှန်ကန်သည်ဟုယုံမှတ်ခြင်း၊ (၅)မိမိကြံစည်တွေးတောသည့်အတိုင်းမှန်ကန်သည်ဟုယုံမှတ်ခြင်း၊ (၆)သူတစ်ပါးလုပ်ငန်းနှင့် မိမိစရိုက်ကိုက်ညီခြင်းကြောင့် ယုံမှတ်ခြင်း၊(၇)စာပေကျမ်းဂန်အတိုင်းငါတို့လုပ်သည်ဟုယုံမှတ်ခြင်း၊ (၈)သူတစ်ပါးပြောဆိုသောစကားနှင့် မိမိအယူအဆတူညီခြင်းကြောင့် ယုံမှတ်ခြင်း၊ (၉)ပုဂ္ဂိုလ်ကျော် ပညာရှိသူများမိန့်ကြား၍ အမှန်တရားဖြစ်ကြောင်းယုံမှတ်ခြင်း၊(၁၀)ငါတို့ဆရာ၊ ငါတို့ကိုးကွယ်မှု ငါတို့ဓလေ့ထုံးစံဆိုပြီးယုံမှတ်ခြင်းဟူ၍ (၁၀)ခွန်းဖြစ်သည်။
ယုံမှတ်လို့ပုံအပ်မိသူများမဖြစ်စေဖို့အထက်ပါဖော်ပြပေးခဲ့သည့်စကား(၁၀)ခွန်းတွင်ကိုယ်တိုင် ဆင်ခြင်ဥာဏ်ဖြင့် စဉ်းစားတွေးခေါ်ပြီးမိမိပြုသမျှ ကိစ္စအဝဝတွင် အမှားနှင့်အမှန်ဝေဖန်ပိုင်းနိုင်ကြပါစေ၊ အောင်မြင်သောဘဝကိုကိုယ်တိုင်ဖန်တီးရယူနိုင်ပါစေဟုစာရေးသူအနေဖြင့် တောင်းဆုပြုအပ်ပါသည်။
လူတိုင်းအထူးသတိပြုရန်မှာ သူတစ်ပါးပြောကြားသော စကားကြောင့်ဖြစ်စေ၊ မိမိ၏ အယူအဆအတွေးခေါ်ကြောင့်ဖြစ်စေ၊ ဓလေ့ထုံးတမ်းအစဉ်အလာကြောင့်ဖြစ်စေ၊ ပညာရှင်များ၏အဆိုအမိန့်များကြောင့်ဖြစ်စေတစ်ထစ်ချ မယုံကြည်သင့်ပေမိမိကိုယ်တိုင်လက်တွေ့ကျင့်သုံးသည့်အခါ အကျိုးမရှိရုံမကကိုယ်စိတ်နှစ်ဖြာချမ်းသာစေနိုင်သော စကားဖြင့်လျှင် ပယ်သင့်က ပယ်ရမည်ဖြစ်သည်။ ယုတ်စွအဆုံးမိဘနှင့်ဆရာသမားတို့၏ စကားပင်ဖြစ်စေအကျိုးစီးပွားကိုမဖြစ်ထွန်းစေပါက ယုံကြည်ကိုးစားရန်မသင့်ကြောင်း ဘုရားရှင်ကိုယ်တော်တိုင် ကုလာမသုတ္တန်တွင် အတိအလင်းဟောကြားပေးခဲ့ပါသည်။
အချို့အရာများသည် သူတစ်ပါးပြောဆိုမှုနှင့် လက်တွေ့ဘဝမှာများစွာကွဲပြားခြားနားလျှက်ရှိသည်။မိမိ၏ပတ်ဝန်းကျင်ပုဂ္ဂိုလ်များကကောင်းသောစကားနှင့် မကောင်းသောစကားများဖြင့် ဘာပဲပြောဆိုနေပါစေမိမိကိုယ်တိုင်လိုက်နာကျင့်သုံး၍ အနာဂါတ်ပစ္စုပ္ပန် နှစ်တန်သောအကျိုးစီးပွားကိုဖြစ်ထွန်းစေမှသာလိုက်နာကျင့်သုံးသင့်ပါကြောင်းနှင့်လူတိုင်းမယုံအပ်၊ မပုံအပ်မယုံမှတ်သင့်သော ဘုရားဒေသနာတော်လာစကား(၁၀)ခွန်းကိုရေးသားတင်ပြရင်းနိဂုံးချုပ်အဆုံးသတ်လိုက်ရပါသည်။
နန်းစန်းစန်းဝင်း
Like On Facebook
Follow On Twitter
Subscribe On RSS