Friday, March 14, 2014

ပအိုဝ်းအမျိုးသားအဖွဲ့ချုပ် နာယကကြီး (အဂ္ဂမဟာ သီရိသုဓမ္မမဏိဇောတဓရ ၀ဏ္ဏကျော်ထင်) ဘွဲ့ရ ဦးအောင်ခမ်းထီ ထံမှ ပေးပို့သော ၂၀၁၄ ခုနှစ်၊ (၆၅) နှစ်မြောက် ပအိုဝ်းအမျိုးသားနေ့ အခမ်းအနားသ၀ဏ်လွှာ

တောင်ကြီး၊ ၂၀၁၄ ခုနှစ်၊ မတ်လ (၁၅) ရက်နေ့

ချစ်ကြည်လေးစားအပ်ပါသော ပြည်ထောင်စုဖွား ပအိုဝ်းတိုင်းရင်းသား ညီအစ်ကို မောင်နှမများခင်ဗျား-
ယနေ့သည် ပအိုဝ်းတိုင်းရင်းသားတို့၏ နေ့ထူးနေ့မြတ်အဖြစ် ကျက်သရေမင်္ဂလာ အပေါင်းနှင့် ပြည့်စုံသော (၆၅) နှစ်မြောက် ပအိုဝ်းအမျိုးသားနေ့ ဖြစ်ပါသည်။ ပအိုဝ်းအမျိုးသားနေ့တွင် ပြည်ထောင်စု သမ္မတ မြန်မာနိုင်ငံတော် အတွင်း မှီတင်းနေထိုင်လျက် ရှိကြကုန်သော ပအိုဝ်းပြည်သူ ပြည်သားအပေါင်းတို့ ကောင်းကျိုးချမ်းသာ မင်္ဂလာ အဖြာဖြာနှင့် ပြည့်စုံကြပါစေကြောင်း ဆုမွန်ကောင်းဖြင့် နှုတ်ခွန်းဆက်သအပ်ပါသည်။
သမိုင်းအစဉ်အလာ ကြီးမားသည့် ပြည်ထောင်စု သမ္မတ မြန်မာနိုင်ငံတော်အတွင်း တိုင်းရင်းသား လူမျိုးပေါင်း (၁၃၅) မျိုး၊ လူဦးရေ သန်း (၆၀) ကျော်တို့သည် ရှေးပဝေသဏီကပင် ဥမကွဲ သိုက်မပျက် စည်းလုံးညီညွတ်စွာ နေထိုင်လာခဲ့ကြပါသည်။ မြန်မာနိုင်ငံသို့ နယ်ချဲ့ဖက်ဆစ်တို့ ကျူးကျော်ခဲ့သဖြင့် လွတ်လပ်ရေး ဆုံးရှုံးကာ စည်းလုံးညီညွတ်မှုများ ပြိုကွဲခဲ့ရပါသည်။ လွတ်လပ်ရေးဖခင် ဗိုလ်ချုပ်အောင်ဆန်း၏ ကြိုးပမ်းခဲ့မှုကြောင့် ၁၉၄၈ ခုနှစ်တွင် လွတ်လပ်ရေးပြန်လည် ရယူနိုင်ခဲ့ပါသည်။
လွတ်လပ်ရေးရရှိပြီး ကိုလိုနီစနစ် အမွေဆိုးများကြောင့် တိုင်းရင်းသား ညီအစ်ကို မောင်နှမများအကြား သံသယနှင့် ပဋိပက္ခများ နှစ်ရှည်စွာ ဖြစ်ပေါ်ခဲ့ရသည်။ ပဋိပက္ခများကြောင့် အိမ်နီးချင်းနိုင်ငံများထက် နိုင်ငံရေး၊ စီးပွားရေး၊ လူမှုရေး ခေတ်နောက်ကျ ကျန်ရစ်ခဲ့ရသည်။ နယ်ချဲ့နှင့် ဖက်ဆစ်တို့ကို တိုင်းရင်းသား ညီအစ်ကို မောင်နှမတို့၏ အသက်နှင့် သွေးများကိုရင်းကာ တွန်းလှန်တိုက်ခိုက် နိုင်ခဲ့ကြသည်။ မြန်မာ့သမိုင်းတစ်လျှောက် ခါးသီးသော အတွေ့အကြုံများကို သင်ခန်းစာယူလျှက် နိုင်ငံတော်ဖွံ့ဖြိုးရေး၊ နိုင်ငံတော်ကြီး ထာဝရ ငြိမ်းချမ်းရေး တို့အတွက် တိုင်းရင်းသား ညီအစ်ကို မောင်နှမများအားလုံး တက်ညီလက်ညီ ၀ိုင်းဝန်းကြိုးပမ်း ဆောင်ရွက်သွားရမည် ဖြစ်ပေသည်။
ပအိုဝ်းတိုင်းရင်းသား ညီအစ်ကိုမောင်နှမများခင်ဗျား-
ပအိုဝ်းတိုင်းရင်းသားတို့ နေထိုင်ရာဒေသအတွင်း ပဋိပက္ခပြဿနာများကြောင့် နှစ်ပေါင်းများစွာ စစ်ဘေးစစ်ဒဏ်များဖြင့် ခါးစည်းရင်ဆိုင် တွေ့ကြုံခဲ့ကြရသည်။ ပအိုဝ်းအမျိုးသားအဖွဲ့ အနေနှင့် ဒုက္ခပင်လယ်ပြီး နိုင်ငံရေး၊ စီးပွားရေး၊ လူမှုရေးဘ၀များ များစွာ ခေတ်နောက်ကျ ခဲ့ရသည့်အတွက် ၁၉၉၁- ခုနှစ်တွင် နိုင်ငံတော်နှင့် အပစ်အခတ်ရပ်စဲကာ ဒေသဖွံ့ဖြိုး တိုးတက်ရေး လုပ်ငန်းများကို နေ့မအား ညမအား အားသွန်ခွန်စိုက် ကြိုးပမ်းဆောင်ရွက်လာခဲ့ကြရာ ပအိုဝ်းပြည်သူပြည်သားအားလုံး ငြိမ်းချမ်းရေး၏ အရသာ၊ ငြိမ်းချမ်းရေး၏ အကျိုးကျေးဇူးများ စတင်ထိတွေ့ ခံစားနေကြရပြီ ဖြစ်ပါသည်။
၂၀၀၈ ခုနှစ် ဖွဲ့စည်းပုံအခြေခံဥပဒေအရ ၂၀၁၀ ခုနှစ်တွင် ပါတီစုံ ဒီမိုကရေစီ အထွေထွေ ရွေးကောက်ပွဲကြီး အောင်မြင်စွာ ကျင်းပနိုင်ခဲ့သည်။ ၂၀၀၈ ခုနှစ် ဖွဲ့စည်းပုံ အခြေခံဥပဒေက အခြားတိုင်းရင်းသားတို့ထက် ပို၍ ပအိုဝ်းလူဦးရေးအများဆုံး တည်ရှိရာဖြစ်သော ရှမ်းပြည်နယ်တောင်ပိုင်း ဟိုပုံးမြို့နယ်၊ ဆီဆိုင်မြို့နယ်နှင့် ပင်လောင်းမြို့နယ်တို့ကို ပအိုဝ်းကိုယ်ပိုင်အုပ်ချုပ်ခွင့်ရဒေသ မြို့နယ် (၃) ခုတို့တွင် ပြည်နယ်လွှတ်တော် ကိုယ်စားလှယ်များ၊ ပြည်သူ့လွှတ်တော် ကိုယ်စားလှယ်များ၊ အမျိုးသားလွှတ်တော် ကိုယ်စားလှယ်များအဖြစ်ဖြင့် ပအိုဝ်းအမျိုးသားအဖွဲ့ချုပ် (PNO) ပါတီမှ တာဝန်ရှိလူကြီးမင်းများ ရွေးချယ်တင်မြှောက် ခံခဲ့ကြရပါသည်။ ဒီမိုကရေစီ နိုင်ငံတော်သစ် တည်ဆောက်ရာတွင် တိုင်းရင်းသားအားလုံး ပါဝင်ခွင့်ရသည့်အတွက် အောင်မြင်မှု အသီးအပွင့် ရလာဒ်ကောင်းများ မျက်ဝါးထင်ထင် တွေ့မြင်ကြရပြီဖြစ်သည်။ စည်းကမ်းပြည့်ဝသော ဒီမိုကရေစီ နိုင်ငံတော်သစ် တည်ဆောက်ရာတွင် ခိုင်မာသည့် ပြည်ထောင်စုစိတ်ဓါတ်၊ စစ်မှန်သည့် မျိုးချစ်စိတ်ဓါတ်တို့ဖြင့် စည်းလုံးညီညွတ်စွာ တက်ညီလက်ညီ ၀င်းဝန်းကြိုးပမ်း ဖော်ဆောင်ကြပါရန် ပအိုဝ်းအမျိုးသားနေ့ အခါသမယတွင် တိုက်တွန်းနိုးဆော်လိုက်ပါသည်။

ဦးအောင်ခမ်းထီ

ပအိုဝ်းဘာသာ


Powered by Blogger.