Thursday, January 14, 2016

ခေါင်းဆောင်ကောင်းအား လေးစားစွာ ဂုဏ်ယူဦးညွတ်ခြင်း

တောင်ကြီး၊ ၂၀၁၆ ခုနှစ်၊ ဇန်န၀ါရီလ (၁၅) ရက်


အေးမြတဲ့ဆောင်းလေပြေနဲ့အတူ နှစ်ဟောင်းကို နှုတ်ဆက်ပြီး နှစ်သစ်က လက်ကမ်းကြိုဆိုနေပြီ ဖြစ်သည်။ နှစ်သစ်ကို အားအင်အပြည့်နဲ့လျှောက်လှမ်းနိုင်ရန် လုံလောက်တဲ့ခွန်အားတွေရှိဖို့ လိုမည်ဖြစ်သည်။ မိမိတို့ ပအိုဝ်းလူမျိုးသည် ၂၀၁၆ နှစ်သစ်ကို အားမာန်အပြည့်နဲ့ ခြေလှမ်းစနိုင်ခဲ့သည်ဟု ဆိုချင်မိသည်။





 မိမိတို့၏ ခေတ်အဆက်ဆက် ခေါင်းဆောင်များ၏ စေတနာ၊ ဝါသနာ၊ အနစ်နာကို အရင်းခံပြီး ပအိုဝ်းပြည်သူများ၏ အကျိုးကိုမျှော်ကိုးပြီး ကြိုးပမ်းအားထုတ်ခဲ့ခြင်းကြောင့် ပအိုဝ်းဟူ၍ ယနေ့တိုင်ရပ်တည်နိုင်ခဲ့ခြင်း ဖြစ်သည်။ ပအိုဝ်းကိုယ်ပိုင်အုပ်ချုပ်ခွင့်ရဒေသ ဦးစီးဥက္ကဌ ဦးခွန်စံလွင်၏ ကြိုးပမ်းအားထုတ်မှုကြောင့် ၆-၁-၂၀၁၆ ခုနှစ် ပအိုဝ်းအမျိုးသားပိုင်(ဒဲဉ်သီးဗွေကွင်း)တွင် လုပ်ငန်းခွင်အကြို ဆရာအတတ်ပညာ ဒီပလိုမာ အထူးသင်တန်းကျောင်းကို ဖွင့်လှစ်နိုင်ခဲ့သည်။ သင်တန်းကျောင်းဖွင့်ပွဲတွင်  ပညာရေးဝန်ကြီးဌာနမှ ပြည်ထောင်စု ဒုတိယဝန်ကြီးကိုယ်တိုင်တက်ရောက်ဖွင့်လှစ်ပေးခြင်းမှာ အားရကျေနပ်ဖွယ်ဖြစ်သည်။ အဆိုပါ သင်တန်းကျောင်းတွင် ပအိုဝ်းကိုယ်ပိုင်အုပ်ချုပ်ခွင့်ရဒေသ မြို့နယ်များအပြင် တောင်ကြီး၊ ညောင်ရွှေ၊ ပင်းတယနှင့် ကယားပြည်မှ ကျောင်းသူ/သားပေါင်း (၁၁၅) ဦး တက်ရောက်ခွင့်ရခဲ့ပါသည်။
မိမိတို့နိုင်ငံသည် စနစ်အမျိုးမျိုး၏ အုပ်ချုပ်မှုအောက်တွင် နှစ်ပေါင်းများစွာ ခံခဲ့ရသည်။ မိမိတို့နိုင်ငံသည် အထူးသဖြင့် တိုင်းရင်းသားဒေသတွင် စစ်ဘေးစစ်ဒဏ်အပြင် ခေတ်စနစ်ဆိုးတို့၏ ဒဏ်ကြောင့် ဒေသဖွံ့ဖြိုးရေးလုပ်ငန်းများ ဖော်ဆောင်ရာတွင် အဘက်ဘက်မှ နောက်ကျကျန်ခဲ့ရပြီး ပညာရေးကဏ္ဍတွင် အားနည်းခဲ့ရသည်။ တိုင်းပြည် ဖွံ့ဖြိုးတိုးတက်အောင် လုပ်ဆောင်ရာတွင် လူ့စွမ်းအားအရင်းအမြစ်သည် အလွန်အရေးကြီးပါသည်။ ပညာရေးကဏ္ဍ နိမ့်ကျမှုကြောင့် တိုင်းပြည်လည်း နောက်ကျကျန်ခဲ့ရပြီး ကမ္ဘာ့အလယ်တွင် မျက်နှာငယ်ခဲ့ရသည်။ ဒီမိုကရေစီ အကူးအပြောင်းကာလမှာ နိုင်ငံတော်အစိုးရအနေဖြင့် ပညာရေးကဏ္ဍကို အလေးပေးဆောင်ရွက်နေပြီး ပညာရေးကဏ္ဍတိုးတက်စေဖို့အတွက် ပညာရေးနှင့်ဆိုင်သည့် အမျိုးသားပညာရေးဥပဒေနှင့် အမျိုးသားပညာရေးကိုပြင်ဆင်သည့် ဥပဒေကိုလည်း ပြဌာန်းနိုင်ခဲ့ပြီဖြစ်သည်။ ပညာရေးကဏ္ဍကို ဖွံ့ဖြိုးတိုးတက်အောင် ဆောင်ရွက်ရာတွင် ဆရာ/မများ အရေအတွက်နှင့် အရည်အသွေး တိုးတက်မှုမှာလည်း များစွာလိုအပ်လှပါသည်။ ပအိုဝ်းကိုယ်ပိုင်အုပ်ချုပ်ခွင့်ရဒေသ ဦးစီးဥက္ကဌ ဦးခွန်စံလွင်သည် မိမိတို့ပအိုဝ်းကိုယ်ပိုင်အုပ်ချုပ်ခွင့်ရဒေသတွင် ပညာရေးကဏ္ဍဖွံ့ဖြိုးတိုးတက်လာစေရန် ရည်ရွယ်၍ ဒေသခံဆရာ/မများ မွေးထုတ်ပေးနိုင်မည့် လုပ်ငန်းခွင်အကြိုဆရာအတတ်ပညာ ဒီပလိုမာ အထူးသင်တန်းကျောင်းကို မိမိတို့ဒေသတွင် ပထမဦးဆုံးဖွင့်လှစ်နိုင်ခဲ့သည့်အတွက် အထူးပင် ဝမ်းသာဂုဏ်ယူမိပါသည်။ သစ်တစ်ပင်ကောင်းရင် ဌက်တစ်သောင်းနားနိုင်သည်ဟူသော ဆိုရိုးစကားအတိုင်း ပအိုဝ်းပြည်သူများအတွက် အားကိုးအားထားပြုနိုင်မည့် အနာဂါတ်ခေါင်းဆောင်ကောင်းများ ပေါ်ထွန်းလာစေရန် မိမိဒေသ၊ မိမိလူမျိုးရေရှည်အကျိုးကိုမျှော်ကိုး၍ ပညာရေးကဏ္ဍကို အလေးထားဆောင်ရွက်လာသည်ကို တွေ့ရသည့်အတွက် ပအိုဝ်းပြည်သူတစ်ဦးအနေဖြင့် ဂုဏ်ယူကျေနပ်မိပါသည်။ ပညာမြှင့်မှလူမျိုးတင့်မည် ဆိုသည့်အတိုင်း ပအိုဝ်းကျောင်းသူ/သားမောင်မယ်များသည်လည်း မိမိတို့ရရှိသည့်အခွင့်အရေးများကို မိမိရရဆုတ်ကိုင်ထားကာ တတ်သိပညာများကို ကြိုးစားလေ့လာသင်ယူသင့်သည်။ သို့မှသာ ဒေသအကျိုး၊ တိုင်းပြည်အကျိုးကို သယ်ပိုးနိုင်သော နိုင်ငံ့သားကောင်းရတနာများ၊ လူ့စွမ်းအားအရင်းအမြစ်ကောင်းများ ပေါ်ထွန်းလာမည်ဖြစ်ပြီး မိမိတို့လူမျိုးများ၏ ပုံရိပ်ကိုလည်းမြှင့်တင်လာနိုင်မည်ဟု မျှော်တွေးရင်း ခေါင်းဆောင်ကောင်းများ၏ လုပ်ဆောင်ချက်ကို အစဉ်ထာဝရ လေးစားဂုဏ်ယူနေမိပါသည်။
 

ခြဲုင်းပေခွန် (စန္တာခမ်း)



Powered by Blogger.