၂၀၁၅ - ခုနှစ်၊ နိုဝင်ဘာလ(၈)ရက်နေ့တွင် ကျင်းပပြုလုပ်သည့် ပြည်ထောင်စုသမ္မတ မြန်မာနိုင်ငံတော်၏ ပါတီစုံဒီမိုကရေစီ အထွေထွေရွေးကောက်ပွဲတွင် မဲဆန္ဒရှင်ပြည်သူများမှ ဆန္ဒမဲပေးရွေးချယ်ခဲ့ပြီး အနိုင်ရရှိခဲ့သည့် လွှတ်တော်အမတ်များသည် ဒုတိယအကြိမ်လွှတ်တော်သက်တမ်းအတွက် ကိုယ်စီလွှတ်တော်တာဝန်ထမ်းဆောင် နေကြပြီ ဖြစ်ပါသည်။ လွှတ်တော်အမတ်များသည် ပြည်သူများ၏ကိုယ်စား ဥပဒေပြုရေးမဏ္ဍိုင်ကို တာဝန်ယူထား ရသူများဖြစ်သည်နှင့်အညီ အလကား နေ၍မရပဲ မဲဆန္ဒရှင်ပြည်သူများ၏ကိုယ်စား လွှတ်တော်တွင် ဥပဒေနှင့်အညီ တာဝန်နှင့်လုပ်ပိုင်ခွင့်ရှိသည်များကို ပြန်လည်ဆောင်ရွက်ရမည့် တာဝန်ရှိသည်ဟု ယူဆပါသည်။ ထိုကဲ့သို့ ဆောင်ရွက်ပေးနိုင်ရေးအတွက် မဲဆန္ဒရှင်ပြည်သူများအနေဖြင့် လွှတ်တော်အမတ်များ၏ တာဝန်နှင့်လုပ်ပိုင်ခွင့်များ အားလုံးဖြစ်စေ၊ အချို့ဖြစ်စေ လေ့လာသိရှိထားရန်နှင့် သိရှိပြီးပါက မိမိတို့၏ မြို့နယ်နှင့် သက်ဆိုင်သည့် ပြည်သူ့လွှတ်တော်၊ အမျိုးသားလွှတ်တော်နှင့် တိုင်းဒေသကြီး(သို့မဟုတ်) ပြည်နယ်လွှတ်တော် အမတ်များထံသို့ အချက်အလက်များနှင့်အညီ တင်ပြတောင်းဆိုနိုင်မည် ဖြစ်ပါသည်။
လွှတ်တော်အမတ်များသည် ဖွဲ့စည်းပုံအခြေခံဥပဒေနှင့် တည်ဆဲဥပဒေများကို ကာကွယ်စောင့်ရှောက်ခြင်း၊ နိုင်ငံတော်နှင့်စပ်လျဉ်းသည့် လျှို့ဝှက်ချက်များကို ထိန်းသိမ်းစောင့်ရှောက်ခြင်း၊ လွှတ်တော်သို့ တင်သွင်းသည့် အဆိုများ၊ ဥပဒေကြမ်းများနှင့်စပ်လျဉ်း၍ ဆွေးနွေးရာတွင် နိုင်ငံတော်နှင့်နိုင်ငံသားများ၏ အကျိုးစီးပွားများကို အဓိကထားခြင်း၊ မိမိတို့၏ သက်ဆိုင်ရာ မဲဆန္ဒနယ်မြေနှင့် နိုင်ငံတော်ဖွံ့ဖြိုးတိုးတက်ရေးအတွက် ဖွဲ့စည်းပုံအခြေခံဥပဒေနှင့် မဆန့်ကျင်စေပဲ အာဏာပိုင်အဖွဲ့အစည်းများနှင့်ဖြစ်စေ၊ အာဏာပိုင်ပုဂ္ဂိုလ်များနှင့်ဖြစ်စေ ပေါင်းစပ်ညှိနှိုင်း ဆောင်ရွက်ပေးခြင်း၊ မိမိမဲဆန္ဒနယ်မြေအတွင်းရှိ မဲဆန္ဒရှင်များအား လွှတ်တော်နားရက်နှင့် အားလပ်သည့်ရက် ကာလများတွင် ကွင်းဆင်းခြင်း၊ လွှတ်တော်အတွေ့အကြုံများ ပြန်လည်ရှင်းလင်းပေးခြင်း၊ မဲဆန္ဒရှင်များ၏ ဒေသ လိုအပ်ချက်များ၊ အခက်အခဲများအပေါ် တင်ပြချက်များကို လွှတ်တော်သို့ တင်ပြပေးခြင်း၊ မေးခွန်းမေးမြန်းပေးခြင်း၊ ဖွဲ့စည်းပုံအခြေခံဥပဒေနှင့်အညီ ဥပဒေကြမ်းများတင်သွင်းခြင်း၊ ဆွေးနွေးခြင်းနှင့် လွှတ်တော်က ခွင့်ပြုသည့် အခြားကိစ္စရပ်များကို ဆွေးနွေးခြင်းစသည့် တာဝန်နှင့်လုပ်ပိုင်ခွင့်မျိုးကို ဆောင်ရွက်ရသည်ဟု လေ့လာ သိရှိရပါ သည်။
လွှတ်တော်အမတ်များသည် နိုင်ငံအကျိုး၊ မဲဆန္ဒရှင်ပြည်သူများ၏ ဒေသအကျိုးကို သယ်ပိုးထမ်းဆောင်ရသည့် ပုဂ္ဂိုလ်များဖြစ်ပါသည်။ ထို့ကြောင့် ရွေးကောက်ပွဲတွင် မိမိတို့ ဆန္ဒမဲပေးရွေးချယ်ခဲ့ကြသည့် သက်ဆိုင်ရာ လွှတ်တော်အမတ်များအား မိမိတို့၏ဒေသအတွင်းရှိ ဒေသလိုအပ်ချက်များ၊ အခက်အခဲများကို အချက်အလက် များပြုစုပြီး လွှတ်တော်အမတ်များထံ တင်ပြတောင်းဆိုရမည့် တာဝန်ရှိပါသည်။ တင်ပြတောင်းဆိုရာတွင်လည်း မိမိတို့ဒေသ၏ အမှန်တကယ်လိုအပ်လျှက်ရှိသည့် ဒေသလိုအပ်ချက်များ အခက်အခဲများကိုသာ မှန်ကန်စွာ တင်ပြတောင်းဆိုကြရန် လိုအပ်ပါသည်။ တင်ပြတောင်းဆိုသည့် လိုအပ်ချက်များတွင်လည်း ဒေသအတွက် အမှန်တကယ်အကျိုးရှိပြီး တာဝန်ရှိပုဂ္ဂိုလ်များနှင့် ဒေသခံပြည်သူများ ဆွေးနွေးညှိနှိုင်းတိုင်ပင်ပြီး အားလုံးသဘောတူ လက်ခံသည့် လိုအပ်ချက်မျိုးကိုသာ တင်ပြတောင်းဆိုရန် လိုအပ်မည် ဖြစ်ပါသည်။ တင်ပြတောင်းဆိုရမည့် လိုအပ်ချက်များ တစ်ခုမက များစွာရှိပါက အချင်းချင်းညှိနှိုင်းတိုင်ပင်ပြီး ပထမဦးစားပေး၊ ဒုတိယဦးစားပေး အစီအစဉ်များဖြင့် တင်ပြတောင်းဆိုရန် လိုပါသည်။ ထိုမှသာ မဲဆန္ဒရှင်ပြည်သူများ၏ အမှန်တကယ်လိုအပ်သည့် လိုအပ်ချက်များ၊ အခက်အခဲများကို ရရှိနိုင်မည် ဖြစ်ပါသည်။ လိုအပ်ချက်တစ်ခု ရရှိပြီးမှသာ ကျန်ရှိသည့် လိုအပ်ချက်များကို ထိုနည်းအတိုင်း ပထမဦးစားပေး၊ ဒုတိယဦးစားပေးစနစ်ဖြင့် ဆောင်ရွက်ရန် လိုအပ်မည် ဖြစ်ပါသည်။
ဆန္ဒမဲပေးရွေးချယ်၍ အနိုင်ရရှိသွားသည့် လွှတ်တော်အမတ်များသည် လွှတ်တော်ထဲတွင် မိမိတို့ မအားလပ်၍၊ မသွားနိုင်၍ မိမိတို့ကိုယ်စား နိုင်ငံအကျိုး၊ ဒေသအကျိုးကို ဆောင်ရွက်ပေးနိုင်ရေးအတွက် ကိုယ်စားလှယ် စေလွတ်ထားခြင်း၊ မိမိတို့၏ ကိုယ်စားပြု သွားရောက်တာဝန်ထမ်းဆောင်ပေးခြင်း၊ မိမိတို့၏ အကျိုးကိုသယ်ပိုးရန် မဲပေးရွေးချယ်ခဲ့ကြခြင်း ဖြစ်သည်ဟု ယုံကြည်ပါသည်။
ထို့ကြောင့် ဥပဒေပြုခြင်းသည် လွှတ်တော်အမတ်များ၏ လုပ်ရမည့်တာဝန်တစ်ခု ဖြစ်သကဲ့သို့ ပြည်သူတို့၏ အခက်အခဲများ၊ လိုအပ်ချက်များကို အချိန်အခါအားလျော်စွာ ပြည်သူများ၏ အသံကို နားထောင်ပြီး “ ပြည်သူ့အသံ လွှတ်တော်အသံ”၊ “ ပြည်သူ့ဆန္ဒ လွှတ်တော်ဆန္ဒ ”၊ “ ပြည်သူတို့၏ မျှော်လင့်ချက် လွှတ်တော်က ဖော်ဆောင်ရွက်” ဆိုသည့် လွှတ်တော်ဆောင်ပုဒ်နှင့်အညီ နိုင်ငံတော်နှင့် ပြည်သူများ၏ ကောင်းရာကောင်းကျိုး အတွက် လွှတ်တော်ထဲတွင် မေးခွန်းမေးမြန်းခြင်း၊ အဆိုတင်သွင်းခြင်းများကို ဥပဒေနှင့်အညီ လုပ်ဆောင်ရသည် ဟု သိရှိရပါသည်။ ထို့ကြောင့် မဲဆန္ဒရှင်ပြည်သူများအနေဖြင့် မိမိတို့ဒေသ၏ အမှန်တကယ် လိုအပ်လျှက်ရှိသော ဒေသလိုအပ်ချက်များ၊ အခက်အခဲများကို အချက်အလက်နှင့်အညီ မိမိတို့၏ လွှတ်တော်ကိုယ်စားလှယ်များထံ ရဲရဲဝံ့ဝံ့ တင်ပြတောင်းဆိုကြရန် လိုအပ်ကြောင်း တိုက်တွန်းတင်ပြရင်း နိဂုံးချုပ်လိုက်ရပါသည်။
မဲဆန္ဒရှင် ပြည်သူများအားလုံး ကိုယ်စိတ်နှစ်ပါး ရွှင်လန်းချမ်းမြေ့ကြပါစေ။
ခွန်နောင်လွုမ်း
Like On Facebook
Follow On Twitter
Subscribe On RSS