Tuesday, November 7, 2017

ခေတ်စနစ်ကြောင့် ပအိုဝ်းရိုးရာအမွေအနှစ်များ အပျက်စီးမခံပါစေနှင့်

တောင်ကြီး၊ ၂၀၁၇ ခုနှစ်၊ နိုဝင်ဘာလ (၇) ရက်



နာရီလက်တံသည် အချိန်နှင့်အမျှ စက္ကန့်မခြားဘဲ တရွေ့ရွေ့ပြောင်းလဲနေသကဲ့သို့ ခေတ်နှင့်စနစ်သည်လည်း ၎င်းကဲ့သို့ပင် တရွေ့ရွေ့လည်ပတ်နေလေ၏။ ထို့အတူပင် လူသားတို့သည်လည်း ခေတ်ရေစီးကြောင်းအလျောက် စဉ်းစားတွေးခေါ်မှုအပိုင်းတွင် တဖြည်းဖြည်း မြင့်မားလာသော်လည်း အခြားတဖက်ဖြစ်သော အကျင့်စာရိတ္တပိုင်းတွင် တဖြည်းဖြည်း ယုတ်လျှော့လာလေကုန်သည်။ တခါတရံ ခေတ်စနစ်ကြောင့် မိမိတို့ပအိုဝ်းတိုင်းရင်းသားများ၏ ချစ်စရာကောင်းသော ဓလေ့ထုံးတမ်းများ၊ ရိုးရာအမွေအနှစ်များ ပျောက်ကွယ်ဝါးမြိုခံ ရတော့မည်လားဟု အကြောက်တရားဖြင့် ရင်တမမနှင့် ထိုင်စောင့်နေရသော အချိန်အခိုက်အတန့်လည်း ရေနွေးအိုးဆူသလို တနေ့တခြား စိုးရိမ်ရေမှတ်အထိ အငွေ့တထောင်းထောင်းနှင့် တဖြည်းဖြည်းဆူပွက်လာမိလေသည်။ အဝေးဆုံးကိုသွားမကြည့်ပါနှင့် ယနေ့အချိန်ထိ မိမိတို့ ပအိုဝ်းလူမျိုးတို့၏ ဓလေ့ထုံးတမ်းများ၊ ရိုးရာအမွေအနှစ်များ ဝါးမြိုခံရသည့် အရေအတွက်ကို ပြန်ရေတွက်လျှင် ရေတွက်လိုရမည်မထင်။ ထို့ကြောင့် ယနေ့အချိန်တွင် ပအိုဝ်းလူမျိုးများသည် မိမိတို့၏ ဓလေ့ထုံးတမ်းများ၊ ရိုးရာအမွေအနှစ်များ ဝါးမြိုခြင်းခံခဲ့ရသော အဓိကအကြောင်းရင်းများ၊ တရားခံများကို ရှာဖွေဖော်ထုတ်ရမည့် အချိန်ကာလရောက်ရှိလာပြီဖြစ်သည်။ ထိုကဲ့သို့ မရှာဖွေနိုင်လျှင် ခေတ်စနစ်ပြောင်းလဲလာသည်နှင့်အမျှ မိမိတို့၏ ဓလေ့ထုံးတမ်းများ၊ ရိုးရာအမွေအနှစ်များသည်လည်း မြစ်ကမ်းပါးပြိုသကဲ့သို့ ပျောက်ကွယ်သွားမည်ကို ထိုင်ကြည့် နေရုံမှတပါး ဘယ်မှတတ်နိုင်မည်မထင်။ ထို့ကြောင့် မိမိတစ်ဦးတည်းအနေဖြင့် ထိုကဲ့သို့ ပျက်စီးပျောက်ကွယ်ရခြင်း၏ အကြောင်းရင်းများနှင့် တရားခံများသည် လူကြောင့် (လူ့ပယောဂ ကြောင့်) ဖြစ်သည်ကို  အခန်းကဏ္ဍ(၃)ခုဖြင့် အနည်းအကျဉ်းထောက်ပြသွားမည်ဖြစ်သည်။

ယနေ့ခေတ်လူငယ်များသည် ခေတ်စနစ်၏ပြောင်းလဲမှုဒဏ်ကို မခံနိုင်ခြင်း၊ အလွဲသုံးစားမှု ပြုခြင်းများကြောင့် အရာရာကို အနောက်တိုင်းဆန်ဆန်ပြုလာကြသည်မှာ ဝမ်းနည်းစရာပင်ဖြစ်သည်။ လူငယ်များအတွက် အခြားတစ်ဖက်တွင် ခေတ်အမှီလိုက်ရန်၊ Update ဖြစ်ရန် လိုအပ်သော်လည်း အခြားတစ်ဖက်တွင် ရိုးရာအမွေအနှစ်များပျောက်ကွယ်နေရသည်ကိုလည်း သတိပြုစေလိုပါသည်။ အဝတ်အစားပိုင်းတွင် သာမက အခြားသော အပိုင်းကဏ္ဍများတွင်လည်း မိမိတို့လူသားများ၏ ပယောဂကြောင့် ခေတ်ကိုအမှီလိုက်ရင်း လုံးဝပျောက်ကွယ်သွားရမည့် ကိန်းဆိုက်နေသည်ကို သတိထားမိပေလိမ့်မည်။

ပထမအချက်အနေဖြင့် နီးနီးနားနားမြင်တွေ့နေရသော တရားဟောဆရာ(မော်)အတတ် ပညာသော်လည်းကောင်း တူရိယာများ(ခရာ၊ ပီး၊ တိန်းခင်လောင်ဖုံး၊-----) အတီးအမှုတ်ပညာများ သော်လည်းကောင်း လူတိုင်းသင်ဖူးရဲ့လားဟု မမေးလေနှင့် မြင်တောင်မမြင်ဖူးဘူးလို့ ဖြေကြမည့် မျိုးဆက်သစ်လူငယ်များလည်း တစ်ပုံတစ်ပင် အများအပြားရှိပေလိမ့်မည်။ ၎င်းတို့ကို ထိန်းသိမ်းသင့်လားဟု မေးလျှင်သင်သင့်သည်။ ထိန်းသိမ်းသင့်သည်ဟုဖြေကြမည်အမှန်ပင်သို့သော် မည်ကဲ့သို့ ထိန်းသိမ်းရမည်။ သင်ရမည်ကိုပင် ရေရေရာရာ သိကြမည်မဟုတ်။ ထို့ကြောင့် တစ်ဖက်တွင် လူငယ်များသည် မသင်ကြား၊ မလေ့လာနိုင်သော်ငြားလည်း တာဝန်သိစိတ်ဖြင့် ထိန်းသိမ်းခြင်းများ ပြုလုပ်သင့်သကဲ့သို့ အခြားတဖက်တွင်လည်း တာဝန်ရှိပုဂ္ဂိုလ်များနှင့် ငွေကြေးချမ်းသာသူများသည် ခေတ်စနစ်ကြောင့် ပျက်စီးပျောက်ကွယ်တော့မည့်ကိန်းဆိုက်နေသော မိမိတို့လူမျိုး၏ ဓလေ့ထုံးတမ်းများ၊ ရိုးရာအလေ့အထများကို သိရှိပြီးသောသူများအား ချီးမြှောက်အားပေးခြင်း၊ ခေတ်လူငယ်များကိုလည်း နွေရာသီကျောင်းပိတ်ရက်များတွင် ၎င်းတို့ ထံတွင်လည်းကောင်း တတ်သိနားလည်သူများထံတွင်လည်းကောင်း ပြန်လည်သင်ကြားနိုင်ရန် စီစဉ်ပေးခြင်း၊ ပြန်လည်သင်ကြားစေခြင်း စသောနည်းလမ်းများဖြင့် တစ်နှစ်တစ်ခါ ပြန်လည်ထိန်းသိမ်းဖော်ထုတ်သင့်ပေသည်။

ဒုတိယအချက်အနေဖြင့် အစားအသောက်ပိုင်းတွင်လည်း အနောက်တိုင်းဆန်ဆန်ဖြစ်သော ဟမ်ဘာဂါ၊ ဒင်ဆမ်း၊ ပီဇာ၊ ဟော့ဒေါ့ အစရှိသော ယနေ့ခေတ် အနောက်တိုင်း အစားအစာများသည် လူငယ်များသိရှိ၊ စားဖူးပေလိမ့်မည်။ ပအိုဝ်းရိုးရာ အစားအစာဖြစ်သော တခိုးဗွူအဲဉ်၊ တခိုးသို့ဖာ;၊ တခိုးဖြွုမ်ပေ; အစရှိသော ရိုးရာမုန့်များကို စားဖူးရဲ့လားဟုမေးလျှင် မြင်တောင်မြင်ဖူးကြမည်မထင်။ “တစ်ခါက နိုင်ငံခြားဧည့်သည်များ မိမိတို့ ဒေသသို့ ဝင်လာလျှင် မိမိတို့ပအိုဝ်းရိုးရာအစားအစာဆိုင်များကို လမ်းညွန်ပြစရာပင်မရှိဘူးလို့ ဧည့်လမ်းညွန်လုပ်နေသည့် ညီငယ်လေးတစ်ယောက်ကပြောပြဖူးသည်။ ထို့အပြင် အဆိုပါ နိုင်ငံခြားဧည့်သည်လည်း အခြားညီနောင်တိုင်းရင်းသားများဒေသသွားလျှင် ၎င်းတို့ရိုးရာအစားအစာဆိုင်များကို လိုက်ပို့ကာ ရိုးရာအစားအစာများဖြင့် ဧည့်ခံလေ့ရှိကြောင်း၊ သို့သော် ပအိုဝ်းလူမျိုးတို့တွင် အဆိုပါရိုးရာ အစားအစာဆိုင်များဖွင့်လှစ်ထားမှု အားနည်းနေသေးကြောင်း၊ ထို့ကြောင့် ပအိုဝ်းလူမျိုးတို့ သည်လည်း အခြားညီနောင်တိုင်းရင်းသားများကဲ့သို့ ရိုးရာအစားအစာများပြန်လည်ဖော်ထုတ်ကာ၊ ဆိုင်များဖွင့်လှစ်သင့်သည်ဟု အကြံပြုခဲ့သေးကြောင်း ဝမ်းနည်းစွာကြားသိရပါသည်။”  အဆိုပါ မိမိတို့၏ဘိုးဘွားဘီဘင်အစဉ်အဆက်က တီထွင်လာခဲ့သည့် ရိုးရာအမွေအနှစ်များသည် မိမိတို့ (၂၁) ရာစုလူငယ်များပင် မမြင်ဖူးဘူးဆိုလျှင် နောင်လာမည့် (၂၂) ရာစုလူငယ်များအတွက် နာမည် တောင်ကျန်မည်မထင်ပါ။ ထို့ကြောင့် အခြားညီနောင်တိုင်းရင်းသားများဖြစ်သော ရှမ်း၊ ကချင်၊ ချင်း၊ ရခိုင်ရိုးရာအစားအစာ၊ အသုံးအဆောင်ဆိုင်များ၊ ဖွင့်လှစ်ခြင်းကဲ့သို့သော ပအိုဝ်းရိုးရာအစားအစာများ၊ အသုံးအဆောင်များနှင့် အခြားသောရိုးရာအမွေအနှစ်များကို အမျိုးသားရေးတာဝန်တစ်ရပ်အဖြစ် ပြန်လည်ဖော်ထုတ်သင့်ပေသည်။ 

နောက်ဆုံးအချက်အနေဖြင့် ဘိုးဘွားအစဉ်အဆက်က ပအိုဝ်းလူမျိုးအချင်းချင်း ရာထူး ကြီးငယ်၊ ဆင်းရဲချမ်းသာခွဲခြားဆက်ဆံမှုမရှိစေရန်နှင့် တစ်သွေးတစ်သားတည်းဖြစ်စေရန် ရည်ရွယ်၍ ပအိုဝ်းအမျိုးသားဝတ်စုံကို အဆင်တန်ဆာမပါ၊ ဂုဏ်ပကာသနမပါသည့် နက်ပြာ ရောင်တစ်ရောင်တည်းဖြင့် တီထွင်လာခဲ့သည်မှာ ရာစုနှစ်များကြာညောင်းခဲ့ပြီကို အားလုံးသိရှိပြီး ဖြစ်ပေလိမ့်မည်။ ထိုအဝတ်အစားသည် အခြားညီနောင်တိုင်းရင်းသားများနှင့်မတူညီသည်မှာ ရာထူးကြီးငယ်၊ ဆင်းရဲချမ်းသာမရွေး အဝတ်အစားများသည် အရောင်တစ်မျိုးတည်းသာ ဝတ်ဆင်ရခြင်း၊ အဆင်တန်ဆာမပါခြင်း၊ အပွင့်အခက်အလက်မပါခြင်း၊ အလှူအတန်းများအတွက် သော်လည်းကောင်း အရောင်တစ်မျိုးတည်းသာ ဝတ်ဆင်ရခြင်းကြောင့် မိမိတို့လူမျိုး၏ စည်းလုံးမှုအင်အားကို ပြသထင်ဟပ်စေခြင်းစသည့် အားသာချက်များသာမက အခြားအခြားသော အားသာချက်များသည်လည်း တစ်ပုံတစ်ပင်ရှိနေလိမ့်မည်။ ဤအရာကား ရှေးဘိုးဘေးဘီဘင် အစဉ်အဆက်များ၏ နောင်လာမည့်အနာဂါတ်အတွက်  အမျှော်အမြင်ကြီးမားစွာဖြင့် ကြိုတင် ပြင်ဆင်နိုင်စွမ်းအားကြီးမားလှသည်ဟူ၍ ဂုဏ်ပြုမှတ်တမ်းတင်မိပါသည်။

ယနေ့ခေတ်ကာလတွင် အွန်လိုင်း(Facebook)ခေတ်ဖြစ်သည်နှင့်အညီ ခေတ်ကိုအမီလိုက်နေသည့် ခေတ်သစ်လူငယ်များလည်း အွန်လိုင်းစာမျက်နှာကို နေ့စဉ်ကြည့်၍ ခေတ်ရေစီးကြောင်း နှင့်အတူစီးမျှောနေကြသည်။ အဆိုပါအွန်လိုင်းစာမျက်နှာပေါ်တွင်  အနုပညာရှင်များ(ဗီဒီယို သရုပ်ဆောင်များ)သည် မိမိကြောင့် မိမိတို့ရိုးရာအဝတ်အစား ပျောက်ကွယ်ရတော့မည်ဟူသော အသိစိတ်ကို နှလုံးသွင်းဟန်မမြင် ထင်ပေါ်ကျော်ကြားစေရန်ဟူသော စိတ်ဆန္ဒဖြင့်သာ ရှေးရှု၍ ရိုးရာအဝတ်အစားများ(ဘော်ကြယ်အဝတ်အစားများ၊ ကတ္တီပါခေါင်းပေါင်းများ)ကို ဆန်းသစ် တီထွင်ပြ၊ ဝတ်စားပြလာကြပြီး အွန်လိုင်းစာမျက်နှာပေါ်တွင် ဝမ်းနည်းစွာဖြင့် မကြာခဏ မြင်တွေ့နေရပေလိမ့်မည်။ အခြားသာမန်လူသားများသည်အနေဖြင့် ရိုးရာအဝတ်အစားကို မည်မျှပင်တီထွင် ဝတ်ပြနေပါစေ အခြားပအိုဝ်းလူမျိုးများထံ ရောက်ရှိကူးစက်ဖို့၊ အတုခိုးဖို့ အလားအလာနည်းသော်လည်း ယခုလို အနုပညာရှင်များ (ဗီဒီယိုသရုပ်ဆောင်များ)မှ ရှေ့ကဦး ဆောင်ဝတ်ပြလိုက်လျှင် နောင်လာမည့် ရာစုတစ်ခုအတွင်းတွင် ဆင်းရဲချမ်းသာခွဲခြားမှုမရှိဘဲ အရောင်တစ်ရောင်တည်းသာ ဝတ်ဆင်ရမည်ဟူသောခံယူချက်ဖြင့် မိမိတို့ဘိုးဘွားဘီဘင် လက်ထက်ကတည်းက တီထွင်လာခဲ့သည့် မိမိတို့ ပအိုဝ်းတိုင်းရင်းသားတို့၏ အဝတ်အစားသည်လည်း အရောင်မျိုးစုံထွက်လာတော့မည်မှာ မြေကြီးလက်ခတ်မလွှဲပေ။ ထိုပင်မက နောင်လာမည့် အလှူအတန်းပွဲများသာမက ပအိုဝ်းအမျိုးသားနေ့(ဒဲဉ်သီးလာဗွေ)တွင်  ပအိုဝ်းလူမျိုးများ၏ ကိုယ်စားပြုအရောင်ဖြစ်သော၊ ဂုဏ်ပကာသနမပါသော နက်ပြာရောင်တို့အစား ဂုဏ်ပကာသန အရောင်များဖြင့် ထုံမွှမ်းနေသော ရောင်စုံဝတ်စုံများဖြင့် ပအိုဝ်းလူမျိုးများ ချီတက်လာသည့် မြင်ကွင်းကိုမြင်တွေ့ရပေလိမ့်မည်။

ထို့ကြောင့် ကျော်ကြားလိုသော စိတ်ဆန္ဒတစ်ခုတည်းဖြင့် မိမိတို့၏ ရိုးရာအမွေအနှစ်များကို ထပ်မံ၍ဆန်းသစ်တီထွင်ခြင်း၊ အလွဲသုံးစားမပြုလုပ်မိပါစေနှင့်။ မိမိအား ရိုးရာအမွေအနစ်များ ပျောက်ကွယ်စေခဲ့သည့် တရားခံအဖြစ် ကမ္ဗည်းမော်ကွန်းအထိုးမခံမိပါစေနှင့်။ ခေတ်မည်မျှပင် ပြောင်းလဲစေကာမူ တဖက်တွင် ခေတ်အမီလိုက်ရင်း ခေတ်မီသောလူမျိုးဖြစ်နိုင်သော်ငြားလည်း အခြားတဖက်တွင် ခေတ်စနစ်၏ ပြောင်းလဲမှုရေလှိုင်းလုံးအောက်ကို မိမိတို့ရိုးရာအမွေအနစ်များ နစ်မြုပ်ပျောက်ကွယ်တတ်သည်ကိုလည်း သတိထားစေလိုပါသည်။ ထို့အပြင် တဖက်တွင် ခေတ်နှင့်အညီ လိုက်လျောညီထွေစွာ တိုးတက်ကျင့်ကြံနေထိုင်နိုင်သည့် လူမျိုးဖြစ်စေရမည်ဟု နှလုံးမူရမည်ဖြစ်သကဲ့သို့ အခြားတဖက်တွင်လည်း မိမိတို့၏ ဘိုးဘွားဘီဘင်အစဉ်အဆက်က တီထွင်လာခဲ့သော ရိုးရာအမွေအနှစ်များသည် ခေတ်စနစ်ကြောင့် ပျက်စီးပျောက်ကွယ်မခံဘဲ ကမ္ဘာတည်သရွေ့ တည်တံ့ထင်ကျန်စေရန်အတွက် ပအိုဝ်းလူမျိုးတိုင်းတွင် အဆိုပါအမွေအနစ်များကို ထိန်းသိမ်းရမည်ဟူသောခံယူချက်များ ကိုယ်စီထားရှိမည်ဆိုလျှင် ကမ္ဘာမြေတည်တံ့ နေသည့်ကာလပတ်လုံး မိမိတို့ရိုးရာအမွေအနှစ်များသည်လည်း ကမ္ဘာမြေနှင့်အပြိုင် ဆက်လက်တည်တံ့ခိုင်မြဲနေလိမ့်မည်ဖြစ်သည်ဟု တိုက်တွန်းရေးသားလိုက်ရပါသည်။

ခွန်ယွေးယဲင်
(ခမ်းစန္တာ;ဟေ့,)
Powered by Blogger.