သမိုင်းသည် နိုင်ငံ၊ လူမျိုး၊ အဆောက်အဦး၊ လူပုဂ္ဂိုလ် စသည်တို့၏ ရှေးကာလဖြစ်စဉ်များပင်ဖြစ်သည်။ သမိုင်းသည် အစဉ်မှတ်သားရအောင် ပြုလုပ်သောစာကို ဆိုလိုသည်။ ကျေးရွာ၊ ဘုရား၊ ဂူ၊ ကျောင်း၊ တန်ဆောင်း၊ ပုဂ္ဂိုလ်ထူး၊ အကြောင်းအရာထူးတို့နှင့် စပ်လျဉ်း၍ စကားပြေဖြင့် ဖြစ်စေ၊ လင်္ကာဖြင့် ဖြစ်စေ၊ သီကုံးရေးသားထားသည့် စာများကို ခေါ်ခြင်းဖြစ်သည်။ သမိုင်းသည် လူမျိုးတစ်မျိုး၏ အတိတ် နိုင်ငံရေးဖြစ်ရပ်၊ စီးပွားရေးဖြစ်ရပ်၊ လူမှုရေးဖြစ်ရပ်နှင့် ယဉ်ကျေးမှုဆိုင်ရာဖြစ်ရပ်များကို ပြောပြနေသည်။
တိုးတက်သောနိုင်ငံ၊ တိုးတက်သောလူမျိုး အသီးသီးတို့တွင် နိုင်ငံရေးသမိုင်းများ၊ စီးပွားရေးသမိုင်းများ၊ လူမှုရေးသမိုင်းများ၊ စစ်ရေးသမိုင်းများ၊ ယဉ်ကျေးမှုသမိုင်းများ၊ အုပ်ချုပ်ရေးသမိုင်းများ စသည်ဖြင့် စာအုပ်စာတမ်းများဖြင့် ပြုစုရေးသားထားကြပါသည်။ အတိတ်သမိုင်း ဖြစ်ရပ်များကို လေ့လာပြီး အနာဂါတ်အတွက် ဆောင်ရွက်သင့်သည်များကို ဆက်လက်၍ ဆောင်ရွက်နိုင်မည်ဖြစ်သည်။ အတိတ်ကို အခြေခံပြီး အနာဂတ်တွင် မိမိလိုချင်သည့် ပုံစံများကို တည်ဆောက်နိုင်ရန်အတွက် သမိုင်းသည် မရှိမဖြစ် ရေးသား ပြုစုထားသင့်ပါသည်။ ထို့ကြောင့် အတိတ်သည် ပစ္စုပ္ပန်နှင့် အနာဂတ်အတွက် အကျိုးပြုနိုင်သည်မှာ သင်ခန်းစာယူတတ်ရန်သာ ဖြစ်ပါသည်။ သင်ခန်းစာဖြင့် ပြုစုရေးသားထားသည့် စာများသည် သမိုင်းဟုလည်း ခေါ်ပါသည်။
အတိတ်ကာလက လူမျိုးတစ်မျိုး၊ နိုင်ငံတစ်နိုင်ငံတွင် ဖြစ်ပျက်ခဲ့သော အတ္ထုပ္ပတ္တိ၊ အကြောင်းအရာတို့ကို ရေးသားမှတ်တမ်းတင်ထားရှိခြင်းသည် သမိုင်းပင် ဖြစ်သည်။ ထိုရေးသားမှတ်တမ်းတင်ခဲ့သည့် အကြောင်းအရာများ၊ အဖြစ်အပျက်များ စသည်တို့သည် အမှန်စင်စစ် ဖြစ်ပျက်ခဲ့ပါသည်ဟု သက်သေခံ အထောက်အထားများ ပါရှိရပေမည်။ ထို့ကြောင့် သက်သေခံ အထောက်အထားများ မပါရှိလျှင် သမိုင်းမဟုတ်ဟု ပြောဆိုလေ့ရှိပါသည်။
သမိုင်းအဖြစ်အပျက်တစ်ခုသည် အမှန်မုချ ဖြစ်ပျက်ခဲ့ပါသည်၊ လုပ်ကြံပြောဆိုရေးသားခြင်း မဟုတ်ကြောင်းကို ခိုင်လုံသော သက်သေခံပစ္စည်းများ၊ အရာဝတ္ထုများနှင့်တကွ ပြသနိုင်မှသာလျှင် သမိုင်းအထောက်အထားများဟု ခေါ်ဆိုနိုင်ပါသည်။ အခိုင်လုံဆုံးသမိုင်း အထောက်အထားများသည် ကျောက်စာစာပေနှင့် ရှေးဟောင်းပစ္စည်းများပင် ဖြစ်သည်။
ဧကန်မုချဖြစ်သော အကြောင်းအရာကို ကိုယ်တိုင်မြင်တွေ့၊ ကိုယ်တိုင်ကြားသိသော သူတစ်ဦး တစ်ယောက်သည် နောင်လာနောက်သားတို့အတွက် အမှတ်ရစေရန် ရည်ရွယ်၍ ရေးမှတ်ထားခဲ့သော မှတ်တမ်းများသည် အလွန်ခိုင်လုံသော သမိုင်းအထောက်အထားများ ဖြစ်သည်။ ထို့ကြောင့် ကျောက်စာများသည် အခိုင်လုံဆုံး၊ အစိတ်ချဆုံး သမိုင်းအထောက်အထားများ ဖြစ်သည်။
ပြည်ထောင်စုမြန်မာနိုင်ငံတော်အတွင်း မှီတင်းနေထိုင်ကြသော တိုင်းရင်းသားလူမျိုးများအနက် ပအိုဝ်းလူမျိုးသည် ကိုယ်ပိုင်စာပေ၊ သမိုင်းနောက်ခံ၊ ဘာသာစကား၊ ယဉ်ကျေးမှု၊ စီးပွားရေး၊ လူမှုရေး ပထ၀ီအနေအထားနှင့် နယ်နိမိတ်အထင်အရှားရှိသော လူမျိုးဖြစ်ပြီး စည်းလုံးညီညွတ်စွာ နေထိုင်လျက်ရှိသည်။ မိမိတို့စာပေ၊ ယဉ်ကျေးမှု၊ ဘာသာစကား မပျောက်ပျက်အောင် ထိန်းသိမ်းစောင့်ရှောက်သည့်အနေဖြင့် နှစ်စဉ်နှစ်တိုင်း ပအိုဝ်းအမျိုးသားနေ့ပွဲတော်ဖြစ်သည့် တပေါင်းလပြည့်နေ့တွင် ပအိုဝ်းလူမျိုးအများဆုံး နေထိုင်လျက်ရှိသည့် ဒေသများ၌ ကျင်းပပြီး ပအိုဝ်းဘာသာဖြင့် စာစီစာကုံးပြိုင်ပွဲ၊ ပအိုဝ်းအမျိုးသမီးလှယဉ် ကျေးမယ်ပြိုင်ပွဲ၊ ရိုးရာယဉ်ကျေးမှု အမွေအနှစ်များကို ထိန်းသိမ်းသောအားဖြင့် ရိုးရာအကပြိုင်ပွဲများ၊ လူငယ်များ ကျန်းမာကြံ့ခိုင်ပြီး အကျင့်စာရိတ္တများ ကောင်းမွန်လာစေရေး၊ မူးယစ်ရန်မှ ကာကွယ်နိုင်ရေးအတွက် ရည်ရွယ်ပြီး အားကစားပြိုင်ပွဲများနှင့် ပအိုဝ်းစာပေထူးချွန်ဆု ချီးမြှင့်ပွဲ အခမ်းအနားများကို စည်ကားသိုက်မြိုက်စွာ ထည့်သွင်း ကျင်းပလေ့ရှိကြသည်။ နှစ်စဉ်နှစ်တိုင်း မပျက်မကွက် ကျင်းပလျက်ရှိသည်မှာ နောင်လာနောက်သားများ အတုယူစေရန်၊ ရိုးရာယဉ်ကျေးမှု သမိုင်းကြောင်းများကို ကာကွယ်ထိန်းသိမ်းသွားစေရန်နှင့် သမိုင်းသစ်များကိုလည်း ရေးထိုးထားနိုင်ရန် ရည်ရွယ်၍ ကျင်းပခြင်းဖြစ်ပါသည်။
ဤသို့ ကျင်းပခြင်းသည်လည်း ခိုင်လုံသော သမိုင်းအထောက်အထားပင် ဖြစ်သည်။ အတိတ်သမိုင်းဖြစ်ရပ်များကို လက်စွဲကိုင်၍ ပအိုဝ်းလူမျိုးတို့၏ ဂုဏ်ကိုမြှင့်မားသထက် မြှင့်မားလာအောင် ဖော်ဆောင်နိုင်ရန် ပအိုဝ်းပြည်သူတိုင်းတွင် တာဝန်ရှိသောကြောင့် ပအိုဝ်းအမျိုးသားနေ့ပွဲတော်ကိုလည်း ပအိုဝ်းပြည်သူတိုင်း ပါဝင်ဆင်နွှဲကြသည်ကို တွေ့နေရပါသည်။ ဤသည်ကို ကြည့်ခြင်းအားဖြင့် ပအိုဝ်းပြည်သူများသည် မိမိတို့၏ ရိုးရာယဉ်ကျေးမှုများ၊ သမိုင်းများ ထိန်သိမ်းရန်အတွက် မိမိတာဝန်ဖြစ်သည်ဟု ခံယူပြီး တာဝန်ကျေပွန်စွာ ထမ်းဆောင်ကြသည်ကို အများအားဖြင့် တွေ့နေရပါသည်။
လူမျိုးတစ်မျိုး၏ အတိတ်သမိုင်းဖြစ်ရပ်သည် ထိုလူမျိုးအတွက် အသက်သွေးကြောသမျှ အရေးကြီးလှပေသည်။ အတိတ်ဖြစ်ရပ်သည် ပစ္စုပ္ပန်ကို ပိုမို၍ နားလည်စေနိုင်သည်။ အနာဂါတ်တွင် မည်သို့ ဖြစ်လာနိုင်သည်ကိုလည်း မျှော်တွေးမှန်းဆနိုင်သည်။ အတိတ်သမိုင်းသည် ထိုလူမျိုး၏ အနာဂါတ် မီးရှူးတိုင်ပင်ဖြစ်သည်။ ထို့ကြောင့် ပအိုဝ်းလူမျိုးတို့၏ သမိုင်းကြောင်းကို ပအိုဝ်းပြည်သူတိုင်း ဖတ်ရှု့လေ့လာရန် လွန်စွာအရေးကြီးပါသည်။ သမိုင်းသိမှ လူမျိုးကို မြှင့်တင်နိုင်မည်ဆိုသကဲ့သို့ မိမိလူမျိုးကို မြှင့်တင်လိုသော သူသည်သမိုင်းကြောင်းကို မဖြစ်မနေ သိရှိထားရပါမည်။ သမိုင်းသည် လူမျိုးတစ်မျိုး ရေရှည်တည့်တံ့စေရန်အတွက် အလွန်ပင် အရေးကြီးလှပေသည်။
ခေတ်စနစ်သည် အစဉ်အမြဲ တိုးတက်ပြောင်းလဲ၍ နေပါသည်။ ခေတ်စနစ်များ ပြောင်းလဲတိုင်း သမိုင်းအဖြစ်အပျက် အစဉ်အလာများသည်လည်း လိုက်လျောညီထွေ ပြောင်းလဲ၍ နေပါသည်။ ကျန်ရစ်သော ခေတ်များ၏ အကြောင်းခြင်းရာ အဖြစ်အပျက်များသည် ထိုခေတ်၏ သမိုင်းဖြစ်ရပ်သဖွယ် ကျန်ရစ်နေလေတော့သည်။ သို့သော် ပြောင်းလဲလာသည့် သမိုင်းကြောင်းအပေါ် အတိတ်သမိုင်းများကို လိုက်လံ ဖျက်ဆီး၍ရမည် မဟုတ်ပေ။
မိမိတို့၏ သမိုင်းကို မသိသော လူမျိုးသည် မှတ်ဉာဏ်မရှိသော လူတစ်ဦးနှင့် တူသည်။ ထို့ကြောင့် “သမိုင်းကို ဘာလို့သင်ရသနည်းဟုမေးလျှင် မအအောင်လို့ သမိုင်းကို သင်ထားရပါမည်ဟု သမိုင်းပညာရှင် ဒေါက်တာသန်းထွန်း၏ အဆိုအမိန့်တွင် ကြားဖူးပါသည်။” မိမိလူမျိုး၏ သမိုင်းကိုမေ့နေသောလူမျိုးသည် အတိတ်ကာလက မိမိတို့၏ ဘိုးဘွားများ ရှာဖွေတွေ့ရှိခဲ့သည်များကို အသစ်တစ်ဖန်ရှာဖွေနေရပေဦးမည်။ တီထွင်ထားသည်များကို ထပ်မံ၍ တီထွင်ရပေဦးမည်။ ဘိုးဘွားများရင်ဆိုင်ခဲ့ရသော အလားတူ ပြဿနာများကို ထပ်မံ၍ ရင်ဆိုင် ဖြေရှင်းနေရပေဦးမည်။ ပြုလုပ်ခဲ့ကြသော အမှားများကိုလည်း တစ်ဖန် ပြန်လည်မှားကြပေဦးမည်။ ထို့ကြောင့် လူငယ်များကို မိမိအနေဖြင့် အကြံပြုလိုသည်မှာ မိမိလူမျိုး၏ စီးပွားရေး၊ နိုင်ငံရေး၊ လူမှုရေးစသည့် အတိတ်ဖြစ်ရပ်များအပေါ် အခြေခံပြီး မိမိလူမျိုး ရေရှည်ရပ်တည်နိုင်ရန်အဖြစ် အပျက်များကို စနစ်တကျ ရေးမှတ်ထားပြီး သမိုင်းသစ်အဖြစ် မှတ်တမ်းတင်ထားရှိရန် ကြိုးပမ်းကြရမည်။ လူမျိုးတစ်မျိုး၏ လုပ်ဆောင်ချက်၊ ကြိုးပမ်းချက်များကို မှတ်တမ်းတင်ထားမှု မရှိလျှင် မဖော်ထုတ်နိုင်ကြလျှင် လူမျိုးပါပျောက်ကွယ်သွားနိုင်ပါသည်။
ဗြိတိသျှဝန်ကြီးချုပ်ဟောင်း ဆာဝင်စတန်ချာချီက “လူမျိုးတစ်မျိုး၏အတိတ်သမိုင်းကို အဝေးဆုံးသို့ ပြန်ကြည့်နိုင်သူသည် ကိုယ့်တိုင်းပြည်ကိုယ့်လူမျိုး၏ အနာဂါတ်ကံကြမ္မာကုိုလည်း အဝေးဆုံးသို့ လှမ်းမျှော် ရှုမြင်နိုင်သည်” ဟုဆိုခဲ့ပါသည်။ ထို့ကြောင့် ပအိုဝ်းတိုင်းရင်းသားတို့၏ အနာဂါတ်ကံကြမ္မာကို အကောင်းဆုံးတည်ဆောက်လိုလျှင်၊ ပအိုဝ်းလူမျိုးဂုဏ်ကို မြှင့်တင်လိုလျှင်၊ မိမိလူမျိုးရေရှည်တည်တံ့လိုလျှင် လက်ရှိပအိုဝ်းလူမျိုး ခေါင်းဆောင်ကြီးများ၏ လုပ်ဆောင်နေသော နိုင်ငံရေးဖြစ်ရပ်၊ စီးပွားရေးဖြစ်ရပ်၊ လူမှုရေးဖြစ်ရပ်နှင့် ယဉ်ကျေးမှုဆိုင်ရာ ဖြစ်ရပ်များကို မပျက်မကွက် စနစ်တကျရေးမှတ်ထားပြီး သမိုင်းသစ်များ ရေးထိုးထားနိုင်ရန် လိုအပ်ကြောင်းနှင့် ရှိပြီးသော အတိတ်သမိုင်းများကိုလည်း သိရှိလာအောင် ပအိုဝ်းပြည်သူတိုင်းလေ့လာစေလိုပြီး အနာဂတ်တွင် ပအိုဝ်းလူမျိုးသည် ကမ္ဘာ့အလယ်တွင် တင့်တောင့်တင့်တယ်ဖြင့် ပအိုဝ်းလူမျိုးဂုဏ်ကို ဖော်ဆောင်နိုင်မည့်သူများ ဖြစ်ကြမည်ဟု မိမိအနေဖြင့် ယုံကြည်ရင်း နိဂုံးချုပ်ရေးသားတင်ပြလိုက်ရပါသည်။
ကိုးကား။ ။ ပအိုဝ်းအမျိုးသား၏ ဂုဏ်အင်္ဂါရပ်များ
နင်;အွဉ်ရက်ခွို,
ခမ်းစန္တာ;
Like On Facebook
Follow On Twitter
Subscribe On RSS