မြန်မာနိုင်ငံသည် တိုင်းရင်းသားပေါင်းစုံနေထိုင်ကြပြီး ကမ္ဘာ့လူဦးရေအများဆုံး နိုင်ငံကြီး နှစ်နိုင်ငံ၏ အကြားတွင် တည်ရှိသောနိုင်ငံဖြစ်ပြီး တိုင်းရင်းသားပေါင်းစုံနေထိုင်ကြသည့် နိုင်ငံတစ်နိုင်ငံဖြစ်သည်။ ပအိုဝ်းလူမျိုးသည်လည်း မြန်မာနိုင်ငံတိုင်းရင်းသားပေါင်းစုံများထဲမှ လူမျိုးတစ်မျိုးအဖြစ်ပါဝင်ပါသည်။ ပအိုဝ်းတိုင်းရင်းသားများသည် ရှမ်းပြည်နယ်တောင်ပိုင်း အများဆုံးနေထိုင်ကြပြီး ကယားပြည်နယ်၊ မွန်ပြည်နယ်၊ ကရင်ပြည်နယ်၊ ပဲခူးတိုင်းဒေသကြီး၊ မန္တလေးတိုင်းဒေသကြီးနှင့် နေပြည်တော် ကောင်စီနယ်မြေစသည့်ဒေသများတွင်လည်း နှံ့စပ်စွာ နေထိုင်ကြပါသည်။
မြန်မာတိုင်းရင်းသားများသည် ဗုဒ္ဓဝါဒနှင့် ဗုဒ္ဓစာပေများကြောင့် ယဉ်ကျေးမှု ပိုမိုတိုးတက်မြင့်မားလာခဲ့သည်။ ယဉ်ကျေးမှုတွင် ရုပ်ပိုင်းနှင့် စိတ်ပိုင်းဆိုင်ရာဟူ၍ ရှိသည်။ ရုပ်ပိုင်းတွင် ဝတ်စားဆင်ယင်မှု အသုံးအဆောင်ပစ္စည်းကိရိယာများနှင့် အဆောက်အဦးများပါဝင်သည်။ စိတ်ပိုင်းဆိုင်ရာယဉ်ကျေးမှုတွင် အမူအရာယဉ်ကျေးမှု၊ အပြောအဆိုယဉ်ကျေးမှု၊ စိတ်နေစိတ်ထားယဉ်ကျေးမှုနှင့် ယုံကြည်ကိုးကွယ်မှုများ ဖြစ်သည်။
ယနေ့လူသားများသည် အတိတ်လူသားများ တီထွင်ဖန်တီးထုတ်လုပ်ခဲ့သော ယဉ်ကျေးမှု အမွေအနှစ်များကို လေးစားမြတ်နိုးကြပြီး မပျောက်မပျက်စေရန် ထိန်းသိမ်းစောင့်ရှောက်ကြသည်။ လူမျိုးတိုင်းတွင် မိမိ၏ ကိုယ်ပိုင်ယဉ်ကျေးမှု အနှစ်သာရ ဝိသေသလက္ခဏာများ အမြတ်တနိုး မွမ်းမံကြစမြဲဖြစ်သည်။ ယခုခေတ်တွင် ယဉ်ကျေးမှုအမွေအနှစ်များထိန်းသိမ်းခြင်း၊ ရှာဖွေစုဆောင်းခြင်းသည် သက်ဆိုင်ရာလူမျိုးများ၏ ဇာတိမာန်များ၊ တိုင်းချစ်ပြည်ချစ်စိတ်ဓာတ်များ ကိန်းအောင်းလာစေရန်ဖြစ်သည်။ ပအိုဝ်းယဉ်ကျေးမှုသည် အခြားယဉ်ကျေးမှုများနှင့် ရောပြွမ်းသင့်သလောက် ရောပြွမ်း၍ နေပါသည်။ သုဝဏ္ဏဘူမိသထုံပြည်မှ ဗုဒ္ဓအယူဝါဒကို လက်ခံခဲ့ကြသဖြင့် ဗုဒ္ဓဘာသာယဉ်ကျေးမှုအပေါ်တွင် အခြေပြုထားပါသည်။ ပအိုဝ်းဒေသ ကျေးရွာများရှိ ဘုန်းကြီးကျောင်းများ၊ လပြည့်လကွယ် နေ့ကြီးရက်ကြီးများ၊ ဗုဒ္ဓနှင့် ပတ်သက်သော အလှူဒါနပွဲများသည် ပအိုဝ်းအမျိုးသားများ၏ ထူးခြားသော ယဉ်ကျေးမှု လက္ခဏာများပင်ဖြစ်သည်။
ထို့ကြောင့် ပအိုဝ်းတိုင်းရင်းသားများ၏ ယဉ်ကျေးမှုအကြောင်းများ အမျိုးအမျိုးရှိသည့် အနက် ပအိုဝ်းလူမျိုးများ၏ စိတ်နေသဘောထားများ၊ ဝတ်စားဆင်ယင်မှုများအကြောင်း ဤဆောင်းပါးတွင် အကျဉ်းတင်ပြသွားမည်ဖြစ်ပါသည်။
ပအိုဝ်းတိုင်းရင်းသားများသည် ပဒေသရာဇ်အုပ်စိုးသူ လူတန်းစား၏ ဖိနှိပ်ညှဉ်းပန်းမှုနှင့် အခွန်အတုတ်မတရား အတင်းအဓမ္မကောက်ခံမှုများကြောင့် ၎င်းတို့နှင့်ကင်းဝေးရာ တောင်ပေါ် ဒေသများတွင် ရွှေ့ပြောင်းနေထိုင်ကြရသည်။ ပအိုဝ်းများ၏ စိတ်နေစိတ်ထားမှာ ရိုးသားမှုကို အရင်းခံကြသည်။ ပအိုဝ်းစကားပုံတစ်ခုအရ “ကုန်းမြင့်လျှင်ရေမတင်၊ ဂုဏ်မြင့်လျှင်လူမခင်”ဟုဆိုပေသည်။ ပအိုဝ်းလူမျိုးများသည် ဓနဂုဏ်၊ ငွေဂုဏ်၊ ပညာဂုဏ် မောက်ခြင်းများ မရှိသလောက်နည်းပါးပြီး ဆင်းရဲချမ်းသာမရွေး တပြေးညီစွာ တန်းတူဆက်ဆံကြသည်။
ပအိုဝ်းများသည် ပင်ကိုယ်ဗီဇအားဖြင့် ရိုးသား၍နိုးကြားကာ ကြိုးစားကြသည်။ ပွင့်လင်းခင်မင်တတ်ကြသည်။ မိမိတို့အချင်းချင်းဖြစ်စေ၊ အခြားညီအစ်ကိုတိုင်းရင်းသားများနှင့်ဖြစ်စေ၊ ရင်းရင်းနှီးနှီးချစ်ချစ်ခင်ခင်ပြေပြေလည်လည် ဆက်ဆံတတ်ကြသည်။ မြန်မာ့စွယ်စုံကျမ်းတွင် “ပအိုဝ်းတိုင်းရင်းသားများသည် ကိုယ်လက်ကြံ့ခိုင်သည်၊ သတ္တိရှိသည်၊ အေးဆေးစွာ နေထိုင်တတ်သည်။ ရှက်ကြောက်ခြင်း၊ တည်လွန်ခြင်း၊ အလျဉ်းမရှိ၊ ဖော်ရွေလှ၍ လွယ်ကူစွာပေါင်းသင်းဆက်ဆံနိုင်သော တိုင်းရင်းသား”ဟု ရေးသားထားပါသည်။ ပအိုဝ်းအမျိုးသားရော အမျိုးသမီးများပါ လုံ့လဝီရိယ ရှိကြပြီး အလုပ်ကို အားသွန်ခွန်စိုက် လုပ်ကိုင်အသက်မွေးကြသည်။
ပအိုဝ်းများသည် စကားပြောရာတွင် စကားတန်ဆာဆင့်လေ့မရှိ၊ လိုရင်းကို ဒဲ့ဒိုးပြောတတ်သည်ကြသည်။ ရောက်ရှိလာကြသော ဧည့်သည်များအား ပွင့်ပွင့်လင်းလင်း ခရီးဦးကြိုပြု၍ ဧည့်ဝတ်ကျေပွန်တတ်ကြသည်။ အပေါ်ယံပြင်ပတွင် အဝတ်မဲများ ဝတ်ထားကြသော်လည်း အတွင်းစိတ်သဏ္ဍာန်တွင်ကား အဖြူချည်းသာ တွေ့မြင်နိုင်ပါသည်။ ပအိုဝ်းအမျိုးစုသည် ဗုဒ္ဓဘာသာကို ကိုးကွယ်ယုံကြည်ကြသည်။ အနည်းငယ်မျှသာ ခရစ်ယာန်ကို ကိုးကွယ်ကြသည်။ ဘုရား၊ တရား၊ သံဃာကို အထူးကြည်ညိုလေးစားသည့် ပအိုဝ်းကျေးရွာများတွင် တိုက်ကျောင်းကြီးများ၊ သစ်သားကျောင်းကြီးများကို ကြီးကျယ်ခမ်းနားစွာ ဆောက်လုပ်လှူဒါန်းကြသည် ကိုတွေ့ရပါသည်။
ပအိုဝ်းအမျိုးသားများ၏ ဝတ်စားဆင်ယင်မှုများမှာ တရုတ်ပြည်အချို့ဒေသများ၏ ဝတ်စားဆင်ယင်မှုများနှင့် ဆင်တူသည်။ ပအိုဝ်းအမျိုးသားများ၏ အဓိကဝတ်စုံမှာ ခေါင်းပေါင်းနှင့် အတွင်းခံအကျီအဖြစ် စပို့ရှပ်အဖြူရောင်ဝတ်ဆင်ကြပြီး အပေါ်တိုက်ပုံအကျီမှာ လေးထောင့်စပ်ပုံသဏ္ဍာန်ရှိပြီး ခါးအထိရှည်သည်။ ဘောင်းဘီမှာ အပွဖြစ်၍ ခါး၌အဝကျယ်သည်။
ပအိုဝ်းမိန်းကလေးများ၏ ဝတ်စုံမှာခပ်ကျယ်ကျယ် ခပ်ပွပွရှိသည့်သင်တိုင်းများဖြစ်သည်။ လည်ပင်းနေရာတွင် ဗွီ(V) ပုံသဏ္ဍာန်ရှေ့နောက်ဖောက်ထား၍ လက်မောင်းအဝအကျယ် နှစ်ပေါက်ပါရှိသည်။ အပေါ်ထပ်တွင် အမျိုးသားတိုက်ပုံဆန်ဆန် ကော်လံသေးခါးတိုကိုသာ ဝတ်ဆင်ကြသည်။ ကိုယ်အောက်ပိုင်းတွင် ဒူးအထိရှိသော ထမီကိုအသုံးပြုဝတ်ဆင်လေ့ရှိသည်။ ဒူးအောက်ပိုင်း ခြေသလုံးပတ်လည်တွင် အဝတ်နက်စခေါ် ခြေပတ်ကို ကြိုးဖြင့်ချည်နှောင်ဝတ်ဆင်ကြသည်။ အမျိုးသမီးများသည် ခေါင်းပေါင်းများပေါင်းထားသည့်အပြင် ရွှေဆံထိုးနှစ်ခုလည်းထိုးထားကြသည်။
မည်သို့ပင်ဖြစ်စေကာမု “တောင်းမှာအကွပ်၊ လူမှာအဝတ်” ဆိုသည့်ဆိုရိုးစကားအတိုင်း ပအိုဝ်းအမျိုးသား၊ အမျိုးသမီးများ၏ ဝတ်စားဆင်ယင်မှုသည် ဆင်းရဲချမ်းသာမရွေး၊ အပျိုအအိုမရွေး၊ အကြီးအကဲ ငယ်သားမရွေး အနက်ရောင်ကိုသာ တပြေးညီစွာ ဝတ်ဆင်လာခဲ့ကြသည်။ ရာသီဥတုဒဏ် ပေကျေမှုဒဏ်ခံနိုင်စေရန် ဂုဏ်တုဂုဏ်ပြိုင် လူတန်းစားခွဲခြားမှုမရှိစေရန် အနက်ရောင်သည် ပအိုဝ်းတိုင်းရင်းသားများ၏ မူပိုင်သင်္ကေတအရောင်ပင်ဖြစ်ပါတော့သည်။
ပြည်ထောင်စုသမ္မတမြန်မာနိုင်ငံအတွင်း ရှမ်းပြည်တောင်ပိုင်း၊ ကယားပြည်နယ်၊ မွန်ပြည်နယ်၊ ကရင်ပြည်နယ်၊ ပဲခူးတိုင်းဒေသကြီးနှင့် မန္တလေးတိုင်းဒေသကြီးနှင့် နေပြည်တော်ကောင်စီနယ်မြေအတွင်း မှီတင်းနေထိုင်ကြကုန်သော ပအိုဝ်းတိုင်းရင်းသားများသည် ရာသီဥတုအရ ဝတ်စားဆင်ယင်မှု အနည်းငယ်ကွဲပြားသည်မှအပ ကျန်သော ယဉ်ကျေးမှုရေးရာများသည် တစ်ပုံစံတည်း၊ တစ်ထပ်တည်း ရှိနေကြကြောင်း တွေ့ရပါသည်။ ထို့ကြောင့် ပအိုဝ်းတိုင်းရင်းသားအားလုံး၏ ယဉ်ကျေးမှုဓလေ့ထုံစံများသည် တစ်မျိုးတည်းရှိကြောင်း ပအိုဝ်းတိုင်းရင်းသားအပေါင်းတို့ မိမိ၏ ယဉ်ကျေးမှုနှင့် စည်းလုံးမှုကို ထိန်းသိမ်းကြပါစို့လို့ တိုက်တွန်းရင်း ရေးသားတင်ပြအပ်ပါသည်။
ကိုးကား- ပအိုဝ်းအမျိုးသား၏ဂုဏ်အဂါင်္ရပ်များ
နန်းစန်းစန်းဝင်း
Like On Facebook
Follow On Twitter
Subscribe On RSS