အခြေခံပညာကျောင်းများတွင် တိုင်းရင်းသားစာပေသင်ကြားသော နေ့စားလပေး ကျောင်းဆရာ၊ ဆရာများကို ပညာရေးဌာနဝန်ထမ်းအဖြစ် တရားဝင်ခန့်အပ်သွားမည် ဖြစ်ကြောင်း ဇွန်လ (၁၁) ရက်တွင် ကျင်းပသည့်ဒုတိယအကြိမ် ရှမ်းပြည်နယ်လွှတ်တော် (၁၅)ကြိမ် မြောက်အစည်းအဝေးတွင် သိရသည်။
တိုင်းရင်းသားစာပေသင်ကြားသော နေ့စားလပေးဆရာ၊ ဆရာမများကို အခြေံပညာဦးစီးဌာန နေပြည်တော်မှ လုပ်အားခအဖြစ် တစ်ရက် လျှင် ၄၈၀၀ ကျပ်ဖြင့် ၂၀၁၇-၁၈ ပညာသင်နှစ်မှစတင်ကာ ခန့်အပ်ခဲ့ခြင်းဖြစ်သည်။
ရှမ်းပြည်နယ်အတွင်းရှိ တိုင်းရင်းသားစာပေဘာသာသင် ဆရာ/ဆရာမနေ့စားလပေးများအား တရားဝင်ဝန်ထမ်းအဖြစ် ခန့်အပ်ရန်အစီစဉ်ရှိ/မရှိ နှင့်စပ်လျဉ်းသည့်မေးခွန်းကို နမ္မတူမြို့နယ် မဲဆန္ဒနယ်အမှတ် (၂)မှ လွှတ်တော်ကိုယ်စားလှယ် ဒေါ်နန်းစံဟွမ်က ကြယ်ပွင့်ပြမေးခွန်းဖြင့်မေးမြန်းပြီး ရှမ်းပြည်နယ်အစိုးရအဖွဲ့ ပြည်နယ်လူမှုရေးဝန်ကြီးကပြန်လည်ဖြေကြားပေးခဲ့သည်။
“ ဘွဲ့ရထားသည့် ဆရာတွေကို မူလတန်းအတတ်သင် စာပေးစာယူ သင်တန်းကိုတက်ရောက်စေပြီး သင်တန်းဆင်းပြီးပါက ပညာရေး ဝန်ကြီးဌာန တိုင်းရင်းသာလူမျိုးရေးရာဝန်ကြီးဌာန၊ တိုင်းရင်းသားစာပေနှင့် ယဉ်ကျေးမှု ဦးစီးဌာနသို့ ညှိုနှိုင်းပြီး အမြဲခန့်ဝန်ထမ်းအဖြစ် ခန့်ထားပေးရန်စီစဉ်လျက်ရှိပါတယ်” ဟု ပြည်နယ်လူမှုရေးဝန်ကြီး ဒေါက်တာမျိုးထွန်းက ပြန်လည်ဖြေကြားခဲ့ခြင်းဖြစ်သည်။
တိုင်းရင်းသားစာပေသင်ကြားသောဆရာ/ဆရာမများသည် ပညာရေးဝန်ကြီးဌာနမှဖွင့်လှစ်သော သင်ကြားမှု လေ့ကျင့်မှုများ၊ သင်တန်းများ၊ ရုံးလုပ်ငန်းပိုင်းဆိုင်ရာတာဝန်များ၊ အခြားဘာသာသင်ကြားနိုင်ရန်သင်ကြားမှု နည်းစနစ်များကို တက်ရောက်ခွင့်ရှိသော်လည်း တရားဝင်ဝန်ထမ်းမဟုတ်သောကြောင့် သင်ကြားရေးပိုင်းတွင် ထိရောက်စွာ ထမ်းဆောင်နိုင်ရန် အားနည်းနေသေးကြောင်း သိရသည်။
၂၀၁၈-၁၉ ပညာသင်နှစ်တွင် ရှမ်းပြည်နယ်အတွင်းရှိ အခြေခံပညာကျောင်းများတွင် အခြေခံပညာနဝမတန်းမှဘွဲ့ရအထိ တိုင်းရင်းသား စာပေသင်ကြားပေးသည့် နေ့စားလပေးဆရာပေါင်း (၈၂၆)ဦးကို ခန့်အပ်သင်ကြားစေခဲ့ကြောင်း သိရသည်။
တိုင်းရင်းသားစာပေသင်ကြားသည့် နေ့စား၊ လပေး ဆရာ၊ဆရာမများ သည် မိမိတို့သင်ကြားပေးသည့်ကျောင်းတွင် လိုအပ်သောအတန်းများ စာသင်ကြားခြင်း၊ ရုံးလုပ်ငန်းများကို ကူညီဆောင်ရွက်ရခြင်း၊ အချို့သော ကျောင်းများတွင် အတန်းပိုင်ဆရာအထိ တာဝန်ယူသင်ကြားပေးရခြင်းမျိုးလည်းရှိကြောင်းသိရသည်။
၂၀၀၈ ဖွဲ့စည်းပုံအခြေခံဥပဒေအရ နိုင်ငံတော်သည် တိုင်းရင်းသားတို့၏ ပညာရေး၊ ကျန်းမာရေး၊ စီးပွားရေး၊ လမ်းပန်းဆက်သွယ်ရေး၊ လူမှုစီးပွားဘဝဖွံ့ဖြိုးတိုးတက်ရေးအတွက် ကူညီဆောင်ရွက်မည်ဟုပါရှိကြောင်းသိရသည်။
သတင်း နန်းဆုဗွေ
Crd>>>khamsarngor
Like On Facebook
Follow On Twitter
Subscribe On RSS