တောင်ကြီး၊ ဩဂုတ်လ (၁၆) ရက်
၂၀၂၀ဟန်ႏနေင်ႏယိုတလဲင်ႏ(ယိုတအာႏ) ဝင်ꩻဖေႏလင်ꩻချာယင်းလဲဉ်းသွူ၊ ဝင်ꩻဖေႏလင်ꩻချာယင်းလဲဉ်းသွူ၊ စွုမ်းဖြာꩻနီနာꩻ အခွင်ꩻအရေꩻတဲင်၊ ကွပ်နဝ်ꩻမ အခွင်ꩻအရေꩻတဗာႏကရိုꩻယို အီႏလꩻသဲင်ꩻဗာႏစွဉ်ႏတဲ့ ခုဲင်ႏငါႏနဝ်ꩻမ၊ စွုမ်ႏဖြာꩻခွန်နင်ꩻ အောဝ်ႏလိုႏထူႏဒါႏဒါႏခန်းဝင်ꩻနီနာꩻ ခွိုꩻပအိုဝ်ႏအခွင်ꩻအရေꩻသွူ။
အခွင်ꩻအရေꩻတဗာႏကရိုꩻနဝ်ꩻ နီမဉ်ႏထူႏဒါႏတဲ့ လꩻချံꩻသာႏ၊ နီမဉ်ႏထူႏဒါႏတဝ်း၊ နီမဉ်ႏသွုံꩻဒါႏတဝ်ႏနဝ်ꩻ မဲ့တဲင်နီပအိုဝ်ႏဖုံႏယို အဝ်ႏထွာစွူဗော့ꩻဒျာႏ ဝင်ꩻသွဉ်း၊ ဝင်ꩻလိုꩻ၊ အဝ်ႏခံႏလွေꩻစွူစွူပါထဲင်ႏဒွိုန်းကဒျာႏ ဝင်ꩻနိစွက်၊ ဝင်ꩻအံႏနွောင်ꩻ၊ ဝင်ꩻတိက်ꩻနျꩻ၊ ဝင်ꩻလွꩻထီႏဖုံႏလွုမ်ꩻသွူ။ နဝ်ꩻမꩻခွန်နင်ꩻခွိုꩻပအိုဝ်ႏစွုမ်ႏဖြာꩻ “ယွိုင်ႏစူဗောင် အွဉ်ႏခြေင်ႏကတွောင်”ထွူတဲင်၊ အဝ်ႏလိုႏထူႏဒါႏဒါႏခန်းဝင်ꩻ၊ အဝ်ႏလိုႏထူႏလꩻလꩻခန်းဝင်ꩻနီနာꩻ နမ်းပဲင်ႏဆဲင်ႏ အုပ်ချွုတ်ထိန်ꩻထွားခွင်ꩻလꩻဒေႏသတွမ်ႏခမ်းထီသွူ။
နဝ်ꩻတွော့ꩻ နီပအိုဝ်ႏဖုံႏယို ရိုꩻကီစွဉ်ႏ လꩻလွေꩻလဲဉ်းနမ်းပဲင်ႏဆဲင်ႏအုပ်ချွုတ်ထိန်ꩻထွားခွင်ꩻလꩻဒေႏသ သွံဝေင်ꩻနယ်ႏ ရိုꩻနဝ်ꩻလဲ့၊ နုဲင်းခွေသွဉ်းအနေႏထာꩻ ထီႏတွမ်ႏကတွားနဝ်ꩻ၊ နီပအိုဝ်ႏဖုံႏယို တလꩻလွေꩻတဲးတဲးမွေးတဝ်းဒွိုန်း နီနမ်းပဲင်ႏဆဲင်ႏအုပ်ချွုတ်ထိန်ꩻထွားခွင်ꩻလဒေႏသသွူ။ မဉ်ႏဒေါ့ꩻဗာꩻယင်းတနယ်ꩻနဝ်ꩻလဲ့ နီပအိုဝ်ႏဖုံႏယို နမ်းပဲင်ႏဆဲင်ႏ အုပ်ချွုတ်ထိန်ꩻထွားခွင်ꩻလꩻ ဒေႏသကရိုနဝ်ꩻ လꩻလွေꩻဒျာႏကြွို့ꩻဒျာႏအမဉ်ꩻလွုမ်ꩻသွူ။
ကွပ်ꩻနဝ်ꩻမꩻ တညတဝ်ႏဒွိုမ် အခိန်ႏခါႏတွင်ꩻကာလ နီပအိုဝ်ႏ “မဲ”ပြဲင်ႏပွယ်ꩻတဲ့ အီႏတွိုႏဖျင်ယင်းသွူတအာႏတဲင်၊ နီပအိုဝ်ႏဖုံႏယို ယံဖေႏကလꩻလွေꩻမွေးမွေးခန်း နမ်းပဲင်ႏဆဲင်ႏအုပ်ချွုတ်ထိန်ꩻထွားခွင်ꩻလဒေႏသတဲင်၊ နဝ်ꩻလွုမ်ꩻမကာႏ နီပအိုဝ်ႏဖုံႏယို ယံဖေႏကလꩻသဲင်ꩻပါထဲင်ႏယင်းတွမ်ႏ ခမ်းတွမ်ႏထီနုဲင်းကရီးခါတဲင်၊ ခမ်းကောင်ခမ်းဒွမ်နီနာꩻ ခွိုꩻပအိုဝ်ႏစွုမ်ႏဖြာꩻ ဖြား-ဆား၊ ပေႏ- တန်၊ မူႏတွမ်ႏခို အွဉ်ခန်းသွော့ဝင်ꩻဆွေꩻနွေꩻတွိုင်ႏပင်ႏ၊ အွဉ်ခန်းသွော့ဝင်ꩻဖြွမ်ူဗူႏ လွောင်ႏဗူႏ၊ အွဉ်ခန်းသွော့ဝင်ꩻတွူႏတရန်၊ အွဉ်ခန်းသွော့ဝင်ꩻလွေꩻသော့ꩻချာဒျာႏ နီပအိုဝ်ႏ “မဲ” အကျောင်ꩻ နေးတွမ်ႏရက်ခွိုꩻသꩻဓါတ်တန်တန်အာအာတဲင် တဲမ်းနယ်လွေꩻဖေႏဗာႏ ရွမ်ဖြဲင်ꩻနုဲင်းယိုနဝ်ꩻသွူ။
(ယပ်ꩻရီးမꩻသာႏဆုဲင်ꩻ)
ဟဒယခွန်မောင်ႏ (ထီဓါတ် - ဖြားဗွာခမ်း)
Like On Facebook
Follow On Twitter
Subscribe On RSS