Tuesday, October 20, 2020

၂၀၂၀ လွိုက်ရွေꩻပွယ်ꩻကို ကွပ်ပွိုးတမုဲင်ꩻ အောဝ်ႏလိုႏသော့ꩻဖေႏချာတွိုႏ ပအိုဝ်ႏစွိုးခွိုꩻအစွိုꩻ(PNO) “ နဂါꩻ” မဲး ကရိုꩻနောဝ်ꩻ -

 တောင်ႏကီꩻ၊ လာအောက်တိုဘာ (၂၁) နီ



(၁) ကွိုင်ႏတန်ႏတွမ်ႏနီသွဉ်းသီး စွိုးခွိုꩻလꩻပဲင်ႏခွင်ꩻဖုံႏ အဗွေတဗာႏဖေႏကလꩻနောဝ်ꩻ မွဉ်ႏဖျင် ၂၀၀၈ လွောင်ႏဗူႏပွုံႏအခေႏခံႏဥပဒေႏယိုမꩻ အီႏလꩻနွောင်ꩻနောဝ်ꩻသွူ။ ကအီႏဖျင်နွောင်ꩻဒါႏ ၂၀၀၈ လွောင်ႏဗူႏပွုံႏအခေႏခံႏဥပဒေႏယိုနောဝ်ꩻ တဖူꩻအောဝ်ႏ(၂)လီးနောဝ်ꩻသွူ။ ပထမတလီးနောဝ်ꩻ အောဝ်ႏလွတ်တောႏအကိုဖဲ့ꩻ ဒင်ႏသွင်ꩻနေးလွတ်တောႏကိုထွူတဲင် နေးထူႏပါထင်ႏယင်း ခမ်းသား မွိုးဖါသီး သꩻဆန္ဒတဲင်တွော့ꩻ ဖျင်လွေꩻနုဲင်းနောဝ်ꩻသွူ။ ဒုတိယတလီးနောဝ်ꩻ အောဝ်ႏ NCA လိတ်ချွုတ်အလꩻ မာꩻလွေꩻခမ်းပေါင်ꩻဗူႏငိမ်ꩻချံꩻရေꩻညီႏလာႏခံႏ-(၂၁)ရျာꩻစုပင်ႏလုံတဲင် ကအီႏတဲႏဆို့ꩻ လွေꩻဒါႏ ဒီမိုကရေစီဖက်ဒရယ်ခမ်းပေါင်ꩻဗူႏ ခမ်းတသာထီတသာအတာႏ ကအောဝ်ႏဒေါ့ꩻရီခြိꩻထူႏဒါႏ ခမ်းပေါင်ꩻဗူႏလိတ်ချွုတ်အလꩻတွော့ꩻ ဖျင်လွေꩻနုဲင်းနောဝ်ꩻသွူ။  ကအီႏဖျင်နွောင်ꩻအီဒါႏ ၂၀၀၈ လွောင်ႏဗူႏပွုံႏအခေႏခံႏဥပဒေႏ တဖူꩻ(၂)လီးအကို ပါဝင်ႏခွင်ꩻဖေႏကလꩻနောဝ်ꩻ  လွိုက်ရွေꩻပွယ်ꩻကိုယို အောဝ်ႏလိုႏအောင်ႏနွောင်ꩻငါႏ နောဝ်ꩻသွူ။

(၂) ၂၀၀၈ လွောင်ႏဗူႏပွုံႏအခေႏခံႏဥပဒေႏယို အောဝ်ႏလွတ်တောႏအကိုဖဲ့ꩻ ဖေႏကဖျင်နွောင်ꩻနောဝ်ꩻ လွိုက်ရွေꩻပွယ်ꩻအကို ပါတီတန်တဗာႏလွုမ်ꩻ နွောင်ꩻလꩻလို့ခန်းစွဉ်းတယောဝ်း ဖျင်တလꩻနွောင်ꩻ တောဝ်း၊ အထျꩻနောဝ်ꩻအောဝ်ႏဒျာႏ မန်းပါတီအွဉ်ငါသားတွမ်ႏ စဲ့ꩻမန်းအွဉ်ငါသားအလောင်း နောဝ်ꩻသွူ။ ၂၀၀၈ လွောင်ႏဗူႏပွုံႏအခေႏခံႏဥပဒေႏယိုအလောင်း ကျွိုက်စွယ်ꩻလဲ့နောဝ်ꩻ၊ ကျွိုက်စွယ်ꩻ တောဝ်းလဲ့နောဝ်ꩻ တွမ်ႏနီသွဉ်းသီးယို ကင်ꩻခွါႏတလꩻတောဝ်းနောဝ်ꩻမꩻ ဖျင်နွောင်ꩻလဲ့နောဝ်ꩻ၊ ဖျင်တခုဲင်ႏလꩻနွောင်ꩻတောဝ်းဒွိုန်းလဲ့နောဝ်ꩻ နီသွဉ်းသီး စွိုးခွိုꩻ၊ ဒေႏသ၊ ဟံႏနယ်ႏ၊ ခမ်းထီ အကျိုꩻတရာꩻကထွာအီဒါႏ၊ အကျိုꩻတရာꩻကအောဝ်ႏဒါႏ ထာꩻမာꩻဖုံႏယို ခွိုင်းမာꩻကလꩻနောဝ်ꩻ အောဝ်ႏလိုႏမာꩻလွေꩻနောဝ်ꩻသွူ။  

(၃) ခမ်းရင်ꩻသားလိုꩻမျိုꩻလင်ဖုံႏနောဝ်ꩻ နဲင်ႏငံႏရေꩻခြေင်ႏထိုလောင်းကီသူꩻ အောဝ်ႏတွိုႏလွေꩻ လꩻလဲဉ်းနောဝ်ꩻမꩻ ဝင်ꩻစွိုးခွိုꩻအကျိုꩻတရာꩻအတာႏ ဝင်ꩻမာꩻဖေႏနွောင်ꩻလဲဉ်းပငါပရာꩻတဲင် နီသွဉ်းသီးခွိုꩻနွယ်ႏယိုလဲ့ ဖေႏကတွိုႏလꩻလွေꩻနုဲင်းနုဲင်းနောဝ်ꩻ နဲင်ႏငံႏရေꩻမာꩻခွင်ꩻ ကအောဝ်ႏလꩻခိန်ႏ တွင်ꩻ မာꩻတောဝ်းတထွာတောဝ်း၊ မာꩻတောဝ်းတလꩻတောဝ်းနောဝ်ꩻမꩻ သွိုꩻသွိုꩻသွင်ႏသွင်ႏ ဖြွမ်းဖြွမ်းဗူႏဗူႏ ထွိုင်ႏမာꩻသွိုသွိုငီႏငီႏခန်းဝင်ꩻမꩻ အီႏတွိုႏတသွိုန်လွဉ်ꩻလꩻဝင်ꩻ နောဝ်ꩻသွူ။

(၄) စွိုးခွိုꩻထာꩻမာꩻယို ယိုꩻယိုꩻမာꩻမာꩻ တထွူသွတ်ꩻနွောင်ꩻတောဝ်းတဲင် စွိုးခွိုꩻထာꩻမာꩻအကို လိုꩻမူႏတရိုꩻတောဝ်း၊ လိုꩻယွဲးတရိုꩻတောဝ်း လုဲင်းလုဲင်းအာအာ မဉ်ႏအောဝ်ႏအွဉ်ငါနွောင်ꩻမꩻ စွိုးခွိုꩻယို တာႏဆွာꩻအီႏတဉ်ႏခွေါင်၊ အီႏတန်ထို၊ အီႏထင်ႏထိုလွဉ်နွောင်ꩻတဲင် အောဝ်ႏလိုႏစွဲးကမ်းဖေႏအာႏ ပင်ႏတသွောင်းထိုငါႏ ခွိုꩻသွုပ်တသာ လိုꩻယွဲးဖုံႏတွမ်ႏ လိုꩻမူႏဖုံႏနောဝ်ꩻသွူ။

(၅) မန်းခမ်းယိုခါ အောဝ်ႏကျင်ꩻသွုံꩻလွေꩻ ပါတီစွုမ်ႏဒီမိုကရေစီစနစ်တဲင် ပါတီစွုမ်ႏကရိုꩻဒါႏ လောင်ႏလွိုးအဟန်ဖုံႏ ဖေႏကအောဝ်ႏလွဉ်တဲ့နောဝ်ꩻ၊ အနစ်သာရ ဖေႏကဗွေစွုမ်ႏလွဉ်တဲ့နောဝ်ꩻ အခေႏခံႏတွမ်ႏလိုꩻမျိုꩻတရိုꩻတောဝ်း၊ အခေႏခံႏတွမ်ႏ ထာꩻယူႏခံႏထူႏချက်ဖုံႏတရိုꩻတောဝ်း ပါတီဖုံႏယို အောဝ်ႏစွုမ်ႏမွေးငါႏနောဝ်ꩻသွူ။ ပါတီစွုမ်ႏရိုꩻနုဲင်းနောဝ်ꩻအတွိုင်ꩻ လွိုက်ရွေꩻပွယ်ꩻကိုလဲ့ ပါတီ အလွောက်ꩻ ထွိုက်တန်ႏရာꩻ အောဝ်ႏနွောင်ꩻလꩻလွေꩻနွောင်ꩻဒျာႏ ပငါပရာꩻနောဝ်ꩻမꩻ နီသွဉ်းသီးယိုလဲ့ စွိုးခွိုꩻနဲင်ႏငံႏရေꩻဂွုဏ်ႏသိက္ခာႏ ဖေႏကပေႏဖြီဗာႏမွိုန်းတဲင် အောဝ်ႏလိုႏနွောင်ꩻလꩻငါႏနောဝ်ꩻသွူ။ 

(၆) နီသွဉ်းသီး ကအောဝ်ႏကွီကော့ꩻ ကအောဝ်ႏမဉ်လꩻဒါႏ ဒီမိုကရေစီရေꩻ၊ တန်ႏတူႏတသွိုန်ရေꩻ၊ နမ်းပဲင်ႏဖန်ဆင်ꩻခွင်ꩻ အခွင်ꩻအရေꩻဖုံႏယို ဖေႏကလꩻနောဝ်ꩻ နီတွမ်ႏနီ သောင်ႏသာချာမꩻ၊ နီတွမ်ႏနီ တွူႏတရန်ချာမꩻ အီႏလꩻနွောင်ꩻတဲင် မဉ်ႏသော့ꩻချာဖေႏဒျာႏ “ နဂါꩻ” မဲးနောဝ်ꩻမꩻ နီသွဉ်းသီးကွီကော့ꩻ ချက်ဖုံႏ၊ ထာꩻမဉ်လꩻဖုံႏယိုနောဝ်ꩻ တွမ်ႏနီသွဉ်းသီးထာꩻမာꩻယို အီႏထဲ့မဲဉ်ႏလို့ဝင်ꩻနောဝ်ꩻသွူ။ 

(၇) ဒီမိုကရေစီဖေႏကဖြစ်ဖြွူဖြွဉ်ထန်ႏလွဉ်အတာႏ ဒီမိုကရေစီထွာပြောင်ꩻလွဉ် ထွာစဲဉ်ႏဖုံႏအကို နီသွဉ်းသီးခွိုꩻနွယ်ပအိုဝ်ႏဖုံႏ အစဲဉ်ႏစဲဉ်ႏအဆက်ဆက် အောဝ်ႏတွူႏတရန်လွဉ်တဲင် ဒီမိုကရေစီ တာႏဆွာꩻတဉ်ႏခွေါင်ရေꩻ ဖေႏကထွာနွောင်ꩻအီအတာႏ အောဝ်ႏလိုႏဖေါႏထန်ႏသွုပ်ခွုမ်မာꩻထင်းယင်း နီသွဉ်းသီးစွိုးခွိုꩻကအွဉ်ႏထွော့ꩻသေꩻခါꩻဒါႏ မူဝါဒဖုံႏတွမ်ႏ ထာꩻမာꩻရဲဉ်ႏဖုံႏနောဝ်ꩻသွူ။

(၈) မန်းခမ်းနဲင်ႏငံႏရေꩻ အပွိုင်အခင်အလꩻလဲ့နောဝ်ꩻ၊ အခိန်ႏအခါႏအလꩻလဲ့နောဝ်ꩻ၊ အခေႏအနေႏ အလꩻလဲ့နောဝ်ꩻ ခမ်းသားမွိုးဖါသီး အယံဟောဝ်သွတ်ꩻတွမ်ႏ တွိုႏခြောင်ꩻမုꩻအအောဝ်ႏသွတ်ꩻ ဆွန်ꩻစူ ပါဝင်ႏမုꩻနောဝ်ꩻ ထွာသော့ꩻဖေႏမဲး နုဲင်းနောဝ်ꩻသွူ။ ဒီမိုကရေစီ ဖေႏကမွန်ဗန်တန်ထိုနွောင်ꩻအီအတာႏ ခမ်းသားမွိုးဖါသီး ဆွန်ꩻစူပါဝင်ႏမုꩻယိုနောဝ်ꩻ ထွာအရေꩻတန်အချက်တဗာႏတဲင် ခမ်းသားမွိုးဖါသီး ဆွန်ꩻစူပါဝင်ႏမုꩻအာႏယံအလွောက်ꩻ ဒီမိုကရေစီယိုလဲ့ အီႏမွန်ဗန်တန်ထိုလွဉ် နုဲင်းနောဝ်ꩻသွူ။ နောဝ်ꩻထွူတကာႏတောဝ်း အခေႏခံႏလိုꩻအခွင်ꩻအရေꩻယိုလဲ့ အီႏရဲးကာႏကွယ်ႏဖေႏနွောင်ꩻ၊ ခမ်းထီ ထင်ႏထိုလွိုင်ႏကွိုန်ꩻသာႏယာႏရေꩻအတာႏ အထျꩻကထွာဒါႏ နဲင်ႏငံႏရေꩻငိမ်ꩻစွူမုꩻယိုလဲ့ ဖန်ဆင်ꩻထွာအီ နွောင်ꩻ နုဲင်းနောဝ်ꩻသွူ။ 

(၉) ဒီမိုကရေစီမွန်ဗန်တန်ထိုရေꩻယို တန်တန်အာအာ အောဝ်ႏဒင်ႏဒျာႏ ခမ်းကိုငိမ်ꩻချံꩻရေꩻ အလောင်းနောဝ်ꩻမꩻ အောဝ်ႏသောင်ႏသာတဲႏဆို့ꩻဖေါႏထန်ႏလွေꩻ ခမ်းကိုငိမ်ꩻချံꩻရေꩻတွမ်ႏ တဲ့ꩻခေါဝ်း ရေꩻနုဲင်းနောဝ်ꩻသွူ။ ကအောဝ်ႏသောင်ႏသာတဲႏဆို့ꩻဖေါႏထန်ႏလွေꩻဒါႏ ခမ်းကိုငိမ်ꩻချံꩻရေꩻတွမ်ႏ တဲ့ꩻခေါဝ်းရေꩻကိုနောဝ်ꩻလဲ့ နီသွဉ်းသီးခွိုꩻနွယ်ႏယို လုဲင်းလုဲင်းတန်တန် အောဝ်ႏပါဝင်ႏငီꩻ နုဲင်းနောဝ်ꩻသွူ။ တခမ်းလွုမ်းတငိမ်ꩻချံꩻနွောင်ꩻတောဝ်းဒွိုန်းစွဉ်ႏရိုꩻကီလဲ့ နီသွဉ်းသီးရပ်ဒေႏသကို ငိမ်ꩻချံꩻရေꩻယို ကွပ်ပွိုးအွဉ်ႏအရေꩻတဲင် ခွꩻခွꩻသꩻသꩻ အုံအောဝ်ႏထုမ်ႏကျံႏနွောင်ꩻနုဲင်းယိုနောဝ်ꩻ ဒီမိုကရေစီမွန်ဗန်တန်ထိုရေꩻအတာႏ ထွာအီအစွဲးအကမ်း “အာႏ”တဗာႏ နုဲင်းနောဝ်ꩻသွူ။

(၁၀) ခမ်းထီတဖြုံႏအကို ခွုမ်စံႏကျင်ꩻသွုံꩻခန်းစွဉ်ႏ အုပ်ချွုတ်ရေꩻစနစ် အမျိုꩻမုဲင်ꩻတရိုꩻတောဝ်း ခမ်းသားမွိုးဖါသီး အုံအောဝ်ႏအံႏအွꩻရေꩻအဆင်ႏပြေႏမုꩻယို ထွာအရေꩻတန်သွတ်ꩻ အထျꩻအထောင်ꩻ နောဝ်ꩻမꩻ ဒေႏသကိုကအောဝ်ႏဒါႏခမ်းသားမွိုးဖါသီး ကအောဝ်ႏလိုႏဒါႏရပ်ရာႏဒေႏသလွိုင်ႏကွိုန်ꩻ သာႏယာႏရေꩻ၊ လိုꩻအုံအောဝ်ႏမုꩻအရန်းထင်ႏထိုရေꩻတွမ်ႏ စီꩻပွာꩻရေꩻဖဲ့ꩻဆဲင်ႏရာꩻ ထင်ႏထိုရေꩻအတာႏ အောဝ်ႏလိုႏဖေါႏထန်ႏခွုမ်မာꩻခရာႏ အောဝ်ႏအာတန်နောဝ်ꩻသွူ။ ကအီႏဖေါႏထန်ႏခွုမ်မာꩻအီႏအတာႏလဲ့ မူဝါဒဖုံႏတွမ်ႏ ထာꩻမာꩻရဲဉ်ႏဖုံႏယို အောဝ်ႏလဲဉ်းအထွူနောဝ်ꩻသွူ။

(၁၁) နီသွဉ်းသီး မြန်မာခမ်းယိုနောဝ်ꩻ သမဲင်ꩻခြောင်ꩻဖုံႏ၊ ယေန်ႏငဲးမုꩻဓလေ့ꩻထွုံꩻစံႏဖုံႏ၊ ယွုမ်းအံႏ ကိုꩻကွယ်ႏမုꩻဖုံႏ တဗွိုန်ပီတောဝ်းဝင်ꩻကထွာဒါႏ ခမ်းရင်ꩻသားလိုꩻမျိုꩻပေါင်ꩻစွုမ်ႏဖုံႏယို အုံငီꩻ အောဝ်ႏရောဝ်းဝင်ꩻနောဝ်ꩻမꩻ ယွုမ်းအံႏမုꩻ၊ သွင်ꩻအံႏမုꩻတွမ်ႏ ခြိꩻထူႏမုꩻဖုံႏယို အွဉ်ႏအထျꩻတဲင် ခမ်းရင်ꩻသား ကလꩻထွိုက်ကလꩻသင်ꩻဒါႏ တန်ႏတူႏတသွိုန်ꩻမုꩻအခွင်ꩻအရေꩻဖုံႏယိုဖေႏကလꩻ အီႏခွုမ်မာꩻလွေꩻ သွူတကာႏတောဝ်း ခမ်းထီထင်ႏထိုလွိုင်ႏကွိုန်ꩻသာႏယာႏရေꩻအတာႏယိုလဲ့ လွတ်တောႏကို ကအီႏတွိုႏလွဉ်ဒါႏ လွတ်တောႏအမတ် ဖုံႏကားကအောဝ်ႏလဲ့နောဝ်ꩻ၊ ကအီႏလွောင်ႏဗူႏ တသာယင်းဒါႏ အစိုႏရတသာအစွိုꩻလဲ့နောဝ်ꩻ အီႏဆွန်ꩻစူမာꩻလွေꩻငီꩻဒျာႏနောဝ်ꩻမꩻ ခမ်းထီအတာႏထွာ အီထင်း “အာႏ” တစွိုးနောဝ်ꩻသွူ။

(၁၂) ကအီႏခွုမ်မာꩻအီထာꩻမာꩻဖုံႏအတာႏ လိုꩻအရွယ်ႏသွံပါꩻလဲ့အောဝ်ႏဗွေစွုမ်ႏ၊ လိုꩻအာႏရဲင်ꩻလဲ့အာ၊ ပညာႏဒါႏလိုꩻသေလိုꩻဒါႏလဲ့လွိုင်ႏ၊ အစွိုꩻအဗူႏအာႏရဲင်ꩻလဲ့တန်၊ ထာꩻမာꩻခွုမ်စံႏမုꩻစနစ်လဲ့အောဝ်ႏ၊ အစွိုꩻယန္တရာႏလဲ့ဟောဝ်၊ ခွိုꩻနွယ်ႏအတာႏလဲ့ အွဉ်ငါတွူႏတရန်ဖေႏနွောင်ꩻနောဝ်ꩻသွူ။


နောဝ်ꩻမꩻ ကွပ်ပွိုးစွဉ်ႏ အကျောင်ꩻခရာႏအချက်နုဲင်းဆꩻကီယိုဖုံႏတဲင် အောဝ်ႏလိုႏသော့ꩻဖေႏချာ ငါႏ ပအိုဝ်ႏစွိုးခွိုꩻအစွိုꩻ(PNO) “ နဂါꩻ” မဲး နောဝ်ꩻသွူ။

ခွန်ဆောင်းရွှေ

(21-10-2020)


Powered by Blogger.