တောင်ကြီး၊ ၂၀၁၅ ခုနှစ်၊ နိုဝင်ဘာလ (၁) ရက်
ရွေးကောက်ပွဲနီးစပ်လာသည်နှင့်အမျှ ရွေးကောက်ပွဲတွင် ၀င်ရောက်ယှဉ်ပြိုင်ကြမည့် နိုင်ငံရေးပါတီများ မိတ်ဆက်ခြင်းကို ရိုက်ကူးနေသည့် Skynetရုပ်သံလိုင်းအဖွဲ့သားများသည် ၂၀၁၅ ခုနှစ်၊ အောက်တိုဘာလ(၂၈)ရက်၊ ဗုဒ္ဓဟူးနေ့၊ တောင်ကြီးမြို့၊ ပအိုဝ်းအမျိုးသားအဖွဲ့ချုပ်(PNO)ဗဟိုဌာနချုပ်ရုံး တွင် ပအိုဝ်းအမျိုးသားအဖွဲ့ချုပ်(PNO)ပါတီ ဒု-ဥက္ကဌ ဦးခွန်မောင်သောင်းအား ၂၀၁၅ရွေးကောက်ပွဲနှင့် ပတ်သက်၍ PNOပါတီ၏ ရပ်တည်ချက်၊ လုပ်ဆောင်ချက်နှင့် မူဝါဒများကို လာရောက်မေးမြန်း ရိုက်ကူးသွားခဲ့ပါသည်။
ထိုသို့မေးမြန်းရာတွင် ပအိုဝ်းအမျိုးသားအဖွဲ့ချုပ်(PNO)ပါတီ ဒု-ဥက္ကဌ ဦးခွန်မောင်သောင်းက ပအိုဝ်းအမျိုးသားအဖွဲ့ချုပ်(PNO)ပါတီကို ၂၀၁၀ခုနှစ် မတ်လတွင် ကျင်းပသော ပအိုဝ်းတစ်မျိုးသားလုံး ညီလာခံကြီး၏ ဆုံးဖြတ်ချက်အရ တည်ထောင်လာခဲ့သည်မှာ (၅)နှစ်ပင်ရှိပြီဖြစ်ကြောင်း၊ ၂၀၁၅ရွေး ကောက်ပွဲတွင်ပအိုဝ်းအမျိုးသားအဖွဲ့ချုပ်(PNO)ပါတီအနေနှင့် တောင်ပေါ်၊
မြေပြန့် ပေါင်း၍ ပြည်သူ့ လွှတ်တော်၊ အမျိုးသားလွှတ်တော်၊ တိုင်း/ပြည်နယ်လွှတ်တော်နှင့် တိုင်းရင်းသားရေးရာဝန်ကြီး စုစုပေါင်း မဲဆန္ဒနယ်(၂၂)နေရာ ၀င်ရောက်ယှဉ်ပြိုင်မည်ဖြစ်ကြောင်း၊ ထိုသို့ဝင်ရောက်ယှဉ်ပြိုင်ရာတွင် မိမိတို့နိုင်ခြေရှိသည့် ပအိုဝ်းလူမျိုးအများစုနေထိုင်ရာ မြို့နယ်များကိုသာ ရွေးချယ်ယှဉ်သွားသည်ဖြစ်ကြောင်း။
ပအိုဝ်းလူမျိုးများသည် ရှမ်းပြည်နယ်တောင်ပိုင်း၊ တောင်ကြီးခရှိင်၊ လွိုင်လင်ခရိုင်တို့တွင် အများစုနေထိုင်ကြပြီး ကရင်ပြည်နယ်၊ ကယားပြည်နယ်၊ မွန်ပြည်နယ်နှင့် ပခူးတိုင်းဒေသတို့တွင် ပျံ့နှံ့နေထိုင်လျက်ရှိကြောင်း၊ လူဦးရေအနေနှင့် ၁၉၈၉ခုနှစ် လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန၏ ထုတ်ပြန်ချက်အရ (၁၅၆၉၀၀၀)ကျော်ရှိပြီး ၂၀၁၄လူဦးရေစစ်တမ်း ထွက်ရှိလာပါက လက်ရှိလူဦးရေကို သိနိုင်မည်ဖြစ်ကြောင်း၊ ပအိုဝ်းလူမျိုးများသည် တောင်ယာကို အဓိကထား၍ လုပ်ကိုင်လျက်ရှိပြီး သနပ်ဖက်၊ လက်ဖက်၊ အာလူး၊ ကြက်သွန်၊ ပြောင်း၊ မီးဖိုချောင်သုံး သီးနှီးနှင့် အခြားသီးနှံများ စိုက်ပျိုးလျက်ရှိကြောင်း၊ ထိုသို့စိုက်ပျိုးရာတွင် သမာရိုးကျမှ သိပ္ပံနည်းကျအဖြစ်သို့ ပြောင်းလဲနိုင်ရန်နှင့် ထုတ်ကုန်များကို တန်ဖိုးမြှင့်တင်နိုင်ရန်အတွက် လိုအပ်သော နည်းပညာနှင့် နည်းလမ်းများကို ကူညီပေးဆောင်ရွက်ပေးသွားမည်ဖြစ်ကြောင်း။
ပညာရေးနှင့်ပတ်သက်၍ ပအိုဝ်းကိုယ်ပိုင်အုပ်ချုပ်ခွင့်ရဒေသနှင့် ပအိုဝ်းအမျိုးစုနေထိုင်ရာဒေသများတွင် မူလတန်းအခြခံပညာမသင်မနေရဟူသည့် ပြဌာန်းချက်ပေါ်မူတည်၍ ကျေးရွာတိုင်း အခြေခံပညာမူလတန်းကျောင်းများ တည်ဆောက်ပေးလျှက်ရှိကြောင်း၊ ထို့အပြင် လိုအပ်သော အလယ်တန်းကျောင်းနှင့် အထက်တန်းကျောင်းများကို သက်ဆိုင်ရာဌာနများနှင့် ပူးပေါင်း၍ တည်ဆောက်လျက်ရှိကြောင်း၊ ထိုသို့ တည်ဆောက်ပေးခြင်းကြောင့် ယခင်က ဘွဲ့ရပညာတတ် မရှိခဲ့သည့် ကျေးရွာများ၌ ယခုလက်ရှိတွင် ရွာတိုင်း ဘွဲရပညာတတ်ရှိလာပြီဖြစ်ကြောင်း။ ကျန်းမာရေးနှင့်ပတ်သက်၍ ပအိုဝ်းလူမျိုးများသည် တောင်ယာများကို လုပ်ကိုင်သူများဖြစ်၍ ယေဘုယျအားဖြင့် ကျန်းမာသန်စွမ်းသည်ဟု ရှုမြင်နိုင်ကြောင်း၊ ထို့ပြင် ကျန်းမာရေးဌာန၊ တိုက်/နယ်ဆေးရုံ၊ ဆေးပေးခန်းနှင့် ကျန်းမာရေးဝန်ဆောင်မှုလုပ်များ ပအိုဝ်းနေထိုင်ရာမြို့နယ်နှင့်ဒေသများတွင် တော်တော်များများရှိနေပြီး ကျန်းမာရေးနှင့်ပတ်သက်၍ လွှမ်းခြုံပေးနိုင်သည့် အနေအထားရှိနေပြီဖြစ် ကြောင်း၊ သို့ရာတွင် လုံလုံလောက်လောက်မပြည့်စုံသေးသည့်အတွက်ကြောင့် ကျန်းမာရေးကဏ္ဍနှင့် ပတ်သက်၍ ဆက်လက်လုပ်ဆောင်ရန် အစီအစဉ်ရှိနေကြောင်း။ မိမိတို့ပအိုဝ်းအမျိုးသားအဖွဲ့အနေနှင့် ပြည်ထောင်စုမြန်မာနိုင်ငံတော် မပြိုကွဲရေး၊ တိုင်းရင်းသား စည်းလုံးညီညွှတ်မှု မပြိုကွဲရေး၊ အာချုပ်အာခြာအာဏာတည်တံ့ခိုင်မြဲရေးကို အဓိကထားဆောင်ရွက်နေပါ ကြောင်း၊ ထို့ပြင် မိဘပြည်သူများ လိုလားတောင်းတနေသည့် ဒီမိုကရေစီနိုင်ငံတော်ကြီးပေါ်ပေါက်လာ စေရေးနှင့် တည်တံ့ခိုင်မြဲရေးကို တဖက်တလှမ်း ကြိုးစားဆောင်ရွက်နေပါကြောင်း၊ ထို့ပြင် တိုင်းရင်းသားမိဘပြည်သူများလိုလားတောင်းတနေသည့် စစ်မှန်သော ဖက်ဒရယ်ပြည်ထောင်စုကြီး ပေါ်ပေါက်လာစေရန်အတွက် မိမိတို့ တိုင်းရင်းသားပါတီအနေနှင့် တခြားတိုင်းရင်းသားနည်းတူ ဆောင်ရွက်သွားမည်ဖြစ်ကြောင်း။
မိမိတို့ပအိုဝ်းတိုင်းရင်းသားများသည် ရိုးသားဖြူစင်ကြပြီး အခြားတိုင်းရင်းသားများနှင့် အေးအတူပူအမျှ နေထိုင်လာကြလျှက်ရှိကြောင်း၊ မိဘပြည်သူများ၏ အကျိုးစီးပွားကို ရှေ့ရှုပြီး အခြားတိုင်းရင်းသားများနှင့်လည်း သဟဇာတနေထိုင်ရန် မူဝါဒများ ချမှတ်လျှက်ရှိကြောင်း၊ မိမိတို့ပအိုဝ်းအမျိုးသားအဖွဲ့ချုပ်(PNO)ပါတီက ပအိုဝ်းဟုအမည်ခံထားသော်လည်း မိမိတို့၏ မူဝါဒ၊ လုပ်ဆောင်ချက်များသည် မိမိတို့ ပအိုဝ်းလူမျိုးများသာမဟုတ်ဘဲ ဒေသတွင်းနေထိုင်ကြသော အခြားတိုင်းရင်းသားအကျိုးစီးပွားကိုပါ လုပ်ဆောင်လျှက်ရှိနေကြောင်း၊ ထို့ကြောင့် လာမည့် ရွေးကောက်ပွဲတွင် အခြားတိုင်းရင်းသားများအနေနှင့် မိမိတို့ပအိုဝ်းအမျိုးသားအဖွဲ့ချုပ်(PNO)ပါတီကို ထောက်ခံအားပေးစေလိုကြောင်း
ပြောကြားသွားခဲ့ပါသည်။
ခွန်ထင်းလေအောင်း
Like On Facebook
Follow On Twitter
Subscribe On RSS