စိတ်နေသဘောထား

တောင်ကြီး၊ ၂၀၁၆ ခုနှစ်၊ ဖေဖေါ်ဝါရီလ (၂၈) ရက်

လူတစ်ဦးတစ်ယောက်၏ ဘ၀ခရီးလမ်းတစ်လျောက်လုံးတွင် စိတ်နေသဘောထားသည် အရေးကြီးသော အခန်းကဏ္ဍမှပါဝင်နေကြောင်းကို လူတိုင်းသတိပြုမိပါလိမ့်မည်။ မည်သည့်နေရာတွင်ဖြစ်စေ၊ မည်သို့သောအဆင့်ဖြင့် ကျင်လည်နေသူဖြစ်ပါစေ မိမိအားထုတ်လုပ်ကိုင်နေသည့် လုပ်ငန်းဆောင်တာများ၊ မိမိရည်ရွယ်ရာစိတ်ဆန္ဒများ အောင်မြင်ပြည့်စုံလာစေရန်အတွက် စိတ်နေသဘောထား ထားရှိတတ်မှုက အလွန်အရေးကြီးသည်ဟုဆိုချင်ပါသည်။
မွန်မြတ်သောစိတ်နေသဘောထားသည် မိမိတို့၏ဘ၀ကို ၀င်းပမြင့်မားစေရုံသာမက မိမိတို့နှင့် စပ်ဆိုင်သည့် မိတ်ဆွေအပေါင်းအသင်း၊ မိသားစု၊ လူမှုအဖွဲ့အစည်း စသည်တို့ကိုလည်းကောင်း ကောင်းသောအကျိုးသက်ရောက်မှုရှိစေပါသည်။ တစ်ဦးချင်းမှသည် မိသားစုတစ်စု၊ မိသားစုတစ်စုမှသည် ၀န်းကျင်တစ်ခု၊ ၀န်းကျင်တစ်ခုမှသည် နိုင်ငံတစ်နိုင်စသည်ဖြင့် ကောင်းမွန်သော စိတ်နေသဘောထားတို့ ကျယ်ကျယ်ပြန့်ပြန့် ဖြစ်ထွန်းလာလျှင် ငြိမ်းချမ်းပျော်ရွှင်ဖွယ်ကောင်းသည့် လူ့အဖွဲ့အစည်းကို ရရှိနိုင်မည်ဖြစ်သည်။
စိတ်နေသဘောထားသည် အသင်းအဖွဲ့ကို မြှင့်တင်နိုင်သလို  ရိုက်ချနိုင်သည်ဟု အောင်မြင်စေသောအချိုးအကွေ့ (The Winner’s Edge) စာအုပ်တွင် ဒင်းနစ်ဝိတ်တ်လေက ရေးသားထားပါသည်။ “စီးပွားရေးလုပ်ငန်း မှာပဲဖြစ်ဖြစ် ၊ ပညာရှင်အဖွဲ့အစည်းတစ်ခုမှာဘဲဖြစ်ဖြစ်၊ အစိုးရအဖွဲ့မှာဘဲဖြစ်ဖြစ်၊ နောက်ဆုံးအိမ်မှာဘဲဖြစ်ဖြစ် ခေါင်းဆောင်ကောင်းတွေဟာ ကျန်တဲ့လူတွေထက် ပြတ်ပြတ်သားသားနေတဲ့ အချက်တစ်ချက်ရှိတယ်။ အဲဒါမွေးရာပါ ဗီဇလည်းမဟုတ်သလို ဥာဏ်ကောင်းတာလဲမဟုတ်ဘူး၊ ပင်ကိုစွမ်းရည် မဟုတ်ဘူးနော် စိတ်နေသဘောထားက အဓိကကျ ပါတယ်”ဟု ဆိုထားပါသည်။
စိတ်မကောင်းစရာအချက်တစ်ချက်မှာ လူတော်တော်များများသည် ၎င်းအချက်ကို လက်မခံတတ်ကြပေ။ အရည်အချင်းရှိလျှင် လုံလောက်သည်ဟုထင်ကြသည်။ တစ်ချို့ကလည်း အရည်အချင်းရှိလျှင် အတွေ့အကြုံရှိလျှင် ရပြီဟုထင်ကြသည်။ အရည်အချင်းရှိသော အဖွဲ့အစည်းတွေ၊ အုပ်စုတွေ၊ အသင်းအဖွဲ့တွေရှိနေပါလျက်နှင့် အဖွဲ့ဝင်များ၏ စိတ်နေသဘောထားမပြည့်ဝမှုကြောင့် ဘာမှ ဖြစ်မလာသည်ကိုလည်း တွေ့မြင်နေကြရပေသည်။ အလွန်အရည်အချင်းရှိသူများနှင့်သာ ဖွဲ့စည်းထားသော အသင်းအဖွဲ့ဖြစ်ပါစေ အဖွဲ့ဝင်တို့၏ စိတ်နေသဘောထားပေါ်မူတည်၍ ရလဒ်က အမျိုးမျိုးဖြစ်နိုင်သည်။
ထို့ကြောင့် ရလဒ်ကောင်းကို လိုချင်လျှင် လူကောင်းတွေထားရုံ၊ အရည်အချင်းကောင်းတွေ ရှိရုံနှင့်မပြီး၊ စိတ်ဓါတ်ကောင်းရပေမည်။ စိတ်ဓါတ်တွေကောင်းလျှင် ကောင်းသလောက် အဖွဲ့အစည်း၏ စွမ်းဆောင်ရည် တက်လာမည်။ စိတ်ဓါတ်ညံ့လျှင် ညံ့သလောက် စွမ်းဆောင်ရည်ကျဆင်းမည်။
အရည်အချင်း စိတ်နေသဘောထား ရလဒ်
အလွန်ကောင်း + အလွန်ညံ့ = ညံ့
အလွန်ကောင်း + ညံ့ = သာမန်
အလွန်ကောင်း + သာမန် = ကောင်း
အလွန်ကောင်း + ကောင်း = အလွန်ကောင်း
ထို့ကြောင့် “စိတ်နေသဘောထားဆိုတာ ငါတို့ထက်ရှေ့ရောက်နေတဲ့ ငါတို့ရဲ့အသွင်သဏ္ဍာန်ပဲပေါ့။ အမြစ်တွေက အထဲကို နက်နက်တွယ်နေသလောက် အသီးအပွင့်တွေက အပြင်ကိုဖြာထွက်နေကြတယ်။ တို့ရဲ့ အကောင်းဆုံးမိတ်ဆွေလည်း ဖြစ်သွားနိုင်သလို အဆိုးဆုံး ရန်သူလည်း ဖြစ်သွားနိုင်တယ်။ ငါတို့ ပြောနေတဲ့စကားတွေထက် ပိုလည်းရိုးသားတယ် ပိုလည်းခိုင်မာတယ် စိတ်နေသဘောထားဆိုတာ အတွေ့အကြုံတွေပေါ်မှာ မူတည်ပြီး ဖြစ်ပေါ်နေတဲ့ အပေါ်ယံမျက်နှာတစ်ခုပဲ။ လူတွေကိုဆွဲဆောင်ယူနိုင် စွမ်းရှိသလို ထွက်ပြေးသွားအောင်လည်း လုပ်တတ်တယ်။ ထုတ်ဖော်မပြရဘဲလည်း မနေနိုင်ဘူး၊ ငါတို့အတိတ်ရဲ့စာကြည့်တိုက်မှူး၊ ငါတို့ရဲ့ပစ္စုပ္ပန်ရဲ့ပြောရေးဆိုခွင့်ရှိသူ၊ ငါတို့ရဲ့အနာဂတ်အတွက် ရှေ့ဖြစ်ဟောဆရာဟာ ငါတို့ရဲ့စိတ်နေသဘောထားပဲပေ့ါ”ဟု ဒေါက်တာရဲ၏ ခေါင်းဆောင်ကောင်းဖြစ်မည့် စိတ်နေသဘောထား စာအုပ်တွင် ရေးသားထားပါသည်။

ကိုးကားချက် (ခေါင်းဆောင်ကောင်းဖြစ်မည့်စိတ်နေသဘောထား/ ဒေါက်တာရဲ(ကလေးအထူးကုဆရာဝန်))

နန်းဆောင်းလေပြေ (အွံအား)