လူသားအရင်းအမြစ် စိန်ခေါ်မှုများ

တောင်ကြီး၊ ၂၀၁၆ ခုနှစ်၊ ဧပြီလ (၄) ရက်

ကျွန်တော်တို့ မြန်မာနိုင်ငံဟာဆိုရင် စစ်အစိုးရအုပ်ချုပ်ရေးစနစ်မှ အများပြည်သူအုပ်ချုပ်ရေးစနစ်လို့ခေါ်တဲ့ ဒီမိုကရေစီစနစ်ဆီကို ၂၀၁၀ ခုနှစ်၊ နိုဝင်ဘာလ(၇)ရက်နေ့မှာ အောင်အောင်မြင်မြင်နဲ့ ကူးပြောင်းနိုင်ခဲ့ပါတယ်။ အဲဒီလို ကူးပြောင်းနိုင်ခဲ့သည့်နှင့်တပြိုင်နက်ထဲမှာပဲ မြန်မာနိုင်ငံအစိုးရသစ်ရဲ့ ယခု(၅)နှစ်တာ လုပ်ငန်းဆောင်ရွက်ချက်များဟာ နောက်သို့ ပြန်မလှည့်သော၊ ရှေ့သို့လှမ်းချီသော၊ အပေါင်းလက္ခဏာဆောင်သော လုပ်ဆောင်ချက်များဖြစ်တယ်လို့ နိုင်ငံတကာအသိုင်းအ၀ိုင်းတွေက ယုံကြည်လက်ခံလာခဲ့ကြပြီး နှစ်ပေါင်းများစွာ အရေးယူပိတ်ဆို့ထားတဲ့ Sanctions များကိုလည်း ပြန်လည်ဖြေလျော့ပေးခဲ့ပါတယ်။ ယခုအချိန်မှာ နိုင်ငံတကာမှ မြန်မာနိုင်ငံသို့ စီးပွားရေးအရ ရင်းနှီးမြုပ်နှံမှုတွေ လာရောက်ရင်းနှီးမြုပ်နှံနေကြပြီး နောင်လာမယ့် အစိုးရသစ်သက်တမ်းမှာလည်း  Foreign Direct Investment(FDI)များ လာရောက်ရင်းနှစ်မြုပ်နှံနိုင်မယ့် အခြေအနေများ၊ အခွင့်အလမ်းများ များစွာ ရှိနေတယ်။ ဘာကြောင့်လဲဆိုတော့ မြန်မာနိုင်ငံမှာ လုပ်သားအင်အား ပေါများပြီးတော့ အလုပ်သမားငှားရမ်းခ ဈေးသက်သာတယ်။ မြေပေါ်မြေအောက်သယံဇာတ ပေါများတယ်။ စတဲ့ ဒီလိုအားသာချက်တွေကြောင့် မြန်မာနိုင်ငံဟာ ပျိုတိုင်းကြိုက်တဲ့ နှင်းဆီခိုင်တွေ ဖြစ်နေတယ်။
သို့သော်လည်းပဲ ကျွန်ုပ်တို့နိုင်ငံမှာ ဘယ်လိုမျိုးသော လိုအပ်ချက်တွေ၊ ဘယ်လိုမျိုးသော အားနည်းချက်တွေ ရှိနေတယ်ဆိုတာကို ပြန်လည်ဆန်းစစ်ဖို့ လိုတယ်။ တစ်နိုင်ငံလုံးအတိုင်းအတာအထိ လိုအပ်ချက်တွေနဲ့ ပြည့်နှက် လို့နေတယ်။ ၂၀၁၀ ခုနှစ်မှာ ပါတီစုံဒီမိုကရေစီစနစ်ကို ပုံဖော်ပြီးတဲ့နောက်ပိုင်းမှာ ကျွန်ုပ်တို့ရဲ့ ပအိုဝ်းအမျိုးစုနေထိုင်တဲ့ ဒေသတွေမှာ ရုပ်ပိုင်းဆိုင်ရာ(Infrastructure)များ အရင်ကထက် တိုးတက်လာတာ အမှန်ပါပဲ။ ပြည်နယ်၊ မြို့နယ်၊ ကျေးရွာချင်းဆက် လမ်းတံတားများ၊ လျှပ်စစ်မီးလင်းရေး၊ ဆေးရုံ၊ ဆေးပေးခန်း၊ စာသင်ကျောင်းဆောင်များ၊ ကျေးရွာ သောက်သုံးရေများ စတဲ့ ရုပ်ပိုင်းဆိုင်ရာ(Infrastructure)တွေဟာဆိုရင် လွှတ်တော်သက်တမ်းတစ်ခုမှာ အတိုင်းအတာ တစ်ခုအထိ အောင်မြင်ခဲ့တယ် ဆိုတာကို ဘယ်သူ့မှ ငြင်းလို့မရပါဘူး။ သို့သော် အဲဒီရဲ့နောက်မှာ ကြီးမားသော လိုအပ်ချက်ဖြစ်တဲ့ လူသားအရင်းအမြစ်(Human Resources)တွေကတော့ များစွာ အားနည်းနေသေးတာကို အားလုံး လက်ခံကြလိမ့်မှာပါ။ ဆိုလိုချင်တာက ကျွန်ုပ်တို့ ပအိုဝ်းလူမျိုးတွေဟာ လူသားအရင်းအမြစ် ဖွံ့ဖြိုးတိုးတက်မှု လိုအပ်ချက် ကြီးမားနေဆဲပါပဲ ဖြစ်ပါတယ်။
သုံးသပ်ကြည့်ရမယ်ဆိုရင် နောင်လာမယ့် (၅)နှစ်သက်တမ်းအထိကို မျှော်ကြည့်မယ်။ ယခုလွှတ်တော်ဟာ NLD စိုးမိုးရေးလွှတ်တော်။ ယခုအစိုးရဟာ NLD ပုံဖော်ဖြစ်လာမယ့် အစိုးရ။ NLD ဦးဆောင်တဲ့ နိုင်ငံရေး၊ စီးပွားရေးစနစ်ဟာ အရင်လွှတ်တော်၊ အရင်အစိုးရကထက် အသွားအပြန် စီးဆင်းမှု ပိုမိုမြန်ဆန်လာမယ့် အနေအထားမှာ ရှိနေတယ်။ ဒေါ်အောင်ဆန်းစုကြည့်နဲ့ နိုင်ငံတကာဟာ တသားတည်းတွေ။ NLD အစိုးရဖြစ်လာလို့ နိုင်ငံတကာ Sanctions တွေ အရင်ကထက် ပိုမိုလျော့ချလာမယ်လို့ ယုံကြည်တယ်။ NLD အစိုးရမှ ချမှတ်မယ့် Economics ပေါ်လစီတွေဟာ အရင် အစိုးရတွေကထက် ခိုင်မာမှု ပိုမိုရှိလာမှာဖြစ်ပြီး ပွင့်လင်းမြင်သာမှု ပိုမိုရှိလာနိုင်မှာ ဖြစ်တယ်။ ဘာဖြစ်လို့လဲဆိုတော့ ရွေးကောက်ပွဲကာလမှာ ပေးခဲ့တဲ့ ကတိက၀တ်တွေ များခဲ့လို့ပဲ။ ဒါ့ကြောင့် ခိုင်မာတဲ့ Policies တွေနဲ့ဆို ခိုင်မာတဲ့ FDI တွေက ပျိုတိုင်းကြိုက်တဲ့ မြန်မာနိုင်ငံမှာ ရင်းနှီးမြုပ်နှံမှုတွေ  စီးဆင်းလာမှာ အသေအချာပါပဲ။ နိုင်ငံခြားရင်းနှီးမြုပ်နှံမှု တွေနဲ့အတူ အလုပ်အကိုင်အခွင့်အလှမ်းများ ကျွဲကူးရေပါ ဖြစ်လာမှာပါ။
အဲဒီလို နိုင်ငံခြားရင်းနှီးမြုပ်နှံမှုတွေ အလုံးအရင်း ၀င်လာပြီး ရင်းနှီးမြုပ်နှံမှု ပြုတဲ့အခါမှာ  အိမ်ရှင်ဖြစ်တဲ့ ကျွန်ုပ်တို့တွေ ဘာတွေပြင်ဆင်ထားပြီးပြီလဲ?။ ကုမ္ပဏီကြီးတွေက ကျွန်ုပ်တို့ရဲ့ ဒေသတွေမှာ လာရောက်ရင်းနှီးမြုပ်နှံရင် အဲဒီ ကုမ္ပဏီကြီးတွေမှာ ကျွန်ုပ်တို့တွေ ဘယ်ရာထူးအတွက် မျှော်မှန်းထားနိုင်ပြီလဲ?။ ရယူဆုပ်ကိုင်နိုင်ဖို့ ပြင်ဆင်ထားပြီးပြီလား?။ အဆင်သင့်ဖြစ်နေပြီလား?။ FDI များ လာရောက်ရင်းနှီးမြုပ်နှံမှု ပြုလုပ်တဲ့အခါမှာ ကျွန်ုပ်တို့ရဲ့ အိမ်ရှင်နိုင်ငံသားတွေ အလုပ်အကိုင်ရရှိနိုင်မယ့် ရာထူးအဆင့်အတန်းကို ကျွန်တော်တွေးမြင်ကြည့်နိုင်တယ်။  ယခုလက်ရှိအခြေအနေအရဆိုရင် အိမ်ရှင်များ အလုပ်သမားဘ၀ ဖြစ်လာနိုင်ပြီး ဧည့်သည်များ အလုပ်ရှင်ဘ၀ ဖြစ်လာမယ့်အခြေအနေများနဲ့ ကိန်းဆိုက်နေသည်။ အိမ်ရှင်ဖြစ်ပြီး ဂိတ်ပေါက်စောင့်၊ သန့်ရှင်းရေးအဆင့်လောက်နဲ့ဆို မဖြစ်တော့ မဟုတ်ပါလား။ လူသားအရင်းအမြစ်ဖွံ့ဖြိုးတိုးတက်ဖုို့ စိန်ခေါ်မှုကြီး ခေါင်းလောင်းထိုးပြီပေါ့။
ကျွန်တော်တို့ ဘာတွေကို လိုအပ်နေသလဲ?။ ကျွန်တော်တို့ ဘာတွေကို ပြင်ဆင်ဖို့ လိုနေပြီလဲ?။ Skillful Labours တွေဖြစ်ဖို့ ဘာတွေဖြည့်ဆည်းထားဖို့ အလောတကြီး လိုပြီလဲ။ လူငယ်တွေ တော်တော်များများ အင်္ဂလိပ်စာ၊ ကွန်ပျူတာ၊ စာရင်းအင်း၊ အီးမေးလ်ဂျီမေးလ် အွန်လိုင်းချိတ်ဆက်မှု ဒါတွေကို ကျွမ်းကျင်အဆင့် မဟုတ်ရင်တောင်မှ အခြေခံအဆင့်အထိ သိထား၊ လေ့လာထားပြီးပြီလား?။ ဒါတွေကို ကျွမ်းကျင်အဆင့်ထိ ပိုင်ဆိုင် ထားပြီဆိုရင်တော့ နိုင်ငံခြားရင်းနှီးမြုပ်နှံမှု ကုမ္ပဏီကြီးတွေမှာ အခြေခံမဟုတ်သော အလယ်အလတ်အဆင့် အလုပ်တစ်ခု ရရှိဖို့ သေချာပြီ။ အိမ်ရှင်တွေဟာ အလယ်အလတ်အဆင့်နဲ့ပဲ တန်တာလား?။ ဒါရိုက်တာ၊ မန်နေဂျာရာထူးတွေက ဧည့်သည်တွေနဲ့ပဲ တန်သလား?။ ဒါကိုလည်း ထပ်စဉ်းစားဖို့ လိုပြန်ပြီ။ ဒါဆိုရင် ကျွမ်းကျင်အဆင့်ထက် ပိုတဲ့ Skill တွေကို ထပ်ဖြည့်ဖို့လိုနေပြီ။ Master အဆင့်ဖြစ်ဖို့ လိုပြီ။ အချိန်အားဖြင့် မနှောင်းသေးပါ။ ပြင်ဆင်ချိန် အနည်းငယ် ရပါသေးတယ်။ အလုပ်အကိုင် ရှားပါးတယ်ဆိုတာ ကိုယ့်မှာ အရည်အသွေး မရှိလို့သာ ဖြစ်ပြီး Qualification မရှိပဲ Opportunity ရှိလာစရာအကြောင်းကို မရှိပါဘူး။
လက်ရှိအခြေအနေအရ လူသားအရင်းအမြစ်စိန်ခေါ်မှုပြဿနာဟာ ကြီးမားဆဲပါ။ သို့သော် ပြင်ဆင်ချိန်လေး ရရှိနိုင်သေးတယ်ဆိုတဲ့ အနေအထားမှာ ရှိနေသေးတယ်။ လူငယ်တွေ ပြင်ဆင်ထားကြပါ။ ဒီလိုခေတ် ဒီလိုစနစ်မှာ အင်္ဂလိပ်စာ၊ ကွန်ပျူတာ၊ စာရင်းအင်း၊ အီးမေးလ်ဂျီမေးလ် အွန်လိုင်းချိတ်ဆက်မှု ဒါတွေကို ပြင်ဆင်တတ်မြောက်ထားမှု မရှိထားရင် ခင်ဗျားတို့ ပြောပြောနေတဲ့ အလုပ်အကိုင်ရှားပါးမှု(Lack Opportunity)ဆိုတာ အရင်ကထက် ပိုဆိုးလာမှာ ဖြစ်ပြီး ခင်ဗျားတို့ဘ၀တွေကလည်း ဒုံရင်းက ဒုံရင်းပါပဲဆိုတာ သေချာနေပြီ။

Kka Sp(Opinion)