တောင်ကြီး၊ ၂၀၁၆-ခုနှစ်၊ ဧပြီလ(၁၂)ရက်
ပအိုဝ်းဒေသအတွင်း အလုပ်အကိုင် ပိုမိုရရှိရေးအတွက် ပအိုဝ်းအမျိုးသားအဖွဲ့ချုပ်(PNO)နှင့် ဂျပန်အခြေစိုက် TOBU ကုမ္ပဏီလီမိတက်တို့သည် ၂၀၁၆-ခုနှစ်၊ ဧပြီလ(၉)ရက်တွင် တောင်ကြီးမြို့၊ ပအိုဝ်းအမျိုးသားအဖွဲ့ချုပ်(PNO)ဗဟိုဌာနချုပ်ရုံးတွင် တွေ့ဆုံဆွေးနွေးခဲ့ကြသည်။
အဆိုပါ တွေ့ဆုံဆွေးနွေးမှုတွင် ပအိုဝ်းအမျိုးသားအဖွဲ့ချုပ် (PNO) မှ ဦးခွန်တင်ထွဋ် [တွဲဖက်အတွင်းရေးမှူး(၃)]၊ ဦးစောခွန်ကျော်ဝင်း (ရုံးအဖွဲ့မှူး)၊ ခွန်ဆောင်းရွှေ (ဌာနမှူး-လေ့ကျင့်ရေးနှင့် ပညာပေးရေးဌာန)၊ ခွန်ကျော်အေး (ဌာနမှူး - စီမံဌာန)၊ ခွန်လှစိုး (နိုင်ငံတကာဆက်ဆံရေးဌာန)နှင့် ဂျပန်အခြေစိုက် TOBU ကုမ္ပဏီလီမိတက် ဥက္ကဌ Mr. Tsuyoshi Watanabe တို့သည် ရင်းနှီးပွင့်လင်းစွာ ပအိုဝ်းဒေသအတွင်း အလုပ်အကိုင် ပိုမိုရရှိရေး ဆွေးနွေးခဲ့ကြသည်။
ထိုသို့ဆွေးနွေးကြရာ၌ ပအိုဝ်းအမျိုးသားအဖွဲ့ချုပ် တာဝန်ရှိသူများမှ မိမိတို့အဖွဲ့သည် ဂျပန် NGO/ INGO အဖွဲ့အစည်းများနှင့် ပအိုဝ်းဒေသဖွံ့ဖြိုးရေးလုပ်ငန်းများ ပူးပေါင်းဆောင်ရွက်မှု အများအပြား ရှိခဲ့သည့်အကြောင်းနှင့် လက်ရှိပအိုဝ်းဒေသအတွင်း အလုပ်အကိုင် အခွင့်အလမ်း လိုအပ်မှု အခြေအနေများကို ဆွေးနွေးသွားခဲ့ပြီး၊ TOBU ကုမ္ပဏီလီမိတက်ဥက္ကဌမှ ပအိုဝ်းအမျိုးသားအဖွဲ့ချုပ်သည် ဒေသဖွံ့ဖြိုးရေးကို အစဉ်တစိုက် လုပ်ကိုင်နေသည်ကို သိရှိရသဖြင့် ထိုဒေသဖွံ့ဖြိုးရေးလုပ်ငန်း ဆောင်ရွက်မှုတွင် မိမိတို့ကုမ္ပဏီ ပါဝင်ပူးပေါင်းလုပ်ကိုင်လိုကြောင်း အပြန်အလှန်ဆွေးနွေးခဲ့ကြသည်။
ပအိုဝ်းအမျိုးသားအဖွဲ့ချုပ်(PNO)နှင့် ဂျပန်အခြေစိုက် TOBU ကုမ္ပဏီလီမိတက်တို့သည် သန့်ရှင်းရေး၊ လုံခြုံရေး၊ ဧည့်ခံကျွေးမွေးရေး၊ အဆောက်အဦးစီမံခန့်ခွဲမှု၊ သဘာဝပတ်ဝန်းကျင်ထ်ိန်းသိမ်းရေး အစရှိသည့် သင်တန်းများ ဖွင့်လှစ်ကာ ဒေသခံလူငယ်များ အလုပ်အကိုင်ရရှိသည်အထိ ပူးပေါင်းဆောင်ရွက်ကြမည့် အကြောင်းအရာများကို ပဏာမတွေ့ဆုံဆွေးနွေးနိုင်ခဲ့ကြကြောင်း သိရှိရပါသည်။
ခွန်လှစိုး
Like On Facebook
Follow On Twitter
Subscribe On RSS