လူငယ်နှင့် ခေါင်းဆောင်မှု

တောင်ကြီး၊ ၂၀၁၆ ခုနှစ်၊ ဇွန်လ (၂၂) ရက်

လူငယ်ဟုဆိုတွင် ကလေးသူငယ်မဟုတ်သောအရွယ် အသက်(၁၆)နှစ်နှင့် အထက်(၃၅)နှစ် အောက်အထိ ခေါ်ဝေါ်မှုများရှိကြသည်။ အသက်(၃၅)ကျော်သွားလျှင် အတန်းပညာနိမ့်သည်ဖြစ်စေ၊ မြင့်သည်ဖြစ်စေ၊ စီးပွားဥစ္စာ ဂုဏ်ဓန ဆင်းရဲသည်ဖြစ်စေ၊ ချမ်းသာသည်ဖြစ်စေ လူကြီးအခြေနေ သို့ရောက်သွားလေပြီဖြစ်သည်။ လူငယ်ဟူသည် အနာဂတ်၏ ခေါင်းဆောင်လောင်း ခေါင်းဆောင်ကောင်းများ ဖြစ်ကြသည်။ လူငယ်တို့၏ ကာယဥာဏ စာရိတ္တ ဘက်စုံဖွံ့ဖြိုးတိုးတက်မှုဖြင့် နိုင်ငံနှင့် လူမျိုး၏ ဖွံ့ဖြိုးတိုးတက်ရေးများကို စွမ်းဆောင်နိုင်သည်။ လူငယ်တို့သည် ကာယခွန်အား ပြည့်စုံရမည်။ ဥာဏစွမ်းရည် ထက်မြက်ရမည်။ စာရိတ္တဟူသော ကိုယ်ကျင့်တရားကောင်းများ ရှင်သန်နေရမည်။ ထိုသို့သော ကာယ၊ ဥာဏ၊ စာရိတ္တ စွမ်းရည်များ ထက်မြက်စေရန် ပြည့်စုံလာစေရန် မိမိတို့၏ အသိပညာ၊ အသိတရား၊ လုံ့လ၀ိရိယဟူသော ကိုယ်ရည်ကိုယ်သွေးများ ပြည့်စုံထက်မြက်စေရန် မိမိကိုယ်မိမိ လေ့ကျင့်ထိန်းသိမ်း ဆောင်ရွက်ရမည်ဖြစ်သည်။
နိုင်ငံတော်၏ အင်အားစုတွင် လူငယ်၏ အင်အားစုသည် သုံးပုံတစ်ပုံခန့်ရှိသည်။ ထိုသို့သော အင်အားစုကြီးဖြစ်သော ယနေ့လူငယ် အင်အားစုသည် နောင်တစ်ချိန်တွင် တိုင်းပြည်တာဝန်ကို ပခုံးပြောင်း တာဝန်ထမ်းဆောင်ရမည့် သွေးသစ်အင်အားစုလည်း ဖြစ်သည်။ ထိုသို့သော အရည်အသွေးရှိသည့် လူငယ်တို့တွင် ကာယစွမ်းအား၊ ဥာဏစွမ်းအား၊ စိတ်ဓာတ်စွမ်းအား၊ စာရိတ္တမဏ္ဍိုင် ကြံ့ခိုင်ရေးစွမ်းအား ပြည့်စုံရန် လိုအပ်သည်။ လူငယ်၏ သဘောသဘာဝသည် ရှင်သန်သည်။ နုပျိုသည်။ တက်ကြွသည်။ လန်းဆန်းသည်။ တိမ်းလွယ်ယိမ်းလွယ်သည်။ သူငယ်ချင်း အပေါင်းအသင်းကို တွယ်တာသည်။ ရှင်သန်တက်ကြွနိုးထနေသော ရွက်သစ်၊ ရွက်ညွှန့်၊ ရွက်နု၊ ပုရစ်ဖူးများအသွင်ရှိသည်။
ထိုသို့ နိုးကြားတက်ကြွ ရှင်သန်နေသော လူငယ်တို့သည် မျက်မှောက်ခေတ်၏ နိုင်ငံရေး ရေချိန်မြှင့်တက်လာသည်နှင့်အမျှ ဦးဆောင်လိုစိတ် ခေါင်းဆောင်လိုစိတ် ရှိရန်လိုအပ်ပါသည်။ ခေါင်းဆောင်မှုအပိုင်းမှာလည်း ခေါင်းဆောင်ကောင်းတစ်ယောက်၏ အရည်အသွေး အရည်အချင်း ပြည့်မှီရန်လိုပါသည်။ ခေါင်းဆောင်ကောင်းတစ်ဦးဖြစ်လိုသူသည် သာမန်သူတို့ထက် အရည်အချင်း ပိုမိုရှိရန်အထူးလိုအပ်ပါသည်။
လူတိုင်းခေါင်းဆောင်ဖြစ်လိုသောဆန္ဒရှိနေသော်လည်း ခေါင်းဆောင်တွင် ရှိသင့်သော စိတ်နေသဘောထား၊ ခေါင်းဆောင် အရည်အချင်းသည်ကား လူတိုင်းရှိနိုင်မည်မဟုတ်ပေ။  ခေါင်းဆောင်တစ်ဦးသည် ပညာအရည်အချင်းရှိနေရုံမျှဖြင့် မလုံလောက်ပေ။ အသိဉာဏ်ပညာ၊ သနားခြင်းကရုဏာ၊ ရဲရင့်ခြင်းဗျတ္တိ၊ ရိုးသားခြင်း စသည့်ဂုဏ်အရည်အချင်းများအပြင် ပြဿနာတိုင်းကိုမျှတစွာ ဖြေရှင်းတတ်ရန်၊ နောင်ဖြစ်လာမည့် အကျိုးရလာဒ်နှင့် အပြစ်အန္တရာယ်များကို ကြိုတင် သိမြင်နိုင်ခြင်းရှိရမည့်အပြင် အနစ်နာခံခြင်း၊ တာဝန်သိတတ်၊ တာဝန်ယူတတ်ခြင်းစသည့် ပင်ကိုယ်ကိုယ်ရည်ကိုယ်သွေးများလည်း မဖြစ်မနေလိုအပ်ပါသည်။
ထို့အပြင် ဘေးကနေ မြောက်ပင့်ပြောဆိုသော ကပ်ဖားကပ်စား လူ့အတ္တသမားတို့၏ မြှောက်ထိုးပင့်ကော် သွေးထိုးဂုံးတိုက်စကားများကိုလည်း လက်မခံ၊ မသာယာသင့်ပါပေ။ ခေါင်းဆောင်ကောင်းဟူသည် "ငါသာခေါင်သူကြီး ငါသာဟင်းခွက်ကြီး" ဆိုသကဲ့သို့ အတ္တကြီးမားသူလည်း မဖြစ်ရန်အထူး လိုအပ်လှ၏။ ထို့အပြင် ခေါင်းဆောင်ကောင်းသည် အသိဥာဏ်နည်းပါးသူ၊ အဂတိလိုက်စားသူလည်း မဖြစ်သင့်ပေ။ မိမိ၏ လုပ်ဖော်ကိုင်ဖက် လက်အောက်ငယ်သားများအပေါ် ရှေ့တွင်ဖြစ်စေ၊ ကွယ်ရာတွင်ဖြစ်စေ အဂတိတရားကင်းရှင်းစွာဖြင့် ဝေဖန်ပိုင်းခြားခွဲခြားနိုင်ရမည်ဖြစ်သည်။
လူမျိုးတစ်မျိုး၊ အဖွဲ့အစည်းတစ်ခု ခေတ်မီဖွံ့ဖြိုးတိုးတက်ဖို့ရန်၊ ကမ္ဘာမှာဂုဏ်သိက္ခာအဆင့် အတန်းရှိရှိနှင့်
တင့်တင့်တယ်တယ်ဖြစ်ဖို့ရန်အတွက် ခေါင်းဆောင်ကောင်းများကို အမှန်တကယ်  လိုအပ်ပါကြောင်း ရေးသားလိုက်ရပါသည်။

ခွန်လေဗွာ