လူသားတိုင်းသည် ဘေးကင်းရန်ရှင်းသည့်ဘ၀၊ ကိုယ်စိတ်နှစ်ဖြာကျန်းမာချမ်းသာသည့်ဘ၀ကို အစဉ်လိုလားတောင့်တကြလေသည်။ လူသားတို့သည် နေ့စဉ်နှင့်မျှ သွားလာလှုပ်ခြားနေရသည့် အဓိကအကြောင်းရင်းကို လေ့လာဆန်းစစ်ပါက ကိုယ်စိတ်နှစ်ဖြာ ချမ်းသာလိုခြင်းကြောင့် သွားလာလှုပ်ရှား နေကြရသည်ကို တွေ့မြင်ရမည်ဖြစ်သည်။ လူအမျိုးမျိုး စရိုက်အဖုံဖုံနှင့် ပြည့်စုံနေသော လူသားတို့ကမ္ဘာတွင် လူသားချင်းတူငြားသော်လည်း လူနေမှုအဆင့်အတန်း အပြောအဆို အနေအထိုင်များသည် ချမ်းသာသော လူ့အသိုင်းအ၀ိုင်းနှင့် ဆင်းရဲသည့် လူ့အသိုင်းဝိုင်းဟု နှစ်မျိုးနှစ်စားခွဲခြားလေသည် ဒေသအလိုက် လူနေမှုဘ၀သည် မတူပဲတစ်မူကွဲပြားကြလေသည်။
ဆင်းရဲခြင်း၏ အကြောင်းတရားနှင့် ဆင်းရဲခြင်းဒဏ်ကို များသောအားဖြင့် လူသားတို့ တွေ့ကြုံခံစား သိထားကြသော်လည်း ချမ်းသာသည့်နည်းလမ်းကိုကား မသိရှိကြပါ။ ချမ်းသာရခြင်း၏ အကြောင်းတရားများကို လူသားတိုင်းမသိကြသလို ချမ်းသာပြီးသောလူတွေဟာလည်း ချမ်းသာသည့်နည်းလမ်းများ တစ်ဦးနှင့်တစ်ဦး တူညီကြလိမ့်မည် မဟုတ်ပေ ချမ်းသာခြင်းနည်းလမ်း အမျိုးမျိုးရှိရာမှာ ရှေးဘ၀က ကုသိုလ်ကံထူးလို့ ချမ်းသာခြင်းရှိသလို ရိုးသားကြိုးစားပြီး ချမ်းသာလာသူတွေလည်းရှိသည်။ ဤနေရာတွင် ခေတ်စနစ်အရ ချမ်းသာခြင်းနည်းလမ်းရှိသလို (သမ္မာအာဇီဝ)ကောင်းသောအသက်မွေးခြင်းဖြင့် ဘုရားရှင်ဟောကြား ချမ်းသာခြင်းနည်းလမ်းများကို တင်ပြရေးသားရလျှင် ၁။ ဥဌာနသမ္ပဒါ- ကြိုးစားအားထုတ်ခြင်းဖြစ်သည်၊ ကြိုးစားအားထုတ်ခြင်းဆိုရာဝယ်-မိမိ၏လုပ်ငန်းအပေါ် ပျော်ပျော်ရွှင်ရွှင်လုပ်ခြင်း သည်းခံပြီးလုပ်ခြင်း စိတ်ပါဝင်စားစွာလုပ်ကိုင်ခြင်း နည်းမှန်လမ်းမှန်ဖြင့် ကြိုးစားအားထုတ်ခြင်း သမ္မာအာဇီဝကျကျ ကြိုးစားရှာဖွေခြင်း၊ လုံ့လ၀ီရိယဖြင့်အားထုတ်ခြင်း မှန်မှန်ကန်ကန်တွေးတော ကြံစည်ခြင်း လက်တွေ့လုပ်ဆောင်ခြင်းဖြစ်သည်။၂။အာရက္ခသမ္ပဒါ-ထိန်းသိမ်းစောင့်ရှောက်ခြင်း၊ ထိန်းသိမ်းစောင့်ရှောက် ခြင်းဆိုရာဝယ်-ချွှေတာစုဆောင်း သူဌေးလောင်း ဆိုသည့်အတိုင်း မိမိရှာဖွေရရှိသည့် ရွှေ၊ငွေစည်းစိမ် ဥစ္စာရတ္တနာများကို မပျောက်မပျက်ရလေအောင် ထိန်းသိမ်းစောင့်ရှောက်ခြင်း များသထက်များလာအောင် စုဆောင်းခြင်း အလဟဿမဖြုန်းတီးခြင်း၊ တန်ဖိုးထားခြင်းတို့ဖြစ်သည်။ ၃။ ကလျာဏမိတ္တတာ-မိတ်ကောင်း ဆွေကောင်းရှိခြင်း၊ မိတ်ကောင်းဆွေကောင်းဆိုရာဝယ်-မိမိဘ၀အောင်မြင်မှုအတွက် အဓိကကျသည့် အရာတစ်ခုဖြစ်သည် ကျွမ်းကျင်လိမ္မာသော သစ္စာ-မေတ္တာရှိသော နှစ်ကိုယ်တစ်စိတ်ရှိသော မိမိနှင့်တန်းတူ ရည်တူရှိသော မိတ်ဆွေစင်စစ်ကိုဆိုလိုခြင်းဖြစ်သည်။၎။သမဇီဝိတာ-၀င်ငွေထွက်ငွေမျှတမှုရှိခြင်း၊ နေ့စားသ္မား ဖြစ်စေ၊ လခစား သ္မားဖြစ်စေ၊ စီးပွားရေးလုပ်ငန်းရှင်များဖြစ်စေ မိမိရရှိသည့် ၀င်ငွေနှင့် တစ်နေ့တာ အသုံးစရိပ်ကို မျှတစွာသုံးစွဲတတ်သည်ကိုဆိုလိုခြင်းဖြစ်သည်၊ ချမ်းသာလိုသောသူတိုင်းသည် ၀င်ငွေထက် စုငွေကပို၍ အရေးကြီးကြောင်း ကြားသိခဲ့ဖူးလေသည် ထို့ကြောင့် ချမ်းသာခြင်းဘ၀ကို ရယူပိုင်ဆိုင်လိုသောသူတို့သည် မှတ်ရလွယ်ကူပြီး ရိုးရှင်းသော အထက်ပါဘုရားရှင်ဟောကြားသော ချမ်းသာခြင်းနည်းလမ်းများကို လိုက်နာကျင့်သုံးကြ၍ ချမ်းသာသောဘ၀ကို လူသားတိုင်း ပိုင်ဆိုင်နိုင်ကြပါစေကြောင်း ရေးသားတင်ပြလိုက်ရပါသည်။
ခွန်အောင်ထွိုက်ဗွေ
Like On Facebook
Follow On Twitter
Subscribe On RSS