အချိန်တိုအတွင်း ငြိမ်းချမ်းရေး လုပ်ငန်းစဉ်ကို အကောင်အထည်ဖော်ရန် လိုအပ်သည်ဟု ဗိုလ်ချုပ်မှူးကြီး မင်းအောင်လှိုင်ပြောကြား

တောင်ကြီး၊ ၂၀၁၆ ခုနှစ်၊ စက်တင်ဘာလ (၁) ရက်

ငြိမ်းချမ်းရေးလုပ်ငန်းစဉ်ကို အကောင်အထည်ဖော်ရာတွင် နိုင်ငံတော်နှင့်တိုင်းရင်းသား ပြည်သူလူထု၏ အကျိုးစီးပွားကို ထာဝစဉ်ရှေးရှုပြီး စိတ်စေတနာ ထက်သန်စွာဖြင့် အချိန်တိုအတွင်း အကောင်အထည် ဖော်ဆောင်ရန် လိုအပ်ကြောင်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က သြဂုတ် ၃၁ ရက်က နေပြည်တော်ရှိ MICC-2 တွင် ကျင်းပသော ပြည်ထောင်စု ငြိမ်းချမ်းရေး ညီလာခံ (၂၁ ရာစုပင်လုံ) ဖွင့်ပွဲတွင် နှုတ်ခွန်းဆက်စကား ပြောကြားခဲ့သည်။
တပ်မတော် ကာကွယ်ရေး ဦးစီးချုပ်က ပြောကြားရာတွင် “ ငြိမ်းချမ်းရေးလုပ်ငန်းစဉ်များမှာ လိုအပ်တာထက် ပိုပြီး အချိန်ကြာလာရင် ဘေးပယောဂတွေ၊ ၀င်ရောက်စွက်ဖက်မှုတွေ၊ ကြိုးကိုင်ခြယ်လှယ်လိုတာတွေ ပိုမို များလာနိုင်ပြီး ရှိရင်းစွဲ ယုံကြည်မှုတည်ဆောက်ပြီးသားအရာများ ပျောက်ပျက်နိုင်ခြင်း၊ ပွတ်တိုက်မှုများ များပြား လာနိုင်ခြင်းတို့ကြောင့်၊” အချိန်တိုအတွင်း အကောင်အထည် ဖော်ကြရန် အကြံပြုလိုသည်ဟု ပြောကြားခဲ့သည်။ ထို့အပြင် ဗိုလ်ချုပ်မှူးကြီး မင်းအောင်လှိုင်က နိုင်ငံတော်၏ ငြိမ်းချမ်းရေးနှင့် စည်းလုံးညီညွတ်မှု တည်ဆောက် ရေးလုပ်ငန်းစဉ်တွင် တပ်မတော်အနေနှင့် ခေတ်အဆက်ဆက်တွင် တက်ကြွစွာ ပူးပေါင်းပါဝင် ဆောင်ရွက်ခဲ့ ကြောင်း၊ ထိုသို့ ဆောင်ရွက်ရာတွင် ယုံကြည်ချက်၊ ခံယူချက်နှင့် သဘောထားအမြင်များ မည်သို့ပင် ကွဲပြားစေကာမှု “ငြိမ်းချမ်းရေးကို မဖြစ်မနေရယူလိုစိတ်” အပေါ်အရင်းခံပြီး မိမိတို့ဘက်မှ ခိုင်ခိုင်မာမာ ရပ်တည်လုပ်ဆောင်လာခဲ့သည်ဟုလည်း ပြောကြားခဲ့သည်။ ယင်းအပြင် အမျိုးသားပြန်လည်သင့်မြတ်ရေးနှင့် ငြိမ်းချမ်းရေးလုပ်ငန်းစဉ်များ ဆောင်ရွက်ရာတွင် တပ်မတော်အနေနှင့် ဒို့တာဝန်အရေး(၃)ပါးကို အခြေခံပြီး နိုင်ငံ၏ပကတိလိုအပ်ချက်ဖြစ်သော တည်ငြိမ်အေးချမ်းရေး၊ တိုင်းရင်းသားစည်းလုံးညီညွတ်ရေးနှင့် ဖွံ့ဖြိုးတိုးတက်ရေးမူဝါဒ (၃)ရပ်အပေါ်တွင် ရပ်တည်ပြီး အဖွဲ့အစည်းပေါင်းစုံနှင့် လက်တွဲပူးပေါင်းပါဝင် လုပ်ဆောင်နေကြောင်း၊ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးလုပ်ငန်းစဉ်များ အောင်မြင်စွာ အကောင်အထည်ဖော် ဆောင်ရွက်နိုင်ရန်အတွက် အဓိက နှလုံးသွင်း ရမည့်အချက်မှာ တိုင်းရင်းသား စည်းလုံးညီညွတ်ရေး မဟာဗျူဟာကို မျက်ခြည်မပြတ် ကျင့်သုံးခြင်းနှင့် ထာဝရငြိမ်းချမ်းရေး ရယူရန်အတွက် အမှန်တကယ်ဆန္ဒရှိခြင်းတို့သာ ဖြစ်သည်ဟုလည်း ထည့်သွင်း ပြောကြားခဲ့သည်။ ယင်းအပြင် နိုင်ငံတော်၏ အတိုင်ပင်ခံပုဂ္ဂိုလ်၊ ၂၁ ရာစုပင်လုံ ညီလာခံ ကျင်းပရေး ဗဟိုကော်မတီ ဥက္ကဌ ဒေါ်အောင်ဆန်းစုကြည်ကလည်း အမျိုးသား ပြန်လည် ရင်ကြားစေ့ရေးသည် ပြည်ထောင်စုသား အားလုံးနှင့် သက်ဆိုင်ကြောင်း၊ အမျိုးသား ပြန်လည်သင့်မြတ်ရေးတွင် တိုင်းရင်းသား လက်နက်ကိုင် အဖွဲ့အစည်းများ အချင်းချင်းကြားက သင့်မြတ်ရေးလည်း ပါဝင်ကြောင်း ညီလာခံ အဖွင့်မိန့်ခွန်းတွင် ပြောကြားခဲ့သည်။ နိုင်ငံတော်၏ အတိုင်ပင်ခံ ပုဂ္ဂိုလ်က “ NCA (တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူ စာချုပ်) လက်မှတ်ရေးထိုးပြီးဖြစ်တဲ့ အဖွဲ့တွေ့နဲ့ NCA မထိုးရသေးတဲ့အဖွဲ့တွေကြားမှာ ၀ိဝါဒ ကွဲပြားမှုတွေဖြစ်ပေါ်နေရင် ကျွန်မတို့ ငြိမ်းချမ်းရေးခရီးဟာ နှောင့်နှေးကြန့်ကြာသွားမှာ ဖြစ်ပါတယ်။ ကျွန်မတို့တိုင်းရင်းသားကြားမှာ နားလည်မှုလွဲမှားတာတွေ စိတ်ဝမ်းကွဲမှုတွေမရှိစေဖို့ ဘုံသဘောတူညီချက်ဖြစ်တဲ့ NCA ရဲ့ ထီးရိပ်အောက်မှာ အားလုံးရောက်ရှိလာအောင် ကျွန်မတို့ ကြိုးစားဆောင်ရွက်နေပါတယ်” ဟုလည်း ပြောကြားခဲ့သည်။ ဖွင့်ပွဲ အခမ်းအနားတွင် ညီညွတ်သော တိုင်းရင်းသား လူမျိုးများ ဖက်ဒရယ် ကောင်စီ ဥက္ကဌ အင်ဘန်လက အခု လက်ရှိ ပြောနေသော ဖက်ဒရယ် ဒီမိုကရေစီ ပြည်ထောင်စုသည် ခွဲထွက်ရေး မဟုတ်ကြောင်း ပြောလိုသည်ဟုလည်း ပြောကြားခဲ့သည်။ ၎င်းက “ဟိုတုန်းက ကျနော်တို့ပြောခဲ့တဲ့ ဖက်ဒရယ်ပြည်ထောင်စုဟာ စုဖွဲ့ပြီး အေးအတူ၊ ပူအမျှ၊ ယှဉ်တွဲနေထိုင်ဖို့ ဖြစ်သလိုပဲ အခုကျနော်တို့ပြောတဲ့ ဖက်ဒရယ် ဒီမိုကရေစီပြည်ထောင်စုဟာလည်း ခွဲထွက်ရေးမဟုတ်ဘူးဆိုတာကို ပြောလိုပါတယ်။ တစ်ခုဘဲ ပြောလိုတာကတော့ တန်းတူရည်တူ၊ အေးအတူ၊ ပူအမျှ၊ ယှဉ်တွဲနေထိုင်နိုင်ဖို့ တစ်ယောက်နှင့်တစ်ယောက်၊ လူမျိုးတမျိုးနဲ့တမျိုး ဘယ်လို အပြန်အလှန်အသိမှတ်ပြုကြပြီး အပြန်အလှန်ပူးပေါင်းဆောင်ရွက်ကြမယ်၊ မျှဝေကြမယ်၊ ပူးပေါင်းကြမယ်ဆိုတဲ့ သာစေ၊ နာစေ မဟုတ်တဲ့ ညီအစ်ကိုမောင်နှမစိတ်စိတ် (သို့မဟုတ်) ပြည်ထောင်စုစိတ်ဓာတ်ကို မွေးမြူကြဖို့တော့ အလွန်အရေးကြီးပါတယ်” ဟု ပြောကြားခဲ့သည်။ အဆိုပါ ၂၁-ရာစု ပင်လုံ ညီလာခံတွင် နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်၊ ပြည်သူ့လွှတ်တော် ဥက္ကဌ ဦးဝင်းမြင့်၊ အမျိုးသားလွှတ်တော်ဥက္ကဌ မန်းဝင်းခိုင်သန်း၊ တပ်မတော် ကာကွယ်ရေး ဦးစီးချုပ် ဗိုလ်ချုပ်မှုးကြီး မင်းအောင်လှိုင်၊ တိုင်းရင်းသား လက်နက်ကိုင်အဖွဲ့အစည်းမှ ကရင်အမျိုးသား အစည်းအရုံး ဥက္ကဌ စောမူတူးစေးဖိုး၊ ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ ဥက္ကဌ၊ KIO ဒုတိယ ဥက္ကဌ အင်ဘန်လ၊ အမျိုးသားဒီမိုကရေစီအဖွဲ့ချုပ်ပါတီ နာယက ဦးတင်ဦးနှင့် ကုလသမဂ္ဂ အထွေထွေ အတွင်းရေးမှူးချုပ် မစ္စတာ ဘန်ကီမွန်းတို့က ကြိုဆိုနှုတ်ခွန်းဆက်အမှာစကား ပြောကြားခဲ့သည်။ ညီလာခံသို့ အစိုရ၊ တပ်မတော်၊ လွှတ်တော်ကိုယ်စားလှယ်များ၊ လက်နက်ကိုင်အဖွဲ့အစည်းများ၊ လူမှုရေးအဖွဲ့အစည်းများ၊ ပါဝင်သင့်ပါဝင်ထိုက်သူများနှင့် ဖိတ်ကြားထားသော ဧည့်သည်တော်များ တက်ရောက်ခဲ့ကြောင်း သိရှိရပါသည်။

ခွန်ထင်;လေအောင်;