Wednesday, November 9, 2016

ပအိုဝ်းအမျိုးသားအဆင့် နိုင်ငံရေးဆွေးနွေးပွဲကို (PNO) နှင့် (PNLO) တို့ ပူးပေါင်းဆောင်ရွက်သွားမည်

တောင်ကြီး၊ ၂၀၁၆ ခုနှစ်၊ နိုဝင်ဘာလ (၁၀) ရက်




ပအိုဝ်းအမျိုးသားအဆင့် နိုင်ငံရေးဆွေးနွေးပွဲကို ပအိုဝ်းအမျိုးသားအဖွဲ့ချုပ်(PNO)နှင့် ပအိုဝ်းအမျိုးသား လွတ်မြောက်ရေးအဖွဲ့ချုပ်(PNLO)တို့က ပူးပေါင်းဆောင်ရွက်သွားမည်ဟု ၂၀၁၆ခုနှစ်၊ နိုဝင်ဘာလ(၉)ရက်၊ ပအိုဝ်းအမျိုးသားအဖွဲ့ချုပ်(PNO)၊ဗဟိုဌာနချုပ်ရုံး၌ တွေ့ဆုံပွဲတွင် သဘောတူဆုံးဖြတ်ချက်ချမှတ်ခဲ့ပါသည်။

၎င်း တွေ့ဆုံမှုတွင် “ အမျိုးသားအဆင့် နိုင်ငံရေးဆွေးနွေးပွဲကို ကျင်းပပြုလုပ်ခွင့်ရှိတာက အစိုးရရယ်၊ လက်မှတ်ရေးထိုးထားတဲ့ လက်နက်ကိုင်အဖွဲ့အစည်းရယ် ပြီးတော့ ကျွန်တော်တို့ အနိုင်ရပါတီရယ် ဆိုပြီးတော့ (၃)ဖွဲ့ ရှိပါတယ်၊ ဆိုတော့ အမျိုးသားအဆင့် နိုင်ငံရေးဆွေးနွေးပွဲမှာ ပအိုဝ်းအမျိုးသားရေး ကိစ္စကို လုပ်ပိုင်ခွင့်ရှိတဲ့ ကျွန်တော်တို့ ဒီနှစ်ဖွဲ့ကို ပူးပေါင်းညှိနှိုင်း လုပ်ဆောင်နိုင်အောင် ဆိုပြီးတော့ ဒီလိုတွေ့ဆုံမှုကို ပြုလုပ်ရခြင်း ဖြစ်ပါတယ်” ဟု (PNO) ဒု-ဥက္ကဌ ဖြားခွန်မောင်သောင်းက ပြောကြားခဲ့ပါသည်။

အမျိုးသားအဆင့် နိုင်ငံရေးဆွေးနွေးပွဲ ကြီးကြပ်မှုကော်မတီ (တိုင်းဒေသကြီးများ၊ ပြည်နယ်နှင့် နေပြည်တော်ကောင်စီနယ်မြေ) ဖွဲ့စည်းပုံတွင် အမျိုးသားအဆင့် နိုင်ငံရေးဆွေးနွေးပွဲ ကြီးကြပ်မှုကော်မတီ (တိုင်းဒေသကြီးများ၊ ပြည်နယ်နှင့် နေပြည်တော်ကောင်စီနယ်မြေ) တစ်ခုလျှင် သက်ဆိုင်ရာဒေသ၏ အစိုးရ၊ တိုင်းရင်းသားလက်နက်ကိုင်အဖွဲ့အစည်းများနှင့် ရွေးကောက်ပွဲအနိုင်ရနိုင်ငံရေးပါတီများမှ ကိုယ်စားလှယ်(၃)ဦး စီ၊ စုစုပေါင်း(၉)ဦးစီဖြင့် ဖွဲ့စည်းရမည်ဟု လုပ်ငန်းလမ်းညွန်တွင် ပြဌာန်းထားပါသည်။

ထိုသို့ ပူးပေါင်းဆောင်ရွက်ခြင်းနှင့် ပတ်သက်၍ (PNLO) ဥက္ကဌ ဖြားခွန်မြင့်ထွန်းက “ ကျွန်တော်တို့က ပူးပေါင်းလုပ်ဆောင်ဖို့ ဆန္ဒရှိပြီးသား ဖြစ်တယ်၊ အမျိုးသားအဆင့် လုပ်ငန်းလမ်းညွန်မှာ ပြဌာန်းထားတာ ရှိတယ်၊ အကယ်၍ ကျွန်တော်တို့ ပူးပေါင်းမလုပ်ဆောင်နိုင်ရင် အမျိုးသားအဆင့် နိုင်ငံရေးဆွေးနွေးပွဲ ကြီးကြပ်မှုကော်မတီက ဘာလာမလဲဆိုတော့ ကျွန်တော်တို့ကြားမှာ မတူညီတဲ့ သဘောထားကွဲလွဲမှုတွေ ရှိခဲ့ရင် သူက ညှိနှိုင်းပေးမယ်ဆိုတဲ့ဟာရှိတယ်။ ဒါကြောင့် ကျွန်တော်တို့ ပူးပေါင်းလုပ်ဆောင်မယ်ဆိုတာက ကျွန်တော်တို့ ပအိုဝ်းလူမျိုးရဲ့ ဂုဏ်သိက္ခာကို မထိခိုက်စေချင်တဲ့ သဘောဘဲ ဖြစ်တယ်၊ ကြီးကြပ်မှုကော်မတီက ကျွန်တော်တို့ တန်းတူခွင့် သတ်မှတ်ထားတဲ့ ကျွန်တော်တို့ ပအိုဝ်းတွေကြားမှာ လိုက်ပြီးညှိနှိုင်းပေးနေရရင်  ကျွန်တော်တို့ ပအိုဝ်း သိက္ခာကျတယ် လို့ မြင်တယ်” ဟု ယင်းတွေ့ဆုံပွဲတွင် ပြောကြားသွားခဲ့သည်။

အဆိုပါ တွေ့ဆုံပွဲတွင် နှစ်ဦးနှစ်ဖက်မှ ဆုံးဖြတ်ချက်(၅)ချမှတ်ခဲ့၍ ပအိုဝ်းအမျိုးသားအဆင့် နိုင်ငံရေးဆွေးနွေးပွဲကြီးကြပ်မှုကော်မတီ ဖွဲ့စည်းနိုင်ရန် အစိုးရဖက်ကို အမြန်ဆုံးညှိုနှိုင်း သွားမည်ဖြစ်ပြီး  ပါဝင်သင့်ပါဝင်ထိုက်သော ပအိုဝ်းအမျိုးသားအဆင့် နိုင်ငံရေးဆွေးနွေးပွဲ အကြိုညှိနှိုင်းဆွေးနွေးပွဲကို ဒီနိုဝင်ဘာလအတွင်း ကျင်းပသွားမည်ဟု ဆုံးဖြတ်ချက်အရ သိရှိရပါသည်။

ပအိုဝ်းအမျိုးသားအဖွဲ့ချုပ်(PNO)ပါတီသည် ၂၀၁၅ရွေးကောက်ပွဲတွင် ပအိုဝ်းကိုယ်ပိုင်အုပ်ချုပ်ခွင့်ရဒေသ ဖြစ်သော ဟိုပုံး၊ ဆီဆိုင်၊ ပင်လောင်း (၃)မြို့နယ်ကို အပြတ်အသတ် အနိုင်ရရှိထားသော ပါတီဖြစ်ပြီး ပအိုဝ်းအမျိုးသားလွတ်မြောက်ရေးအဖွဲ့(PNLO)သည် ၂၀၁၅ခုနှစ်၊ အောက်တိုဘာ(၁၅)ရက်၌    တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူညီချက်စာချုပ် (NCA) တွင် တိုင်းရင်းသားလက်နက်ကိုင်အဖွဲ့(၇) ဖွဲ့နှင့်အတူ လက်မှတ်ရေးထိုးထားသော အဖွဲ့တစ်ဖွဲ့ဖြစ်သည်။

ခွန်ထင်;လေအောင်;
Powered by Blogger.