Thursday, December 8, 2016

စာပေ စကား ပြောဆိုရေးသားရာမှာ ဥပဒေကြောင်းရာအရ ဆင်ခြင်ရာ

တောင်ကြီး၊ ၂၀၁၆ ခုနှစ်၊ ဒီဇင်ဘာလ (၉)ရက်


အသိအလိမ္မာ ဥာဏ်ပညာနည်းပါးနေသောနိုင်ငံတစ်ခုတွင် ဒီမိုကရေစီစနစ် အစစ်အမှန်မရှိနိုင်ပေ။ အသိအလိမ္မာဥာဏ် ပညာသည် ဒီမိုကရေစီစနစ်၏ အခြေခံသဘောတရားကြီးပင်ဖြစ်သည်။ ဒီမိုကရေစီစနစ်ကို ကျင့်သုံးလိုလျှင် “လူတိုင်းစဉ်းစား တတ်သောဥာဏ် ဝေဖန်တတ်သောသတ္တိနှင့် ပြည့်စုံရပေမည်။” ဆိုသော အခွင့်အရေးကို လက်ကိုင်ပြုကာ မိမိရေးသားဝေဖန်လိုက်သော အရေးအသား၊ အပြောအဆိုသည် တစ်ဖက်သားအား ထိခိုက်နစ်နာစေသော အရာမျိုးဖြစ်နေပါလျှင် ထိုအရေးအသား၊ အပြောအဆိုသည် ဒီမိုကရေစီအရေးဟူသော အခွင့်အရေးဆိုင်ရာနှင့် ကိုက်ညီမှုမရှိဘဲ ပုတ်ခတ်ပြောဆိုလိုက်သော အရာများပင်ဖြစ်နေပါသည်။

ခေတ်စနစ် တိုးတက်ပြောင်းလဲလာသည်နှင့်အမျှ အသိဥာဏ်ပညာများ အီလက်ထရောနစ်ဆိုင်ရာ လည်း ပြီးပြည့်စုံလာသည်သာမက မိမိအသုံးပြုနေသော အင်တာနက်၊ ဖေ့ဘုတ်၊ ဂျီမေး၊ အီးမေးစသော နည်းစနစ်များလည်း လိုအပ်သည်ထက် ပိုမိုနေကြောင်းကို လူတိုင်းမြင်တွေ့နိုင်ပါသည်။ ထိုကြောင့် ပြည်သူလူထုနှင့်ဆိုင်ရာ စာရေးဆရာများနှင့် သတင်းစာ၊ ဂျာနယ်၊ မဂွဇင်းအယ်ဒီတာများက ပြည်သူလူထု၏ မျက်စိကို ဖွင့်ပေးရန်တာဝန်ရှိသည်။ မိမိလူမျိုး၏အလိုဆန္ဒကိုဖော်ပြရန်တာဝန်လည်းရှိ၏။ ပြည်သူလူထုအကျိုးကို မျှော်ကိုး၍ အရာရာတွင် အကြောင်းအကျိုးအားလျော်စွာ ညွှန်ပြ၊ နိုးဆော်၊ အသိပေးရေးလည်း ရှိနေသည်။ ထို့ကြောင့် ဒီမိုကရေစီနိုင်ငံတစ်ခုတွင် စာရေးဆရာနှင့် အယ်ဒီတာများကို ချုပ်ချယ်ထားလျှင် သို့မဟုတ် မျက်နှာကြီး မျက်နှာငယ်လိုက်၍ မျက်နှာသာပေးသူကိုပေး၍ ဖိနှိပ်သူကို ဖိနှိပ်ထားလျှင် အမှားကြီး မှားပေလိမ့်မည်။ နိုင်ငံတွင် ရှိသမျှ အယ်ဒီတာ စာရေးဆရာများကို မျှမျှတတ လွတ်လပ်ခွင့်ပေးထားရမည်။ စာရေးဆရာတိုင်း၊ အယ်ဒီတာတိုင်းသည်လည်း မိမိရေးသားလိုရာကို စည်းကမ်းဥပဒေရှိသည့်အတိုင်း လိုက်နာကာ ရေးသားရမည် ဖြစ်သည်။

သို့သော် မိမိတို့နိုင်ငံ၊ မိမိတို့လူမျိုးသည် မင်းမဲ့တိုင်းပြည်၊ မင်းမဲ့လူမျိုးမဟုတ်သောကြောင့် မိမိရေးသား၊ ဝေဖန်ပြောဆိုလိုက်သော အကြောင်းအရာသည် “ တကယ်ဖြစ်ရပ်မှန် ဟုတ်မဟုတ်” မိမိရေးသားလိုသော အကြောင်းအရာကို အောက်ခြေအရင်းအမြစ် အစအန ကုန်စင်အောင်သိပြီးမှသာ ရေးသားဝေဖန်သင့်ကြောင်းနှင့် မိမိရေးသား ဖြန့်ဝေလိုက်သော အကြောင်းအရာသည် မိမိလူမျိုးကိုသော်လည်းကောင်း၊ မိမိဒေသအတွက်သော်လည်းကောင်း၊ အဖွဲ့အစည်းအချင်းချင်းသော်လည်းကောင်း၊ လူပုဂ္ဂိုလ်အချင်းချင်းသော်လည်းကောင်း အကျိုးဖြစ်ထွန်းမှုမဖြစ်စေဘဲ လူမျိုးအချင်းချင်း သွေးစည်းညီညွတ်မှုကို ထိခိုက်ပျက်ပြားစေသော အရေးအသားများ မဖြစ်ရန်လိုအပ်ပါသည်။ ထိုသို့အပြုသဘောဆောင်သော အရေးအသား ဖြစ်နေပါက ဥပဒေ အဆိုအမိန့်တစ်ခုအတိုင်း  “ ဥပဒေကို မသိနားမလည်ပါဟု ဆိုရုံမျှဖြင့် ဥပဒေက သင့်ကိုခွင့်လွှတ်လိမ့်မည်မဟုတ်” ဆိုသော စကားအတိုင်း လိုက်နာသင့်ကို အောက်ပါ ပုဒ်မများဖြင့် သုံးသပ်မိပါသည်။

မိမိလူမျိုးကို တိုးတက်ကောင်းမွန်အောင် အသိအမြင်များ ဖြန့်ကျက်မှုများပြုလုပ်လိုလျှင် ဂုဏ်သိက္ခာကျဆင်းမှုများမဖြစ်စေဘဲ အကျိုးရှိသော အမှန်တကယ်ဖြစ်ရပ်များကိုသာရေးသားပြီး မိမိဖြန့်ဝေလိုက်သော သတင်းကြောင့် “အဖွဲ့အစည်းတစ်ခုခု သို့မဟုတ် ပုဂ္ဂိုလ်တစ်ဦးဦးကိုထိခိုက်နစ်နာစေရန် ဖြစ်စေ၊ ဂုဏ်သိက္ခာကျဆင်းစေရန် ဖြစ်စေ သတင်းအချက်အလက်ကို အီလက်ထရောနစ်နည်းပညာဖြင့် ပြုလုပ်ခြင်း၊ ပြုပြင်ခြင်း သို့မဟုတ် ပြောင်းလဲခြင်းပြုလုပ်ထားသည့် သတင်းအချက်အလက်ကို ဖြန့်ချိခြင်း”  ဟူသော လုပ်ရပ်ကြောင့် ပြစ်မှုနှင့်ပြစ်ဒဏ်ကျသင့်သည်ဟု ပြည်ထောင်စု သမ္မတ မြန်မာနိုင်ငံ ၂၀၁၄ ခုနှစ် ပြည်ထောင်စုလွှတ်တော် ဥပဒေ အမှတ် ၆ အီလက်ထရောနစ် ဆက်သွယ်ဆောင်ရွက်ရေး ဥပဒေ ၁၃၇၅ ခုနှစ်၊ တပို့တွဲ လပြည့်ကျော် ၁၁ရက် ၂၀၁၄ ခုနှစ် ဖေဖော်ဝါရီလ ၂၅ ရက်နေ့တွင် ထုတ်ပြန်သော ဥပဒေ ပုဒ်မ ၃၄ (ဃ) တွင် မည်သူမဆို အထက်ပါပြစ်မှုကိုကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူအား ငွေဒဏ်ကျပ်ငါးဆယ်သိန်းမှ ကျပ်သိန်းတစ်ရာအထိ ချမှတ်ရမည်။ ငွေဒဏ်မဆောင်ပါက ထောင်ဒဏ် အနည်းဆုံး တစ်နှစ်မှ အများဆုံးသုံးနှစ်အထိချမှတ်ရမည်ဟု ပြဌာန်းထားသောကြောင့် လူတိုင်းဆင်ခြင်သင့်ပါသည်။

ထို့နောက် (၂၀၁၃ ခုနှစ်၊ ပြည်ထောင်စုလွှတ်တော် ဥပဒေအမှတ် ၃၁။) ၁၃၇၅ ခုနှစ်၊ သီတင်းကျွတ်လဆန်း ၄ ရက် (၂၀၁၃ ခုနှစ်၊ အောက်တိုဘာလ ၈ရက်) တွင်ပြဌာန်းထားသော ဆက်သွယ်ရေးဥပဒေ ပုဒ်မ  ၆၆ ( ဃ) ဆက်သွယ်ရေးကွန်ယက်တစ်ခုခုကို အသုံးပြု၍ ပုဂ္ဂိုလ်တစ်ဦးဦးအား ခြောက်လှန့်တောင်းယူခြင်း၊ အနိုင်အထက်ပြုခြင်း မတရားတားဆီးကန့်ကွက်ခြင်း၊ အသရေဖျက်ခြင်း၊ နှောင့်ယှက်ခြင်း၊ မလျော်သြဇာသုံးခြင်း သို့မဟုတ် ခြိမ်းခြောက်ခြင်း၊ ဟူသော လုပ်ရပ်မျိုးကို မည်သူမဆို ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူအား သုံးနှစ်ထက်မပိုသော ထောင်ဒဏ် ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ရမည်ဟု ပြဌာန်းထားသောကြောင့် မိမိပြုလုပ်မှုတစ်ရပ် ကြောင့် ထိုသို့မခံရလေအောင် သတိထားသင့်ကြောင့် ပြောကြားလိုပါသည်။

ထို့ပြင် မြန်မာနိုင်ငံ ရာဇသတ်ကြီးပုဒ်မ ၄၉၉ တွင်လည်း ဤသို့ထပ်မံပြဌာန်းထားသေးသည်။ မည်သူမဆို နုတ်ဖြင့်ဖြစ်စေ၊ ဖတ်ရှုစေရန် ကြံရွယ်သည့်စကားဖြင့်ဖြစ်စေ၊ အမှတ်အသားဖြင့်ဖြစ်စေ၊ ထင်ရှား သော ပုံသဏ္ဍာန်ဖြင့်ဖြစ်စေ လူတစ်ဦးတစ်ယောက်၏ အသရေကို နစ်နာစေရန် အကြံဖြင့်သော် လည်းကောင်း၊ ထိုသူနှင့် စပ်လျဉ်းသော စွပ်စွဲခြင်းသည် ထိုသူ၏အသရေကိုနစ်နာစေမည်ဟု သိလျက်နှင့်သော်လည်းကောင်း ထိုသို့ယုံကြည်ရန် အကြောင်းရှိလျက်နှင့် သော်လည်းကောင်း ထိုသူနှင့်စပ်လျဉ်းသော စွပ်စွဲချက်ကိုပြုလျှင် သို့မဟုတ် ကြေညာလျှင်လည်း အောက်ပါအတိုင်း ပုဒ်မ ၅၀၀ ပါဖော်ပြချက်မှာ မည်သူမဆို အခြားသူတစ်ဦး၏ အသရေကို ဖက်လျှင် ထိုသူကို နှစ်နှစ်အထိ အလုပ်မဲ့ထောင်ဒဏ်ဖြစ်စေ၊ ငွေဒဏ်ဖြစ်စေ ဒဏ်နှစ်ရပ်လုံးဖြစ်စေ ချမှတ်ရမည်ဟု ပြဌာန်းထားသောကြောင့် မိမိ၏ အရေးအသား အပြောအဆိုဖြန့်ကျက်မှုမှ ပြည်သူလူထုအတွက် အကျိုးမဖြစ်ဘဲ တရားဥပဒေ ရင်ဆိုင်ရမည့် လုပ်ရပ်မျိုးဖြစ်နေလျှင် မိမိလူမျိုး အသိုင်းအ၀ိုင်းမှ တရားရုံးတွင် အမှုပြဿနာကို ရင်ဆိုင်ဖြေရှင်းနေရလျှင် ဂုဏ်သိက္ခာကျဆင်းမှုများဖြစ်စေသောကြောင့် ထိုသို့မဖြစ်ရလေအောင် ဆင်ခြင်ကာ စည်းကမ်းဥပဒေကို လေးစားလိုက်နာပြီး အမျိုးဂုဏ်၊ ဇာတိဂုဏ်မြှင့်မား စေရန် ရည်ရွယ်၍ ရေးသားပြောဆိုဝေဖန်သင့်ကြောင်း ဤဆောင်းပါးဖြင့် အသိပေးလိုက်ရပါသည်။

နန်းဆောင်းလေပြေ (အွံအား)

Powered by Blogger.