ခေါင်းဆောင်ဆိုသည်မှာ မိမိအဖွဲ့အစည်း၏ ရည်မှန်းချက်ပန်းတိုင်ကို အောင်မြင်စွာ လှမ်းကိုင်နိုင် ရေးအတွက် အဖွဲ့သားအားလုံးအား စည်းရုံးဖွဲ့စည်း၍ ဦးစီးဦးဆောင်မှုပြုကာ ရှေ့ဆောင်လမ်းပြသြဝါဒပေး၍ ဆောင်ရွက်နေသူဖြစ်သည် ဟူ၍ ဆိုရပေလိမ့်မည်။
အဖွဲ့အစည်းများကို လူတိုင်းဦးဆောင်ကြသော်လည်း ခေါင်းဆောင်အစစ်မဟုတ်ကြပေ။ အိမ်ထောင်တစ်ခုတွင် ဖခင်သည် ဦးဆောင်သူဖြစ်သော်လည်း ဖခင်တိုင်းကား ခေါင်းဆောင်ကောင်း မဟုတ်ကြပေ။
“စား၊ ဝတ်၊ နေရေးပြေလည်အောင် ငါရှာပေးတာပဲ တာဝန်ကျေပြီ”ဟူသော ဖခင်များ အများအပြားတွေ့ဖူးကြပေလိမ့်မည်။ ထိုဖခင်မျိုးသည် ဦးဆောင်သူအဖြစ်ကား မငြင်းလိုသော်လည်း ခေါင်းဆောင်အဖြစ်ကား အပြည့်အဝထောက်ခံရန် မဖြစ်နိုင်ချေ။ တာဝန်နှင့် ဝတ္တရားနှစ်မျိုးလုံးကို ထမ်းဆောင်နိုင်ပြီး အနာဂတ်အတွက် အာမခံချက်ရှိသော ဦးဆောင်သူမျိုးသာ ခေါင်းဆောင်အစစ်အမှန်ဖြစ်သည်။ အဓိကကွဲပြားချက်မှာ ခေါင်းဆောင်များတွင် Commitment ဟူသော အာမခံချက်နှင့် Result ဟူသော ရလဒ်က အရည်အချင်းတစ်ရပ်အဖြစ် ပါဝင်သည်။ ခေါင်းဆောင်သည် ရလဒ်အခြေပြု ဦးဆောင်သူဖြစ်သည်။ ဦးဆောင်သူကား အလုပ်အခြေပြုဖြစ်သည်။ ရလဒ်အတွက် အာမမခံပေ။
ဦးဆောင်သူ ဖခင်ဘဝမှ ခေါင်းဆောင်သူ ဖခင်ဘဝသို့ ပြောင်းလဲလာနိုင်ရန်မှာ မိမိတို့၏ အခြေခံအရေးကြီးသုံးပါးဖြစ်သော စား၊ ဝတ်၊ နေရေး တည်းဟူသော အရေး(၃)ပါးသည် ယခုခေတ်တွင် မလုံလောက်တော့ချေ။ ကောင်းစွာ ပညာသင်ကြားပေးနိုင်မှု၊ ကျန်းမာရေး၊ လူမှုရေး၊ ဘဝအာမခံချက်၊ ထောက်ပံ့မှုစသော အခြားအရေးကြီးငယ်များစွာ ပါဝင်လာမှ ခေါင်းဆောင်ဖြစ်သော ဖခင်ဖြစ်လာပေမည်။
ခေါင်းဆောင်မှုဟူသည် အများပြည်သူကို သာမန်ထက်ပိုသော ဖြစ်ရပ်များပေးအပ်နိုင်ရန် အမြင့်ဆုံး လမ်းကြောင်းတစ်ခု ဖန်တီးပေးခြင်းဟု နားလည်နိုင်သည်။ ခေါင်းဆောင်သည် အများကို ညွှန်ပြရာဖြစ် သည်။ နောက်လိုက်များ၏ အရည်အသွေးကို ဖြည့်ဆည်းပေးပြီး မိမိ၏ ကိုယ်ရည်ကိုယ်သွေးကိုလည်း အမြဲတစေထက်မြက်နေစေရန် ကြိုးစားနေသူလည်းဖြစ်ရမည်။ မဟာဗျူဟာရေးဆွဲသူဖြစ်ပြီး နောက်ပါတို့ကို လိုအပ်သော ပုံသွင်းနိုင်သူလည်းဖြစ်သည်။ ယခုခေတ်သည် လှည်းခေတ်၊ လှေခေတ်မဟုတ်တော့၊ အစွမ်းထက်သော နည်းပညာချင်း စီးချင်းထိုးသောခေတ်ဖြစ်လာခဲ့ပြီ။ ခေါင်းဆောင်ပိုင်းကလည်း သိမ်မွေ့ထက်မြက်သော မဟာဗျူဟာချင်း ပြိုင်ဆိုင်နေရသောခေတ် ဖြစ်လာနေပြီ။ ခေတ်နှင့်အသားတကျမရှိပါက ခေတ်ကို မျက်ခြေပြတ်ပါက ခေါင်းဆောင်ကောင်းဖြစ်မည်မဟုတ်။ ကိုယ့်နေရာ၊ ကိုယ့်အဖွဲ့အစည်းကလေးမျှကိုသာ ဦးဆောင်သူဖြစ်ပေမည်။
ခေါင်းဆောင်ကောင်းတို့တွင် ရှိသင့်ရှိထိုက်သော အရည်အချင်းများ ခေါင်းဆောင်တို့တွင် ရာခိုင်နှုန်းပြည့် ရှိမှသာလျှင် အကြင်သူ ခေါင်းဆောင်ကောင်းတစ်ဦး ဖြစ်ပေမည်။ ခေါင်းဆောင်ကောင်း ရရှိနိုင်ရန် နောက်လိုက်တို့ကလည်း ထိုက်သင့်သော အရည်အချင်းရှိရန် လိုအပ်သည်။ ခေါင်းဆောင်တစ်ဦး ၏ အရည်အချင်းကိုလည်း သိထားသင့်သည်။ ဘာဖြစ်ဖြစ်လက်ခံတတ်သော နောက်လိုက်တို့သည် ခေါင်းဆောင်ကောင်းမရနိုင်ချေ။ အနောက်နိုင်ငံက အရှေ့ထက်သာသည့် အချက်တစ်ချက်မှာ သူတို့ခေါင်း ဆောင်ကို ဝေဖန်သုံးသပ်နိုင်ကြသော အရည်အချင်းပင်ဖြစ်သည်။ ခေါင်းဆောင်သည် လိမ်ညာဖြီးဖြန်း၍ တော်ရိလျော်ရိလုပ်၍မရ လုပ်ခဲ့သမျှတို့ကို သုတေသီတို့က မှတ်တမ်းတင်ထားတတ်ကြသည်။
လူတော်များသည် မှန်ကန်သော ခေါင်းဆောင်များဖြစ်ခွင့်ရှိပြီး လူညံ့များကား ဦးဆောင်သူများသာ ဖြစ်နိုင်ကြသည်။ (ဥပမာ- အဖေက ငွေရှိ၍ တည်ထောင်ခဲ့သော ကုမ္ပဏီတွင် သားက အရည်အချင်း မပြည့်ဝသော်လည်း ဦးဆောင်သူတော့ ဖြစ်နိုင်ပါသေးသည်။ ခေါင်းဆောင်ကား ဖြစ်မည်မဟုတ်ပေ။)
ခေါင်းဆောင်ကောင်းတို့သည် နောက်လိုက်တို့ကို ပြုပြင်ရ၏။ ပြင်ပပြုပြင်ပြောင်းလဲမှုကို ဆောင်ရွက်ခြင်းဖြစ်သည်။ မြို့ရွာ၊ အစုအဖွဲ့တို့၏ စည်ပင်ဝပြောမှုကိုလည်း ဆောင်ရွက်ရသည်။ အနာဂတ်ကိုလည်း အာမခံချက်ပေးရသည်။ ဥပဒေကိုလည်း လေးစားလိုက်နာရသည်။ အများကို ရင်ဝယ်သားကဲ့သို့လည်း သဘောထားရသည်။ ခေါင်းဆောင်ဖြစ်လျှင် ကိုယ်အတွက် ဘာမှမရှိ၊ ကိုယ့်အတွက် သူတုိ့လုပ်နေကြသည်မဟုတ်တော့ဘဲ သူတို့အတွက် ကိုယ်လုပ်နေရခြင်းသာ ဖြစ်လာ၏။
ထိုသို့ဆောင်ရွက်နိုင်ရန် အတွင်းပြုပြင်ပြောင်းလဲမှုကိုလည်း ဆောင်ရွက်ရသည်။ အတွင်းပြုပြင် ပြောင်းလဲမှုက ပို၍ ခက်ခဲသည်။ မိမိ၏ ခံယူချက်၊ အတွေးအခေါ်၊ အနာဂတ်အမြင်စသော စိတ်ပိုင်းဆိုင်ရာ၊ ခံယူချက်တို့ကို ခေါင်းဆောင်တစ်ဦး အရည်အချင်းပြည့်မီရန် ပြုပြင်ရသည်။ အခြားသော အတတ်ပညာ၊ အသိပညာတို့ကိုလည်း ဆည်းပူးရသည်။ ထို့ပြင် ခေါင်းဆောင်တစ်ဦးသည် အရာအားလုံးကို မသိနိုင်၊ သိရန်လည်းမဖြစ်နိုင်။ လူတော်တို့ကို သုံးစွဲရဲသော သတ္တိလည်းရှိရပေသည်။ ဆန့်ကျင်ဘက်စကား၊ အကြံဥာဏ်ဖြစ်ပါက ချင့်ချိန်၍ မျှတစွာ ဆုံးဖြတ်ရသည်။ အဆုံးအဖြတ် မှန်ကန်ရန် ညဏ်ရှိရပေမည်။ ဦးဆောင်သူဖြစ်ရန်ကား ခက်ခဲသော်လည်း မှန်ကန်သော ခေါင်းဆောင်ဖြစ်ရန်ကား မလွယ်ကူပေ။
မွိုးပိုမူ - စန္တာခမ်း (ပင်လောင်း)
ကိုးကားချက် - သိဖို့လား၊ ရှိဖို့လား (နေဇင်လတ်)
ခေါင်းဆောင်ဟူသည်(ဦးမောင်မောင်)
Like On Facebook
Follow On Twitter
Subscribe On RSS