လူတိုင်းသည် ခံစားချက်ကိုယ်စီရှိကြသော်လည်း တခါတရံ မိမိ၏ရင်တွင်းခံစားချက်များကို ဖွင့်ပြောရန်အတွက် ရင်လေးနေကြပါသည်။ ရင်တွင်းခံစားချက်များကို ထုတ်ဖော်ပြောဆိုသည့်နေရာမှာ အမျိုးသမီးများသည် မိမိ၏ခံစားချက်ကို အခြားသူတစ်ဦးဦးထံသို့ ဖွင့်ပြောလိုက်လျှင် လူအများ၏ အထင်မြင်သေးမှုခံရမည်ကို စိုးရိမ်နေသလို “နားထောင်ပေးပါ့မလား၊ နားလည်ပေးနိုင်ပါ့မလားဟူသော” စိုးရိမ်စိတ်ရှိနေတတ်ကြပါသည်။ ထို့အပြင် ခွဲခြားဆက်ခံရသောအမျိုးသမီးများနှင့်အကြမ်းဖက်ခံရသော အမျိုးသမီးများသည် သူတို့၏ခံစားချက်များကို ရင်ဖွင့်လိုက်လျှင် လူအများ၏ ကဲ့ရဲ့ပြစ်တင်အထင်သေးမှုကို ပိုပြီးကြောက်ရွံ့နေကြပါသည်။
အိမ်ထောင်သည် အမျိုးသမီးများအနေဖြင့် အိမ်ထောင်သည်မှစ၍ ခင်ပွန်း၏ဝတ္တရား၊ သား/သမီးများ၏ ဝတ္တရားများကို ကျေပွန်အောင်ထမ်းဆောင်ရသည်သာမက အချို့သောအမျိုးသမီးသည် မိသားစုအတွက် ဝင်ငွေဖူလုံမှုရှိအောင် စီးပွားရှာဖွေတတ်ကြသည်ကိုလည်း လူတိုင်းအသိပင်ဖြစ်ပါလိမ့်မည်။ အိမ်မှုကိစ္စများကိုသာ အချိန်ကုန်နေသော အမျိုးသမီးအချို့သည် ခင်ပွန်း၏အထင်မြင်သေးမှုကို ပိုပြီးခံစားတတ်ရပါသည်။ ထိုသို့ ခံစားနေရခြင်းအကြောင်းရင်းသည် အိမ်မှုကိစ္စကိုသာ လုပ်ဆောင်ရသောအမျိုးသမီးဆိုသည်မှာ အပြင် ဗဟုသုတ အတွေ့အကြုံအားနည်းနေသည်ဟု ထင်မြင်ယူဆနေခြင်းကြောင့်ဖြစ်သည်။ ကျေးလက်တောရွာမှာ ရှိသော အိမ်ထောင်သည်အမျိုးသမီးများသည် အိမ်မှုကိစ္စ၊ သား/သမီးဝေယျာဝစ္စ၊ ခင်ပွန်းဝေယျာဝစ္စများကို ပိုပြီးလုပ်ဆောင်ရသောကြောင့် ရုပ်ပိုင်းနှင့်စိတ်ပိုင်း ပိုပြီးပင်ပန်းရတတ်ပါသည်။ အချို့သောအမျိုးသမီးများသည် တာဝန်ကျေပွန်အောင်လုပ်ဆောင်ပေးသလောက် ခင်ပွန်းသည်၏ နားလည်အားပေးမှုမရရှိကြသည်ကို တွေ့မြင်ကြရလိမ့်မည်ဟု ထင်မြင်မိပါသည်။ ထို့အပြင် အိမ်ထောင်သည်အမျိုးသမီးများသည် သား/သမီးများ၏ စားဝတ်နေရေးနှင့် ပညာရေးကိုလည်းပူပြင်ရပါသည်။
အိမ်ထောင်မရှိသော အပျိုအမျိုးသမီးများသည်လည်း မိသားစု၊ ပတ်ဝန်းကျင်အသိုင်းအဝိုင်းကြောင့် ခံစားရသည့်ခံစားချက်ရှိသကဲ့သို့ အလုပ်ခွင်လုပ်ငန်းအဆင်မပြေမှုကြောင့်ခံစားရသည့် ခံစားချက်များလည်း ရှိလိမ့်မည်ဟု ထင်မြင်မိပါသည်။ ထို့အပြင် အချို့သောအမျိုးသမီးများသည် ဓမ္မတာရောဂါနှင့် အခြားသော ရောဂါကြောင့် ခံစားရသည့်ရင်တွင်းခံစားချက်များကို ရင်ဖွင့်ရန်ခက်ခဲသည့်အခြေအနေလည်း ရှိလိမ့်မည်။ သူငယ်ချင်းမိတ်ဆွေအချင်းချင်းကြားမှာလည်း တစ်ဦးကတိုးတက်မြင့်မားလာသည့်အချိန်တွင် တစ်ဦးကမနာလို ဝန်တိုစိတ်မွေးခြင်း၊ စိတ်ညစ်ဝမ်းနည်းသည့်အခါမှာ အချင်းချင်းပံ့ပိုးဖေးမအားပေးကူညီမှု မရှိကြပါ။ ရုပ်ပိုင်းဆိုင်ရာ အကြမ်းဖက်ခံရမှုဆိုသည်မှာ လက်နက်(သို့မဟုတ်)အရာဝတ္ထုတစ်ခုခုကို အသုံးပြု၍ဖြစ်စေ၊ အသုံးမပြုဘဲဖြစ်စေ အမျိုးသမီး၏ ခန္ဓာကိုယ်ကို(သို့)ကိုယ်အင်္ဂါအစိတ်အပိုင်းတစ်ခုခုကို ထိခိုက်နာကျင်စေရန်၊ ပျက်စီး ဆုံးရှုံးစေရန်(သို့)အသက်ဆုံးရှုံးစေရန် အကြံဖြင့်သော်လည်းကောင်း ထိုသို့ဖြစ်လာနိုင်သည်ကို သိလျက်နှင့် သော်လည်းကောင်း ပြုလုပ်သော အနိုင်ထက်ပြုမှု၊ ညှဉ်းပမ်းနှိပ်စက်မှု၊ ထိပါးစော်ကားမှု၊ မတရားဖမ်းဆီးမှု၊ ချုပ်နှောင်ထားမှု၊ ပိတ်လှောင်ထားမှုနှင့် မတရားတားဆီးကန့်ကွက်မှု(သို့မဟုတ်)လွတ်လပ်ခွင့်ပိတ်ပင်မှုများ အပါအဝင် မည်သည့်နည်းဖြင့်မဆို အကြမ်းဖက်သည့်ပြုလုပ်မှုများ အားလုံးကိုဆိုသည်။ စိတ်ပိုင်းဆိုင်ရာ အကြမ်းဖက်မှုဆိုသည်မှာ အမျိုးသမီး၏ စိတ်ပိုင်းဆိုင်ရာထိခိုက်နစ်နာမှုဖြစ်စေရန်၊ ဂုဏ်သိက္ခာထိခိုက် ကျဆင်းစေရန် နှုတ်ဖြင့်ဖြစ်စေ၊ အပြုအမှုဖြင့်ဖြစ်စေပြုလုပ်ခြင်း၊ အနှောင့်အယှက်ပြုခြင်း၊ ကန့်သတ်ချုပ်ချယ်ခြင်း၊ ကဲ့ရဲ့သရော်မှုပြုခြင်း၊ ခြိမ်းခြောက်ခြင်း၊ ကြောက်ရွံ့သိမ်ငယ်အောင်ပြုလုပ်ခြင်း၊ လျစ်လျူရှုခြင်း၊ အထီးကျန်ဖြစ်စေ ခြင်း၊ စိတ်ငြိုငြင်စေပြီး နှုတ်ဆိတ်နေစေရန်ပြုခြင်း(သို့မဟုတ်)အရှက်တကွဲ အကျိုးနည်းဖြစ်စေရန် ပြုခြင်းကို ဆိုလိုသည်။ စီးပွားရေးဆိုင်ရာ အကြမ်းဖက်မှုဆိုသည်မှာ အမျိုးသမီးပိုင်ပစ္စည်း(သို့မဟုတ်) ငွေကြေးကိုသော် လည်းကောင်း၊ ကိုယ်ပိုင်စီးပွားရေး၊ ဝင်ငွေရရန်အခွင့်အလမ်း၊ ငွေကြေးဆိုင်ရာအမှီအခိုကင်းစွာ နေထိုင်မှုကို သော်လည်းကောင်း၊ ဖျက်ဆီးခြင်း၊ သိမ်းယူခြင်း၊ ကန့်သတ်ခြင်း၊ ခေါင်းပုံဖြတ်ခြင်း(သို့မဟုတ်) တားမြစ်ပိတ်ပင်ခြင်းကို ဆိုလိုသည်။ လိင်ပိုင်းဆိုင်ရာအကြမ်းဖက်မှုဆိုသည်မှာ လိင်ပိုင်းဆိုင်ရာ လက်ရောက်ကျူးလွန်မှု၊ ညှဉ်းပမ်းနှိပ်စက်မှု၊ လိင်ပိုင်းဆိုင်ရာကျွန်ပြုမှု၊ နှောင့်ယှက်မှု(သို့မဟုတ်)တစ်ဦးတစ်ယောက်သောသူ၏ လိင်ပိုင်းဆိုင်ရာကိစ္စရပ်ကို အခြားသူကြည့်ရှုနိုင်ရန် ထုတ်ဖော်ဖြန့်ဝေမှုကို ဆိုလိုသည်။ အထက်ပါ ရုပ်ပိုင်းဆိုင်ရာ အကြမ်းဖက်မှု၊ စိတ်ပိုင်းဆိုင်ရာအကြမ်းဖက်မှု၊ စီးပွားရေးဆိုင်ရာအကြမ်းဖက်မှုနှင့် လိင်ပိုင်းဆိုင်ရာအကြမ်း ဖက်မှုတို့ကြောင့် စိတ်ဒဏ်ရာအမျိုးမျိုးဖြင့် ခံစားရသည့်အမျိုးသမီးအများအပြား ရှိပါသည်။
နိဂုံးချုပ်အနေဖြင့် အိမ်ထောင်သည်အမျိုးသမီးများအတွက် အမျိုးသားများသည် အမျိုးသမီးအလုပ်၊ အမျိုးသားအလုပ်ဟူ၍ မခွဲခြားဘဲ မိမိအားလပ်သည့်အချိန်များတွင် ဝင်ရောက်ကူညီလုပ်ဆောင်ပေးသင့်ပါသည်။ ပြဿနာကိစ္စတစ်ခုခုကြောင့် အမျိုးသမီးများခံစားရသည့် ခံစားချက်များကို ထုတ်ဖော်ပြောဆိုလာအောင် အမျိုးသားများအနေဖြင့်လည်းကောင်း၊ အမျိုးသမီးများအချင်းချင်းလည်းကောင်း ဂရုတစိုက်နားထောင်ပေးသင့်ပါသည်။ နားထောင်ရုံတင်မကဘဲ ဖေးမကူညီအားပေးသည့်စကား ပြောဆိုရမည်၊။ နားထောင်သည့်နေရာ မှာလည်း အပျက်သဘောမျိုးလှောင်ရယ်သည့်ပုံစံဖြင့် နားမထောင်ဘဲ အပြုသဘောဆောင်သော နည်းဖြင့် နားထောင်ပေးသင့်ပါမည်။ အမျိုးသမီးအချင်းချင်းကြားတွင် တစ်ဦးကဘဝတိုးတက်ပြောင်းလဲလာသည့်အခါ မနာလိုဝန်တိုစိတ်မထားဘဲ ဂုဏ်ယူဝမ်းမြောက်သည့်စကား ချီးကျူးပြောဆိုသင့်ပေသည်။ ထို့အပြင် တစ်ဦးက ပြဿနာတစ်ခုခုကြောင့် ဝမ်းနည်းပူဆွေးရသည့်အခါ အမျိုးသမီးအချင်းချင်းကိုယ်ချင်းစာသောစိတ်ဖြင့် ဖေးမ ကူညီပေးသင့်ပါသည်။ ထို့ကြောင့် အမျိုးသမီးများ၏ခံစားချက်ကို ကိုယ်ချင်းစာတက်သည့်စိတ်၊ အပြုသဘောေ်ဆာင်သည့် အကြံဉာဏ်များပေးခြင်းဖြင့် အမျိုးသမီးများ၏ ရင်ဖွင့်သံစကားကို အမျိုးသားများအနေဖြင့် နားထောင်ပေးကြပါစို့ဟု တိုက်တွန်းလိုပါသည်။
မူပေမဲုင်းကောင်
Like On Facebook
Follow On Twitter
Subscribe On RSS