Sunday, November 26, 2017

ရွေးကောက်ပွဲကျင်းပရန် (၃၆)လသာ ကျန်တော့သည်

တောင်ကြီး၊၂၀၁၇ ခုနှစ်၊ နိုဝင်ဘာလ ( ၂၇) ရက်


၂၀၁၀ ခုနှစ်၊ နိုဝင်ဘာလ(၇)ရက်နေ့တွင် ပါတီစုံဒီမိုကရေစီအထွေထွေရွေးကောက်ပွဲကြီး ကျင်းပမည်ဟု နိုင်ငံတော်အစိုးရမှ ထုတ်ပြန်ကြေညာခဲ့ပြီး ရွေးကောက်ပွဲတွင် ပါတီပေါင်း (၃၇)ပါတီ ဝင်ရောက်ယှဉ်ပြိုင် ခဲ့သည်။ ရွေးကောက်ပွဲတွင် လွတ်လပ်ပြီး တရားမျှတမှုရှိမရှိ စသည်များကို အားလုံးဖြတ်သန်းခဲ့ကြရပြီး ဖြစ်ကာ ပန်းဝင်သည့် အောင်နိုင်သူများလည်း ပန်းဝင်ခဲ့ပြီး ဖြစ်သည်။ ၂၀၁၀ ရွေးကောက်ပွဲအပေါ် မိမိ၏ ထင်မြင်သုံးသပ်ချက်အရ ပါတီများမှ ရွေးကောက်ပွဲအတွက် အဆင်သင့်အနေအထား မရှိခြင်း၊ ရွေးကောက် ခံကိုယ်စားလှယ်များသည်လည်း အဆင်သင့်အနေအထား မဖြစ်ခြင်းနှင့် ၂၀၁၀ ရွေးကောက်ပွဲသည်  ပြည်သူလူထုများအတွက် နှစ်(၂၀)ကြာမှ ပြန်လာသော ရွေးကောက်ပွဲဖြစ်၍ ပြည်သူများလည်း အဆင်သင့် မရှိခဲ့ပါ။ ဤကဲ့သို့သော အဆင်သင့်မဖြစ်ရခြင်း၏ နောက်ကွယ်တွင် အကြောင်းချင်းရာ များစွာ ရှိသည်။

ဒုတိယအကြိမ် ပါတီစုံဒီမိုကရေစီ အထွေထွေရွေးကောက်ပွဲကြီးကို ၂၀၁၅ ခုနှစ်၊ နိုဝင်ဘာလ(၈)ရက်နေ့တွင် ပြန်လည်ကျင်းပခဲ့ပြီး ပါတီပေါင်း (၉၀)ကျော် ဝင်ရောက်ယှဉ်ပြိုင်ခဲ့ကာ ယှဉ်ပြိုင်မှု ပြင်းထန်ခဲ့သည်။ ၂၀၁၅ ရွေးကောက်ပွဲသည် ယခင် ၂၀၁၀-၂၀၁၂ ရွေးကောက်ပွဲကဲ့သို့ မဟုတ်ဘဲ တမူထူးခြားခဲ့ပြီး ဆုံးရှုံးမှုများ၊ အကျိုးအမြတ်ဖြစ်ထွန်းမှုများ ထွက်ရှိခဲ့လေ၏။ ဆုံးရှုံးမှုပြင်းထန်ခဲ့သော ၂၀၁၅ ရွေးကောက်ပွဲ တွင် တိုင်းရင်းသားပါတီများအတွက် ထိချက်နာခဲ့ရသည်မှာ ပါတီကွဲခြင်းပြဿနာနှင့် တိုင်းရင်းသားပါတီများ မဲမရခြင်းပင်ဖြစ်ပြီး ပါတီကွဲခြင်းကြောင့် ကြားကားခရီးသည် များခဲ့သည်။ ကြားကားဆွဲသည့်ပြဿနာများ ကြောင့် လွှတ်တော်တွင် ကိုယ်စားပြုမှုများ မပါဝင်နိုင်တော့သည့် အခြေအနေသို့ပင် ဖြစ်သွားခဲ့ပါသည်။ တဖန် အစိုးရသစ်မှ ပြုလုပ်ကျင်းပသော ပြည်ထောင်စုငြိမ်းချမ်းရေး ညီလာခံ-(၂၁)ရာစုပင်လုံတွင် အနိုင်ရပါတီများသာ တက်ရောက်ခွင့်ရရှိခဲ့သည့်အတွက်ကြောင့် ညီလာခံတွင်လည်း တိုင်းရင်းသားများ၏ ကိုယ်စားပြုမှုများ မပါဝင်နိုင်တော့သည့် အခြေအနေသို့ ဖြစ်ခဲ့ရပြန်ပါသည်။ တချို့တိုင်းရင်းသားတွင် ပါတီမကွဲသော်လည်း ကြိုတင်ပြင်ဆင်မှုအားနည်းခြင်း၊ စည်းရုံးလှုံ့ဆော်နိုင်မှုအားနည်းခြင်း စသည့် အချက်များကြောင့် ရွေးကောက်ပွဲတွင် ခွက်ခွက်လှန်အောင် ရှုံးပွဲနွဲခဲ့ရပါပြီး ကြိုတင်ပြင်ဆင်မှုရှိသော ပါတီအနည်းငယ်သာ ပြန်လည်ပန်းဝင်နိုင်ခဲ့သည်။
စာရေးသူ ကျွန်ုပ်၏ သုံးသပ်တွေ့ရှိချက်များအရ ယှဉ်ပြိုင်မှု ပြင်းထန်သော ၂၀၁၅ ရွေးကောက်ပွဲအပြီးတွင် အကျိုးအမြတ် ထွက်ပေါ်ခဲ့သည်မှာ ပြည်သူလူထုများနေဖြင့် ၂၀၁၅ ရွေးကောက်ပွဲအပေါ် စိတ်ဝင်စားမှု တိုးလာသည်။ နိုင်ငံရေးသို့ ပါဝင်လှုပ်ရှားမှုရေချိန် တဆင့်မြင့်လာသည်။ ရွေးကောက်ပွဲမတိုင်ခင် မဲစာရင်း ကြေညာချိန်ကာလ မဲစာရင်းတွင် မိမိအမည်ပါမပါ စိတ်ဝင်စားမှု မြင့်မားလာပြီး မဲပေးပုံပေးနည်းများ သင်တန်းအတွက် အချိန်ပေး၍ ပါဝင်လှုပ်ရှားဆောင်ရွက်မှုများ ရှိလာခဲ့သည်။ ပထဝီနယ်မြေ အခြေအနေ အရ ကော်မရှင်မှ မဲရုံဖွင့်လှစ်ထားရှိမှုများအပေါ် စောဒကတက် မေးခွန်းထုတ်တတ်လာသည်။ ရွေးကောက်ပွဲနေ့တွင်လည်း ရွေးကောက်ပွဲအနိုင်အရှုံး ရလဒ်အပေါ် နားစွင့်တတ်လာသည်။ ဤသည်ကား ၂၀၁၅ ရွေးကောက်ပွဲမှ ထွက်ရှိလာသော နိုင်ငံရေးနိုးကြားမှု အသိရေချိန်အကျိုးအမြတ် ဖြစ်သည်။ မည်သို့ပင် ဆိုစေကာမူ ၂၀၁၀၊ ၂၀၁၅ ရွေးကောက်ပွဲကြီးသည် အတိတ်မှာပင် ပုံပြင်သဖွယ် ကျန်ရစ်ခဲ့ပြီး ဖြစ်သည်။

အချိန်သည် ကုန်မြန်သည်။ တိုင်းရင်းသားပါတီများ သတိမထားမိ၊ အမှုမဲ့အမှတ်မဲ့ ဖြတ်သန်းလာခဲ့သည်မှာ ၂၀၁၅ ရွေးကောက်ပွဲမှစ၍ ယနေ့အချိန်ထိ (၂၄)လသာသာ ကုန်လွန်ခဲ့ပြီးဖြစ်သည်။ အမှုမဲ့အမှတ်မဲ့ ဖြတ်သန်းကုန်လွန်ခဲ့ပြီဖြစ်သော (၂၄)လသာသာ အချိန်ကာလတွင် တိုင်းရင်းသားပါတီများအနေဖြင့် ပြည်သူ့အကျိုးအတွက် မည်သည့်အရာများကို စွမ်းဆောင်ပေးနိုင်ခဲ့ပြီလဲ၊ မိမိတို့၏ ပါတီပုံရိပ်ကောင်းအောင် ဘယ်အရာတွေက လုပ်ဆောင်ပေးနိုင်သလဲ၊ မိမိတို့၏ ၂၀၂၀ ရွေးကောက်ပွဲအတွက် မည်သည့်အရာကို ကြိုတင်ပြင်ဆင်နိုင်ခဲ့ပြီလဲ ဟူသောမေးခွန်းကို နေ့စဉ်ရက်ဆက် မိမိကိုယ်မိမိ ပြန်လည်မေးမြန်းဆန်းစစ်ရန် လိုအပ်ပြီ ဖြစ်သည်။ ၂၀၁၅ ရွေးကောက်ပွဲတွင် ရှုံးနှိမ့်၍ ပြာပုံဘဝ ရောက်ခဲ့ရသော်လည်း အတိတ်ကို လွမ်းဆွေးရန်မလိုဘဲ သင်ခန်းစာရယူပြီး ရှေ့သို့ ခရီးဆက်ရန်လိုအပ်ပြီ ဖြစ်သည်။ မိမိပါတီလှုပ်ရှားရာ နယ်မြေအတွင်းရှိ မိဘပြည်သူများအတွက်၊ မိမိလူမျိုးအတွက် ဖွံ့ဖြိုးရေးလုပ်ငန်းများကို တစိုက်မတ်မတ် ဖြည့်ဆည်းဆောင်ရွက်ပေးပြီး မိမိပါတီအမှတ်       ရရှိစေရန်၊ မိမိတို့၏ ပါတီကို ပြည်သူလူထုများ စိတ်ဝင် စားမှု ရှိလာစေရန်၊ ပြည်သူလူထုများမှ မိမိတို့ပါတီကို အစဉ်မျက်မှန်း တမ်းမိစေရန်၊ မိမိတို့ပါတီသည် ပြည်သူလူထုနှင့် တသားတည်းရှိကြောင်းကို အစဉ်တဆက်ပြသနိုင်ရန် အထူးအရေးကြီးလှပြီ ဖြစ်သည်။ ၂၀၁၅ ရွေးကောက်ပွဲတွင် အောင်မြင်မှုမရရှိခဲ့သည့်  တိုင်းရင်းသားပါတီ များအနေဖြင့် ဒေသဖွံ့ဖြိုးရေးလုပ် ငန်းများကို အနိုင်ရပါတီများက ဆောင်ရွက်ပေးလိမ့်မည်ဟု ယူဆပါက အမှားကြီးမှားလိမ့်မည်ဖြစ်ပြီး မိမိတို့၏ ပါတီအနာဂတ်အခြေအနေများ ပြိုလဲရန်သာ ဦးတည်သွားလိမ့်မည် ဖြစ်သည်။

လက်ရှိအခြေအနေအရ စာရေးသူ၏ ထင်မြင်ယူဆချက်မှာ တိုင်းရင်းသားနိုင်ငံရေးပါများ(အားလုံးနီးပါး) သည် နိစ္စဓူဝ ပြည်သူလူထု၏အကျိုး၊ လိုအပ်ချက်များထက် လက်ရှိခေတ်စားလျက်ရှိနေသည့် ဖက်ဒရယ်၏ သွားရာလမ်းကိုပင် ပို၍ အာရုံရောက်နေကြပြီး ပို၍ပင် အားသွန်ခွန်စိုက် ဆွေးနွေးလျှောက်လှမ်းနေကြ သည်ကို တွေ့မြင်နေရပါသည်။ ပြည်သူများမှ နေ့စဉ်ခံစားနေရသော အခြေခံစားဝတ်နေရေးပြဿနာများ၊ တိုင်းရင်းသား ပြည်သူများအတွက် ပုံမှန်ဈေးကွက်ရှိသော စိုက်ပျိုးရေးထွတ်ကုန်များ စသည့် ပြည်သူများ၏ အခြေခံလိုအပ်ချက်များကို အားသွန်ခွန်စိုက် ကြိုးစားဆွေးနွေး ဖော်ဆောင်ပေးခဲ့သည်မှာ မရှိသလောက်ပင် ရှားပါသည်။ တိုင်းရင်းသားများအနေဖြင့် ဖက်ဒရယ်ကို လိုချင်သည်မှာမှန်သော်လည်း ဖက်ဒရယ်သည် လက်ရှိမြန်မာနိုင်ငံ၏ အဖြေမှန် ဟုတ်မဟုတ်နှင့် တိုင်းရင်းသားလူမျိုးငယ်များအတွက် မည်ကဲ့သို့ အကျိုး ဖြစ်ထွန်းစေမည်ကို မည်သည့်ပညာရှင်တစ်ဦးတစ်ယောက်မှ ဧကန်မုချ မပြောနိုင်သေးပေ။ တိုင်းရင်းသား ပါတီများသည် ဖက်ဒရယ်ကိစ္စရပ်နှင့်သာ အချိန်ကုန်လွန်လျက်ရှိနေပြီး မိမိပါတီအမှတ် ရရှိစေရန်၊ ၂၀၁၅ ကဲ့သို့ မဟုတ်ဘဲ လာမည့်ရွေးကောက်ပွဲတွင် မိမိတို့ပါတီအနေဖြင့် ပြည်သူထံမှ ထောက်ခံမှုများ ပြန်လည်ရရှိစေရန် စသည့် ဆောင်ရွက်ချက်များ စွမ်းဆောင်နိုင်ခြင်း မရှိသေးပေ။ တိုင်းရင်းသားပါတီများ အနေဖြင့် နေ့စဉ်နှလုံးသွင်း ထားရမည့်အချက်မှာ လာမည့် ၂၀၂၀ ရွေးကောက်ပွဲတွင် ယခု မိမိတို့ အစဉ်အားစိုက်ဆွေးနွေးနေသည့် ဖက်ဒရယ်အကြောင်းအရာများသည် မိမိတို့ပါတီကို မဲထည့်ပေးမည် မဟုတ်ကြောင်းနှင့် ပြည်သူလူထုကသာ မိမိတို့ပါတီကို မဲထည့်ပေးနိုင်မည်ဖြစ်ကြောင်းကို အစဉ်သတိမူ ရမည် ဖြစ်သည်။ ပြည်သူလူထုအပေါ် မိမိတို့ပါတီ၏ ကိုယ်စားပြုမှုသည် ရွေးကောက်ပွဲအနိုင်အရှုံးနှင့် ဆုံးဖြတ်နိုင်သောကြောင့် ရွေးကောက်ပွဲအနိုင်ရရှိမှုမရှိပါက အဆိုပါပါတီသည် ပြည်သူလူထုကို ကိုယ်စားပြုမှုမရှိသည့်ပါတီဟု ကောက်ချက်ချနိုင်သည်။ လက်ရှိအစိုးရဖော်ဆောင်နေသည့် နိုင်ငံရေး လမ်းကြောင်းဒီဇိုင်းအရ ရွေးကောက်ပွဲအနိုင်ရ ပါတီသာလျှင် ပြည်ထောင်စုငြိမ်းချမ်းရေးညီလာခံ-(၂၁)ရာစုပင်လုံသို့ ပါဝင်နိုင်မည်ဖြစ်သောကြောင့် မိမိတို့လူမျိုးကို ကိုယ်စားပြုနိုင်ရန်အတွက် ရွေးကောက်ပွဲအောင်မြင်ရန် အထူးလိုအပ်ပါသည်။ လက်ရှိ အခြေအနေရ တိုင်းရင်းသားပါတီများအနေဖြင့် ဖက်ဒရယ်ဟူသော စကားလုံးကြီးကြီးကိုသာ စွဲကိုင်လျက်ရှိနေပြီး ပြည်သူလူထုနှင့် ထိတွေ့မှုမရှိ အောက်ခြေလွတ်နေကြသည်ကို သတိထားမိဟန်မမူဟု စာရေးသူအနေဖြင့် သုံးသပ်မိပါသည်။ ယခုကဲ့သို့ ခရီးဆက်မည် ဆိုပါက ၂၀၁၅ ရွေးကောက်ပွဲကဲ့သို့ ပြည်သူလူထုထောက်ခံမှု မရရှိဘဲ ဒုံရင်းဒုံရင်းဘ၀နှင့်သာ ပြန်လည်ဖြတ်သန်းရမည့် အနေအထားပင် ဖြစ်သည်။

သို့ဖြစ်၍ ၂၀၂၀ ရွေးကောက်ပွဲကျင်းပရန် (၃၆)လသာ လိုတော့သည်။ တိုင်းရင်းသားပါတီများအနေဖြင့် သတိမမူ၊ အမှုမဲ့အမှတ်မဲ့  ဖြတ်သန်းခဲ့သည်မှာ (၂၄)လသာသာ ကုန်လွန်ခဲ့ပြီ ဖြစ်သည်။ ဖက်ဒရယ်သည် အရေးကြီးသည်မှန်သော်လည်း ဖက်ဒရယ်ဆွေးနွေးမှုကို အနည်းငယ်လျော့ချပြီး မိမိတို့ပါတီ၏ ၂၀၂၀ ရွေးကောက်ပွဲအောင်မြင်ရေးအတွက် ပြည်သူ့အကျိုးပြုလုပ်ငန်းများ၊ ဒေသဖွံ့ဖြိုးရေးလုပ်ငန်းများဖြင့် မိမိတို့ ပါတီကို ပြည်သူလူထုမှ လက်ခံလာစေရန်၊ ထောက်ခံလာစေရန်၊ ပြည်သူနှင့် တသားတည်းရှိကြောင်း ပြသနိုင်စေရန်အတွက် ကြိုးစားပြင်ဆင်ရတော့မည် ဖြစ်သည်။

ဖက်ဒရယ်အကြောင်းအရာများကိုသာ ရှေ့တန်းတင်ဆောင်ရွက်ပြီး ပြည်သူလူထုများ၏ နိစ္စဓူဝအကျိုးစီးပွားကို လစ်လျူရှုပါက ၂၀၂၀ တွင် အောင်မြင်နိုင်ရန် ဖြစ်နိုင်စရာ မရှိပေ။ ပြည်သူများအနေဖြင့်လည်း လက်ရှိလွှတ်တော်တွင် မိမိတို့လူမျိုး ကိုယ်စားပြု ပါဝင်မှုအခြေအနေ၊ ပြည်ထောင်စုငြိမ်းချမ်းရေးညီလာခံ-(၂၁)ရာစုပင်လုံတွင် မိမိတို့လူမျိုး ကိုယ်စားပြု ပါဝင်မှုအခြေအနေများကို သုံးသပ်၍ သင်ခန်းစာရယူနိုင်ရန်လည်း အထူးအရေးကြီးပါသည်။ မည်သို့ပင်ဆိုစေကာမူ ရွေးကောက်ပွဲကျင်းပရန် (၃၆)လသာ ကျန်ရှိတော့သည့် အနေအထားတွင် တိုင်းရင်းသားပါတီများအနေဖြင့် မိမိတို့ပါတီအောင်နိုင်ရေးအတွက် မည်ကဲ့သို့သော ကြိုတင်ပြင်ဆင်မှု များကို ဆောင်ရွက်ထားနိုင်ခဲ့ပြီလဲ၊ မိမိတို့ပါတီသည် ပြည်သူလူထု၏အကျိုးကို မည်ကဲ့သို့ ဆောင်ရွက်ပေးနိုင်ခဲ့ပြီလဲ၊ မိမိတို့ပါတီအနေဖြင့် ပြည်သူလူထုနှင့် တသားတည်းရှိကြောင်းကို ဘယ်လောက်ထိ ပြနိုင်ခဲ့ပြီလဲ ဟူသော မေးခွန်းများသည် တိုင်းရင်းသားပါတီများကို ကျီစယ်လျက် ရှိနေပြီး အဆိုပါမေးခွန်းများကို တိုင်းရင်းသားပါတီများအနေဖြင့် ရဲရဲဝံ့ဝံ့ ဖြေကြားနိုင်ရန် ကြိုးစားသင့်ပြီဖြစ်ကြောင်း တိုက်တွန်းရေးသားရပါသည်။

Kka Sp

Powered by Blogger.