Sunday, April 22, 2018

ပြိုင်တူတွန်းလျှင် အမှန်တကယ်ရွေ့ပါလိမ့်မည် ရွှေပအိုဝ်းတို့

တောင်ကြီး၊ ၂၀၁၈ ခုနှစ်၊ ဧပြီလ (၂၃)ရက်


သက်ရှိလောကတွင် ကြက်၊ ငှက်၊ ကျွဲ၊ နွား၊ ခွေး၊ ဝက်၊ ခြင်္သေ့၊ ပုရွက်ဆိတ် အစရှိသည့်သတ္တဝါတို့သည် တစ်ဖွဲ့နှင့်တစ်ဖွဲ့၊ တစ်မျိုးနှင့်တစ်မျိုး  သူတစ်လူငါတစ်မင်းဖြင့် တိုက်ခိုက် အနိုင်ကျင့်ကြလေ၏။ ထို့အတူပင် နတ်၊ ဗြဟ္မာ၊ အသူရကာယ်နှင့် သိကြားမင်းတို့သည်လည်း တိုက်ခိုက်အနိုင်ကျင့်ကြလေကုန်၏။ ထို့အတူပင် ယနေ့ကမ္ဘာပေါ်ရှိလူသားတို့သည်လည်း ပုထုဇဉ် လူသားများပီပီ လောဘ၊ ဒေါသ၊ မောဟ၊ မာန်မာနများကို ရှေ့တန်းတင်ကာ ကမ္ဘာဦးကတည်းကပင် တစ်ဖွဲ့နှင့်တစ်ဖွဲ့၊ လူမျိုးတစ်မျိုးနှင့်တစ်မျိုး၊ တစ်နိုင်ငံနှင့်တစ်နိုင်ငံတို့သည်လည်း နေထိုင်မှုစနစ်၊ ပေါ်လစီမူဝါဒများ၊ အယူအဆများ၊ ကိုးကွယ်ယုံကြည်မှုများ မတူညီကြသည်ကို အကြောင်းပြု၍ အင်အားကြီးသည့်နိုင်ငံက အင်အားငယ်သော နိုင်ငံကိုသော်လည်းကောင်း၊ လူများစုလူမျိုးကြီး သူများကလူနည်းစုလူမျိုးငယ်များကိုသော်လည်းကောင်း၊ နေရာများလုယူခြင်း၊ အသိပညာများနှင့် အတတ်ပညာများ ပြိုင်ဆိုင်ကြခြင်းစသည်ဖြင့် တိုက်ခိုက်အနိုင်ယူကြလေသည်။ ထို့အတူပင် မျက်မှောက်ခေတ်ကာလ၏ ခေတ်ရေစီးကြောင်းအရ ဉာဏ်ပညာကြီးသူက ဉာဏ်ပညာနည်းပါးသူကိုလည်း ပညာတန်ခိုးဖြင့် သော်လည်းကောင်း၊ နည်းပညာဖွံ့ဖြိုးတိုးတက်သူက နည်းပညာဖွံ့ဖြိုးမှု အားနည်းသူကို နိုင်ငံရေးနည်းလမ်းဖြင့်သော်လည်းကောင်း၊ စစ်ရေးနည်းလမ်းဖြင့်သော်လည်းကောင်း ထပ်မံအနိုင်ယူပြန်လေရာ ဤသည်ကားလောကဓမ္မတာတည်း။

လူမျိုး၊ နယ်မြေဧရိယာ၊ ဒေသမပျောက်ပျက်အောင် လူမျိုးအလိုက်၊ ဒေသအလိုက်၊ နိုင်ငံအလိုက်တို့တွင် ယဉ်ကျေးမှုများမပျောက်ပျက်စေရန်နှင့် အနိုင်ကျင့်မှုမခံရစေရန် လူမျိုးတိုင်း၊ ဒေသတိုင်း၊ နိုင်ငံတိုင်းတို့က ကာကွယ်ကြသည်။ ကာကွယ်ရန်လည်းတာဝန်ရှိသည်။ မိမိကိုယ်ကို ကာကွယ်ခြင်း၊ လူမျိုးကိုကာကွယ်ခြင်း၊ ဒေသကိုကာကွယ်ခြင်းနှင့် နိုင်ငံကိုကာကွယ်ခြင်းသည် အမှန်တရားပင်ဖြစ်သည်။ မိမိကို ကာကွယ်ရန်သော်လည်းကောင်း၊ လူမျိုးကို ကာကွယ်ရန်သော်လည်းကောင်း၊ ဒေသကိုကာကွယ်ရန်သော်လည်းကောင်း၊ နိုင်ငံကိုကာကွယ်ရန်သော်လည်းကောင်း လူမျိုးအဖွဲ့အစည်းများ၊ လူမျိုးတပ်မတော်များ ပေါ်ပေါက်လာရခြင်း၏ အကြောင်းရင်းပင်ဖြစ်သည်။

အသိပညာအတတ်ပညာ၊ ဝီရိယ၊ မျိုးချစ်စိတ်၊ အချင်းချင်းစည်းလုံးညီညွတ်မှု၊ သတ္တိဗျတ္တိတို့ အားနည်းသည့်လူမျိုး၊ နိုင်ငံများသည် ကျွန်ဘဝနှင့် အနိုင်ကျင့်မှုခံရသည့်အပြင် ကမ္ဘာ့အလယ်တွင် မျက်နှာငယ်ရသည်။ မိမိတို့သည် လူချင်းအတူတူဖြစ်သော်လည်း နေထိုင်ခြင်း၊ စဉ်းစားတွေးခေါ်ခြင်း၊ အလုပ်လုပ်ခြင်း၊ ကြိုးစားအားထုတ်ခြင်းနည်းပါးပါက နေရာ၊ ဒေသ၊ နိုင်ငံမရှိသည့် လူမျိုးဖြစ်ကြရသည် သာမက လူမျိုး၏ ယဉ်ကျေးမှု၊ ဓလေ့ထုံးတမ်း၊ ဘာသာ၊ သာသနာနှင့် လူမျိုးပါပျောက်ကွယ်သွားနိုင်ပါသည်။

လူသားတို့သည် ဗီဇနိယာမအတိုင်း မွေးဖွားကတည်းက လူ့အခွင့်အရေးကို ကမ္ဘာပေါ်ရှိလူသားအားလုံး ညီတူညီမျှခံစားခွင့်ရှိသော်ငြားလည်း အခွင့်အရေးကိုသိသူ၊ ကြိုးစားမှုအားကောင်းသူ၊ အခွင့်အရေးကို အမိအရယူတတ်သူမှသာ အခွင့်အရေးကို ထိုက်ထိုက်တန်တန်ရရှိခံစားကြရသည်။ မိမိသည်လည်း မိမိတို့လူမျိုးအတွက် ရရှိသင့်သည့်အခွင့်အရေးများ ရရှိစေရန် ကြိုးစားအားထုတ်မှု၊ ရယူပေးတတ်မှု၊ အဆိုပါအခွင့်အရေးများကို ရရှိအောင် ဝီရိယစိုက်ထုတ်မှုမရှိသည့်အပြင် မိမိတို့လူမျိုးအတွက်လည်း တတ်နိုင်သည့်ဘက်မှ ဆောင်ရွက်ပေးရန်မသိလျှင် ဆန်ကုန်မြေလေးတစ်ယောက်ကဲ့သို့သာကြီးပြင်းလာပြီး လူဖြစ်ရကျိုးမနပ်ဘဲ ဘဝရှုံးနေသူသာဖြစ်ရလိမ့်မည်။

ထို့ကြောင့် လူဖြစ်ရာတွင် ဘဝရှုံးနေသူမဖြစ်ရလေအောင် မိမိတို့လူမျိုး၊ ယဉ်ကျေးမှု၊ ဘာသာ၊ သာသနာ၊ ဒေသဖွံ့ဖြိုးတိုးတက်ခိုင်မာစေရန် ဆောင်ရွက်ရမည့်တာဝန်ကိုယ်စီရှိရလေသည်။ လူမျိုးရပ်တည်မှု တည်မြဲရန်နှင့် လုံခြုံမှုများရှိစေရန်အတွက် -

(၁) မိမိတို့ပအိုဝ်းလူမျိုးတို့၏ ကျေးရွာ၊ ကျေးရွာအုပ်စု၊ မြို့နယ်များအပြင် တစ်မျိုးသားလုံး အန္တရာယ်ကျရောက်လာပါက ဥမကွဲသိုက်မပျက်ဘဲ စည်းလုံးညီညွတ်စွာဖြင့် မိမိတို့၏ လက်ရုံးရည်စွမ်းအား၊ နှလုံးရည်စွမ်းအားနှင့် အသိပညာစွမ်းအားများဖြင့် ပြန်လည် ခုခံကာကွယ်ရမည်။
(၂) မိမိတို့ပအိုဝ်း လူမျိုးအချင်းချင်း၏ စည်းလုံးညီညွတ်မှု၊ ချစ်ခင်မှုများအပြင် တစ်ဦးတစ်ယောက်၏ အခက်အခဲများရှိလာပါက မိမိတို့တစ်မျိုးသားလုံး၏ အခက်အခဲများ အဖြစ်ခံယူကာ မိမိသည်လည်း ပအိုဝ်းလူမျိုးတစ်ဦးဖြစ်သောကြောင့် တစ်ကိုယ်ကောင်းဆန်စွာ ခွဲမထွက်ဘဲ ဝိုင်းဝန်းကူညီဖြေရှင်းရမည်။
(၃) မိမိကိုယ်မိမိနှင့် မိမိတို့ပအိုဝ်းလူမျိုးကို မိမိချစ်သကဲ့သို့ အခြားညီနောင်တိုင်းရင်းသားကိုလည်း ချစ်ခင်လေးစားရမည့်အပြင် ၎င်းတို့နှင့် ချစ်ခင်ရင်းနှီးမှုရရှိစေရန် မိတ်ဆွေကောင်းများဖွဲ့ရမည်။
(၄) မိမိတို့လူမျိုး၊ ယဉ်ကျေးမှု၊ ဘာသာ၊ သာသနာ၊ ဒေသဖွံ့ဖြိုးတိုးတက်ခိုင်မာစေရန် အတွက် ကာယဗလ(ကိုယ်အား)၊ ဉာဏဗလ(ဉာဏ်အား)၊ ဘောဂဗလ(ပစ္စည်းဥစ္စာအား)၊ စာရိတ္တဗလ(ကိုယ်ကျင့်တရားအား)နှင့် မိတ္တဗလ(သူငယ်ချင်းမိတ်ဆွေကောင်းများ၏အား) စသော ဗလ(၅)တန်၏အားနှင့် အစစအရာရာပြည့်စုံလျှင် မိမိတို့ ပအိုဝ်းလူမျိုး၏ ယဉ်ကျေးမှု၊ ဘာသာ၊ သာသနာ၊ ဒေသဖွံ့ဖြိုးတိုးတက်ခိုင်မာမှုသည် အဓွန့်ရှည်တည်တံ့မည်ကား မြေကြီးလက်ခတ်မလွဲပေ။ 

ထို့အတူ အထက်ပါ အချက်များကို အခြေခံ၍ ယနေ့လက်ရှိ ခေတ်အဆက်ဆက်က ဗလ(၅)တန်ဖြင့် ပြီးပြည့်စုံပြီးဖြစ်သော ပအိုဝ်းလူမျိုးတို့၏ဘိုးဘွားများနှင့် ယနေ့ခေတ် ဗလ(၅)တန်ဖြင့် ပြီးပြည့်စုံပြီးဖြစ်သော ပအိုဝ်းလူမျိုးတို့၏ ခေတ်ပညာတတ်လူငယ်တို့ ပူးပေါင်းမှုစွမ်းအားဖြင့် ပအိုဝ်းလူမျိုးတို့ အနာဂါတ်ကို ပူးပေါင်းထုဆစ် ပုံဖော်မည်ဆိုပါက ခရီးမဝေးတော့ပေပြီ။

မည်သည့်အလုပ်များကိုမဆို “ငါ”မပါလျှင် ပြီးစီးအောင် မဆောင်ရွက်နိုင်သကဲ့သို့  “သူ”မပါ ပြန်လျှင်လည်း ဘယ်အရာမှ မပြီးပြန်ပေ။ ထို့အတူပင် “ငါနှင့်သူ” မက “မင်း”တစ်ယောက်မပါပြန်လျှင်လည်း မည်သည့်အရာမှ မပြီးစီးပြန်ဖြစ်တတ်လေ၏။ မိမိတို့တွင်ပိုင်ဆိုင်သည့်အသိပညာ၊ အတတ်ပညာများကို အခြားသူများနှင့်ပူးပေါင်း၍ မိမိတို့ပအိုဝ်းလူမျိုးအတွက် “မင်း၊ သူ၊ ငါ” ဟူသော ထောင့်ပေါင်းစုံမှ ဗလ(၅)တန်ဖြင့် တတ်နိုင်သည့်ဘက်တွင် တတ်အားသမျှ ကူညီဖြည့်ဆည်း ဆောင်ရွက်ပေးမည်ဆိုပါက အချိန်တိုအတွင်းတွင် မိမိတို့လူမျိုးသည်လည်း လူပုံအလယ်တွင် တင့်တောင့်တင့်တယ်ဝင့်ထည်စွာ မြင်တွေ့နိုင်မည်မှာ မုချဧကန်ပင်။

မိမိပအိုဝ်းလူမျိုးတိုင်းသည်လည်း မိမိတို့တွင် ပိုင်ဆိုင်သည့်လက်(၅)ချောင်းကဲ့သို့ သူ့နေရာနှင့် သူအသုံးတည့်သကဲ့သို့ လူတို့သည်လည်း သူ့နေရာနှင့်သူ အသုံးတည့်ကြလေကုန်သည်။ ထို့ကြောင့် မိမိတို့ဘိုးဘွားများနှင့်ခေတ်ပညာတတ်လူငယ်တို့မှ စည်းလုံးညီညွတ်စွာဖြင့် “တတ်သည့် ပညာ မနေသာ” ဆိုသကဲ့သို့ နှစ်ရှည်လများ မိမိရင်ထဲတွင်ရှိပြီးသော အသိပညာ၊ အတတ်ပညာများကို  မိမိတို့လူမျိုးအတွက် အကျိုးရှိစေမည့် အခန်းကဏ္ဍတွင် တတ်နိုင်သည့်ဘက်မှ အစွန်းရောက်သည့် နူတ်ဖြင့်ဝေဖန်ရေးသားခြင်းမပြုဘဲ အပြုသဘောဆောင်သည့် ပါဝင်အကြံပြုခြင်း၊ ဖြန့်ဝေခြင်း၊ ပူးပေါင်းပါဝင်ရောက်လုပ်ကိုင်ဆောင်ရွက်ပေးခြင်းစသည့် ပအိုဝ်းလူမျိုးတို့၏ သမိုင်းပေးတာဝန်များကို စွမ်းစွမ်းတမံ အားထုတ်ကြိုးပမ်းဆောင်ရွက်စေလိုပါသည်။ ထိုကဲ့သို့ မိမိတို့တွင်ရှိသော အသိပညာ၊ အတတ်ပညာတို့ဖြင့် ဘက်ပေါင်းစုံတွင် ခေတ်ပညာတတ်လူငယ်တို့၏ အင်အားအပြည့်ဖြင့် ပြိုင်တူတွန်းမည်ဆိုပါက မိမိပအိုဝ်းလူမျိုးတို့၏ အနာဂါတ်ရည်မှန်းချက် ပန်းတိုင်ဆီသို့  မြန်မြန်ဆန်ဆန် ရောက်ရှိနိုင်စေမည်သာမက ပအိုဝ်းလူမျိုးတို့၏ မျှော်လင့်တောင့်တနေသည့် အနာဂါတ် ရွှေပြည်တော်ကား မျှော်တိုင်းဝေးတော့မည်မဟုတ်ကြောင်းနှင့် ပအိုဝ်းလူမျိုးတို့၏ အရေးအရာမှန်သမျှကို “မင်း၊ သူ၊ ငါ”တို့ စုပေါင်းအားဖြင့် အားတက်သရောပူးပေါင်းပါဝင်ကာ ပြိုင်တူတွန်းကြရန် အချိန်တန်ပြီ ဖြစ်ကြောင်း ကဗျာဖြင့် ရွှေပအိုဝ်းတို့ကို တိုက်တွန်းရေးသားတင်ပြလိုက်ရပါသည်။ 
ပြုကြစုစည်း
=========
ငါမပါ ဘယ်ဟာမှမပြီး
ငါချည်းသော်လည်း ဘယ်ဟာမှမပြီး
သူမပါ ဘယ်ဟာမှမပြီး
သူချည်းသော်လည်း ဘယ်ဟာမှမပြီး
မင်းမပါ ဘယ်ဟာမျှမပြီး
မင်းချည်းသော်လည်း ဘယ်ဟာမှမပြီး
မင်း၊ သူ၊ ငါ ညီညာစုံမှ အလုံးစုံအကုန်ပြီး
ပြုကြစုစည်း။

ခွန်ယွေးယဲင်
(ခမ်းစန္တာ;ဟေ့,)
Powered by Blogger.