ပအိုဝ်းတိုင်းရင်းသား လူမျိုးများသည် များသောအားဖြင့် ဗုဒ္ဓဘာသာကို သက်ဝင်ယုံကြည်သော လူမျိုးတစ်မျိုးဖြစ်သည်။ ၀ါတွင်းသုံးလတွင် ဥပုသ်သီလကိုဆောက်တည်ခြင်း၊ ၀ါပကာလတွင် ရှင်ပြုပွဲ၊ ရဟန်းခံပွဲ များကိုကျင်းပခြင်း၊ ဒါနအောင်ပွဲ၊ သီလအောင်ပွဲ၊ တရားပွဲများကို ၁၂-ရာသီလိုလိုပြုလုပ်ကျင်းပနေသည်မှာ ရိုးရာယဉ်ကျေးမှုပွဲတော်များဖြစ်လေတော့သည်။
လောကအကျိုးကိုဆောင်ခြင်း၊ လူသားတို့ကောင်းကျိုးများကို ရှေးရှုခြင်း၊ မိမိအကျိုး၊ ဆွေမျိုးအကျိုး၊ လောကအကျိုးကိုလုပ်ကိုင်ခြင်း၊ အပြစ်မရှိသောအလုပ်များကို ကြိုးစားပွားများခြင်းစသည့်လုပ်ငန်းများသည် မင်္ဂလာရှိသောလုပ်ငန်းပင်ဖြစ်သည်၊တနည်းဆိုရသော် ပရဟိတလုပ်ငန်းဟုခေါ်ဆိုရမည်ဖြစ်သည်။
ဗုဒ္ဓဘာသာ၏ အနက်အဓိပ္ပါယ်ကို လူတိုင်းသိရှိနိုင်ရန် အကျဉ်းချုပ်တင်ပြရေးသားရလျှင် ဗုဒ္ဓဆိုသည်မှာ- သတ္တလောက၊ သင်္ခါရလောက၊ သြကာသလောက လောကသုံးပါးကို သိမြင်တော်မူသော မြတ်စွာဘုရား၊ လူနတ်ဗြဟ္မာသတ္တ၀ါတို့၏ဆရာ သခင်ဖြစ်တော်မူသော မြတ်စွာဘုရားဟု အဓိပ္ပါယ်ရှိပြီး၊ ဘာသာဆိုသည်မှာ- စကားဖြစ်ပါသည်။
တစ်နည်းဆိုရသော် ဗုဒ္ဓဘာသာဆိုသည်မှာ ≈ မြတ်စွာဘုရားအဆုံးအမစကားတော်ကို လိုက်နာသူ၊ မြတ်စွာဘုရား အဆုံးအမစကားကို သက်ဝင်ယုံကြည်သူ၊ မြတ်စွာဘုရားဟောကြားတော်မူသည့်အတိုင်း လိုက်နာကျင့်သုံးသူ၊ မြတ်စွာဘုရားသာသနာတော် ရေရှည်တည်တံ့အောင် ကျိုးစားအားထုတ်သူဟု အဓိပ္ပါယ် ရရှိပါသည်။
မြတ်စွာဘုရားသည် ကမ္ဘာတို့၏ ကုဋေတို့ဖြင့်လည်း မရေတွက်အပ် မရေတွက်နိုင်ကုန်သော ကာလတို့ပတ်လုံး အလွန်ဆင်းရဲသဖြင့် ပြုအပ်လှစွာသော စွန့်ခြင်းကြီးငါးပါး၊ ပါးရမီဆယ်ပါး၊ အပြားသုံးဆယ် အစရှိသော ကောင်းမှုတို့ကို ပြုကျင့်တော်မူပြီး ရရှိလာသည့် သဗ္ဗေညုတရွှေဥာဏ်တော်ဖြင့် လူနတ် ဗြဟ္မာသတ္တ၀ါတို့၏ အကျိုးစီးပွားအလို့ငှာ ဟောကြားတော်မူသောတရား မိန့်ကြားတော်မူသောစကားတော်သည် မြတ်စွာဘုရားစကား(တနည်း ဗုဒ္ဓဘာသာ)ဘာသာဖြစ်သည်။
`မည်သည့်ဘာသာဝင်ဖြစ်စေ အလွန်ဆုံးသုံးဆယ်ရှစ်ဖြာ မင်္ဂလာတရားတော်ကို လိုက်နာကျင့်သုံးပါက လူ့အခွင့်အရေးများ လူ့လောကကျင့်ဝတ်များကို အကောင်အထည်ဖော်ပြီးဖြစ်သကဲ့သို့ လက်ရှိဘ၀တွင် ကိုယ်စိတ်နှစ်ဖြာချမ်းသာပြီး တမလွန်ဘ၀တွင် လူနတ်ချမ်းသာအကျိုးစီးပွားများကိုလည်း ရရှိမည်ဖြစ်သည်။
ဘုရားရှင်ဟောကြားတော်မူအပ်သော တရားတော်များသည် ကြံစည်တွေးတောခြင်း၊ စိတ်ကူး ယဉ်ဆန်ခြင်း၊ တစ်ဆင့်စကားတစ်ဆင့်ကြားခြင်း၊ အစဉ်အလာဖြစ်ခြင်းတို့ကြောင်း ဟောကြားထားသည့် တရား တော်များမဟုတ်ပဲ လေးသင်္ချေနှင့်ကမ္ဘာတစ်သိန်းကာလပတ်လုံး လောကကောင်းကျိုးများကို ဆောင်ရွက်ရုံ မကပဲ နောက်ဆုံးဘ၀တွင် ဘုရားအလောင်းတော် သိဒ္ဓတ္ထမင်းသားသည် ခြောက်နှစ်ပတ်လုံး ဒုက္ကရစရိယာ အကျင့်ကို အရိုးကြေကြေ အရေခန်းခန်း ကျင့်ကြံကြိုးကုတ်အားထုတ်ပြီးလျှင် သဗ္ဗေညုတရွှေဥာဏ်တော်ဖြင့် လောကသုံးပါးတွင် ရှိနေပြီးသား သဘာဝတရားများကို ထုတ်ဖော်ဟောကြားထားသော တရားတော်များ ဖြစ်ပါသည်။
ဤကားအပါယ်လေးပါးလားရာလမ်း၊ ဤကားလူနတ်ဗြဟ္မာပြည်သို့သွားရာလမ်း၊ ဤကားမဂ်ဖိုလ်နိဗ္ဗာန် သွားရာလမ်းဟူ၍ အတိအလင်းလမ်းပြပေးခဲ့ပါသည်။ လူနတ်ဗြဟ္မာသတ္တ၀ါတို့၏ ဆရာသခင်ဘုရားရှင် ဟောကြားတော်မူသော နိကယ်ငါးရပ်၊ ပိဋကတ်သုံးပုံ၊ ဓမ္မက္ခန္ဓာပေါင်းရှစ်သောင်းလေးထောင် တည်းဟူသော တရားတော်များသည် ယနေ့ထိတိုင် လူသားတို့အတွက် အဖိုးမဖြတ်နိုင်သော အနန္တတရားတော်များဖြစ်ပါသည်။
မြတ်စွာဘုရားတရားတော်များသည် လူတစ်ဦးချင်းစီ ကျင့်သုံးပါက တစ်ဦးချင်း၏ကောင်းကျိုး၊ တစ်အိမ်ကျင့် သုံးပါက တစ်အိမ်၏ကောင်းကျိုးကို ပေးစွမ်းနိုင်သော တရားတော်များဖြစ်၍ ဘုရားရှင်၏ မူလဒါယကာဖြစ်သော ပအိုဝ်းတိုင်းရင်းသားများသည် ၀ါတွင်းဝါပအချိန်ကာလအားလျော်စွာ မိမိတို့တတ်စွမ်းသမျှ ကုသိုလ်ပြုကြ လေသည်။ အလှူပွဲဖြင့်သာ ဘ၀ကိုကုန်ဆုံးကြသည်မှာ ရိုးရာတစ်ခုပင်ဖြစ်ပါတော့သည်။
ကုသိုလ်ကံကောင်းကြသူများသည် ဘုရားရှင်သာသနာနှင့် တွေ့ရပြီး ကုသိုလ်ထူးများကို ရရှိကြသည်။ ကုသိုလ်ကံညံ့သူတို့သည် သာသနာတွေ့ကြုံပါလျှက် မျက်နှာလွှဲကြသည်။ ကုသိုလ်ကံအလွန်ညံ့သူတို့သည် သာသနာပကာလတွင်လူဖြစ်ကြသူများဖြစ်ပါသည်။
သက်တော်ထင်ရှား ဘုရားရှင်ကိုလည်းကောင်း၊ ပရိနိဗ္ဗန်စံတော်မူပြီးသော ဘုရားရှင်ဖြစ်စေ၊ တူသော စေတနာ သဒ္ဓါတရားတို့ဖြင့် ကိုးကွယ်ပါက တူသောအကျိုးကိုပေးသည် ဆိုသည့်တရားတော်အတိုင်း မိမိတို့ဗုဒ္ဓ၀င်များသည် သတင်းသီလဥပုသ်ဆောက်တည်ခြင်း၊ ဒါနပြုခြင်း၊ တရားဘာဝနာအားထုတ်ခြင်း၊ စသည့်ကောင်းမှုကုသိုလ်လုပ်ငန်းများကို ဆထက်သပိုးတိုးပွားပြုလုပ်နိုင်ရန်အလို့ငှါ ဤဆောင်းပါးဖြင့် ရေးသား အသိပေး တင်ပြလိုက်ရပါသည်။ ဗုဒ္ဓမြတ်စွာသာသနာ နေလိုလလိုအဓွန့်ရှည်စွာတည်စေသောဝ်။
ခွန်ထွန်းလွင်
Like On Facebook
Follow On Twitter
Subscribe On RSS