တိုင်းပြည်ပြုပြင်ပြောင်းလဲရေးနှင့်ဖွံ့ဖြိုးတိုးတက်ရေးအတွက် ပြည်သူများက တောင်ပြိုကမ်းပြို မဲပေးခဲ့သော်လည်း မျှော်လင့်သည့်အတိုင်း ယခုထိ ဖြစ်မလာခဲ့ပါ၊ ငြိမ်းချမ်းရေး၊ စီးပွားရေး၊ ဖွဲ့စည်းပုံပြင်ဆင်ရေးတို့က ထင်ထားသလောက် မျှော်မှန်းထားသလောက် ဘာမှရေရေရာရာဖြစ်မလာခဲ့၊ (၅)နှစ်သက်တမ်းလည်း ပြည့်တော့မည်။ လက်ကျန်ကာလမှာတော့ ၂၀၂၀ အတွက်ပဲ ပြင်ဆင်ကြဖို့ပဲ ကျန်လိမ့်မည်။
မြန်မာနိုင်ငံ လူဦးရေ ၇၀%ရာခိုင်နုန်းခန့်က ကျေးလက်နေပြည်သူလူထုဖြစ်သည့်အတွက် စိုက်ပျိုးရေးကိုပဲ အဓိက လုပ်ကိုင်ကြရာစိုက်ပျိုးသီးနှံများ ဈေးကွက်မကောင်းပါက ကျေးလက်နေပြည်သူများအနေဖြင့် မိမိမိသားစုဘ၀ စားဝတ်နေရေး အဆင်ပြေစွာရပ်တည်နိုင်ဖို့ ခက်ခဲမည်ဖြစ်သည်။ ၄င်းအခက်အခဲကို ထွက်ပေါက်အဖြစ် နိုင်ငံရပ်ခြားသို့ ထွက်ခွာကာ အလုပ်လုပ်ကိုင်ကြသူများ တစ်နေ့တစ်ခြား ပိုမိုများပြားလာသည်။ တစ်ချို့ကျေးရွာများရှိ လူငယ် လူရွယ်များ အစုလိုက်အပုံလိုက် ထိုင်း၊ မလေးရှား၊ စင်္ကာပူစသည့် နိုင်ငံများကို သွားရောက်ပြီး အလုပ်လုပ်ကိုင်ကြသည်။ တိုင်းပြည် သားကောင်း သမီးကောင်းရတနာများက မိမိဒေသ၊ မိမိတိုင်းပြည်ကောင်းကျိုးများအတွက် အားသွန်ခွန်စိုက် လုပ်ကိုင်နိုင်သည့်အရွယ်တွင် တခြားတိုင်းပြည်များသို့ သွားရောက်ပြီး နေထိုင်ရှင်သန်ရသည်မှာ မဖြစ်သင့်သော ကိစ္စပင်ဖြစ်သည်။ မိမိစွမ်းအားကို အပြည့်အ၀ အသုံးချသင့်သည့်အရွယ်မှာ အသုံးချခွင့်မရသည်က တိုင်းပြည်အတွက် အင်မတန်မှ ဆုံးရှုံးမှုကြီးမားပေသည်။
အစိုးရအနေဖြင့် မြို့ကြီးပြကြီးများတွင် မလိုအပ်သေးသည့် စီမံကိန်းကြီးများ လုပ်ဆောင်နေတာထက် ကျေးလက်နေပြည်သူလူထုအတွက် မဖြစ်မနေလိုအပ်သည့် လမ်း၊ တံတား စသည့် ဖွံ့ဖြိုးရေးကိစ္စရပ်များကို ပိုမိုလုပ်ဆောင်သင့်သည်။ ကျေးလက်နေ ပြည်သူများ တိုးတက်ဖွံ့ဖြိုးမှသာ တိုင်းပြည်ဖွံ့ဖြိုး တိုးတက်မည်ဖြစ်သည်။ အစိုးရအနေဖြင့် စီးပွားရေးမူဝါဒများကို ပြန်လည်ပြင်ဆင်သင့်လျှင် ပြင်ရမည်ဖြစ်သည်။ ပြည်သူများအနေဖြင့် စားဝတ်နေရေး အဆင်ပြေပါက မိမိတိုင်းပြည်ဖွံ့ဖြိုးတိုးတက်ရေးလုပ်ငန်းများတွင် အားတက်တရော ပါဝင်လုပ်ဆောင်ကြမည်။ စီးပွားရေးအဆင်မပြေပါက မိမိတို့မိသားစုဘ၀ ရပ်တည်ရှင်သန်ရေးအတွက်သာ ရုန်းကန်လုပ်ရှားနေရပေမည်။
ငြိမ်းချမ်းရေးကိစ္စရပ်များတွင် ဖြေးဖြေးပုံမှန် လုပ်ဆောင်လို့ ရသော်လည်း စီးပွားရေးကိစ္စရပ်များတွင်မူ ငြိမ်းချမ်းရေးကိစ္စရပ်များနှင့်မတူပေ၊ နေ့စဉ် ပြည်သူများ၏ အဓိကအခက်အခဲ ပြဿ နာမှာ စားဝတ်နေရေးပင်ဖြစ်သည်။ စားဝတ်နေရေး ပြဿ နာကို အလုပ်အကိုင်အခွင့်အလှမ်းဖြင့်သာ ဖြေရှင်းရပေမည်။ ကျေးလက်နေ ပြည်သူများ စိုက်ပျိုးသည့် ပြောင်း၊ စပါး စသည့် သီးနှံထွက်ကုန်များ ရသင့်သည့် ဈေးနုန်းဖြင့် တင်ပို့ရောင်းချနိုင်အောင် အစိုးရအနေဖြင့် စီမံချက်တစ်ရပ်ချမှတ်ကာ စီစဉ်ပေးသင့်ပါသည်။ တောင်သူများဘ၀မှာ ဒုံရင်း ဒုံရင်းဖြင့် မထူးခြားနားပါက တာဝန်မကျေသည့် အစိုးရတစ်ရပ် ဖြစ်သွားပါလိမ့်မည်။
နိုင်ငံတကာက ပညာရှင်ပေါင်းများစွာကို ခန့်ထားပြီး လုပ်ဆောင်နေသော်လည်း တိုင်းပြည်အတွက်ဘာမှ ရေရေရာရာ ပြောပလောက်သည့် စွမ်းဆောင်မှုမျိုးလည်း ခုထိအဘယ့်ကြောင့် မတွေ့ရသေးသနည်း။ အဖြေရှာဖို့ လိုအပ်နေပြီဖြစ်သည်။ နိုင်ငံတော်အကြီးအကဲများက လူရှေ့သူရှေ့တွင် နိုင်ငံ့စီးပွားရေးက တိုးတက်ဖြစ်ထွန်း ကောင်းမွန်လာပါသည်ဟု ဘယ်လောက်ပင်ပြောသော်လည်း တကယ့်လက်တွေ့ ပြည်သူများ၏ စီးပွားရေးအခြေအနေမှာ အရင်ကထက် ပိုမိုဆိုးဝါးလာနေသည်ကို တွေ့ရှိနေရပါသည်။
တောင်သူများ၏ အားထားရာမှာ ၄င်းတို့မြေယာ တောတောင်ဖြစ်ပြီး ၄င်းတို့စိုက်ပျိုးထားသည့် သီးနှံများ ဈေးမကောင်းပါက ဘာကိုသွားအားထားရပါမည်နည်း၊ လက်ရှိအစိုးရအနေဖြင့် လူအထင်ကြီးရာ စီးမံကိန်းကြီးများကိုသာ လုပ်ဆောင်ချင်နေသော်လည်း တကယ့်လက်တွေ့ ပြည်သူတို့၏ အခက်အခဲများကို ဖြေရှင်းနေချင်ပုံမရပါ။
မြန်မာ့သားကောင်း သမီးကောင်းများက ထွက်ပေါက်အဖြစ် အနီးစပ်ဆုံး ထိုင်းနိုင်ငံသို့ တရားဝင်၊ တရားမ၀င် ဖြစ်သည့်နည်းနှင့် ထွက်ခွာကြပြီး မျက်နှာငယ်စွာ အလုပ်လုပ်ကြရတာကို များစွာ စိတ်မကောင်းဖြစ်မိသည်။ “ သခင်မျိုးဟေ့ တို့မြန်မာ “ ဘယ်လောက်ပင် ကြွေးကြော်နေ၊ တကယ့်လက်တွေ့မှာက ဆီနဲ့ ရေလို ဖြစ်နေပါသည်။
မြန်မာ၏ ထွက်ကုန် (၇၀) ရာခိုင်နုန်းခန့်က တရုတ်ကိုပဲ တင်ပို့ရောင်းချနေရသည့်အတွက် ဈေးကွက်သည် တရုတ်အပေါ်တွင် မူတည်နေခြင်းက ကောင်းသည့်အလားအလာမဟုတ်ပါ။ ကိုယ့်ဒေသထွက်ကုန်များကို value added ထုတ်လုပ်နိုင်အောင် ကြိုးစားပြီး တခြားနိုင်ငံများသို့ တင်ပို့ရောင်းချနိုင်အောင် အစိုးရအနေဖြင့် စီမံချက်အသေအချာချမှတ်ကာ လုပ်ဆောင်သင့်ပေသည်။ ပေါက်ဖေါ်ကြီးကိုပဲ အားကိုးနေပါက ပြည်သူများ၏ ဘ၀မှာ ရေဘ၀ဲလို တ၀ဲဝဲ တလည်လည် ဖြစ်နေရှာမည်ကို ဗေဒင်မေးစရာမလိုပဲ အားလုံးသိနေပြီဖြစ်သည်။
မြန်မာပြည်သူပြည်သားများအနေဖြင့်လည်း ကိုယ့်နိုင်ငံထုတ်ကုန်များကို အားပေးဖို့လိုသလို အစိုးရအနေဖြင့်လည်း ပြည်တွင်းသို့ တရားမ၀င် ၀င်ရောက်လာသည့် ကြက်သွန်ဖြူ၊ အာလူးစသည့် ကုန်များကိုလည်း ပိတ်ပင်တားဆီးဖို့ လိုပါသည်။ မည်သူကိုမှ ငဲ့ကွက်ဖို့ မလိုပါ၊ အဓိက မိမိပြည်သူများ အဆင်ပြေနေဖို့လိုပါသည်။
တောင်သူများ၏ ဘ၀ကို အစိုးရအနေဖြင့် လှည့်ကြည့်ပေးဖို့လည်း အချိန်တန်ပြီဖြစ်သည်။ စတိတ်စင်ပေါ်တွင် မျက်စိမှိတ်ပြီး ဘယ်လောက်ပင် ပြောကောင်းနေပါစေ၊ စင်အောက်က ပရိသတ်ရှိ/မရှိ ပြန်လှည့်ကြည့်ဖို့ လိုအပ်နေပြီဆိုသည်ကို အစိုးရအနေဖြင့် သိသင့်ပြီဆိုသည့်အကြောင်း အသိပေးရေးသားလိုက်ရပါပေသည်။
ခွန်ဓဇ
Like On Facebook
Follow On Twitter
Subscribe On RSS