တောင်ႏကီꩻ၊ လာအောက်တိုဘာ (၄) နီꩻ
နေင်ႏ ၂၀၂၀ ဗာႏ၊ လာအောက်တိုဘာ (၄)နီꩻနဝ်ꩻ ပထမတောႏလန်ႏရေꩻကို ကပါဒါႏ ဖြားတန်နောင်တဗင် (ဟဲ့ꩻ) ဖြားတန်ကျောင်ꩻဝါရ ကလွူးဖွာꩻဒါႏ နောင်တဗင်ဒုံအကို ဝေင်ꩻနယ်ႏရောက်ꩻစောက်ꩻ ဗဟိုႏအောင်ႏနွောင်ႏရေꩻတာႏဝွန်ႏခံႏ ဖြားတန်ခွန်လာ၊ ပအိုဝ်ႏစွိုးခွိုꩻအစွိုꩻ(PNO) မဲအောင်ႏနွောင်ꩻရေꩻအစွိုꩻ မော့ꩻခွဲးလွေꩻတွမ်ႏ ခမ်းသားမွိုးဖါ နဝ်ꩻသွူ။
ဖြားတန်နောင်တဗင်(ဟဲ့ꩻ) ဖြားတန်ကျောင်ꩻဝါရ(ဟဲ့ꩻ) ဖြားကျော်စန်း လမ်းသားမူနဝ်ꩻ မဉ်ꩻနင်ႏမန်သာꩻ၊ ပိုအဝ်ႏငတ်ꩻဖြာꩻ အခိုဝင်ꩻသွံ၊ အမူႏဝင်ꩻနီသွူ၊ ဒုံကောင်ပြုဲင်ကို ကအောဝ်ႏအုံႏဒါႏ ဖြားမော်သုနေထာႏနောဝ်ꩻ ထွာဒျာႏ ဖြားတန်ကျောင်ꩻဝါရ စာရေꩻ လိတ်တဲမ်းသား နုဲင်းနဝ်ꩻသွူ။ သမဲင်ꩻအမန်ႏနဝ်ꩻ ဖြားတန်ကောင်ပြဲင်မွေးတဝ်း ဟဲ့ဗာႏဒါႏ ဖြားတန်နောင်တဗင် အကျောင်ꩻ ကထွာဒါ ဖြားတန်နောင်တဗင် ပိုလီꩻဖုံႏ ခြုဲင်းနယ်ႏမုꩻအလꩻ သေထွꩻဗာႏနဝ်ꩻသွူ။ ဖြားတန်ကျောင်ꩻဝါရ နောဝ်ꩻ အုံဗာႏဖိုတဝ်း ဒုံကောင်ပြဲင်တဲင် ဒုံကောင်ပြုဲင်ကို ကအောဝ်ႏအုံဒါႏ ဖြားမော်သုနေထာႏနောဝ်ꩻ ထွာဒျာႏဖြားတန်ကျောင်ꩻဝါရ(ဒုံနောင်တဗင်) လိတ်တဲမ်းသားတဲင် ဖြားတန်ကျောင်ꩻဝါရ ထွဉ်ႏဟွိုန်အတွိုင်ꩻ ဖြားမော်သုနေထာႏယို မာꩻလွေꩻ ခွုမ်စံႏဗာႏဒျာႏထာꩻမာꩻသွူ။ သမဲင်ꩻအလꩻ ထွာဒျာႏ ဖြားတန်နောင်တဗင် (ဟဲ့ꩻ) ဖြားတန်ကျောင်ꩻဝါရ အကျောင်ꩻ ဖြားတန်ပိုလီဖုံႏ ခြုဲင်းနယ်ႏချက်အလꩻ တဲမ်းနယ်ႏဖေႏဗာႏ ခမ်းသားမွိုးဖါသွူ။
ထဲင်းယင်း သမဲင်ꩻအအဲဉ်ႏတဗာႏနောဝ်ꩻ နေင်ႏ ၁၉၇၅-၁၉၇၆ ယံတွင်ꩻ ကျောက်ဂူ၊ အင်တော၊ ကျိုင်းခမ်း၊ မိုင်းပြင်း၊ ဟံႏဖြေင်း နောင်တဗင် ဟံႏနယ်ႏအကို မန်းခမ်းကွန်မြူနစ်ပါတီ အလယ်ပိုင်းဗျူရို ရုဲင်ꩻတသွိုးလွေꩻ သေထွꩻဗာႏနုဲင်းနဝ်ꩻသွူ။ အတွင်ꩻနဝ်ꩻကာႏလ မန်းခမ်းကွန်မြူနစ် အစွိုꩻနွို့တဖြာꩻကထွာဒါႏ စဲ့ꩻပိုလ်ႏတအောင်နဝ်ꩻ မာꩻနွောင်ꩻအံႏမွေး ခမ်းသားလူထု တဆင်ႏဆင်ႏမာꩻသီ လိုꩻဒုံဖုံႏတဲင် ကထွာဒါႏ ကွန်မြူနစ် စဲ့ꩻပိုလ်ႏပေႏတဖြာꩻ ပိုလ်ႏကြုတ်နဝ်ꩻ တွိုင်ႏပင်ႏတွမ်ႏ သွꩻဟဝ်တယွေꩻ သွူတဲင် ဟံႏဖြေင်းဒုံအကို ခꩻသီလွေꩻ ကွန်မြူနစ် စဲ့ꩻပိုလ်ႏ တအောင်နုဲင်းနဝ်ꩻသွူ။ ပိုလ်ႏပေႏတကြုတ် တွမ်ႏ သွꩻဟဝ် တယွေꩻနဝ်ꩻ ထူႏသိမ်ꩻလꩻ မန်းခမ်းကွန်မြူနစ် လက်နက်စူခွုမ် ၆ဖြုံႏတဲင် ဖင်းလွေꩻထေ့ ပအိုဝ်ႏစွိုးခွိုꩻအစွိုꩻ မျင်ꩻမိုရ်ႏခမ်း ခမ်းဗွေႏဗိုလ်ႏမှူးမောင်မောင်ထျꩻတဲင် ထိန်းထံႏလွေꩻ စွိုးခွိုꩻတာႏဝွန်ႏနဝ်ꩻသွူ၊ တယ်ႏနဝ်ꩻမာꩻငါ မန်းခမ်းကွန်မြူနစ် အစွိုꩻသားဖုံႏနဝ်ꩻ ဟံႏဖြေင်း၊ နောင်တဗင်၊ မိုင်းပြင်းရပ်ရာႏအကိုယို အုံဗွိုန်ႏတဝ်းဒွုမ်တဲင် လွင်းထင်ꩻထိုꩻ ကျောက်ဂူ၊ အင်တော၊ ကျိုင်းခမ်း ရပ်ရာႏအကျောင်ꩻ သေထွꩻဗာႏသွူ။
ကဟဲ့ꩻဒါႏ စဲ့ꩻပိုလ်ႏပေႏ ပိုလ်ႏကြုတ်နဝ်ꩻ ဆုဲင်ꩻဝုဲင်ꩻ အောဝ်ႏထိန်းထံႏလွေꩻဖေႏ ပအိုဝ်ႏစွိုးခွိုꩻအစွိုꩻ အထူꩻဒေႏသ(၆) မျင်ꩻမိုရ်ႏခမ်း ဒုခမ်းဗွေႏ(ကျောက်တန်ꩻ)အကျောင်ꩻ သေထဲင်းယင်း သမဲင်ꩻနုဲင်းနဝ်ꩻသွူ။ ယိုခါ နီသွဉ်းသီး ပထမတောႏလန်ႏရေꩻကို ကပါဒါႏ ဖြားတန်နောင်တဗင်(ဟဲ့ꩻ)ဖြားတန်ကျောင်ꩻဝါရ တဲ့နောဝ်ꩻ ဗိုလ်မှူးမောင်မောင်လဲ့နောဝ်ꩻ ဖြားတန်ပိုလ်ႏကြုတ်လဲ့နောဝ်ꩻ ကသီအွဉ်ငါ ကကာအွဉ်ရီးလဲဉ်းဒါႏ သွꩻဟဝ်ပုဂ္ဂိုလ်ႏဖုံႏ လဲ့နောဝ်ꩻ ထွာဒျာႏ အာႏဇာႏနီႏပုဂ္ဂိုလ်ႏဖုံႏ လွဉ်းလွဉ်းသွူ။ ပိုလီꩻဖုံႏ ကအောဝ်ႏကုဲင်ဒါႏ ဆꩻချာယို ကမာꩻဒါႏ ဒါန၊ ကဖဒါႏ ကုသိုလ်ႏအကျိုꩻယိုနောဝ်ꩻ တောႏလင်ꩻလောင်ꩻ ၅နီအကို ကထွာဒါႏ အာႏဇာႏနီႏပုဂ္ဂိုလ်ႏဖုံႏ မန်ႏသမျ ယံလꩻလွေꩻဒျာႏကုသိုလ်ႏအကျောင်ꩻ ပအိုဝ်ႏစွိုးခွိုꩻတွမ်ႏ နဂါꩻပိုလီꩻ မျင်ႏမိုရ်ႏခမ်းသားလဲ့ꩻနောဝ်ꩻ ပါတွမ်ႏပိုလီꩻနောင်တဗင်သားဖုံႏယို ယံဖေႏကလꩻလွေꩻဒါႏ ကုသိုလ်ႏအကျိုꩻယို ဖန်ႏဖယ်(အမျှ) ဆုတောင်ꩻမောင်ꩻကော့ꩻဖေႏဒျာႏသွူ။
@Pa-O National Organization
Like On Facebook
Follow On Twitter
Subscribe On RSS