သဘာဝအဖြစ်အပျက်များသည် သူ့သဘာဝအတိုင်းဖြစ်ပျက်နေသည်မှာ မှန်သော်လည်း လူသားတို့နှင့် မူတစ်နည်းမဟုတ်တစ်နည်းဖြင့် ဆက်စပ်ပတ်သက်လျက်ရှိနေပေသည်။ ထိုသဘာဝအဖြစ်အပျက်များတွင် မိုးလေ၀သအခြေအနေသည်လည်း တစ်ခုအပါအ၀င်ဖြစ်သည်။
မွေးဖွားသည်မှသေဆုံးသည်အထိ လူသည်မိုးလေ၀သနှင့် ဆက်နွှယ်နေပေသည်။ သို့သော် ကျွန်ုပ်တို့သည်မိုးလေ၀သကို ဂရုမမူပဲမိမိသွားလိုသည်ကိုသာ သွားတတ်ကြသည်။ လုပ်လိုသည်ကိုလုပ်တတ်ကြသည်။ မိုးလေ၀သသည် ကျွန်ုပ်တို့၏ လုပ်ကိုင်နေထိုင်မှုကိစ္စများတွင် အနည်းငယ်သာ အကျုံးဝင်ပတ်သက်သည်ဟု ယူဆကြသည်။ လက်တွေ့တွင် ကျွန်ုပ်တို့ယူဆထားသည်ထက် ပို၍ မိုးလေ၀သသည်ကျွန်ုပ်တို့အပေါ် စိုးမိုးဆက်နွှယ်ပြီး ပတ်သက်နေပေသည်။
ကျွန်ုပ်တို့သည် မိုးလေ၀သအုံကြီးထဲတွင် နေထိုင်ကြခြင်းဖြစ်သည်။ လေကိုရှူရှိက်နေကြရသည်။ ငါးများရေထဲတွင် တစ်နေရာမှတစ်နေရာသို့ ကူးခတ်သွားလာကြသကဲသို့ ကျွန်ုပ်တို့သည်လည်း အခန်းတစ်ခန်းမှတစ်ခန်း၊ တစ်နေရာမှ တစ်နေရာသို့ လေပင်လယ်ကို ကူးပြီး သွားနေရခြင်း ဖြစ်သည်။
ထို့ကြောင့် ကျွန်ုပ်တို့သည် မိုးလေ၀သကို ချစ်လိုကချစ်နိုင်သည်။ မုန်းလိုကမုန်းနိုင်သည်။ စိတ်ပျက်လိုက စိတ်ပျက်နိုင်သည်။ သို့သော် လျစ်လျူရှု၍ကား မရနိုင်ပေ။ မနက်တိုင်းပင်လျှင် မိုးရွာခြင်း၊ နှင်းကျခြင်း၊ တိမ်ကင်းစင်ခြင်း၊ တိမ်ထူ၍ မိုးအုံ့နေခြင်း၊ ပူနွေးခြင်း၊ အေးခြင်း စသည့် မိုးလေ၀သအခြေအနေ တစ်ခုမဟုတ်တစ်ခု ဖြစ်ပေါ်နေမည်သာဖြစ်ပေသည်။ အပြာရောင် မိုးကောင်းကင်ရှိပြီး ကြည်လင်သာယာသောနေ့များတွင်လူအများသည်လည်း စိတ်လက်ရွှင်လန်းပေါ့ပါးတတ်ကြသည်။ ထိုနေ့အတွက် တစ်နေ့တာ လုပ်ငန်းဆောင်တာများကို ချောမောပြေပြစ်စွာ လုပ်ဆောင်နိုင်ကြမည်ဖြစ်သည်။ ပူအိုက်သည့် နွေရာသီမနက်ခင်းမျိုးတွင် လူအများသည် စိတ်တိုလွယ်ခြင်း၊ စိတ်ဓါတ်ကျလွယ်ပြီး ညိုးနွမ်းလွယ်ခြင်းတို့ ဖြစ်တတ်ကြသည်။ ထိုနေ့အတွက် တစ်နေ့တာလုပ်ငန်းကို ပင်ပန်းစွာ မလုပ်ဆောင်ရသေးမီမှာပင် မောပန်းလွယ်တတ်ကြသည်။
သို့ဖြစ်၍ လူတစ်ယောက်၏ စိတ်ပိုင်းရုပ်ပိုင်း ကျန်းမာမှုနှင့် ထိုလူ၏ဘ၀အဆင့်မြင့်မားမှု စသည်အထိပင် တနေ့တာတွင် ဖြစ်ပေါ်နေသော မိုးလေ၀သက ကြိုးကိုင်ထားသည်မှာထင်ရှားနေပေသည်။
တစ်နည်းဆိုပါက တစ်နေ့တာ မိုးလေ၀သနှင့် မိုးလေ၀သ ဖြစ်ပျက်မှုအပေါ်တွင် လူသည် အသက်ရှင်နေထိုင်ရသည်ဟု ဆိုနိုင်ပေသည်။
မိုးလေ၀သဟူသောအနက်ကို မြန်မာအဘိဓာန် အကျဉ်းချုပ် အတွဲ(၃) တွင် အပူရှိန်၊ လေ၏စိုထိုင်းဆ၊ လေ၏ဖိနှပ်မှု၊ လေတိုက်နှုန်း၊ မိုးရွာမှု၊ တိမ်၊ ဆီးနှင်း၊ ရေတက်ရေကျ၊မြေငလျင်စသော သဘာဝအခြေအနေအရပ်ရပ်ဟု ဖော်ပြထားပေသည်။ လေထုကြီး၏ အောက်ဆုံးအလွှာကမ္ဘာမြေမျက်နှာပြင်နှင့် အနီးကပ်ဆုံးအလွှာတွင်ရှိသော လေထု၏အပူချိုန်၊ လေဖိအား၊ တိုက်လေ၊ စိုထိုင်းမှု၊ မိုးရွာခြင်း၊ ဆီးနှင်းကျခြင်း စသည့်အခိုက်အတန့်အားဖြင့် ဖြစ်ပေါ်သောလေထု၏ အခြေအနေသည် မိုးလေ၀သပင်ဖြစ်သည်။ လူသားများ ကမ္ဘာကြီးပေါ်တွင် သက်တောင့်သက်သာနေနိုင်ရေးမှာ ကောင်းမွန်သော မိုးလေ၀သအခြေအနေပေါ်တွင် မူတည်နေပေသည်။ မိုးလေ၀သကောင်းမွန်ရန်မှာလည်း လူသားတို့အပေါ်တွင် မူတည်နေပေသည်။ ဤကဲ့သို့ မိုးလေ၀သနှင့် လူသားများ၏ ကိုင်းကျွန်းမှီ၊ ကျွန်းကိုင်းမှီ သဘောကို နားလည် သဘောပေါက်လာကြသည့်အခါ လူ့ပယောဂကြောင့် မိုးလေ၀သမပျက်စီးစေရန် ကမ္ဘာ့လူသားထုအနေဖြင့် ၀ိုင်းဝန်းဆန္ဒပြုလာကြသည်။ ဓာတုလောင်စာများကို အသုံးအစွဲများမှုကြောင့် မိုးလေ၀သ ဖောက်ပြန် ပျက်စီးရသည်ဟု ဆိုကာ ဓာတုလောင်စာ သုံးစွဲမှုကို လျှော့ပစ်ရန်တောင်းဆိုလာကြသည်။ ဓာတုလောင်စာများအစား အခြားလောင်စာများကို အစားထိုးသုံးစွဲရန်လည်း တိုက်တွန်းလာကြသည်။ ထိုတိုက်တွန်းချက်အရ စက်မှုသိပ်ပံပညာရှင်များသည် ဓာတုလောင်စာများအစား အခြားလောင်စာများကို အစားထိုးသုံးစွဲရန် ကြိုးပမ်းလာကြသည်။
သစ်တောပြုန်းတီးမှုကြောင့် မိုးလေ၀သဖောက်ပြန်ပျက်စီးရသည်ကို အကြောင်းပြုပြီး သစ်တောများကိုလည်း မဖြုန်းတီးရန် တောင်းဆိုလာကြသည်။ မိုးလေ၀သ ပြန်လည်ကောင်းမွန်ရန်အတွက် သစ်ပင်သစ်တောများ ပြန်လည်ပြုစုပျိုးထောင်ရန်လည်း တိုက်တွန်းလာကြသည်။ သစ်ပင်သစ်တောများကို ပြန်လည်ပြုစုပျိုးထောင်ခြင်းဖြင့် ကောင်းမွန်သောမိုးလေ၀သကို ပြန်လည်ပြုစုပျိုးထောင်ရန် ရည်ရွယ်ခြင်းဖြစ်သည်။
ယနေ့ကျွန်ုပ်တို့မြန်မာနိုင်ငံတွင် နှစ်စဉ် ဇူလိူင်လကို သစ်ပင်စိုက်ပျိုးရေးလအဖြစ် သတ်မှတ်ပြီး လူထုလှုပ်ရှားမှု တစ်ရပ်အနေဖြင့် သစ်ပင်သစ်တောများကိုပြန်လည်ပြုစုပျိုးထောင်နေပေသည်။ စီမံချက်ဖြင့်သစ်ပင်များကို စိုက်ပျိုးနေပေသည်။ ကောင်းမွန်သော မိုးလေ၀သပြုစုပျိုးထောင်ရေး လှုပ်ရှားမှုများပင်ဖြစ်သည်။ ဤသို့ဖြင့် မိုးလေ၀သနှင့် လူသားသည် အမြဲလိုပင်ဆက်စပ်ပတ်သက်နေပေမည်။ ယခင်ကလည်း ဆက်စပ်ပတ်သက်ခဲ့သလို နောင်လည်း ဆက်စပ်ပတ်သက် နေဦးမည်သာဖြစ်သည်။
ခွန်ရက်ခွို,
Like On Facebook
Follow On Twitter
Subscribe On RSS